عرايش من مطبخي حلوة تقليدية

[عطر الملكة]

السلام عليكم و رحمة الله تعالى و بركاته



جبتلكم عرايش من مطبخي نخليكم مع الصور






















مقادير العجينة


- 3 كيلات فرينة
- 1 كيلة مارغارين ذائبة + ملعقة زيت ما تكثريش باش ما تخرجش بنتو فالعجينة هذي غير باش تتحكمي فالعجينة ما تجيكش مطاطية و تعييك فالتشكيل تبقى مسالة اختيارية هي التقليدية تجي بالسمن لكن المارغرين غير باه ما تجيكش تتفتت ياسر و تخسرلك في مرحلة الطلية

- ملقة صغيرة فانيلا

كاس ماء الزهر او ما ورد كيما حبيتي انا نلم بما زهر و ما نديرش الما
- قرصة ملح
- ملعقتين سكر ناعم مي انا ندير ملعقة وحدة اصلا العقدة تكون حلوة و الطلية حلوة ما يشقاش تكون العجينة حلوة تقدري ما تديريش كامل مسالة ذوق


مقادير الحشو :

- 3 كيلات لوز مرحي او كوكاو محمص و مرحي
- كيلة سكر عادي
ملعقة كبيرة من الفانيلا
- قرصة قرفة اختيارية تقدري تعوضيها بقشور ليمونة انا عن نفسي نحب قشور الليمون خير عالقرفة
- ملعقة مارغارين
- ما ورد او ما الزهر حسب واش استعملتي فالعجينة

مقادير الطلية :


- 3 بياض بيض
- 1 ملعقة من عصير ليمون
- 2 ملاعق زيت 5 ملاعق ما الزهر
- سكر ناعم
- ورد او حلوة فضية او ورد مصنوع بعجينة لوز لتزيين مسالة ذوق
- و ملمع + ملون

طريقة التحضير

في قصعة نحطو الفرينة + قرصة الملح + ملعقتين سكر ناعم + ملعقة الفانيلا و نعمل حفرة و نضيف المارغارين الذايبة و باردة و نبسس المكونات و نبلل بما الزهر حتى نحصل على عجينة طرية و ملساء نكيل كويرات بالمكيال قيس 30 غ هنا انا ما عنديش مكيال مي درت تدبيرة عندي قالب سيليكون على شكل بيضة قولبت فيه الكويرات باش يكونو قد قد حبة ما تفوت ختها و خليت الكويرات يريحو في كيس بلاستيك

و حضرت الحشوة

الكوكاو مرحي و محمص + الفانيلا + السكر عادي + قرفة او قشور ليمون + ملعقة مارغارين باش الحشو ما يجيكش يابس وسط الحبة و نلم بماء الزهر حتى نحصل على عجينة معسلة و حاكمة روحها

نجيب الكويرات نفتحهم بالحلال و نرش بالفرينة باش ما تلصقش العجينة و تخسر نحط كمية من الحشو على شكل yو نجبد العجينة نظم االاطراف لبعض على شكل مثلث و نعبز مليح باش ما يخرجش الحشو ما تخافيش من العجينة المهم كمية الحشو تكون مناسبة باش تقدري تتحكمي فالحبة هنا عينك ميزانك في كمية الحشو و تقلبي الحبة و تعبزي على الاطراف و تطلعي فالوسط و تلوي على سبع الشهادة و حطيها في سنيوة مرشوشة و زيدي اعدلي الحبة و ساعفيها لا يتكسرو الاطرااف و حطي الحبات بعاد على بعض باش ما يخسروش

كي تطيب من تحت افتحي عليها من فوق باش تطيب من فوق مي ما تخليهاش تحمار و لا تتحرق عسيها باش ما تخربلكش بنتها نحيها و حطيها تبرد انا درجة طيابها درت 160 درجة و عسيتها

كي تبر د تكون حضرتي الطلية

خلطي بياض البيض حتى يولي ثلج زيدي عصير الليمون + الزيت + ما الزهر و خلطي و بداي ضيفي السكر حتى تثقال و طبعا حلي شوية ملون في شوية ما زهر وزيديه للخليط حسب رغبتك انا درت ملون ابيض سامبل و خلطي و سيي حبة اذا شفتي مزال يسيل زيدي السكر باش يعقد
هنا نصيحة كي تولي تطلي احكمي الحبة بيدك و ساعفيها باه ما يتكسروش الاطراف ما ديريش الطريقة التقليدية كي كانو يغطسوها فالخليط لانو ممكن من ثقالة الخليط تتفتت و تخسر و تخسرلك الطلاء ديري الحبة تنشف و جيبي بونجة ولا فرشة امسحيها بالامع و جيبي وردة قصيها شوية من تحت و دخليها فالوسط او زيني حسب رغبتك انا درت ديكور سامبل ما كانش عندي الوقت

نتمنى نكون شرحت مليح

جبتلكم صور توضيحية لعملية تشكيل الحبة و طلائها منقولة من قناة سميرة هي نفس الطريقة الي اعتمدتها

[حالمة برفقة النبي]

الله يبارك

[nihal159]

مانيش مصدقة عينيا؛ عطر الملكة رجعت معانا؛ توحشناك بزآآآآاف من أيام موضوع الحوامل تاع بلونش غوز؛ مانعرف إذا مازلتي متفكرتينا ولا نسيتينا.
لعرايش جاوك فووووووور بصحتكم

[ام هدول]

روووعة ماشاء الله

[عطر الملكة]

المشاركة الأصلية كتبت بواسطة حالمة برفقة النبي

الله يبارك

يبارك فيك حنونة اشكر مرورك العطر

[عطر الملكة]

المشاركة الأصلية كتبت بواسطة nihal159

مانيش مصدقة عينيا؛ عطر الملكة رجعت معانا؛ توحشناك بزآآآآاف من أيام موضوع الحوامل تاع بلونش غوز؛ مانعرف إذا مازلتي متفكرتينا ولا نسيتينا.
لعرايش جاوك فووووووور بصحتكم

يتوحشك الخير اختي نهال ربي يحفظك كيفاش ننساكم و انا قضيت معاكم كامل شهور الحمل و الله راكي تعرفي هذوك الظروف الي حكيتلكم عليها مع تربية الاولاد راكي تعرفي الكونكسيون ما كانش و زيديلها والدتي كامل الشي اللي عندها و زادت ولات ما تشوفش واش نحكيلك يفرج ربي راها قريب عمليتها في 3 ماي اذا كتب ربي ادعولي ان شالله تنجح و ربي يفرج همي مي والله ما نسيتكم راني نطل عليكم منين ما لقيت فرصة الحمد لله رجعت الانترنت نولي نفوت


الله يحفظك حنونة

[عطر الملكة]

المشاركة الأصلية كتبت بواسطة حالمة برفقة النبي

الله يبارك

الله يسلمك حنونة ربي حفظك و يسجيك

[عطر الملكة]

المشاركة الأصلية كتبت بواسطة ام هدول

روووعة ماشاء الله

انتي الاروع حنونة ربي يحفظك

[كريمة الجزائرية 48]

رووعة شكلها يهبل الله يعطيك الصحة اختي

[عطر الملكة]

المشاركة الأصلية كتبت بواسطة كريمة الجزائرية 48

رووعة شكلها يهبل الله يعطيك الصحة اختي

الله يسلمك اختي مرورك و تشجيعك هو الاروع

[تالا تسنيم]

ماشاء الله يهبلو يعطيك الصحة

قولي اختي استعملتي عجينة السحرية نتاع ام اماني و لا عجينة اخرى

دمتي متألقة

تحياتي

[نجية95]

يعطيك الصحة معليش تعطينا الالمقادير والطريقة من فضلك وكيفاش صنعتي الطلية انا قاع متصدقليش بليييييييز

[عطر الملكة]

المشاركة الأصلية كتبت بواسطة تالا تسنيم

ماشاء الله يهبلو يعطيك الصحة

قولي اختي استعملتي عجينة السحرية نتاع ام اماني و لا عجينة اخرى

دمتي متألقة

تحياتي

صباحك سكر اختي تالا
لا لا درت الوصفة التقليدية نتاع الجدود ضرك نحط مقاديرها

العجينة السحرية ما زال ما جربتهاش بلاك مع ايامات العيد نجربها و نحطلكم النتيجة و طبعا الشكر موصول لام اماني مسبقا

اسعدني مرورك يا غالية

[عطر الملكة]

المشاركة الأصلية كتبت بواسطة نجية95

يعطيك الصحة معليش تعطينا الالمقادير والطريقة من فضلك وكيفاش صنعتي الطلية انا قاع متصدقليش بليييييييز

الله يسلمك اختي ضرك نشرحلك
جينيغالمون لعرايش تعتمد عالشكل و عالطلية و اذا خرب الشكل يسمى تخرب كامل


الوصفة راني نقلتها الفوق فالموضوع مع الصور باش الاخوات كامل يستفادو

[تالا تسنيم]

الله يبارك أختي عطر مشكورة إن شاء الله جربها بطريقتك إمممم

حبيببتي كوبي الوصفة وحطيها الفوقة مع الصور للاستفادة للأخوات و في ميزان حسناتك

مشكورة