السلام عليكم ورحمة الله وبركاته
أنا سيدة متزوجة منذ 8 أشهر ، وزوجي يخدم فالصحرا ، وطاجي وحدي فوق دار شيخي ، الحق منيش نشكر روحي أنا إنسانة عاقلة وخاطيني المشاكل ونية بزااف ، ونفس الشيء التمسته في زوجي لما قبلت به زوجا ، إنسان طيب وحنون ومسؤول ، المهم زوجي لما يجي راني في داري ولما يغيب مرات في داري ومرات نهبط لتحت نقعد مع عجوزتي ونقصرو وعلاقتنا طيبة جدا وهوما ناس ما شاء الله ، كنت عايشة عيشة حسدت روحي عليها ، من غير غياب زوجي لي كان مأثر عليا لكن الحمد لله ..
قبل مدة شهر عجوزتي بدأت تلمحلي على موضوع الأولاد ، رغم علمها بلي رانا عرسان جدد وزوجي اغلب الوقت غايب عليا ، مرة تقولي روحي داوي اذا مريضة روحي شوفي ، مرات تقولي اذا نتي مش مريضة يروح بني يداوي ، قلتلها مناش مراض خليها على ربي برك قالتلي تقلقت ، قلتلها ما تقلقي ما والو ، أنا الحق حزت في نفسي لكن ما بينتش ، مرة كنت نحكي مع زوجي وقلتلو بضحكة وعفوية ماماك تقلقت على لولاد وحكاتلي باه نشوف طبيب اذا طولت مجبتش، هوا ضحك ، وقالي كي نجي نهدر معها ،قلتلو والله والله ما تحكي حاجة ، وفات الموضوع وانا في بالي نسا .
الشهر لي فات كما جا اليامات لولين عادي ، ومن بعد راح قالها ، انتم تبانلكم صرات حاجة صغيرة ولكن هي صرات كارثة وعياط ودواس ، قالها علاه تقوليلها هك وهيا تعيط وهوا يعيط وجرح امو بهدرات لا حول ولا قوة إلا بالله ..
المهم أنا من كنت في عيشة هانية راح دارلي مشكل كبيييير مع عايلتو وقطعني عليهم وأمو اتهمتني اني نحرش في ولدها عليها وأنا اقسم برب العزة مقصدت حاجة غير هدرة هدرتها بعفوية مع زوجي
أنا زوجي الآن راني محتقرتو جدا جدا وعفتو ، منيش قادرة نشوف في. وجهو ، معلاباليش كفاه رح تكون حياتي مع شخص يوصل الهدرة ويدير المشاكل ، تصدمت فيه صدمة حياتي ، والمشكل أني هذاك الشهر اكتشفت اني حامل 😭 ومفرحتش كي البنات ، نفسيا تعبت وتعبت منو ، وديما نبعتلو فيدوات على بر الأم والوالدين ونلح انو يطلب السماح من امو وهوا مخشن في راسو ، أمو مجروحة منو خلاص وانا راهي غايضتني ، دارت فيا غير الخير ودارتني بنتها وانا كنت دايرتها كما أما ، جا زوجي في لحظة هدم كلشي بيناتنا 😭😭😭