***اطباقي الرمضانية البسيطة***

ام حمزة22 · 2015-06-18, 15:30

[IMG[/IMG]السلام عليكم ورحمة الله تعالى وبركاته

اولا اهنك جميع رواد المنتدى بالشهر المبارك تقبل الله منا ومنكم الصيام والقيام

اليوم حبيت نقدملكم موضوعي المتواضع بالماكولات البسيطة اقول البسيطة لاني من يوم كبرو ولادي بسلامتهم عادو هما لي يشرطو ويطلبو واش نطيبلهم وشروطهم مساكن غير مكلفة طلبوا مني ان نطيبلهم حساء الخضار بدون لحم ولا جاج ومتكون غير من البطاطا والجزر والقرعة لاكن انا ما حبيتش نخليهولهم هاكداك بالعافية باه رضاو على اللحم المفروم
اما الاطباق الرئيسية يحبو غير الحاجة لي طايبة فالفور ما يحبوش الجوازات والمراقي حتى والدهم ربي يحفض اصبح يميل لمثل هده الاطباق

اليوم انا دخلت بكري للمبخ وحزمت بالطابلية فالاول وجدت كل المكونات لي نسحقها فالطبخ من بعد خديت طنجرة للحم ألحلو وطنجرة للحساء وقدر لشوربة الفريك وطنجرة صغيرة للصوص تومات نتاع المني بيتزا دوزنت الاطباق وحطيتهم فوق النار من بعد حضرت عجينة الخبز باه تخمرلي
ققبل ما نبدا في مقادير اطباقي حبيت نقوللكم ان في الامس حصلني زوجي باه نشري اللحم لشوربة قالي عندي خدمة روحي انت رحت نشري والله انصدمت فالغاشي بالعافية باه قدرت نسلك راسي
المهم شريت 3قطع كوتليت الغنم باه يتلقلي بنة فالشوربة وكملت بشوية لحم البقري وزدت شريت شوية لحم مفروم
اخواتي الكريمات لم دخلت للبيت بديت نقطع اللحم لشوربة فقط وقطعة صغيرة للحم الحلو ختى ولادي ما يكلوش اللخم في طاجين الحلو نتلقو غير بنة
المهم اقتصدت قطع اللحم لشوربة ل15 يوم خلطت الغلمي مغ البقري والصور تبين دالك

هدي قطعة لحم لطجين لحلو
هدي طنجرة اللحم لحلو والطريقة هي ان حطيت قطعة اللحم وشوية قرفة ومغرفة سمن نضيفلهم كاس ماء ونحط الطنجرة على النار حتى يطيب اللحم ومرة على مرة نضيف الماء حتى يطيب اللحم بعد ما يطيب اللحم نضيف السكر بعد ما يغلي شوية نضيف العينة ثم زبيب وبعده التفاح وبعد ما طيب كل المكونات نضيف فالاخير المشمش المجمد لي الاخت الكريمة ام ااسراء ربي يضكرها على خير ويعطيها الصحة على الفكرة ثم نضيف شوية ماء الزر ونطفي على الطاجين

وهنا حضرت الحساء مثل مادكرت فالاول بالجزر والقرعة والبطاطا مع بصل وفلس ثوم نضيف الزيت والملخ والماء ونخليهم يطيبو بعد النضج رحي المكونات ونرجع الطنجر فوق النار ونضيف اللحم المفروم لي تبلتو غير بفلفل اكحل وشوية ملح

هنا قدر الشوربة والمقادير هي : نحط اللحم فالقدر نضيف فلفل عكري وملح وفلفل اكحل وحشيش شوربة وزيت كما ضفت اضافة لشربة الفريك العاصمية وهي الجزر والبطاطا نحط حبة جزر صغيرة وحبة بطاكا وحبة او نصف قرعة نحطهم يطيبو مع لللحم بعد ما يطيبو نرحيهم فالخلاط مع حبة طماطم نضيف الخليط للقدر ونزيد شوية ماء ثم نضيف الفريك لكنا غسلناه منقبل ثم نضيف 2مغارف طماطم مصبرة وبعد مايطيب الفريك نشوف شربتنا الا خصها شوية تمراق نضيفلها شوية ماء بعد ما طيب فالاخير نضيف غصن نعناع لي راخ يزيد بنة على بنة وما ننساش الحميصة لي كنت طيبتها من قبل وحطيتها فالمجمد نهلي الشوربة تغلي غلية ونطفيها

ها تحضير الصوص تومات للمني بيتزا والمقادير هي نضع فلفل لحلو وطماطم وبصل وزيت ومغرفة او 2 طماطم مصبرة ونمرق ونحطها طيب حتى نشوفها شربت نرحيها بالخلاط الكهربائي

وهدا الخبز لي طيبتو وهدا رابط طريقة تحضيرهhttps://www.djelfa.info/vb/showthread.php?t=1601667

وهدا الطبق الرئيسي لي طلبوه مني ولادي ربي يحفضهم هو طبق مخبوب من كل العتئلة وهو ساهل ماهل
نقلي البطاطا نحطها فالبلا يدخل للفور نطيب من جيها لحم مفروم في شوية زيت وشوية ملح وفلفل اكحل
ومن جهة اخرى نحضر الصوص بيشامال بعد ماطيب لاصوص نخط داخلها اللحم المفروم لي كنا طيبناه ثم نحط الخليط فوق البطاطا ونضيفلو الجبن ونحط فالفرن نشعل غير من الفوق

هنا المايوناز حضرتها بنفسي والمقادير خبة بيض فلس نتاع الثوم مغرفة صغيرة ملح نخلط الكل بالخلاط الكهربائي ونضيف 2كيسان زيت غير بشوية كي تخلاص الكمية نتتع الزيت نضيف مغرفة خل كبيرة
وهنا عندنا الميني بيتزا لي راح تكون موجودة طيلة الشهر الكريم بادن الله لان ولادي ما يحبوش البوراك

وهنا بعد ماطابت وضفنالها الجبن المبشور
وهادي طاولة الافطار ربي يدومها نعما لينا وليكم
وصح فطوركم وتقبل الله صيامكم وقيامكم

ام حمزة22 · 2015-06-18, 15:36

السلام عليكم ورحمة الله تعالى وبركاته
ان شاء الله تكونوا كامل بالف خير

اليوم حبيباتي طيبت فولوفو خدمت العجينة المورقة اليوم صبح كي ما خليتهاش ترتاح مليح فالتلتجة الشك ناع ليفولوفو ما خرجوليش مليح كي كنت نصور قالتلي بنتي واش راكي تصوري راكي تبهدلي في روحك ما خرجولكش ملاح قلتلها متعليش
طبعا اليوم عندي الشوربة نتاع البارح وعندي اللحم لحلو وعندي الحساء فالغد بادن الله نعاود نطيب الحساؤ والشوربة
ادا الوصفة نتاع المرقة هي نفسها نتاع طجين الزيتون
نقطع الجزر رقيق ونضيف البصل و الثوم وزيت وزعتر ورند و ملح وقرصة قرفة وفلفل اكحل ولي يحب الزعفران
نقلي الكل من جهة اخرى نغلي الزيتون باه ما يقعدش مالح
بعد ماطيب الجزر نضيف الزيتون والفطر ونمرق ونخليهم يطيبو بعد نصف ساعة نضيف كويرات اللحم المفروم ونخليه يطيب 5دقايق ونطفي النار

[IMG]https://store1.djelfa.info/vb/2015-06/1434746339872.jpg[/IMG]
.
اخواتي صح فطوركم وطبقي ليوم 3 هو من ابتكاري كنت خايفة ما يعجبش ولادي بصح عجبهم ومسحو تباسة بصحتهم وربي يحفضهم
الطبق عبارة عن بطاطا بوري وبادنجال محشي بلافارس لي درتها في كيكة البدنجال وهدا رابط الكيكة تقدرو تشوفو طريقة تحضير الصوصhttps://www.djelfa.info/vb/showthread.php?t=1802468
نغلي 3حبات بطاطا ونرحيهم ونضيفلهم شوية حليب وزبدة نفرشهم في بلا يدخل للكوشة نكونو حشينا البدنجال والصوص لي قعدت نفرغها فوق البطاطا ونضيف عليهم البدنجال المحشي انا كان عندي غير 2بدنجالات وانت حبيبتي الزائرة تقدري تغطي كاما البلا بالبادنجال المحشي ونزيد نضيف الجبن المبشور وندخلها للفور نشعل غير من الاعلى

صح فطوركم مع اليوم 4من الشهر الكريم
وطبقي اليوم كان ضولمة فالفور
في طنجرة نقلي حبة بصل مع شوية ملح وفلفل اكحل وقرفة و زيت و نخليهم يتقلاو غير بلعقل
منجهة اخرى نحضر الحشو المتكون من لحم مرحي وبصل ومعدنوس و بيضة و روز ملح وفلفل اكحل نخلطهم مليح ونخشي بيهم البطاطا والقرعة
ثم نضيفهه للطنجرة بعد ما تتقلة ونمرق ونخليهم يكيبو
بعد ما طيب البطاطا والقرعة نستفها في بلا وهنا عندنا الاختيار نضيفو المرق او نترك الخضار بلامرق ونضيف فوق الخضتر الصوص بيشاميل ثم الجبن المبشور وندخل البلا للفور نشعل غير من الاعلى
والنتيجة مثل ما راكم تسوفوها فالصور

صح فطوركم مع اليوم 5 من الشهر الكريم
وطبقي اليوم هو باني السمك بالروز
بلا ما نكثر عليكم الصور اليكم رابط طريقة تحضير البانيhttps://www.djelfa.info/vb/showthread.php?t=1802427
اما عن الروز نغليه ونقطرو ونحطو في بلا بعد ما يقدر وندهنو بالزبدة
ومن جيهة اخرى نحضر الصوص تومات والطريقة هي في طنجرة نحط بصل وطماطم وثوم و رند و زعيترا و فلفل اكحل و ملح و زيت و طماطم مصبرة نضيف ماء حتى نغطي الطماطم ونحطها فوق للنار ونخليها طيب 10دقايق ثم نرحيها بالخلاط الكهربائي طبعا حتى ننزع الرند والزعيترا
ثم نرجع القدر على النار ونضيف قليل من السمك كي تعطي بنة لصوص ونخليها لمدة 5دقايق باه طيب قطع السمك ثم نشبح الارز بالسمك وما نضيفش الصوص نخليها بجيه ولي يخب يسقي يسقي قد ما يحب الروز يكون مسقي
وللاسف ما قدرتش اليوم نصور مائدة الافطار تلفوهالي ولادي بسلامتهم جابو صحابهم فطرو معاهم ما قدرت نصور قلتلهم حتى دعاء الافطار نسيتو حتى لقيت روحي بديت ناكل بلا دعاء
نخليكم مع طبق اليوم

صح فطوركم

ام حمزة22 · 2015-06-18, 15:37

السلام عليكم وصح فطوركم فاليوم 6للشهر الكريم
طبقي اليوم هم جغدينيار وهو عبارة عن لابوري والصوص المتكونة من البصل وثوم وجزر نقليهم مليح بعد ما يدخللها الطياب الزرودية نضيف الجلبانة لي كنت فورتها من قبل ودرتها فالمجمد والا كانت عندكم جديدة ديروها طيب مع الجزر بعج ما طيب الخضرة نضيف اللحم المفروم ونخليه يطيب 5د ونطفي الفرن هاد الصوص لازم تكون شوية ناشفة ما تكونش مايهة
ومن جهة اخرة نغلي البطاطا ونرحيها ونحطها في بلا ونحط فقها الصوص وندخلها الفرن 20د وبصحة والهنا

صح فطوركم

السلام عليكم فاليوم 7 من الشهر الكريم

طبقي اليوم هو ودائما نبقى في اطباق الفرن الاقتصادية و لي يحبوها ولادي بسلامتهم
طبق اليوم رفدت من كتاب الوصفة طبقتها متل ماهي متعودة ساعلت كي نرفد وصفات من الكتب نقس منها مكونات او ساغات نزيج من عندي المهم نلقا البنة لي يحبوها ولادي وان شاء الله تعجبكم انتم تان
مثل ماراه مبين فالصور مراحل تحضير هاد الطبق ولي هو التون بالبطاطا والمقادير هي فالاول نغلي البطاطا لي قطعناها مربعات صغار ومن جهة اهرى نقلي بصلة و2سنينات ثوم مع شوية زيت وقرصة ملح وفلفل اكحل ونخليع يتقلى حتى يدبال
نخلط كل المكونات لي هي بطاكا لي كنا غليناها والبصل وللثوم لي قليناه وتون و معدنوس و زيتون جبن ابيض نخلط الكل مع بعض ونضيف 4 او 5 حبات بيض على حساب الكمية نتاع البطاطا لي تكون عندنا ثم ندهن البلا ونفرغ الخليط فيه ونضيف الجبن المرابي وندخلو للفور لمدة نصف ساعة قيس ما يحكم روخو البيض ثم نشعلو من الاعلى باه يحمار شوية

السلام عليكم في اليوم 8 من الشهر الكريم
طبقي اليوم هو لازانيا وطريقتي خاصة في تحضيرها انا لازانيا ما نغليهاش فالماء نديرها مباشرتا فالبلا بلا ما نغليها وتحضير الصوص هو كالتالي
نقبي بصلة كبيرة او2بصلات 2فصوص ثوم + ملح + فلفل اكحل + رند + زعيترا نخلي الكل يتقلى ثم نضيفلو طماطم حب ونصف ملعقة طماطم مصبرة ثم نضيف الحم المرحي ونخليه 10دقايق من بعد نمرق بكمية كبيرة نتاع الماء هاديك المرقة لي راخ طيب اوراق لازانيا وناكدلكم ان لازانيا طيب بكمية كبيرة من المرق احسن من ان تغليها من قبل وديري كمية صغيرة صوص
انا هاد الطريقة لي معتامدة عليها
بعد ما طيب الصوص نبدا نحط اوراق لازانيا فالبلا فالاول نحط شوية صوص ثم طبقة من لازانيا ثم نزيد الصوص وهنا تحبي ديري طبقة نتاع البيشاميل انا ما نديرهاش بين الطبقات ندير غير الصوص نتاع اللحم المفروم نكمل الطبقات حتى نكمل الطبقة الاخيرة نغطيها بالصوص بيشامال ونضيف الجبن المرابي ونحطها فالفور نصف ساعة الا ربع حتى تشرب مليح المرق

السلام عليكم فاليوم 9 من الشهر الكريم
اليوم طبقي الرئيسي خفيف ضريف بنتي قالتلي ماما شهيت فريت بالجاج او بالحم وكي خاوتها ما يكلوليش الحم درت الجاج باه ياكلوه كامل
وفي الشهر الكريم ولادي ما يحبوش الفريت مقطعة كي العادة ولفتهالهم مربعات صغيرة واح نهار قطعتهالهم مثل العادة ما حبوش ياكلوهالي كانها تبدل البنة

السلام عليكم فاليوم 10 من الشهر الكريم
اليوم ما درتش بلا فالكوشة او جواز اليوم طيبت الحوت قليتو ودوزنتو عادي غير بالملح وفلفل اكحل
ومع الحوت درت خبزمحشي بالسلق +زيتون دينوايوتي+ فطر +لحم مرحي +حبة طماطم مقطعة صغيرة
فالاول قليت بصلة ثم ضفتلها الفطر ثم ضفت الزيتون ثم طماطم ثم لحم المرحي بعد ما يطيبو نطفي النار ونضيف جبن مبشور
اما العجينة عندنا 500غ فرينة 2مغارف كبار زيت وشوية ملح ومغرفة خميرة فورية نبسس الكل ثم نضيف الماء الدافي ونعجنوه مدة 5د ونخليه يرتاح بعد ما يخمر نحر العجينة ونحك عليها الحشو ونلوي عليها العجينة ثم نخليها تخمر وندهنها ونحطها طيب صدقوني هاج الخبز وجبة كاملة ومكملة وحبوها ولادي عجبتهم بزاف

صح فطوركم

ام حمزة22 · 2015-06-18, 15:38

السلام عليكم فاليوم 11 من الشهر المبارك
طبقي اليوم لوبيا خضراء فالفور
انا كنت خايفة ولادي ما يعجبهمش البلا بصخ اعجبهم وعندهم الحق جا بنين ويستاهل التجربة
بعج ما نغلي اللوبيا والبطاطا ونطيب اللحنالمفروم في شوية زيت وملح وفلفل اكخل نبدل نستف الخضرة فالبلا
بعج ما ندهن البلا نحك فلاول الوبياء من بعد نزيد عليها شرائح البطاطا المغلية ثم اللحم المفروم لي كيبتو غير في شوية زيت وملح وفلفل اكحل بعد اللحن نزيك طبقة من البطاطا انت واش حبيتي تكاري السرائخ او ديري غير كيما درت بعد البطاطا نضيف اللوبيا ثم الصوص بيشاميل ثم الجبن المبشور وندخلها للفور غير تحمار برك

السلام عليكم فاليوم 12 من الشهر المبارك
طبقي اليوم كلن من العجائن وعمري مل جربت نطبخ المقارون في رمضان هاد للمرة قلت نجرب ونشوف ولادي الا يعجبهم
يخي عجبهم وماعتارضوش عليه

والطبق عبارة عن مقارون غليتو وحطيتو في بلا بعد ما دهنتو طيبت غير ربع باكي مقرون
ومن جهة اخرى نغلي شوية كروفات باه تتنحالو الريحة نتاعو القاسحة بعد ما غليتو حطيتو في مقلا فيها زيت وثوم وفلفل اكحل نقليهم وبعد ما نقلي المروفات نحيه من المقلة ونحط في نفس المقلة شرائخ سمم الفيلي لي قطعتهم رقاق من بعد نحطهم فوق طبقة المقارون ثم نضيف الصوص يشامال والجبن المبشور وندخلو للفور غير باه يحمار

السلام عليكم فاليوم 13 من الشهر المبارك
اليوم ما درتش طبق درت كيش بدل الطبق الرئيسي
والطريقة هي فالعجينة استعملت عجينت البات بريزي بالزيت للاخت الهام حفضها الله
اما الحشو شوية من الكتاب وشوية من عندي
حمرت الجاج فالزيت وملح وفلفل اكحل مع حبات ثوم قسمت الحبة على2 وحطيتهم مع الجاج بعد ما طاب الجاج وتحمر نحيتو من الطنجرة ودرت في نفس الطنجرة بصلة قطعتها ودرتها تتقلى بعد ما دبالت زدتلها الفطر قيس 19 دقايق ونحيتو من النار
من جهة اخرى درت فالحشو الفطر لي طيبناه + تون + زيتون اخضر + معدنوس +جبن + الجاج لي طيبناه من قبل وقطعناه قطع صغار نخلط الكل ونضيف الصوص بيشاميل ونعمر بيهم الفون كيش ثم ضفنا الجبن ودرناهم فالكوشة

السلام عليكم فاليوم 14 من الشهر المبارك
اليوم اخواتي الكريمات كنت رايحة نطيب سكالوب الداند باني بصح وليدي بدلي البرنامج وليت رحيت السكالوب وغلفت بيه البيض وقدمتو مع الفريت هو يشبح الطبق التقليدي لي يسموه المفشش في حجر مو لاكن ما درتلوش المرق ولادي بسلامتهم يحبو الناشف في ناشف
والطريقة هي اني رحيت السكالوب لي كنت رايحة نديرو باني وما درتلو والو وليدي بسلامتو قالي ما تخلطيلو والو غطيت الحبة نتاع البيض ورمدتها فلفرينة ثم البيض ثم الشابلوغ وقليتهم
[IMG[/IMG]
[IMG[/IMG]

السلام عليكم فاليوم 15 من الشهر المبارك
اليوم كان طبقي شطيطحة لحم والمقادير :نضع اللحم فالطنجرة ونضيفلو زيت وفلفل عكري بالاضافة الى درسة كنت حضرتها بفلفل دريس وثوم وملد ندرس الدرسة نتاعنا او نرحيها بالخلاط الكهربايي ونضيفها للحمونخليه يتقلة وساعة على ساعة نضيف الماء الساخن باه يطيب اللحم ما ننساش نضيف الحميصة انا كنت طيبتها من قبل وحطيتها فالمجمد
ولادي بسلامتهم ما يكلوش الشطيطحة درتها على جال اختي وزوجها جاو فكرو معانا
وولاجي بسلامتهم ووليد خالتهم دبرو عليا نحضرلهم اكلة شبابية وهي croque monsieur وحضرتهملهم بالجاج واللحم المفروم
ندهن قطعة الخبز الخاص لدالك بالبيشاميل ثم نضيف الحم او الجاج ثم نضيف الجبن ثم القطعة 2 من الخبز ثم للبيشاميل وفي الاخير الحبن وندهلهم الفرن
والصور تبين دالك

السلام عليكم فاليوم 16 من الشهر المبارك
اخوات الكريمات اليوم ما درتش الطبق عندي اكل امس وزدت معاه سردين محشي بالبيض والبصل والمعدنوس تبلتو بملح وفلفل اكحل
نقيت السردين ونحيتلو شوكو من بعد حشيتو الحشو لي دكرت وغلقت الحبة بالخبة التانية ورمدت فالفرينة وقبيتو

السلام عليكم فاليوم 17 من الشهر المبارك
طبقي اليوم هو طبق عاصمي وهو سفيرية والمقادير هي
نحط الجاح في طنجرة مع شوية زيت وبصلو وملخ وفلفل اكحل وقرفة نقلي الكل ونخليه يكيب بلعقل مع اضافة الماء ساعة على ساعة ختى يطيب الجاج ما ننساش الحميصة انا طيبتها من قبل وحطيتها فالمجمد في اخر الطبخة نحطها
من جهة اخرى نشمخ الخبز اليابس ونعصرو مليح ونرحيه في رحيوة نتاع الخضرة او الروبو حتى ينطو ويصبخ عجينة نضيفو لهاد العجينة قرصة ملح وقرفة ونصف مغرفة قهوة خميرة الحلوى وبيض وحبات جبن وماء زهر نخلط الكل ونكون كويرات صغار ونقليهم وفي التقديم نحط فالصحن حبات السفيرية والجاج ومرق

مع هاد الطبق درت فريت بالمعدنوس والبصل والبيض
نقلي البطاطا ثم نحطها في مقلا بدون زيت لان الفريت فيها زيت ثم نفرغ عليها الخليط لي درناه بالبصل والمعدنوس والبيض وملح وفلفل اكحل بعد ما فرغنا الخليط على البطاطا نخليه يحكم روحو شوية من بعد نقلب البطاطا ونخليها طيب من الجهة التانية بعج ما طيب نقلبها على صحن التقديم

صح فطوركم

ام حمزة22 · 2015-06-18, 15:39

السلام عليكم فاليوم 18 من الشهر اامبارك
اليوم درت طبق جديد بالقرعة خديتو من كتيب كان عندي قديم والطبق يسموه فلون نتاع القرعة راح يعجبكم حتى لي ما يحبش بنة القرعة مثلي راح يحب هاد البلا
فالاول نقلي بصلة ونضيفلها ملح وفلفل اكحل وزيت ثم نضيف قرعة مقطعة مربعات من جهة اخرة نوجد الصوص لي متكونة من بيض و جبن شاف وكريمة فريش لي اول مرة نستعملها في اطباقي نضيف الملح فلفل اكحل ونعناع بعد ما نضرب الكل نخليه بجيه ونولو للقرعة نحطوها في بلا مدهون بالزبدة ثم نضيف الخليط نتاع البيض والفرماج ثو نضيف الشابلوغ فلاخير ونحطها فالفور24د

مع هاد الطبق طيبت ابا نتاع الجاح قليتهم في زيت وثوم بعد ما حمارو شوية ضفتلهم نصف كاس ماء حتى يطيبو من بعد نضيفلهم معدنوس ونخليهم 5د ثم نطفي عليهم
نخليكم مع الصور

السلام عليكم فاليوم 19 من الشهر المبارك
اخواتي ااكريمات اليوم كان كبقي فولوفو كنت سبق وقدمت المراحل

السلام عليكم فاليوم 20 من الشهر المبارك
طبقي اليوم جبت من كتاب كان عندي ودرت فيها بعض التغييرات في مكان البصل استعملت الثوم وجا طبق روعة
عندنا لحم مفروم ضفتلو ثوم وكمون وملح و درتو كويرات وقليتو في شوية زيت من بعد نخيتو من المقلة حطيتو في بلا
والزيت لي قليت فيها اللحم ضفتلها شوية ماء وخليتها تغلي مدة 10 دقايق وضفتها فوق اللحم وضفت البيض ودخلتو للفرن لمدة 15دقيقة
نخليكم مع الصور

السلام عليكم فاليوم 21 من الشهر اامبارك
طبقي اليوم بطاطا بيري محشية بالتون
طبق ساهل ماهل وبنيييين
بعد ما نغلي البطاطا ونرخيها نحط طبقة من البيري فالبلا ثم نضيف طبق من التون ثم الطبقة التانية من البطاطا ونضيف الجبن ومدخلها للفور نحمار غير من الاعلى

السلام عليكم فاليوم 22 من الشهر المبارك
اليوم طبقي كان روز بالحوت وااكروفات
نغلي الروز ونقطرو وندهنو بزبدة ونحطو في بلا
من جهة اخرى نحضر الصوص تومات ولي كنت قدمت مراحلها في اولءل رمضان
اما الصوص كروفيت درتها بيضاء والطريقة نقلي ثوم في شوية زيت وملح وفلفل اكحل بعد ما يتقل نضيف نصف كاس ماء حتى يطيب وتختار المرقة الا شفناه يخص ماء نضيفلو شوية لاكن ما نكثرش باه تقعدلنا المرقة خاترة وبنينة وقربل ما نطفي النار نضيف شوية معدنوس ونخليه 5دقايق ونطفي النار
وحبيت نقوللكم خياتي ان مش لازم تكون كمية كبيرة نتاع الحوت او الاحم باه جي الماكلة بنينة بكمية قليلة تقدري ديري طبق بنين بزاف بزاف

صح فطوركم

ام حمزة22 · 2015-06-18, 15:40

السلام عليكم فاليوم 23 من الشهر اامبارك
طبقي اليوم هو بطاطا فالفور محشية باللحم المفروم
نقلي بصلة في شوية زيت وملح وفلفل اكحل بعد ما تدبال نضيف اللحم المفروم بعد ما يطيب نخليه بجيه ونحضر البطاطا نقطعها دوائر ثم نقليها
ناخد بلا نستف فيه طبقة من البطاطا ثم طبقة من اللحم المفروم ثم نضيف جبن دائب او مبشور او نقدر نستغنا على الجبن
ثم نضيف طبقة من البطاطا زنزيد اللحم ثم الجبن ثم نغطي بطبقة من البطاطا ثم نضرب 3او 4 بيض ونضيفهم على البطاطا ثم نضيف جبن مبسور وندخلها للفور لمدة 20د

السلام عليكم فاليوم 24 من الشهر اامبارك
اخواتي وبناتي العزيزات اليوم ما درتس حاجة كبيرة كانت فعدتلي شوية ماكلة من البارح وزدت معاها مقلة بطاطا وسكالوب
وطريقتي في تحضير السكالوب باه يجي طري وبنين هي
نحط سكالوب في ساشي ونضرب بالحلال وهادا باه يقعط طري فالطهي اما التوابل نديرلو غير الملح ثم نحطو في مقلة فيها القليل من الزيت نحط سكالوب فتلمقلة امنا نخليهم ثانية غير كي يتبدل لونهم نحيهم من اىمقلات كي نكنل كامل سكالوب لي عندي نعاود نرجع سكالوب للمقلة باه يكتسب اللون الدهبي بدون ما يطول فالمقلاة ﻻاه ما يجيش يابس وباه يكتسب الﻻون اادهبي بلا ما يطول فالمقلات نقوم بتحريكه وهو فالمقلات وهاكدا نتحصل على سكالوب طري وبنين

السلام عليكم فاليوم 25 من الشهر المبارك
طبقي تليوم كان مقوم وطريقة تحصيره هي
نضع اللحم في طنجرو ونضيفلو سوية زيت وفلفل تكحل ودرسة متكونة من كمون وملح وثوم نخلي الكل يتقلى طبعا ما ننساش الحميصة انا دابما نشيفهت فالاخير لاني نكيبها ونخبيها فالمجكد
من جهة تخرى نحضر كويرات اللحم الفروم نشيفلو نفس اادرسة لي درناها غالصوص لي متكونة من ثوم وملح وكمون نخلط مليح ونكون كويرات لي راح نضيفها للمرف بعد ما يطيب تللجم
[IMG[/IMG]

السلام عليكم فاليوم 26 من الشهر المبارك
اليوم حمرت نصف جويجة وطريفة تقطيع الجاجة تصيبوها في هاد الرابطhttps://www.djelfa.info/vb/showthread.php?t=1703968
ومع الجاج محمر درت فريت وزدت معاه خبيزات باللحم المرحي لان واحد من ولادي ما يكلوش الجاج

السلام عليكم فاليوم 27 من السهر المبارك

طبقي اليوم كان وريدات البطاطا
نغلي البطاطا ونرحيحا ونفرش جزء منها في بلا ثم نزيد عليه طبقة من اللحم اامفروم لي كنت طيبتو في شوية زين مع حبة بصل
وفوق طبقة تللحم نضيف الوريدات لي شكلتهم ببوشات الحلواني والتزيين كل واحد ودوقو انا درت زيتون وفرماج وبنت الزيتون جات رووووعة معاه

السلام عليكم فاليوم 28 من الشهر المبارك

اليوم حضرت كريب محشيين فالكوشة
مقادير ااكريب هي : 2حبات بيض كاس ونصف حليب 3مغارف كبار زيت وكاس ونصغ فرينة نضرب ااكل ونتحصل على عجينة سائلة
من جهة اخرى نحضر الحشو اامتكون من صدر الجاج نحمرو فاامقلة نضيفلو ثوم ملح وفلفل اكحل وسوية زيت بعد ما يطيب ويتحمر نحيه من اامقلة وفي نفس الزيت نحط بصلة تتقلة مقطعة رقيقة نضيف زيتزن اخضر وفطر ننخليهم يطيبو في اناؤ نحط فيه جبن سائل و3او ا4 مغارف كرام فراش نضيف الجاج مفتت وزيتون والفكر لي طيبناهم ونضيغ معدنوس
نحشي ااكريب ونغلقهم ونستفهم في سنية ونضيف عليهم كرام فراس وجبن مبشور وندخلها للفرن

صح فطوركم

ام حمزة22 · 2015-06-18, 15:41

الصفحة *7* توجد اطباق ام سوهيل حفضها الله
....

....

.....

...

ام حمزة22 · 2015-06-18, 16:50

لبنات بعد ما نكمل اطباقي فالمساء راح نكمل الموضوع بادن الله

والردود المحجوزة للاطباق القادمة الا حيانا ربي

ان شاء الله يعجبكم موضوعي

تحياتي للجميع

صح فطوركم

ام سوهيل · 2015-06-18, 17:49

حبيبتي ام حمزة يعطيك الصحة وتصمي بي الصحة والهنا انتي ووليداتك ربي يخليهملك براك الله فيك راني نقارع البقيت الموضوع

وعندي اقتراح كان قبلتي به ام حمزة ممكن كل وحدة من الاخوات تحطلنا كليوم طبق من عندها هكدا باش نتبدلو الخبرات والمهرات

وربي يوفقك وتصومي بي الصحة

oum fadoua · 2015-06-18, 18:28

مشاء الله عليك ام حمزة الله يعطيك الصحة
صح فطططططططططططططططططوركم

zaho207 · 2015-06-18, 19:03

Rabi ykhalik tata 5w5 3lik saha ftourekom kamel

ام حمزة22 · 2015-06-18, 19:13

اقتباس:

المشاركة الأصلية كتبت بواسطة ام سوهيل

حبيبتي ام حمزة يعطيك الصحة وتصمي بي الصحة والهنا انتي ووليداتك ربي يخليهملك براك الله فيك راني نقارع البقيت الموضوع

وعندي اقتراح كان قبلتي به ام حمزة ممكن كل وحدة من الاخوات تحطلنا كليوم طبق من عندها هكدا باش نتبدلو الخبرات والمهرات

وربي يوفقك وتصومي بي الصحة

الله يسلمك حبيبتي ام سوهيل شكرا لمرورك الطيب مشكورة على الدعاء لك بالمثل

واقتراحك على العين والراس وراح نخلي رد من الردود لوضع اطباقي باه كل وحدة فيكم تحب تحط اطباقها تتفضل وراح نحط كل اسم عضوة امامها رقم الصفحة لي موجود ة فيها الاطباق وجي ساهلة لكل واحد يدخل يتصفح الموضوع وكل الاطباق تبقى فالصفحة الاولى اطباقي وارقام صفحات اطباقكن

واش رايك ام سوهيل
ان شاء الله قدرت نوصلك الفكرة

تحياتي الحارة

صح فطوركم