كيف استعيد نفسي

[مشكلتي]

مشكلتي باختصار هي انو وقع مشكل بيني وبين خطيبي وكان الخطا تاعو وقررت نعطيه فرصة ثانية ولكن ماحدث ان امه اتصلت بامي وحاولت الاستفسار على المشكل اللي صرا امي قالت لها انا لا اتدخل بينهم ومنقدرش نهدر عللى المشكل فجاة بدات تصرخ ف الهاتف على امي وتقلها اهدري بسيف ش كاين ثم ختمت المكالمة ب ربي يجيب لبنتك من جيهة خلاف.
وابنها اللي هو خطيبي لم يفعل شيء بل حظر رقمي وكل مواقع التواصل الاجتماعي حاولت الاتصال باش نقلو وش السبب لكن لا حياة لمن تنادي اختفى من الوجود ثم طالبو بارجاع الهدايا اللي جابوها .دخلت ف صدمة مافهمتش ةش ندير ثقتي بنفسي اهتزت اشعر بانو الذي سيتقدم لي سيفر مني بمجرد يعرف باني كنت مخطوبة اقسم بالله ضعت صح الجهاز شريتو كامل .
اخوتي بالله عليكم متقولوليش بر الوالدين ولازم يسمع لامو لانو كون نحكي الحكاية كاملةستكون في كتاب 500 صفحة
شخص بدون شخصية انهى كل شيء ف لحظة ولم يعط لي فرصة نسقسيه علاه دارو هكا ,مع العلم امه الله يسامحها ما خلات ما دارت في كل مرة تريد انهاء الخطوبة بدون سبب ومشاكل صرات كون نحكي لواحد راسو يحبس.

[محارب الحمق]

مافهمتش النسا كيف يخمو... الموضوع واضح وضوح الشمس وهو ان زواجك من هاذا الشخص مستحيل خاصة وان امه لاتريدك. على الاقل انتهى الموضوع قبل بدايته وقبل الزواج وقبل الدخول وقبل الإنجاب والا لكانت مشكلتك اعقد. صحيح أن الرجال يتحسسون ممن فسخن خطبتهن لانه في الغالب يتجاوزن الحدود الشرعية مع الخطيب ولكن ليس هاذا ما يجب أن يشغلك لانو هناك الكثير ممن لا يأبه للموضوع

[نجاة^^]

أختي هدني من روعك وكيما قال الأخ قبلي هكا خير ما ترجعي لسمح الله بعد بالزواج وممكن بأطفال ...الخ ،وشكون قالك اللي خطبوها وبطلو مش راح تتزوج ؟الدنيا. مكاتيب وأحمدي ربي اللي كشفلك حقيقتهم وخاصة الخطيب. إستجمعي قواك وأنساي لحكاية وإن شاء الله ربي يرزقك الأفضل اللي يعوضك حزنك.

[❣سڪڕ❣]

قالك لي باعني بالبصل نبيعه بقشوره
مادام راح وصاي : طريق السد تدي ولا ترد
نقطة انتهى ...

[toulay]

السلام عليكم
واش دير بواحد كيما قالت امه كلات حتى لو راها غالطة مرة اخرى تكرهلك حياتك مالا قول الحمد الله لكملت القصة قبل ماتبدا
صحيح امه ولازم عليه يطيعها ويحترمها ولكن في حوايج معقولة بصح مين تكون غالطة وهو يساعفها معناها جبان ومعندوش شخصية
تلافه يجيب خلافه
كيما جاء هذا يجي غيره ولخير منه ان شاء الله
ونحي عليك الافكار تاع وحدة مين تكون فاسخة الخطبة ميزيدوش يتقدموا ليها نورمال خلاص واش فيها
ربي يعوضك ان شاء الله
بصح يجي النهار ويندم عليك ولكن وقتها يكون راح الحال وتفرت
بالتوفيق

[مِصداقيَّة!]

انفصالك خيره لك بأذن الله
انصحك تصفحي كتاب التعافي
حسام مصطفي ابراهيم
حتي تخرجي من الصدمه

[ع.عيسى]

وشكون لي قالك انه اذا سمعوا بوحدة مخطوبة يهربوا منها ؟؟؟ ...المطلقات وعاودوا الزواج عادي فمابالك من كانت في فترة الخطبة فقط ....يخطبوك 100 ويتزوج بيك واحد ...خيره في غيره ..ما عليك سوى قول الحمد لله ...هنا توضحت الامور وفرات ..ربي يعوضك

[عبد الله بسكري]

رب يفرج عليك.والدنيا لن تتوقف هنا*
التوكل على الله .وعسى إن تكرهوا شيءا وهو خير لكن*

[مال العز]

عليك بالقرآن فهو شافي النفوس وبذكر الله يطمئن قلبك .الله المستعان

[سجل أنا جزائري]

بصح يا ختي بالعكس نورمالمو تفرحي تحمدي ربي صباح و عشية انو بعد عليك هذا الانسان و انفصل عليك و عرفتي شخصيته الأن افضل بكثير تعرفي شخصيتها بعد الزواج
الرجل الذي ليست له كلمة و ليست له شخصية راه يكرهلك حياتك

و ثاني شيء كونك كنتي مخطوبة و انفصلت لا تأثر ابدا في أي رجل يريد خطبتك بل العلاقات الغير الشرعية هي التي يخاف منها الرجال خاصة في وقتنا الحالي

أنساي موضوع هذي الخطبة كأنها صفحة و طويت

[جالب الخيرات]

اليوم و لا غدوة...........................خير ما يصرالك حاجة أخرى بعد ما تتزوجي..................المهم وكلي ربك بذلك...............فعسى ان تحبوا شيئا و هو شر لكم..............................................و حاجة وحدة اخرى ما تردولوا والو ................................راها جات من عندهم مش من عندكم.................وعلاه يحسبوا بنات الناس لعبة...................................لاحول و لا قوة الا بالله............................................. .....................................

[kazilo]

وعلاش امك لم تقل انها لا تعلم بالمشكل من اصلو وتقلها انت ولدك ما خبركش وانا بنتي ما خبرتنيش ومشكل بيناتهم وهنا الغلطة واكيد امو كذبة عليه وقاتلو هوما قالو فض كلش والخ ولهذا حاولي التواصل معه في مقر عمله وتفهميه واذا مشفتيش فيه خير احمدي ربي لانك ارتحتي منو وزيد تع المخطوبة لي بطلو عليها هادي قديمة والناس تعرف بنت لحلال وتعرف تربية الناس وتعرف لخطيب لي تمسخر ببنت لناس وهو الغالط

[عبد الحميد جزائري]

الخير فيما اختاره الله ...ايام فقط وتنسي كل شيء وبالنسبة للزواج ان كنت مظلومة بالعكس سياتيك أكثر من خاطب لأن الله سيعوضك ...شكرا

[ابو سليمان10]

يبدوا انك كنت تظنين ان الامور تحت سيطرتك و يمكنكي ان تعطي الفرص و تتسامحين ولاكن رصيدك كان قد نفذ و الطرف الاخر هو من كان يعطيك اخر فرصة

[ايمان4]

غير انت راكي تعقدي فيها نساء طلقوا و بالاولاد و عاودوا الزواج و عادي ... كاين لي طلقت قبل البناء و تزوجت عازب و عادي كبريها تكبر صغيرها تصغار ... ها صحا مكتوب و وفى .... it all depends on you and u alone