تابع لمشكلتي خطيبيو الفيسبوك غادي يهبلون"اكتشفت انه يخونني مع انا ولست ادري مع من كذلك"

[مشكلتي]

السلام عليكم ورحمة الله وبركاته

رجاءا رجاءا ثم رجاءا بدون تجريح
انا صاحبة موضوع خطيبي والفيسبوك غادي يهبلوني بعد التوسويس لي كنت عايشة فيه والشك كذلك قررت نفتح فايس جديد ونراسل خطيبي على اساس وحدة اخرى لانه كان يراوغ ويكذب على بشأن صداقاته مع الفتيات
لكن هذه المرة وقع فالفخ قام بإظافتي الى قائمة صديقاته ومن اليوم الاول بدا يقول لي كلام معسول كان يقوله لي انا فقط خطيبته كما كان يدعي ذلك لكن اكتشفت الكارثة واننا في شهر الفضيل طلب صور لي وكذلك رقم الهاتف لكن انا راوغته ولم اعطه شيئا تركته ينتظر ومن الجهة الاخرى كان يتحدث معي في نفس الوقت وكأنه ملاك ولكن كلامه كان جافي نوعا ما معي نظن بدون اطالة فهمتو مشكلتي وبلا مانتعمق فالموضوع

لم اقرر فسخ الخطوبة لعدة اسباب انها نزوعة عابرة وتانيا ربما مجرد قضاء وقت

والله حرت وقلت بلاك نفسخ خطوبتي من هذا الشخص نرتبط مع شخص يكون اكثر منه خصوصا ان اغلبية رجال عندهم فايسبوك
اراءكم تهمني وخصوصا رجال لانهم يعرفو بعضاهم
وادعولي خاوتي والله محتاجة دعاء

[*أم سجى*]

زيدي استدرجيه اكثر وحاولي تسأليه على خطيبته وشوفي اذا كشما هدرلك فيها (على نفسك)...............ثم مبقاتش قعدة معاه......

[اريج 07]

مفهمتش وعلاه حطيتي موضوع نتي عاجبك الحال و محاباش تفسخي الخطوبة وعلاه تحوسي على اراء الاخرين

كون جيت منك والله مانزيد معاه دقيقة خخخخخ ياخي بنات ياخي يذلوا في رواحهم و يقولك اسباب ههههه واش من اسباب تخليك هك ربي يهدي

[القمة انفو]

بهاذ العقلية ما شكيتش كامل نتزوجو للاسف الفيس بوك اصبح عالة على مجتمعنا و ما بقاش لي يعرف معنى الزواج و الارتباط

[ROMMEL]

عندي فايسبوك بصح الحمد لله مانيش كيما خطيبك اصلا الاصدقاء نتاعي في الفايسبوك كامل نعرفهم تاخذي رايي اخطاكي من خطيبك و ماكانش حاجة يسموها نزوة عابرة و تحسبونه هينا وهو عند الله عظيم

[سفيان31]

نعطيك نصيحة اختى غير حبسي لانك تورطيه وتورطي نفسك

غير صارحيه

[زهر التوليب]

اختي الخيانة ماشي ساهلة هذا مخطوبين برك و بدا يخون وراح يبقى يخون للممات لان الخيانة تمشي في دمو و هو كيما قتلك المرة اللي فاتت انسان خلاط يعمل مئة علاقة نورمال و ما يهموش
اخطيك منو انتي باينة انسانة طيبة و هذا النذل ما يستاهلكش ديري قيمة لروحك و تو يجي مكتوبك للباب و اكثري من الدعاء بالزوج الصالح

[صمت الرجوله]

بما انك قلت نحن الرجال نعرفوا بعضنا بعض...انا نقولك فكي عليك و افسخي الخطبة
حنا عندنا من شب على شيئ شاب عليه. خاصة فيما يخص الجنس اللطيف...الكريم يبقى كريم و اللئيم يبقى لئيم
لي كبر على حب العلاقات و المراوغة راح يقعد كيما هاك...راكي غير تعيي روحك

[روح المي]

هذا راجل لعوب واذا حابة تتجرعي خيانة تقبلي لان ظروفك صعبة استخيري وواجهيه بالحقيقة

[nounounounou]

حسب ماقلتيه فانا مع راي الاخوه والاخوات قبلي..........اذا هو هك قبل مايزوجك ....مالا مبعدا كيفاه ....زيدي اسالي نفسك وخليها تجاوبك ....وزيد نتي حاليا ماكيش مدايرة فيه التيقة وحسيتي بلي كاينة حاجة وتاكدتي منها ومبعد كي يعود زوجك جامي توثقي فيه ......وزيد تمرضي روحك عليه .............من الافضل انك تستخيري واتبعي عقلك ةانشاء لي فيها الخير اي توصل ......
بالتوفيق ان شاء الله .

[sarl02]

ما يفعله خطيبك عمل دنيء نسال الله له الهداية ...لكن لا يصل الامر لفسخ الخطبة ...وانتن يا الي راكم اتقولولها حبسي اتحدى اين منكن ان تدمر مشروع زواجها لهذا السبب ...لهذا لا تقلن بما لا تستطعن انتن فعله كفاكم مثاليات ..وربي افرج على الاخت ويهدي هذا الاخ لجادة لصواب

[لمسة ابداع]

المكتوب مبين من عنوانو
خطيبك هدااا رجل لعوووووووووووووب و اكيد كون تديييه رايحة تعاني معاه و مكانش حاجة يسموهاااا نزوة عابرة رايح يتزوج و مزاال متربااااش
المهم كبيرة و تعرفي صلاحك و تعرفيي مليح ايجابياته و سلبياتو مانفدر نقولللك كملي مانقدر نقولك حبسي
ربي يوفقك

[~طَـــمُـــوحْ~]

البداية وكانت هكذا باينة كيفاه تخلاص ... الباب اللي يجي منو الريح اغلقوا واستريح
يجب ان يكون اب اولادك ناضج وقد المسؤولية وواعي ماش طايش وزيد باين ناقص دين كون جا يخاف ربي ميتلاعبش ببنات الناس المهم حاولي تجبدي الدليل الدامغ واعلنيها صراحة مراكيش سلعة لازم يكون عندك موقف وابني حياتك مع من يقدرك ولاتسمحي لنفسك ان تغطي الشمس بالغربال قبل ان تتطور العلاقة معه ... اشباه الرجال ودايرين روحتيهم حاجة لامسؤولية لا ضمير يبقاو هوما اسفل السافلين

[إنسانة بسيطة]

لم اجد موضوعك الاول
لكن دعيني افرك لك اذنك قليلا فان كان هو لعوبا فانت لا تقلين عنه في الامر شيئا فكيف تفتحين حسابا اخر وتقومين بتجربته ؟ وتوهمينه بانك انسانة ثانية ؟ انت مخطئة ولا يوجد شيء اسمه حقي في كشف خيانته
حتى ولو فسخت وجاءك خاطب اخر ستلجئين لذات الطريقة لكشف ان كان وفيا ام لا وتجدين نفسك مع الف حساب في الفايس بوك لارضاء شيئ اسمه الوفاء وانت تفتقدينه قليلا ثم لماذا تستغربين طلبه لصور في رمضان وانت اصلا تخدشين صيامك بالحديث معه ؟؟؟؟؟؟

صلي صلاة استخارة وحاولي التحدث مع خطيبك في امر الخيانة وانظري لرايه وما هدفه من الزواج بك

كلامي لا يعني اني مع تصرف الخاطب فهو واضح للغاية طينته لكن لا تظني نفسك ملاكا وانك في موقف المظلومة مئة بالمئة

[فارس الخيال]

سأعود للرد و بعد أن أقرأ كلا الموضوعين حتى أفهم القصة و لأطرح حلولا إن شاء الله