انصحوني راجاءا خايفة منو

[مشكلتي]

السلام عليكم
كاين شخص رح يتقدم لخطبتي بعد العيد نشاالله
هو شخص هاااااااديء فوق الطبيعي
لكن في مرة كنا نحكو في التيليفون و راح الريزو و كي رجع تقول ماهوش نفس الانسان تحول لوحش في دقيقة و بدا يسب و يعيط و قالي ك\ون ما تعدليش روحك نتحول معاك لشيطان و ندمرك يعني اقل ما يقال انو مجنون
انا حرت و خفت منو بزاف بعد قتلو مفهمتش على واه قلقت هاداك كامل قالي هاديك مش قلقة قالي مشفتينيش كي نقلق صح قالي البارح قلقت ع عمتي طيحت الليستر تاع السقف و ضربت عمتي
المهم فاتت الحكاية و رجع لهدوووءه فوق الطبيعي

قبل يومين زارنا ولد عمتي كبير طبيب و معلابالوش اصلا بالحكاية قاعد يحكي مع ماما و جات سيرتو في لحكاية قال لماما فلان راهو ماشي بالدوا راهو مريض نفسيا كون يخطيه الدوا قادر يولي عدواني و يدير اي شي قالها بحكم مركزو راهم مخبيين هاد الشي قالها جابوهولي هاك المرة بالدرقة كتبتلو الدوا و حكالها بزاف حوايج فيه صح

متقولوليش صارحيه نخاف من ردة الفعل تاعو اتجاهي او اتجاه ولد عمتي
المهم سبب كتابتي للموضوع اني حابتكم تنصحوني

اعطوني طريقة نجبد روحي منو بلا ما يضرني خايفة منو بزاااف كون نقلو هاكداك بلا سبب يقلي اكيد كاين شخص اخر في حياتك و راح ينتقم مني

[nasser26]

أختي الكريمة اكي رايحة تعيشي معاه حياة كاملة واذا متاكدة انو مريض صح نفسيا أخطيك أربحي حياتك وراحتك

وانتي علاش خايفة ؟ هو معليه كي خبا عليك ؟؟ يعني هنا كي خبا عليك راه يغدر فيك هو وعائلته علاااااااااااش يخبوا عليك شئ كمن هذا ؟

الان قبل غدوة اتخذي قرارك هذا ماشي بالشئ الهين حذاري

[فارس الخيال]

هذا نتيجة أنك أردت تجربة هاته العلاقة و التعرف على هذا الشخص قبل الزواج و قبل أن يخطبك أصلا
يعني باختصار حصلتي روحك مع بسيكاتر ظهر الآن على حقيقته
و لو كان في الأصل و تقدم لخطبتك بطريقة شرعية بلا ما تكلميه بلا ما تعرفيه
لكان أسلم و لسأل عنه أهلك و جنبوك منه نوبات هباله
لكنك اتبعت الطريق الذي سلكته الكثيرات من قبلك لوحدهن و لم يكملن مسيرة الدرب
لأنه باختصار هذا الطريق غير سوي و حتى لا أقول شيئ آخر و عواقبه معلومة مسبقا
على كل و من لطف الله بك فقد عرفت حقيقة هذا الشخص
بعد أن ساق الله ابن عمك الطبيب ليخبركم عليه
أنا ما نقولكش صارحيه لأنك أصلا في وضع لا تحسدين عليه و قد قطعت معه شوطا طويلا
لكن الغريب منك هو هذا الخوف الشديد من هذا الشخص و كأنك أمام قابض الأرواح
و هو أصلا ليس خطيبك و لا شيء بل هو شخص غريب كلية عنك حتى تبرري له أو تتكلمين معه
و أنت أخطأت بعد أن قضيت معه طول هذا الوقت و حتى أنه بصدد التقدم لخطبتك بعد العيد
و أنت متوهمة إن كنت تعتقدين بأنه يحبك و هو الآن يريد التقدم لخطبتك
لأنه لو كان فعلا يحبك كما تزعمين لما أخفى عنك هاته النوبة التي تتملكه من حين لحين
و لكان صادقا في كل شيء إن قبلت به كما هو فنعم و هي و إن رفضته فهذا من حقك
خلاصة القول علاقتك مع هذا الشخص علاقة لم تبنى على أسس سليمة و صحيحة
لهذا فإن نهايتها ستؤول للزوال لا محالة
يلزمك شجاعة كبيرة لوضع حد لهاته المهزلة التي أنت فيها
و لا يحضرني أفكار في الوقت الحالي أقترحها عليك لأن القضية تحتاج لتفكير معمق
و إن لم تستطيعي حلها بمفردك فعليك إدخال من أفراد عائلتك ليبعدوه عنك
و ما عنده ما يدمرك و لا يأذيك و لست ملكا من ممتلكاته
كما لا يسعني إلا أن أقول لك بأن تتوبي من مثل هذه العلاقات
و لا تنساقي و لا تنجرفي وراء ما ترينه من علاقات غير شرعية تظنين بأنها تنتهي بالزواج
و لكن نهايتها غالبا مأساوية

[ريان برهوم]

ريحي نفسك منو يرحم بوك وربي يغفرلهم اهلو كي عادو مخبيين نورالمو يقرو بذا الامر

[زهرة الاوراس]

يمكن ان تتجنبيه بان يتم رفضه من قبل الاهل، فمثلا حتى تتوقفي عن التحدث اليه ادعي ان احد اخوتك او والديك احس انكي تكلمين شخص ومنع عنكي الهاتف او ان الهاتف لدى اهلك، و هاكذا تغيرين رقمك وتتخلصين منه، وفي حالة تقدم اليكي يتم رفضه من اهلك وانتهى الامر، حاولي السير مع احد من اهلك في الشارع الى ان تمر هذه المشكلة حتى يتاكد من صحة ادعاءاتك انك مراقبة من اهلك، ايضا اخبري اهلك ان هناك شخص يضايقك ويود خطبتك وانتي لا ترغبين به حتى تضعيهم في الصورة،، اعانكي الله.

[lalib40]

ماذا بعد هذا .......المهم تزوجو برك

[*أم سجى*]

اختي هذا شخص مريض وراح تعيشي معاه الجحيم اذا استمرت علاقتكما ...يجب عليك قطع علاقتك به أولا في الهاتف خططي لسيناريو مثلا كيم قالت الاخت من قبل ديري روحك كنتي تهدري ومبعد كشفك خوك واغلقي التلفون غيري البست على أساس خوك كشفك وادالك التلفون..........واذا جا خطبك ارفضيه رفضا مطلقا ومتخافيش معندو مايديرلك ...واللي قدر عليها خليه يديرها الناس كاما عارفاتو بلي مريض .......لازم تتشجعي ومتبقايش عايشة تحت الخوف والرعب تاعو

[knives66]

مريض بلاستوا سبطار مكان لا تخاف منوا ولا يخاف منك

او كي كلمها فيك تعرفي معني خوف لكدي عليك غيرقوليلو

منيش قابلة

[thorpe]

اولا حاولي ديما تذكريه بربي لانو بذكر الله تطمئن القلوب والراجل يبقا راجل ما يتعابش ما توصلي روحك ما يولي فيك (( وكل عصبي يقال انه حنون )) واله اعلم
ثاني شي لفت انتباهي في قصتك وما هو بالجديد
اطباء الجزائر الي من بينهم ولد عمتك
خونة سبحان الله خونة بكل ما تعنيه الكلمة من معنى
يخون امانة ومهنة
يخون مريض؟
الطبيب نورمالمو بينو وبين لمريض كاين سرية
وهذا الخبيث واسمحيلي على هاد العبارة لانها حقيقة
من مجموعة الاطباء الخوباثا تاع بلادي راه يخرج في سر مريض
سبحان الله
على كل حال
اذا حابة تجبدي روحك منو خليه يغلط فيك وقوليلو سمحلي وصايي اذا ماكانتش بيناتكم عشرة بطبيعة الحال رايح يخليك والسلام عليكم اما اذا كانت بيناتكم عشرة طويلة ممك تحصل مشاكل وربي يعينك
سلام عليكم وربي يهدي ما خلق
صراحة نكره الاطباء تاع الجزاير كره العمى نكرهم تاع الصح لكثير من الاسباب وزيد كل مرة نزيد نكرهم حمد لله لي قصتك زادت اكدت كل ما هو في بالي عليهم
لا امانة لا ضمير لا طب كيما الناس
المريض يزيد يمرض عندهم و زيد من فوق يخرجو اسرارو

[ايمان4]

يا اختي واسم نقلك خليه يجي و مسحيها ف والديك ما تخافيش خصوصا اذا كتقدريش تصبري تخاف يبقى يضربك ... مريض يداوي و ممبعد ساهل الحال خممي ف الدراري يكبرو يخافو و معقددين و اذا بيناتكم عشرة كلشي مبروك الحصول شوفي انت تعرفي

[روح المي]

قولي والديا مقبلوش وخلاص
وراك رجال حمد لله
ميقدر يعمل والو واستخيري و ادعي ربي يسترك

[~رآقية بأخلآقي~]

لا حول ولا قوة الا بالله

اهلك باين مش راح يقبلو بيه..مالا مكلاه تخممي وتكسري راسك...!!!

وياريت خلال هذي الفترة وقبل ما يتقدم لك ماتزيديش تهدري معاه ومكلاه تعيشيه وتعيشي نفسك في أوهام...

وربي يهدي الجميع

[رَكان]

في الحقيقة أنت ليس لديك ما يمكن وصفه بالمشكلة حقيقة ...
ارتكبت خطأ من البداية صحيح ..
لايوجد ما يبرر خوفك منه فأنت وحسب ما فهمت لم تقدمي له ما لايمكن التوقف عن تقديمه ..لا يوجد اي التزام من ناحيته لاشرعا ولاقانونا ..
خطوتين مهمتين لاثالث لهما ودعك من التخبط في هذه الدوامة الوهمية من الخوف فأنت لست تعيشين في غابة ..هناك أب إخوة عم خال ..........
1 ــ امسحي رقمه من جوالك ثم blocage
2 ــ فاتحي أمك بما وقع فهي وبأسلوبها يمكنها اخبار الأب لإتقاء ما يمكن أن يحدث من طرفه كردة فعل على مقاطعته ..
غيره يا أخت لن يزيد الطين غير بلّه ..

[ملكة القمر]

أولا صلي صلاة الاستخارة
و من بعد ديري الأسباب كيما قالو البنات و لا حاولي تكرهيه فيك باه وحدو يخطيك و بلا مشاكل يعني حاولي تتبدلي معاه

[مون1]

المشاركة الأصلية كتبت بواسطة thorpe

اولا حاولي ديما تذكريه بربي لانو بذكر الله تطمئن القلوب والراجل يبقا راجل ما يتعابش ما توصلي روحك ما يولي فيك (( وكل عصبي يقال انه حنون )) واله اعلم
ثاني شي لفت انتباهي في قصتك وما هو بالجديد
اطباء الجزائر الي من بينهم ولد عمتك
خونة سبحان الله خونة بكل ما تعنيه الكلمة من معنى
يخون امانة ومهنة
يخون مريض؟
الطبيب نورمالمو بينو وبين لمريض كاين سرية
وهذا الخبيث واسمحيلي على هاد العبارة لانها حقيقة
من مجموعة الاطباء الخوباثا تاع بلادي راه يخرج في سر مريض
سبحان الله
على كل حال
اذا حابة تجبدي روحك منو خليه يغلط فيك وقوليلو سمحلي وصايي اذا ماكانتش بيناتكم عشرة بطبيعة الحال رايح يخليك والسلام عليكم اما اذا كانت بيناتكم عشرة طويلة ممك تحصل مشاكل وربي يعينك
سلام عليكم وربي يهدي ما خلق
صراحة نكره الاطباء تاع الجزاير كره العمى نكرهم تاع الصح لكثير من الاسباب وزيد كل مرة نزيد نكرهم حمد لله لي قصتك زادت اكدت كل ما هو في بالي عليهم
لا امانة لا ضمير لا طب كيما الناس
المريض يزيد يمرض عندهم و زيد من فوق يخرجو اسرارو

أعجبني هذا الرد جدا وهو أول مافكرت فيه عندما قرأت المشكلة
هذا الطبيب خائن واستغل منصبه ومكانته لتسريب معلومات شخصية للعميل
اصلا المعلومات الشخصية لعميل تكون سرية جدا ولا يجوز الكشف عنها الا بكتاب من المحكمة وفي حدود التهمة الموجهة.
طبيب خائن فنصيحة لا تعتمدي عليه أبدا ولا تعالجي عنده ان اضطررتي لانه سيفضحك.

بالنسبة لمشكلتك أختي أتركيه بكل بساطة الهذف من الزواج هو الاستقرار وسكون الزوجين لبعضعما
ولا أرى أي استقرار بالزواج بهكذا انسان في لحظة غضب يمكن أن يذهب بروحك أو يأذيك بضرب وأذى نفسي عل ما انك لن تطولي شيئا من القضاء لانه غير مسؤول عن أفعاله لحظة العصبية
فانفذي بجلدك منه وقد ذكر الاخوة طرق تيسر لك الابتعاد عنه.