مرا مزوجة

[مشكلتي]

بسلامة عليكم انا مرا مزوجة عمري 30 سنة عندي مشكلة مع راجلي وقبل مانقولكم مشكلتي لازم نحكيلكم شوية على حياتي باش تفهموني انا من اسرة فقيرة جدا ابي معوق حركيا وعمره لا خدم عند دولة قبل مايدير حادثة كان يخدم عند شعب ومنهار لولى مقعد يتقاضى منحة المعاق برك وامي ماكثة في البيت ويما مريضة بالسكري والضغط الدم وتتقاضى منحة المريض ومنحة هادي يكوها برك في مرضها تحاليل وطبيب تخلصه والكرا نتاع طونبيل كي تروح لطبيب يعني منحتها تروح برك في علاجها ونفس الامر بالنسبة لابي ولاختي ورانا نخافه بزاف على امي خويا الكبير دركا معره 37 سنة مسكين حتى زواج مداروش في باله ولا هدرنا عليه خويا هدا كل مسؤولية دار عليه ومسكين مقراش مرا يخدم ومرة يقعد هو مساعد البناء والخدمة مكيناش توجور دركا تعلم حتى كيفاش يدير البانتور بصح ناس راهم يديو لعندهم خبرة يدرلهم بانتور صافي مين داك يعيطلو واختي الصغيرة معوقة دهنيا بنسبة 80 بالمئة وزدات برك هم علينا لان خدمتها صعبة بزاف ولازم نعسوها لانها لو كان منعسوهاش غادي تخرجلنا ويما مسكينة حاصلة فيها هدو هو دارنا عشنا في مزرية كحلة وانا الوحيدة لربحت الباك في دارنا نهار لربحت اهلي كانوا طايرين بالفرح لان كل املهم فيا انا نحيلهم من المزرية وخويا فرح بزاف نعاونه في مسؤولية البيت دخلت الفاك قريت حقوق وكنت ناكل قراية اكل باش نتخرج بسرعة ونخدم وكي تخرجت اهلي فرحو بزاف وقالو خلاص مزرية غادي ننسوها وهنا روحت نحط لدوصي علبالي سهل الخدمة بصح خسرت وزيدت كونكور تاني خسرت ومبعد روحت نسقسي على pré-emploi قلت نديره لحتى نربح كونكور ونخليه بصح قالولي لازم تجيب موافقة قبل روحت نجري على الموافقة وحتى واحد ماوافق ظليت نجري لحتى لبلديات اخرين المهم نجيب موافقة وبعد مدة من البحث لقيت موافقة وروحت نجري لا نام بصح كي روحت قالولي دركا حبسنا لكونترا لانه لحتى نديره احضائيات عليهم وكي يرفع تجميد نمدولك وانا سمعت ببنات مرويا راحوا ومدلهم فخاب ظني فيهم ومبعد جيت حزينة لدارنا نبكي ووليت نبحث على فيلي صوصيال ونجري عليه ماصحليش قالولي لازم اهلك يكونو متوفين مع العلم انني نعرف بنات اهلهم عايشين ولا باس بيهم ويديو فلي صوصيال وانا اكتر واحدة نستحق محبوش دنيا عكست عليا ووليت برك نجوز لكونكور مرة نجوز مرة لالا كرهت وبعد سنيتن من تخرجي ربحت كونكور فشوني في la liste بصح كي روحت نجري ليهم قالولي مراكيش رابحة وانا صاحبتي شفتني في لا ليست وزيد صورت هديك لا ليست وكي قتلهم هادي تصويرة نتاع لاليست قالولي كاين خطا فيها حنا راجعنا الغلط يعني نحوني من ربح وحطاو واحد اخر حسبي الله ونعم الوكيل وستنين عامين اخرين يعني اربع سنين من تخرجي كي وليت 27 سنة باش ربحت اخر مسابقة وجامي ظنيت نربح هدا الكونكور لانه وقتها روحت برك ماقريتله ماوالو كنت متاكدة نخسر وخصوصا ان هاد الكونكور يمشي بمعارف بزاف لانه حاجة شابة كان متصرف في مديرية ضرائب وثما يخلصوا مليح بصح حمد الله ربي كبير ربحت وهاد المرة بادن الله منحونيش واهلي فرحه لواحد درجة كيما ربحت الباك كيف كيف خويا شرا قازوز من فرحته وزعه على الجيران فرحنا بزاف اخيرا قلنا نتهناو من قش نتاع الناس لانه كل ملابسنا ملي كنا صغار نتاع ناس ناس ليمدولنا حنا منشريوش انا كي كنت نقرا خويا كان يشريلي برك في اول سنة دراسة اما الاعياد جامي شريت كيما الاولاد كامل خويا معدور ماعندوش وكل ملابسنا من ناس وحتى اواني المطبخ نتاع ناس وحتى الاثاث نتاع ناس ناس ربي يحفظهم ليصدقوا علينا وانا وخويا كنا ديما قلبنا يتعصر كي يصدقوا علينا ناس مكناش نحبه لان هدا شعور مؤلم ليناوحتى كبش العيد جامي شرينا كبش بحياتنا ناس ليصدقوا علينا يعني واش نحكيلكم عشنا مزرية كحلة بصح كنا عائلة متماسكة ومتعاونة ومتفهمة كنا نعاونه بعضانا في كلشي حتى بامور الشغل دار اخي كي يكون فدار وانا وامي نخدموا خدمة دار جامي يقعد يمد يده حتى لو كان يدير سلطة ولا يغسل ماعن ولا يمسح طابلة يقول مانقدرش نشوفكم تخدموا معناونكمش خويا حنين بزاف علينا وكي ربحت كونكور قلت خلاص كل عيد نشريو كبش وملابس نتاع ناس خلاص نحبسوها وبعد 3 اشهر من الخدمة خالصوني اول شهرية في حياتي شحال فرحت ديت يما للمدينة شريتلها ملابس وحوسنا ودخلن المطعم وشريت ملابس لابي ولاختي ولاخي ولروحي وشرينا دجاج ولحم وشرينا فاكهة لانه لحم هدا مايدخلش لدارنا غير ادا مرض كاش واحد وجابول لنا ناس ولا في العيد ناس تملدنا شوية اما الفاكهة خويا ميشريهاش ومين داك يشريها كي يلقها رخيصة وحنا ناكله برك تين ورمان والعنب لانه عندنا اشجارهم لان اخي يشري برك الخضار والاساسيات حتى هدوك يكونو ناقصين ويخلص الكهرباء والماء مسكين ميقدرش كتر من هكدا بصح الجيران يعطهم صحة كلما يبقلهم اكل يمدولنا زعما اي حاجة يدروها كيما طعام ولا مقارون ولا خبز ولا يمدولنا كي يديرو بزاف ويبقى مهم وليت انا مستكلفة بشراء حوايج لميشريهاش خويا ولحم كل 10 ايام نشري وخويا هكدا نقصت عليه وولينا ناكله خير من جيرانا ومنعت الجيران يجبولنا اكل او الملابس شكرتهم على لفات وقلتلهم دركا منسحقوش حمد الله ولينا فرحانين ولينا كيما ناس كامل ووليت نشري دهب لورحي والجهاز وكي ولى عمري 29 سنة خطبني واحد خويا شرط الاساسي لمدله هو انه نخدم وشرط عليه ثاني مايزعفنيش ويعيشني بالهناء ويدافع عليا وهو قبل وسقسينا عليه لقيناه ولد فاميليا وخطيه مشاكل وقلنا برك مسالة الفقر وحان جربنا الفقر ومسالة سكن مع الاهل مع الوقت غادي نسكنه لوحدنا هكدا حسبنها في دارنا فقبلته رغم اني كنت مترددة لان حلمي انه نبني دار لاهلي لانهم يسكنون بيت قصديري من طوب بصح امي قاتلي روحي تزوجي وديري دارك وكان اول شخص يخطبني رغم انني جميلة في شارع عندي معجبين بصح حتى واحد مايجي يخطب فوافقت وكي روحت لداره نسكن مع اهله وهو كثيرون العدد وفقراء ماشي كيما احنا بصح هما ثاني فقراء ماكلة مخصوصة كلشي مخصوص ضيق فدارهم وزيد راجلي بعد 6 اشهر من العلم قالي نحبسك من الخدمة رغم انه كان شرطي اساسي اني نخدم قالي لالا نحبسك ماشي تروحي وتجي علجال تصرفي على اهلك وانا شهريتي نص نمدوه لاهلي ونص ليا يعني هو حاسد حتى اهلي رغم انه نصف لي ليا نشري بيه لدار وكامل نتاع دار ياكله بصح لالا معجبوش الحال قالي تخرجي ولا نطلقك وانا حكيلته كامل حياتنا قلتله هدا الخدمة راهي لاهلي قبل ماتكون ليا بصح هو مفهمنيش روحت حكيت لخويا زعف بزاف خويا راح ليه وتدبسوا دارو مشكل كبير وخويا قالي غادي نطلقك منه هدا ماشي راجل ويما قاتلي ماتخربيش دارك وانا قعدت عند اهلي حتى اخدت قراري ورجعت ليه بعد سماع كلام امي قلت غادي نمدله فرصة وكي رجعت رجعت وحدي هو جامي جا يديني قلتله انا غادي نخدم قالي ماتخدميش يعني ماتخدميش هدا شرطي وانا رجعت دوزيام فوا لاهلي خويا زعف عليا قالي علاه روحتي طلقي منه واش تستناي ويما قاتلي ماتخربيش دارك بصح ماتخليش خدمتك وقالتلي يما جربيه جيبي عطلة وقوليلي بلي خرجتي من الخدمة شوفي معاملته ليك ادا ولا مليح ويصرف عليك ماتخمميش علينا احنا والفنا مزرية وادا مزالو كيما هاك ومايقدرش يصرف عليك خليه سمعت كلام امي مرة اخرى رجعت ليه وجبت عطلة غير مدفوعة الاجر لمدة 4 اشهر هو زاد نبتله قرون ولا غير يامر وينهى مايصرف عليا مالوا هو يتقاضي زوج ملايان ويصرفهم كامل عى دارهم لانه هو مسؤول على دارهم ابوه متوفي وعنده خوه وهو ثاني خدام بصح هداك دورو نتاعه مانشوفوهاش وكامل يكالوا من هدا زوج نتاعي وادا كان شي عرس فهو ليديره و يعني كل مصروفه لدار برك اما انا جامي يشريلي غير كيما جاز العرس قلتله شريلي روبة قالي واش نشريلك انا مرانيش لاحق نشريلك روحي بروبة نتاع دار واي حاجة نقولها شريلي يقولي مكنش دارهم وكي نقوله املا علاش خرجتني من خدمة يضربني ويقولي عيشي كيما يما علاش يما متشكيش بابا مكنش يشري ليما بصح هي صابرة وانتوما هدا الجيل ماتصبروش قتله لان يماك ماعندهاش حل اخر لازم تصبر يزيد يضربني وكي يلقى امه ولا اخته تخدم شغل دار يركلي برجليه قدامهم ولا يضربني كف ويقولي انتي لتخدمي هادي دارك انتي مايحبش كامل يشوف اخواته ولا امه تخدم لازم انا برك ويقولي دارك وين راهي داري هدا دارهم هما انا صحتلي غرفة فيه وحتى خواتاه ولاو يشنفوا كل دقيقة يقولولي ها دارك حبيتي تخدميه اخدميه ماتحبيش قعدي احنا مانسيقوا ماوالوا غير واحدة فيهم لمليحة تجي وتعاوني وامه ثاني مليحة بصح اخواته الاخرين يالطيف ويزيدو يوسخولي دار خصوصا المتزوجات يجيو ولادهم ويسمخوا دار ويروحو وانا نسيق وننظف وهو عنده 7 اخوات 3 متزوجين واربعة مزال وكلهم ماكثات في البيت وانا غير نسكت ونجبد روحي نسمعهم يهدرو عليا نسكت ندير روحي مسمعتش يعني مانقعد معهم مالوا يهدرو معايا نرد وادا مهدروش نكست خطيني المشاكل يعني دركا مشكلتي حكيتها لكم واش ندير دركا مزال 20 يوم تنتهي العطلة ونتيجة كيما حكتلكم من نهار لقلته خليت خدمة وهو يضربني ويسبني ويحتقرني قدام اهله لانه دركا شافني ضعيفة بلا خدمة وهو هكدا يحب باش يحقرني ومكنش امل منه وكل اخواته ادا متزوجوش غادي يعيشو معاه وهما هكدا يقوله يعني لو بقيوا عازبات مدى الحياة سوف يعيشن معي للابد لان اخوهم الثاني يخافوه بزاف وهو اصلا مايحبهمش ولا يقعد معاهم صافي راجلي هو ليعيشهم طول حياتهم واخواته لماشي متزوجين كبار 3 منهم فوق الاربعين وكي حكيت لامي bien sur مقلتهاش يضربني ولا يسبني وحتى لاخي مقتلوش لانهم لوكان يعرفوا بلي يضربني وسبني خلات عليه خصوصا ان راجلي يبسني باهلي ويسبني بفقري رغم انهم قراء ايضا نقولهم خلات عليهم بصح قلتهم برك كيفاش يعاملني وكيفاش يعاملوني اهله قاتلي امي غير طلقي ومتعاندينيش انا صح عشت بفقر وتعدبت بزاف بالمزرية والفقر جابلي غير الهم وضيق والمرض وانتي الفقر زيدي المشاكل من فوق قالتلي غادي يحكمك كاش مرض قتلي وضعي احسن من وضعك قالتلي جامي نخليك عنده تطلقي منه عندي غير انتي مستحيل نخليك تتعدبي وقالتلي انتي يابنتي عندك شهادة بيديك وعندك خدمتك تقدري تغيري مصيرك ماشي كيما انا منقدرش وزيد انا وقتها اهلي مكنوش متفاهمين وطلاق هدا مكنش لتطلق اونتي حمدي ربك الدنيا تبدلت واخي قالي رئيه معلوم قالي طلقي منه قالي انتي عندك سلاح في يديك ماعندك ماتخافي واخي دايما كان يشجعني على قراية ويقلي قريتك هي سلاحك وبلاكي تبطليها من اجل اي مخلوق وقالي بلي راجل ليقولك حبسي خدمتك حتى لو لاباس بيه اعرفي بلي غير من اجل مصلحته باش يتحكم فيك وباش يغلبك طول حياتك ماشي لانه يحبك ولا يخاف عليك هدا واخي كي حكلته واش يديرلي علالكم راح ليه ودارو خناقة كبيرة حتى حلوهم الجيران وغصبو يطلقني وراجلي طلقني في الخناقة قدام ناس كامل بصح بعد 15 يوم جا وقالي نرجعك مزية خويا مكنش قلتله ياك طلقتني قالي لالا طلاق هداك لا يصح لانه غضب واخوك لجبرني قالي نديك قتله والخدمة كيفاش ثالي ماتخدميش هادي فريناها وزيد ماتجيش لداركم راني نكره خوك وادا رجعتي لداري تنساي داركم قتله روح الله لاتربحك انا لغادي نرفع طلاق عليك وخواتاه ولاو يخرجو عليا اشاعات ماشي واحدة ماشي زوج واخته المليحة هاديك جات عندي وقاتلي بلي راهي حابة نرجع بركسو تحبني بصح قاتلي ننصحك ماترجعيش خويا ماشي مليخ وخواتاتي ماشي ملاح وماعندك حتى مستقبل معاهم قاتلي هي لو كان تلقى شي مخرج غادي تروح منهم بلا رجعة وهي صح تكرههم وقالتلي نبقاو اصدقاء وانا من داك نعيطلها ولا تعطيلي هما فاقولها وردت عليا ختها الكبيرة بهدلتني وقالتلي لو كان تزيدي تعيطي تشوفي وانا سعت كيفاش يعيطوا عليها وسيبوها والله اعلم واش دارو فيها المهم انا دركا كامل اهلي يقولي لي طلقي منه حتى بابا بابا مسكين مانحكيلوش مشاكلي لانه محبيتش نحسه بعجزه لانه اكيد غادي يحب يدافع عليا وهو عاجز مايقدرش صافي ملعباله بزاله قتله برك غير كيما انه يحب يخجرلي من خدمة قالي املا غادي نطلقك منه الله لا يولي ليخرجك من خدمتك ولا ليزعفك وخويا قالي لو كان ترجعي لهم فادي نقول عليك جايحة وتستهلي واماما حلفت ماترجعنيش قولولي واش ندير مجتمعنا لا يرحم المطلقة قلتلهم هكدا فادر قالولي انتي خدامة وعندك سلاح ماتخزري حتى فواحد عيشي لروحك وماتوفيش لناس وخويا قالي حتى لو خلاك تخدمي انا غادي نطلقك منه لانه ماشي عيشة وانا شرطت عليه من الاول مايعزعفكش وهو كل شروطي مدرهاش خويا يركه بزاف قالي ماشي راجل ديما يقولي خلي ناس وتفاهاتهم وعيشي لنفسك وماتشوفي لحتى واحد واعرفي بلي ليهدر عليك بسوء غادي ربي ينتقم منه كامل مع طلاقي وانا خايفة برك من ناس هدا ماكان علبالي بلي لو كان نطلق غادي ننقد روحي من النار لاكلتني على الاقل قبل خدمتي كنا فقراء جدا بصح مكنش مشاكل كنا هنايين بصح دركا نار شعلت كل هدا على قرار خاطئ اتخدناه كلنا علبالي بلي كنت غاطلة كي قبلته من الاول ورميت روحي برك بصح قاتلي يما صححي غلطك كل ناس يغلطوا وانا لنصحتك وقتها صافي واش ندير وقالتلي يما بلاك غادي يجلك مكتوب احسن وماتشوفيش للمطلقات تانيين ومتقارنيش روحك باي واحدة واش ندير من جهة حابة نرجع ونحقق احلام اهلي وحتى لو ماتزوجتش غادي نعيش مرتاحة طول العمر ولا واش ندير.. وطلاق ابغض الحلا زعما لوكان طلاق ربي يعاقبني ولال مستعجلة بطلاقي يعني بلاك لازم عليا نزيد نصبر لانه فقط عام من زواجي بلاك لو كان نصبر سنين اخرى بلاك يتبدل واش رايكم .وهل صحيح طلاقه غير صحيح شرعا وادا رفعت طلاق للمحكمة ويطلقوني فهدا سيكون طلاق مدني فقط وطلاق شعري لازم هو يقولي انتي طالق كيفاش يقولي وانا راني مع اهلي دركا ولو كان يديرلي زكارة ومايطلقنيش واش ندير وقتها.

[المُعادلة الصّعبة]

السلام عليكم
اختي انا نقولك كون جيت منك نطلب الطلاق في هذي الدقيقه
ماهوش محتم عليك وماكيش مجبرة تتحملي هذا كامل
علاش عليك متحملة عذاب قادرة تتخلصي منو
انتي بخدمتك والحمدلله وانا مع راي اهلك كي قالولك سلاحك خدمتك ودراهمك
ماتقبليش بمعيشة الذل والمهانة و هاذي اختو قالتها بفمها قاتلك خويا مش مليح و خواتاتي كيف كيف وماكان حتى معيشه معاهم
هاذي اختهم من لحمهم ودمهم راهم يديرولها هكاك فما بالك انت واحدة غريبة عليهم رح يرحموك زعمة؟
اختي ماهمش محتمين عليك ولا انتي خلقتي من اجل انك تخدمي عليهم فاهمة؟
راكي شايفه ظروف اهلك صعيبه

والاقربون أولى بالمعروف
هو عطاك الخيار قالك بطلي الخدمة ولا نطلقك
نتي اكيد مش رح تحبسي الخدمه على جال عيشة الذل . ماهوش الراجل لي يستاهل تسمعيلو كلمتو
وراكي شفتي كي درتي عطله كيفاش عاملك
تخيلي كون حبستي الخدمه على جال العيشه هاذي صدقيني هذي قمة الغباء والسذاجه
اذن لازم تديري الخيار الثاني اما الطلاق او الطلاق
اصلا مجرد تفكري في ظروف اهلك الصعبه جدا هذا كفيل بأنو يخليك ماتفكريش ابدا في الرجوع لدارهم
تفكري اختي قداش كانت الظروف تاعكم صعيبه و اللي مريتوا بيه يعلم بيه غير ربي
وانتي مش محتم عليك تزيدي على روحك وعلى اهلك مشاكل وهموم اخرى
انتي في غنى عن هذا وماكيش ناقصة مشاكل
ضرك راكي بخدمتك والحمدلله لي فتح عليك اياك ثم اياك ثم اياك تتخلاي على خدمتك حلي عينك
فكري مليح اختي كون ماجيتوش مريتوا بهذيك الظروف ممكن تكون الحكاية اهون
بصح بما انك حكيتي هذيك الميزيرية كامل
اكيد اهلك هوما الاولى بيك عزيزتي
واما عن خوفك وقلقك من هدرة الناس بعد طلاقك ؟
اختي الطلاق ماكيش طالباتو على جال حاجه صغيره تافهة عابرة لا

الموضوع اكبر من انو يكون هكا
والطلاق حاجه شرعها ربي كون جا حاجه مش مليحة كون راهو حرام
انتي علابالك بالسبب لي خلاك تفكري فالطلاق و ادرى بواش قاعد يصرالك وواحد ماراهو عايش في بلاصتك
انتي لي عايشه المعيشه هاذي وانتي لي تتحكمي فيها
وحطي في بالك حاجه اختي باللي الناس راهم يهدروا ويهدروا ويبقاوا يهدروا
مهما درتي في حياتك لازم يشوفوا النقاط السلبية ويبقاوا يهدروا
انتي مكيش عايشة باش ترضي الناس

وهوما يهدروا اكيد لانهم ماعاشوش لي عشتيه وماجربوش لي جربتيه
انتي ادرى بالظروف لي مريتي بيها
وماكيش اول ولا اخر وحدة رح يهدروا عليها الناس لانو هذي هي خدمتهم منذ الازل

يهدروا على كلش لمالانهاية

هذي حياتك انتي
مش مسألة هدرة الناس ولا ما هدرتهمش
هذا مصير حياتك فكري لبعيد

الناس يهدروا عليك مدة وخلاص ينساوا يحبسوا الهدرة ويتلهاوا بموضوع جديد كي العادة
واصلا ما تدريش على رحمة ربي الواسعه كيما رزقك بوظيفه قادر يرزقك بزوج صالح تكوني سعيده معاه ويكون سعيد معاك ويعرف قيمتك ويكون راجل تاع الصح

اختاري انتي اما تكملي تعيشي في هذيك المعيشه على جال هدرة الناس ورضاهم

او انك تحبسي هذا الهراء و خلي يهدروا لين يشبعوا اهم شي تتهناي انتي

ولك حرية الاختيار ضرك راهو في يدك

شوفي وش من معيشه تستاهليها وتناسبك واختاري
مع انو الحل باين خلاص

ربي يفرج ان شاء الله

[Rafik.B]

على الرغم من ان الطلاق أبغض الحلال الا أني أنصحك بالطلاق والطلاق ثم الطلاق زواجك راه معندو حتى معنى غير تضلمي في روحك وانتي أيضا تسرعتي جدا في الزواج من الاول مش انك عشتي فقيرة تتزوجي واحد فقير وزيد عايش مع أهلو وما يعاملكش مليح الطلاق أختي حتى لو كان في الموضوع أولاد .

[عثمان الجزائري.]

لا إله إلا الله، الشرع يا أختي يقول " المؤمنون عند شروطهم " و ما دام زوجك قبل بالشروط فلا يمكنه الرجوع عنها، لن أتكلم عن طبيعة العمل و مشروعيته، بل سأتكلم عن الشيئ الذي تزوجتيه، المشكل فيه مركب بين الجهل و الفقر و بلاك المرض يعني الثالوث الأسود، كيما قالوا ناس بكري زواج مريش ما يقتل ما يعيش، لو كان رجل لما طمع في مالك، و لو كان رجل لو كان كرا دار كي الرجالة، الفقر ليس عيب لكن أن تكون فقير و أحمق فهنا اصبح الأمر لا يطاق، إحذري من إنجاب الأولاد فالأمور لا تعجب موش الفقر و الميزيرية و تزيدي تجيبي طفل تمرمديه في الدنيا، رأيي من رأي أخوك و ليس بسبب العمل فقط بل لانه لم يكن على قدر المسؤولية و لم يعرف معنى إحترام المرأة...

[صفاء الروح]

لااله الا الله محمد رسول الله
وانا نقرا كلماتك هبطو دموعي حسيت بمعاناتك
انتي بارة بوالديك يجازيك ربي فحياتك عاجلا ام آجلا متخمميش
وراجل كما هذا معندك مديري بيه اسمعي كلام امك وخوك
ديري ربي فبالك كان جا يسناهل زوجك كنت نقولك اصبري معاه
ملا معندك مديري بيه مزالت الدنيا طويلة وعريضة قدامك
ومتدري واش مخبيلك المكتوب
ربي يحفظلك والديك ويفرج عليك فالقريب العاجل يارب

[نبض قلبي]

السلام عليكم و رحمه الله تعالى و بركاته
بداية اختي ربي يك ن معاك و يعينك ان شاء الله
شوفي اختي انت شرطتي نهار اللول و اسمحيلي على الكلمة ماكانش معاك راجل لانو انا اللي نعرفو الراجل عند كلمتو
ثاتيا اياكي ثم اياكي ثم اياكي تخلي خدمتك ، لانو راجل كيما هذا حاقرك ضرك وش تستناي منو و سكون في علمك و الله لايتبدل و كل مايزيد فيالوقت يزيد هبالو صدقيني و الله
علاه تحرمي ماليك، طلقي من جدو لانو موش راجل و موش تاع مسؤلية و عيشي مع داركم كاش عام و لا عامين و عاوني خوك و زوجيه ، و شوفي قادر يجيبلك ربي نصيب و الله ماكنتي حتى تتخيله
مالا طلقيه مادام ماعندكش لولاد و ارجعي لداركم و عيشي عانية البال
يعجبك تعيشي عندو تبطلي خدمة من غدوة يطلقك و يطيشك معمرة امراض بعيد الشر عليك من القلقة اللي تعيشيها
و الواحد موش راح يعيش مليار سنة
و زيدي خممي مليح و ربي يكون معاك
و جامي تنساي بلي راحة بالك راهي اهم حاجة في الدنيا هذي مع الراجل اللي يستاهل موش مع. واحد فيه غير الفم
ربي يكون معاك

[المشتاق لجنة النعيم]

ربي يقدر الخير فرات ... ماعندي ما نقول ... و كاينة حاجة في هذ المنتدى ناس تنصح بالطلاق و ناس لا ... أيتها الأخت هاذي مشكلة عائلية أنت و عائلتك و عائلة زوجك ( أو طليقك ) لي تقدرو تتفاهموا فيها سواء بالطلاق أو غيره بناء على الأسباب التي لديكم أنتم أو لديهم هم ... لذلك نقول لأصحاب الردود لا ينبغي عليهم الحكم المسبق وفق عاطفتهم في هكذا مواضيع دون تفكير و تحكيم للعقل ربما تقديم إقتراح أو نصيحة نعم ... لكن أن تخبروها بالطلاق أو لا هاذي ليست من صلاحياتكم ... و أقول لصاحبة الموضوع أنت فضفضت عن نفسك و خرجتي واش في قلبك بصح ما تديش الإجابة من الردود لأنو واحد ما يعرفك و واحد ماهو يسال على مستقبلك ...( مانيش حاب نهبطلك المورال بصح كوني واقعية لأنو الواقع شيء آخر ...) .

[Harrou]

والله قصتك أثرت في بزاف وانت وامثالك الفحلات تستاهلوا كل الخير وتستاهلوا رجال أحسن من زوجك الحالي،
طلقيه وتمسكي بعملك تنالي الراحة النفسية بتجنبك المشاكل التي انت فيها معه الان و تنالي رضا الوالدين ورضا أخوك وكل عائلتك، وعيشي حياتك ولا تبالي بآراء الناس فإرضاء كل الناس غاية لا تدرك، ففي الأخير أياً كان خيارك فشغل الناس هو الانتقاد والبلبلة ولا أرى أن هناك بشر لم يتكلم عنه بالسوء. والملخص انك تنالي حياة أرى انها افضل من حياتك معه، فالخاسر الوحيد راح يكون هو (وان شاء الله اذا لم تختاري الطلاق نكون غالط وتتحسن الأمور).

المهم انك تتخذي قرارك بيدك وتتخذي القرار الي يخليك تكملي حياتك بأكثر سعادة واطمئنان، وحذار من المبالاة أو التأثر بآراء المجتمع. بالتوفيق ان شاء الله.

[نجوم الأمنيات*]

السلام عليكم
انت امرة مناضلة ربي يفتح عليك ويفرحك بالرغم من الصعووبات واجهتيها وما استسلمتيش ربي يتبتك
لا اله الا الله هدا ليس زواج هدا مجزرة
لا احترام ولا تقدير حسبي الله ونعم الوكيل هدا النوع من الرجال فقير وفهمنا ونتي بخدمتك بالعكس راكي تعااااوني فيه على هم الدنيا
اختي خدمتك تم خدمتك مجرد التفكير انك تخليها حرااام هي سلاحك ومصدر قوتك
اما الطلاق تطلقي عادي وبطريقة شرعية اما هدرة الناس قافلة تسير وكلاب تنبح انت غالية ويجي اليوم يديك واحد ويعاملك كالجوهرة بين يديه
ونتي ماتدريش الخير وين يكون
ربي سبحانو راهو يشوف فيك من الفوق نتي انسانة طيبة وتحملتي لي ميتحملش
ربي يفرحك ويرزقك من حيت لا تحتسبين دعواتي لكي

[قدور بن عاشور]

تريدين أن تضحي بحياتك في الهم و الميزيرية و الضرب و الإحتقار و الإهانة من أجل تفادي صفة المطلقة!!!!!
أين ذهب عقلك؟
أهربي من هذا البنادم هروبك من الضباع الجائعة و لا تلتفتي وراءك.

[نجاة^^]

السلام عليكم
اولا تحية لك لانك بارة بوالديك ولعايلتك .
اما زوجك والله مايستاهلك معيشك في الذل و الاهانة و زيد حاب يحبسك من عملك اللي هو مصدر رزق والديك ،عندو حق خوك اطلقي وماشي معناها تطلقتي خلاصت الدنيا ،قادر تزيدي تتزوجي وتلقاي راجل بمعنى الكلمة ،واطلقي احسن ما تزيدي تجيبي لولاد وتتخلط عليك الدنيا ،واتهلاي في والديك وخاوتك .
ربي يفرج عليك ويسهلك اخية

[ريان برهوم]

انا مننصحكش بطلاق ونزيدك هو ضلمك كي قالك تخدمي ومنبعد قلك متخدميش مي حاجة انك تصرفي على داركم ممكن نتي تاني كثرتي بززاف وممكن طوول تجبدي على دراكم كره والله اعلى واعلم ومشكل يبقى بينك وبينو وعايلتك لا انصحك بطلاااااق

[ع.عيسى]

الطلاق وضع من اجل هذه الحالات ..وهو استحالة العشرة بين الزوجين ..ربي يفرج عليك

[محارب الحمق]

أمر مفزع أن يعمد اناس يجهلون واقع صاحبة المشكلة ولم يسمعو من الطرف الاخر الى حثها على الطلاق وكأن الأمر لعبة. يعرف على النساء عموما والجزائريات خصوصا كثرة الشكوى وافتعال المشاكل كما لا نعلم حقيقة العلاقة الاجتماعية بين الزوجين فالأمر في الأول والأخير يرجع إلى صاحبة المشكلة. قال عليه السلام: ليس منَّا من خبب امرأة على زوجها أو عبدًا على سيده. رواه أبو داود وغيره
ومعنى خبب: أي أفسد. وقال عليه السلام: إن إبليس يضع عرشه على الماء، ثم يبعث سراياه فأدناهم منه منزلة أعظمهم فتنة، يجيء أحدهم فيقول: فعلت كذا وكذا، فيقول: ما صنعت شيئًا، ثم يجيء أحدهم فيقول: ما تركته حتى فرَّقت بينه وبين امرأته، فيدنيه منه، ويقول: نعم أنت، فيلتزمه.

[محارب الحمق]

أمر اخر في غاية الأهمية: قرأت مشكلتك الطويلة العريضة فلم أجد غير انسان حياته تدور حول الدرهم والدينار. حتى أنك عند حديثك عن زوجك ركزت على مشكلة العمل والشهرية ولم تخبرينا أبدا عن دينه هل هو مصل؟ هل يحافظ على صلاته؟ هل يصليها جماعة في المسجد؟ هل يصوم هل هو ملتزم بأمور دينه الأساسية؟ غير السب والشتم والضرب, هل له أخلاق حميدة أم أن كله شر وسوء خلق؟ أفهم صعوبة الفقر والحرمان ولكن الفقر ليس حجة للبشر أمام الله فالفقر لا يبرر البعد عن الدين واللهث وراء الدينار والدرهم. من مشكلتك لمست أن كل همك هو الدنيا وكيف تتخلصين من الفقر براتبك الشهري (سلاحك). أنبهك الى امر قد يغيب عن ذهنك: اياك ثم اياك الاعتقاد بأن راتبك هو خلاصك في هذه الدنيا وتأشيرة سعادتك وفلاحك. هذا شرك خفي, فقد جعلت راتبك مصدرا لسعادتك وخلاصك ونسيت أنه مجرد وسيلة ورزق من الله فالله هو المدبر والمغني لا راتبك الشهري. ولو شاء الله أن يعسر عيشك ويكدره لن تنفعك لا شهريتك ولا أموال قارون. ومن المفزع أيضا أن يقول أخوك العبارة التالية:
"قالي بلي راجل ليقولك حبسي خدمتك حتى لو لاباس بيه اعرفي بلي غير من اجل مصلحته باش يتحكم فيك وباش يغلبك طول حياتك ماشي لانه يحبك ولا يخاف عليك". هل هذا يعني أني عندما أغار على زوجتي وامنع عنها العمل في الاختلاط, هل هذا يعني أني لا أحبها ولا أخاف عليها؟ هل هذا يعني ان نرمي الاية "وَقَرْنَ فِي بُيُوتِكُنَّ وَلَا تَبَرَّجْنَ تَبَرُّجَ الْجَاهِلِيَّةِ الْأُولَىٰ" في سلة المهملات؟ هل هذا يعني ان أخاك حب مرتو تغلبو وحاب مرتو تتحكم فيه؟ لا غيرة ولا نخوة ولا قوامة ولا رجولة؟ مرتي تخدم مع الرجال وتهدر معاهم وانا فرحان و****ن؟ أتوقف هنا حتى لا يصير كلامي قصفا عنيفا