سادخل النار بسبب امي

[مشكلتي]

السلام عليكم
ياناس والله تعبت نفسيا وجسديا من صغري حتى كبرت الان 23 سنة مخطوبة والحمد لله ولكن مشكتي مع امي حفظها الله كل شي تصرخ علي وانا مرات انهار ونكسر حوايجي ونقعد نضرب في روحي_اعلم انه مايجوز الجزع _لكن مرضت نفسيا نحكيلكم موقف امس ساعدت اختي بطبخ كيكة ولما كنت اشتغل طاح في الكريم من فوق جافيل قلت لهم نحوا كريم ونحوه وليوم صباح جا خطيبي وامي حطتهالو بكريم انا غضبت وهي قعدت تبكي عاتبتها برك قالت انا مصرالي والو واش رايكم تعبت

[زبدة ذايبة]

انت مالقيتي مع من تضاربي غير يماك؟؟؟؟؟ جاتك ساهلة.
حاولي برك تضاربي مع خطيبك وشوفي لازاد ولى لعندك!!!!!!
والله غير يروح مايزيد يرجع.
وكي جات مسكينة في لميمة حالها ساهل
تعيطي عليها تسبيها تضربيها
ماترفدش في قلبها ليك.
وزيد وش هذا تضربي روحك ؟؟؟؟
وش خليتي للمضطربين نفسيا؟؟؟،؟؟؟
غدوة تروحي للراجل ديري عندو هكذا!!!!!!
والله غير يرجعك لداركم ويقوللهم عطيتولي مهبولة؟؟؟؟؟
وين راكي رايحة ؟؟؟،؟
يماك وتتحملك وراهي متحملة مسكينة
تروحي لدار الناس تمهبلي عليهم هكذا
يخرجوك من عندهم نهار ماتزيدهش
تحسبي ديار الناس لعب!!!!!
انتبهي لروحك وش راكي ديري
تغضب يماك يغضب ربي
وتزيدي تبكيها على جال حلوة ولا.....
كاين ناس يتمناو يقولوا يما
وما صابوهاش
يتمناو يكون حسها في الدار
يتمناو كي يدخلوا للدار يشوفوها
دار بلا أم صعبة
دار بلا والدين صعبة وماعندها حتى معنى
اكبري شوية. عيب عليك من جيهة ربي ثم من جيهة يماك.
ماشي محال ينتقم منك ربي على دموع يماك. وعلى قلة احترامك ليها.
غدوة تروحي لعجوزتك تكوني خايفة منها
كل صباح تبوسيلها راسها
ويماك اللي ولداتك اعفسي عليها.
فاجئتيني.

عاودي فكري مليح. وبركايك من التصرفات اللي راكي ديري فيها.
تكملي هكذا راجل مايخليك في دارو.
لا من جيهة ردود افعالك ( تضربي روحك وتكسري حوايجك) تروحي للراجل والله غير يكسرك ويكركرك لسبيطار مهابل.
وتولي ماراكي بالزواج ماراك ببر الوالدين.
انتبهي لروحك ولتصرفاتك مليح.

[first first]

امك ثم امك ثم امك
تحطلو حتى الرهج .........................باختصار مختصر
وهذي نصيحتي لنفسي اولا ثم ليك وللجميع .............ليس فوق الام الا الله

[ياسمين قدسي]

اسمحيلي اختي بصح نتي راكي مكبرتها بزااف
هادي مش مشكلة كل الامهات يعيطو علئ بناتهم وخاصة الكبيرة وانا الكبيرة ف الدار وتحسابني الوالدة ربي يحفظهالي علئ اتفه امر وتعيط عليا و ما نزعفش منها الحمد لله لعندي ام توجهني وتوريلي الغالط من الصحيح
وحتئ ادا مارانيش غالطة وراهي تفرغ في غيظها فيا الحمد لله معليش مش خسارة فيها شقات وربات ورضعت وولدت وكبرت ومنبعدا
ما تستهالش نصبرو عليها
ياو عياطها و جهنم تاع الام جنةةة الحمد لله عندك ام راجعي حسابتك ي الاخت
والمفروض الام كااامل ما تحسبيهاش
والله يفرجها

[سيرين سيرين]

رضا الله في رضا الوالدين ....انتبهي اختي قيمة الام غالية ربي اخليها ليك

[salamandal]

عندما قرأت العنوان تسرب في نفسي و العياذ بالله أنها تحرضك على الكفر ثم نصطدم بهذه الحكايات التي تدل على ان مجتمعنا أصبح يعاني فراغات رهيبة دينية ثقافية علمية .....................................إلخ

إتقي الله في أمك يِؤتك الله أجرك

[ام رضوان]

السلام عليكم
ربي يهديك اختي ويغفرلك امين
واش نقولك اختي لازم تعرفي بلي الام خط احمر مهما يكون ماتقربيلوش
يعني واش فيها اذا امك عيطت عليك والله يااختى حتى لو ضرباتك مالازمش تقولي اه
وثاني حاجة تعيطي عليها وتعاتبيها لانها حطت لخطيبك الكريمة؟
لاه خفتي يترهج يا والله مايصرالو شيء على ربحتي العيب ودعوة الشر من امك
في بالك دمعة امك راح تروح هكذاك؟ موحاااااال
هذا علاجال ولد الناس بكيتيها امالا على جال ولادك تضربيها
راجعي حساباتك اختي
والله والله والله دمعة الام غالية وقلييل اللي يعرف قيمتها
والندامة هي الاخيرة
والحمد لله اللي عرفتي بلي عصيان الام يدي لنار
اختي والله نقرا في مشكلتك ونتخيل في امك جالسة وتبكي والله وربي عالم قلبي تقطع
الله الله كي عادت الام تتهان من طرف بناتها
ونزيد نقولك حاجة حطيها في بالك
تكسار لحوايج والقلقة راكي ماتروحيش بيهم بعيد
عند بالك بيت الزوجية ساهل ماهل اييييه راكي غالطة
ونصيحتي الاخيرة
ليك وليا ولكل واحد حابب يرضي امه
الجنة راهي غالية ورهنها ربي باقدام الامهات
يعني مش ساهلة باه نرضيوامهاتناونفوزو بالجنة
يلزمنا صبر كبييييير
ربي يحنن قلب امك عليك وينزع السحابة اللي راهي بيناتكم ويفرحك امييين
واسمحيلي اذا قسيت عليك

[ruki]

نورمال اختي...ديري في بالك بلي الام مهما واش تدير تبقى امك ولها عليك حقوق عظيمة ..
فرطي في الناس الكل وفرطي في روحك وماتفرطيش في امك ....وحتى لكان غلطت مالازمش تزعفيها ....ونصيحة اختي تعلمي تتحكمي في اعصابك الحياة ماتمشيش بالتكسار والزعاف ...ربي يهنيكم ^^

[Salima2017]

لازم تتعلمي توسعي بالك من درك مادامك مازلتي في دار والديك. بيت الزوجية ليس سهل.
من جهة اخرى امك تحبلك الخير .ما تزعفيهاش
نهار تتزوجي تشتاقي كل هذه التفاصيل.

[om_hadil]

أين المشكلة ؟؟؟؟

[الطيب الجزائري34]

عندك ام وحدة

[صُبح الأندلس]

اذا أمك و لم تتحمليها فكيف تتحملين الحياة الجديدة و العائلة الجديدة
و كوني على يقين لن يبارك لك الله ما لم ترضي أمك

[hanan7]

الله يهدينا ويهديكي أختي

[الوطن اغلى]

قرأت العنوان بالصدفه و ارعبني ...قرأت الموضوع شئ ثاني
حسني علاقتك بامك ما تدوم الا هي وتحملي وخذي كل شئ بقلب في من الفسحة ...اقلبي كل امورك معها بنوع من المرح لا تتعاملي معها بالجديه وكاننا عسكر في البيت ... امك ثم امك ثم امك
والله يصلح حالك و حالنا ويحنن قلبك عليها ويحنن قلبها عليك ...
ويوفقك لبرها ..

[RAMA HEART]

السلام عليكم

اختي اظن أن المشكلة ليست في أمك فأمك كباقي الأمهات تتصرف ... أما أنت فحاولي أن لا تتحسسي كثيرا من تصرفاتها واستغلي وجودها يوما ما ستندمين على دموعها التي تسببتي بها