كرهت مع الطياب

*أم سجى* · 2016-09-20, 11:31

اهلا وسهلا بيكم والله غير عييت من مشاكل الطياب .......بغيت نفهم فالتحماس (التقلية)تحمسوالبصل تاعكم واللحم فالزيت برك ولا تديرو شويا ماء ولا كل طبخة كفاه فهموني تعيشو والطماطم المصبرة تتحمس مع الزيت ولا حتى تتم التقلية باش نديروها

*أم سجى* · 2016-09-20, 11:32

والتمريق بالماء يكون على مرة ولا على زوج مرات؟

*أم سجى* · 2016-09-20, 11:32

والتوابل يتقلاو مع الزيت ولا وقتاش نديرهم ؟

*أم سجى* · 2016-09-20, 12:21

ولا مساعدة للأسف

دلال2012 · 2016-09-20, 15:06

في لبداية ديري شويه زيت وديري البصل واللحم يتقلاو مليح حتى يذبال البصل وزيدي الثوم والتوابل والطماطم المصبرة وقليهم مليح من بعد تمرقي بالماء سخووون يعني اخر حاجة الماء بعدها تحبي تزيدي ورقات رند ولا منكهات اخرى على حساب الطبخة

*أم سجى* · 2016-09-20, 23:32

شكرا اخت دلال بارك الله فيك

*أم سجى* · 2016-09-20, 23:33

100مشاهدة دلال فقط لي ترد!

om kamilia · 2016-09-21, 08:12

صباح النور آمل , , انا عن نفسي , نحمس البصل مع زيت و لآ مع اللحم بلعقل و نضيف مبعد طماطم مصبرة تتقلى معاهم و نبدى نضيف تقريبا كاس ماء يتقلى الكل مع توابل , هكك 10 دقائق على نار هادية و مبعد زيد نمرق , الافضل بشوية هنا لي يكمن السر, لان يمى تقولنا كي تمرقو على خطرة كي شغل رانا نغسلو ف هذيك المرقة و ماتبقاش بنة ,ـ ونضيفو رشة خفيفة من توابل لي درناهم مع الاول مع الاخير

فاصلة · 2016-09-21, 08:31

انا ما نديرش قاع الماء كي نقلي. أولا نحط اللحم وحدو ينشف فوق نار ونحرك باش ما ينحرقش حتى ينشف هذه اول خطوة بالخف لازم باش ما يزيدش يطلق الماء من بعد نضيف الزيت ونخليه يتقلى مليح ونحط لملح والنار تكون متوسطة ماشي قليلة من بعد نزيد البصل ونخلي فاني يتقلى ونحرك لازم نشوف بلي عندي غير الزيت ما لازمش نخليه يطلق الماء ونحط الخضر لي عندي نزيد نخليها تتقلى هنا نزيد شوية في النار باش ما تطلقش الماء ونحرك مليح ونحط الطماطم ونخليها تتقلى هي فاني كي نحس بلي تقلاو ممكن هذ المرحلة تدوم حتى 20 دقيقة هنا نضيف الماء بالتدريج ونكمل ونحط لتوابل لي بغيت

*أم سجى* · 2016-09-21, 15:06

اقتباس:

المشاركة الأصلية كتبت بواسطة om kamilia

صباح النور آمل , , انا عن نفسي , نحمس البصل مع زيت و لآ مع اللحم بلعقل و نضيف مبعد طماطم مصبرة تتقلى معاهم و نبدى نضيف تقريبا كاس ماء يتقلى الكل مع توابل , هكك 10 دقائق على نار هادية و مبعد زيد نمرق , الافضل بشوية هنا لي يكمن السر, لان يمى تقولنا كي تمرقو على خطرة كي شغل رانا نغسلو ف هذيك المرقة و ماتبقاش بنة ,ـ ونضيفو رشة خفيفة من توابل لي درناهم مع الاول مع الاخير

سلام اختي شكرا لكن كيف تمرقي بلعقل يعني تفتحي الكوكوط كل مرة ترمي شوي ماء؟

*أم سجى* · 2016-09-21, 15:09

اقتباس:

المشاركة الأصلية كتبت بواسطة فاصلة

انا ما نديرش قاع الماء كي نقلي. أولا نحط اللحم وحدو ينشف فوق نار ونحرك باش ما ينحرقش حتى ينشف هذه اول خطوة بالخف لازم باش ما يزيدش يطلق الماء من بعد نضيف الزيت ونخليه يتقلى مليح ونحط لملح والنار تكون متوسطة ماشي قليلة من بعد نزيد البصل ونخلي فاني يتقلى ونحرك لازم نشوف بلي عندي غير الزيت ما لازمش نخليه يطلق الماء ونحط الخضر لي عندي نزيد نخليها تتقلى هنا نزيد شوية في النار باش ما تطلقش الماء ونحرك مليح ونحط الطماطم ونخليها تتقلى هي فاني كي نحس بلي تقلاو ممكن هذ المرحلة تدوم حتى 20 دقيقة هنا نضيف الماء بالتدريج ونكمل ونحط لتوابل لي بغيت

شكرا اختي لكن لما ماتستعمليش الماء في التقلية تكفيك مغرف الزيت تقلي فيها كل واش ذكرتي؟

amouna76 · 2016-09-25, 22:51

للرفع لدي نفس التساؤل ارجو الرد

radmoh2006 · 2016-10-17, 17:56

دائما قلي اللحم مليح عاد زيدي ديري معاه البصل .لان كي ديري البصل يتقلى مع اللحم في نفس الوقت .البصل تبغي تنحرق و اللحم يكون متقلاش مليح

samya7 · 2016-10-17, 19:09

شكرا لكن على الافادة

zokhrofa · 2016-10-17, 22:05

اقتباس:

المشاركة الأصلية كتبت بواسطة أمل 95

اهلا وسهلا بيكم والله غير عييت من مشاكل الطياب .......بغيت نفهم فالتحماس (التقلية)تحمسوالبصل تاعكم واللحم فالزيت برك ولا تديرو شويا ماء ولا كل طبخة كفاه فهموني تعيشو والطماطم المصبرة تتحمس مع الزيت ولا حتى تتم التقلية باش نديروها

اختي امل كنت حكيت على اللحم في ملف الاخطاء المطبخية شفتيه