لماذا أنا على قيد الحياة

[مشكلتي]

السلام عليكم
بالمختصر
أنا بنت صح جامعية بصح تعدبت بزااااااااااااااف مع قراية هذي بويسك مريضة مرض تاع نساء المهم تعذبت بزاااف بزااف
كنحس بروحي معاقبة ودنيا ضايقة عليا
وهادوا ليام كنمرض بزاااف ونا فالإمتحانات
ليوم كان عندي إمتحان تتخيلوا نسيت على التوقيت تاع الإمتحان روحت للجامعة لقيت مكاين حتى واحد
عيطت لصاحبتي قالتلي علاش مجيتش لمتحان كرجعت لدار بكيت دم علاااش علاااااش ماني فهما والوا وتشفوني كفاه تعذبت باش قريت ومنبعد محضرتش لمتحان ودورقا بلاك يدخلوني لرطباج ويقدروا نو
مام ليام لفاتوا تاع لمتحان ننسى بزااف نحفظ ونقرى وننسى
كنخمم مع روحي نلقى بعطين عندهم دراهم ومراض وبعطين معندهمش وماشي مراض
ونا تلموا بلاوات كامل فيا تقول مدعياا
كرهت كرهت كرهت بزاااااااااااااااااااااااااااااااااف
وتشوفوني كيفاه تعذبت صباح لعالم ربي
راسي يوجع ووذاني يسونيو يعني يدير فيهم حالصوت ويطول باش يروح كيقلولي زعما دلعيون حالإمام قالي
هكا
صح بكري كنت نصلي ونبركى بصح شحال عام ونا نصلي و مستورة ومنظلم حتى واحد بلعكس نعاونهم كامل مام لوكان نحيها من فمي ولا من اللوقت تاعي ومام دنغلط معاه نطلب منو سماح ميات نمرا
ما الحل هل تأظل هكذا طول حياتي ماشفت والوا يفرح مام لنعطيهم كلشي منالقى منهم حتى مقابل منطلب والوا كلمة مليحة نطلع بيها لمورال نو
والله أصبحت نخمم فالموت كرهت يعني دنيا كامل ظلما مكاين حتى جها فيها ضوء شوية تدير بيها قوراج وتكمل
سمحلوا طولت عليكم
هذا لمختصر خلي ضيق لفدار ومشاكيل حتى وين تقرا مكانش
أعطوني حل نقدر نكمل بيه حياتي
يأست من كلشي

[toulay]

وعليكم السلام ورحمة الله تعالى وبركاته
استغفر ربي يا اختي ومتقنطش من رحمة الله لانو رحمة ربي واسعة
يا اختي اذا تكون خدمتي في les autres modules ماتدخلش rattrapage
ان شاء الله ياربي تكون خادمة وتعوض
متبقاش غير تحفظ تحفظ حاول تفهم ولخص بطريقتك الخاصة ملازمش تعتمد على الحفظ لانو كون بعيد الشر تنسى الكلمة الاولى خلاص راحت عليك
متبقاش تلوم في روحك وتمرضها بشويا عليك وعلاش هذا كامل
ملازمش تكون عندك une vision pessimiste للحياة تاعك
احكي اضحك كاين داركم صحاباتك والحمد الله راك جامعية وراح يكون عندك un diplôme ان شاء الله وتلقى خدمة يعني مزال قدامك المستقبل
وحاجة مهمة خلي شخصيتك قوية وحاجة ماتاثر عليها
ربي يفرج عليك ان شاء الله
بالتوفيق

[first first]

بخصوص امتحان اليوم.................ديري تبرير غياب واديه للادارة في اقرب فرصة.........على مااعتقد قبل فوات 48 ساعة

هكذا اذا دخلوك راتراباج يعتبروهولك امتحان عادي .حسب معلوماتي....................اكديلهم انك مريضة وبالكاد عقبتي المواد السابقة وهي الحقيقة

نرجعو لهمك..............................همك استصغريه امام عضمة الله.

اذا صلاتك غير محافضة عليها.......................حافضي عليها................صلاة الفجر ..............اذكار.....................يحتاجها كل انسان فمابالك من يكون في حالة هم وغم.

ربي يشفيك....................ربي ينجحك.................ربي يهنيك.......................وربي يعوض دموعك فرح ان شاء الله.
عند القلق استغفري....................اقراي قران ولو ايات بسيطة كالمعودتين والاخلاص.............................وماتحزنيش بزاف على الامتحان................مخلوف ان شاء الله.

ليلتك سعيدة...وغدك اسعد باذن الله.

[ikramo920]

سلام عليكم
ختي ماتفقديش لامل فهاد الدنيا ماتعرفيش واش راه مخبيلك ربي
ارقي وصلي وادعي واقراي قرآن وكتب عربية فرنسية انجليزية باللغة لي حبيتي وان شاء الله تولي حالتك افضل حال و ربي يسرلك امرك
سلام

[mercedes benz arena]

الا بذكر الله تطمئن القلوب

[AMINA.Z]

يا اختي هوني عليك و استغفري ربك
ما فوتيش امتحان ...الحمد لله اكيد فيها خير ...شوفي برك واش لازم ديري باه تقدري تعاوديه
تعبتي في قرايتك... ..ماش خسارة اصلا راكي تقراي ليك ماش غير على جال الامتحان.
مريضة مع العلاج ستشفين باذن الله
ملتزمة و محبة و متخلقة .....هذه امور تنفعك وحدك في دنياك و اخرتك ...لا تساومي الله في عطاياه بعبادتك هذه .....فالله غني و لن تزيده عباداتك غنا ....لذلك اعبدي الله لتنالي رضاه و تسعي لدخول الجنة و ليس ليقوم بارضائك و اسعادك.
المؤمن مصاب ...و صراحة مشكلتك بسيطة مقارنة بالمصائب التي يبتلى بها الناس
قولي الحمد لله لانك حية ترزقين فلديك فرص عديدة للتوبة الصادقة و حمد الله على نعمته ....عوض تمني الموت الذي لن تجد به الا الندامة على ما مضى و ما قيل .

[عثمان الجزائري.]

إستعيني بالرقية الشرعية

[oumhana]

السلام عليكم أختي انا حبيت نتجاوب معاك فيما يخص الصوت لي تسمعيه في ودنيك هداك مرض لازم تشوفي عليه طبيب الأنف و الحنجره يعطيك دوا وترتاحي إن شاء الله وبإذنه تعالى.أنا عانيت من مشكل هذا و الحمدلله اليوم ـ نتمنى لك الصحه والعافيه والنجاح.ومتنسايش ذكر الله كماقالولك الأخوات

[ريهانة]

ربي يفرج عليك في دنيا هديك كل عندنا مشاكل والحياة متمشيش مريقلة كامل اصبري وادعي لربي ونشالله تفرج

["أحمد المحمدي"]

السّلام عليكم، إقرئي هذا الكتاب أنا متأكّد أنّه سيساعدك وسيرفع معنويّاتك إن شاء الله

جدّد حياتك لمحمّد الغزالي

ولا تنسي أن ترقي نفسك وتتحصّني بالذّكر والقرءان والصّلاة في وقتها والدّعاء

[*سبل السلام*]

وعليكم السلام ورحمة الله وبركاته
اختي انت قلت بأنك تحافظين على صلاتك وتساعدين الناس قدر استطاعتك. اذا لاتخافي فهذا ابتلاء من الله ليمحص مابقلبك
المرض ايضا ابتلاء من الله ليرى هل تصبرين وتشكرين أم تكوني من الجاحدين
هذا هو امتحانك الحقيقي الذي يجب ان تنجحي فيه باذن الله
اما بالنسبة لامتحان الجامعة فلم الخوف اذا لم يفت الاوان يمكن ان تعملي تبرير أو تحدثي مع الاستاذ عن مرضك
اما ان فات موعد التبرير المحدد غالبا ب 72 ساعة فأين المشكلة في الدخول للrattrapage
نعرف ناس يدخلو الrattrapage عمدا لرفع معدلاتهم
اما اذا كنت تفكرين في المستقبل مثلا الماستر او ماشابه فعليك بالاجتهاد في المستقبل لرفع معدلك ولن يؤثر باذن الله
بالنسبة للنسيان انا شخصيا عانيت من هذا المشكل. حتى اني مرة كملت حفظ المادة وفهمها مرتين قبل دخولي للامتحان وحين ابدا الاجابة يختفي كل شئ تقريبا من رأسي
والان انا الحمد لله انهيت دراستي وتخرجت بمعدل جيد ولله الحمد
المهم الا تقنطي من رحمة الله واكثري من الدعاء وقيام الليل
وفقك الله دنيا وآخرة وفرج عنك كل كرب وضيق
معذرة على الاطالة

[لجين امنيتي]

استغفري الله يا اختي لماذا لا تنظرين الي من هم اقل منك انظري مثلا للسوريينك كيف يعيشون فهم لم يجدوا حتي الحشيش باه ياكلوه العرا والجوع والبرد اما انت علي الاقل عندك دار تاويك انظري مثلا للافارقة ما لقاو بيها وين بلادهم راهي في حرب وهما هنا يطلبو والله كي تشوفيهم تنساي حالتك فاستغفري الله وصلي وديري ثقة في ربي

[fati 17]

ربي يفرج عليك خيتي

[نسيم الريح ش]

ما تياسيش من رحمة ربي كوني صبرورة وتاكدي انو لكل مرض دوا

[سيرين 5]

الا بذكر الله تطمئن القلوب