سلام
نعطيك طريقتي (تعلمتها على جدتي ربي يحفظها و يشفيها ) جربيها ممكن تعجبك. قليل اللي يعرف كسرة بوطلعة , عموما الناس كامل دير يا اما رخسيس مبسس او كسرة خميرة , كسرة بوطلعة تجي ما بين الرخسيس و الخميرة يعني مبسسة شوية و خفيفة و تطلع كيما الخميرة , و اللي يذوقها مرة يولي يوالفها.
انا نكيل بالباطة نتاع لابل, كل باطة ديرلي قرصة متوسطة . ندير 3 كيلات دقيق, ملح, 3 مغارف صغار سكر, 3 مغارف صغار خميرة, سينوج , 6 مغارف ماكلة زيت يعني لكل قرصة 2 مغارف زيت , ما نبسسهاش بزاف , و نبلها بماء دافئ و العجينة ما تجيش يابسة كيما نتاع الرخسيس بل العكس تجي مرخوفة شوية. ما نعجنهاش بزاف و نخليها تطلع بعقلها 20 د تقريبا.
كي تطلع نولي نعجنها بمارغرين او الاحسن ستار او زبدة حرة تجي بنينة تهبل. تقريبا مغرف ماكلة لكل قرصة , قيس ما ندخل الزبدة فيها, و نكورها نخليها ترتاح 5د ثم نقرصها ما نديرهاش رقيقة كيما الرخسيس تجي شوية خشينة عليه و نخليها تطلع و نطيبها.
بصحة و الهناء و اذا كان عندك سؤال انا في الخدمة .
المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى
المنتدى غير مسؤول عن أي إتفاق تجاري بين الأعضاء... فعلى الجميع تحمّل المسؤولية
( تقرير عن مشاركة سيئة )، و الموجودة أسفل كل مشاركة .
2016-01-25, 22:28
العرض الشجري