خويا انا مريت بنفس تجربتك مع الاعداد المركبة الايام الماضية
كانوا يقلقوني ونحسهم لازملهم تدريب كبير وبالفعل كي تدربت عليهم قبضتهم
لازمك تتمرن عليهم قضية وقت وتعود فقط
اصلا هذي هي الرياضيات عالمره الاولى الدرس يبانلك مبهم ولازم تشفا على حوايج بزاف
مع التمرينات تخفاف يدك تولي طيارة فيهم
وكملاحظة راهم يعتمدوا بزاف على الحالات الخاصه في البكالوريا
نعطيك مثال لازم تحط في راسك بلي التخيلي الصرف العمدة تاعو p/2+kp
و لازم تحط في بالك بلي كل عدد مركب القيمة المطلقه تاع الx تاعو = القيمة المطلقة تاع y تاعو مثلا 1-i ولا 2+2i هذا العمدة تاعو دايما تجي p/4 و حسب الربع - الربع لازم تنتبه لاشاره كل من x و y -
والعدد الحقيقي عمدته هي kp
المهم الحوايج هذي هي لي تتكرر في اغلب الاحيان يعني مايجيبوش الحالات العامة يجيبوا الحالات الخاصه هذي
ان شاء الله تكون فكرتي وصلت
ما عليك الا التمرن الجيد عليها وانصحك بتمارين الكتاب المدرسي
واصبر معاها بزاف ما تتقلقش منها فقط
وعن تجربة كي تقلقت عليها ما فهمت والو بقيت غير نخلط بصح كي صبرت ليها و فكرت انو ماكانش حاجه نفهمها ديراكت عالضربه الاولى فهمتها بشكل كبير والحمدلله
هو محور طويل نوعا ما ومتشعب وفيه افكار بزااف فعلا فعلا افكاره لا تحصى ولكن علينا التحلي بالصبر
وانصح الجميع بملخص الاستاذ محمد حاقة في الاعداد المركبة لانه جيد جدا
اتمنى نكون افدت ولو واحد فيكم
ربي يوفقكم