البسملة1
بناءا على طلب ام ماجد وازهار وام محمد تاج وجميع الاخوات لي عجبوهم الوصفات لي حطيتهم من قبل زدت ليوم جمعتلكم بعض هاذي الوصفات الرائعة نتمنى انها تنال اعجابكم
بريوش بالتونة على شكل قلوب
العجينة
,الفرينة 300غ, ملعقة كبيرة حليب بودرة, 2ملعقة كبيرة زيت, ملح ملعقةصغيرة خميرة فورية, ملعقة صغيرة سكر, كاس ماء دافيء( اكثر او اقل)1 بيضة, ملعقة كبيرة زبدة طرية...للدهن.1صفار بيضة+ ½ م ص خل.. لتزيين... 2ملعقة كبيرة تونة,2ملعقة كبيرة مايوناز,2ملعقة كبيرة ذرى, معدنوس مقطع
طريقة التحضير
نضع جميع مكونات العجينة ما عدا الزبدة والماء في العجانة وتخلط، ثم نضيف الماء، تعجن لبضع دقائق وتضاف الزبدة الطرية مع العجن حتى تمزج جيدا مع العجينة. تغطى العجينة بالبلاستيك الغذائي وتترك لتختمر ويتضاعف حجمها،ثم نزلها براحة اليد و نشكل كويرات صغيرة و نتركها ترتاح 5 د. نبسط العجينة, نلفها,نقسم الحلبوش في الوسط ونلف كل طرف نحوى الداخلو نشكل القلوب، نضعها في صينية نغطيها و نتركها تختمر لمدة نصف ساعة على الأقل نخلط جميع مكونات الحشو ، ندهن القلوب بصفار البيض و نضع القليل من الحشو و ندخلها الفرن مسخن مسبقا على 180° لمدة 25 دقيقة تقريبا
طاجين الباي
المكونات :
300غ لحم المفروم
9 البيضات
150غ ريكوتا او جبن ابيض
200غ من السبانخ ( سلق)
100غ معدنوس
150ع جبن مبشور
1 بصلة مفرومة
3 سنات ثوم
زيت الزيتون
الملح والفلفل وكركم
الإعداد :
نقلي اللحم المفروم في زيت الزيتون مع البصل والثوم نضيف الملح والفلفل بعدما يطيب نقسمو الى 3 أجزاء متساوية , نغلي السلق ثم نقطرو من الماء ونضيفلو ½ ملعقة صغيرة من الكركم والملح والفلفل وجزء من اللحم و 3 بيضات و نمزج الكل مع بعض
نوزع الخليط في بلا مدهون بالزبدة ونضعه في الفرن لمدة 5 دقائق على 180 درجة
في نفس الوقت،ناخذ الجزء الثاني من اللحم المفروم ونضيفلو 3 البيض والريكوتا والجبن المبشور و نمزج الكل ,نخرج الطبق من الفرن ونوزع الخليط فوق الطبقة الاولى ونرجعو الفرن 5 دقائق اخرى
نضيف 3 بيضات للجزء الثالث من اللحم المفروم والمعدنوس المفروم نخلط جيدا ونفرغو فوق الطبقتين ونرجعو للفرن يطهىلمدة 10دقائق ,بعدما يبرد نقطعو
طاجين الخوخ
كورات البطاطا محشية باللحم المفروم في الفرن
المكونات
-2حبات بطاطا
-200 غ لحم مفروم
-50غ جبن ابيض
-معدنوس مقطع
-100غ جبن مبشور
-ملح وفلفل اسود
-فرينة
-2بياض بيض
-زيت للقلي
بالنسبة لصلصة الطماطم
-1بصلة مفرومة
-4سنات ثوم
-1طماطم مقشرة ومرحية
-1ملعقة كبيرة معجون الطماطم
-2ملاعق زيت الزيتون
-ملح وفلفل وزعيترة
-1ملعقة صغيرة سكر
-2ورقات رند
نقشر البطاطا ونقطعها ونديرها تغلي في الماء والملح ثم نقطرها ونرحيها ونضيفلها الجبن الابيض ونخلط جيدا,
نضيف للحم المفروم الملح والفلفل ونشكل كورات صغيرة ونقليها في الزيت
نبلل يدينا بالزيت ونشكل كورات من البطاطا ونحشيها بكورات اللحم ونمررها في بياض البيض ثم في الفرينة
نسخن الزيت ونقليهم ثم ندهن البلا بالزبدة ونستفهم فيه ونسقيهم بصلصة الطماطم ونرش المعدنوس و الجبن المبشور فوق كل كرة وندخلهم الفرن حوالي 10دقائق
دجاج مقرمش
نحتاج الى :
*1 صدر دجاج* بيضة* ملقعة اكل فرينة*بهار دجاج* فلفل اسود* ملح* عصير ليمون* نقطع الدجاج الى مكعبات نضيف باقي المكونات نخلط ونغطيها ونتركها لمدة ساعه في الثلاجه نسخن الزيت في المقلى نضع قطع الدجاج و نتركها تتحمر جيدا حتى تصبح مقرمشه نصفيها على ورق المطبخ و تقدم
ملفوف البطاطا
المقادير
2حبات بطاطا أو على حسب أفراد العائله
الحشو لحم مفروم مطبوخ
(لحم مفروم +بصل مفروم+2م ك زيت ,ملح وفلفل اسود +معدنوس مفروم)
الطريقه
نقطع البطاطا شرائح رقيقه بالطول ثم ننقعها في الماء وملح حتى ترتخي ويسهل لفها تقريباً نصف ساعه او اكثر ,ثم نحشيها باللحم المطبوخ و نقوم بلفها وتثبيتها بعود أسنان ثم نغمس الأطراف في الفرينة ثم البيض ثم لشابلوغ (البقسماط)و نقوم بقليها في زيت ساخن
فريت اوملات البطاطا المبشورة والمحشية باللحم المفروم
المكونات
بطاطا , لحم مفروم , فرماج , 3بيضات , معدنوس , ملح وفلفل , نصف كيس خميرة كيميائية , قليل من الزيت
نطهي اللحم المفروم مع قليل من الزيت والملح والفلفل والمعدنوس
نبشر البطاطا في الجهة الرقيقة , ونضرب 3 بيضات +ملعقتين زيت +ملح+فلفل + نصف كيس خميرة كيميائية نضربهم بالباتور حتى يتضاعف حجمه, نضيفلو البطاطا المبشورة +المعدنوس و نخلط الكل مع بعض
ناخذ مقلة ما تلصقش نحط فيها قليل من الزيت نفرغ نصف كمية البطاطا ثم نوزع اللحم المفروم ثم قطع من الجبن أي نوع ثم نغطي بالنصف الباقي من البطاطا ونحط فوقها قطع صغيرة من الزبدة و نغطيها بالغطاء او بصحن كبير ونضعها فوق النار على أدنى درجة حرارة ونتركها تطهى حتى تتحمر من تحت ثم نقلبها على الجهة الثانية ونزيد نغطيها و نخليها تطيب من تحت وتتحمر
وردات البطاطا
تحضير الحشو
نضع زيت في الطنجرة على النار نضيف بصلة متوسطة مفرومة نقلب البصل الى ان يذبل نضيف اللحمة المفروم ,الملح و الفلفل الاسود ,نحرك من حي للاخر حتى يطيب اللحم ,نضيفلو المعدنوس و نتركه جانبا الى ان يبرد ,ثم نضيفلو 3حبات بيض ,يصبح الخليط شبه سائل,نقطع البطاطا على شكل دوائر ونقليها
طريقة تشكيل الوردات
نضع في قوالب المادلان او الكب كيك دائرة من البطاطا في القاع ثم نقوم بتستيف دوائر البطاطا على الاطراف متراصة بجنب بعضها للحصول على شكل الوردة ..
نضع ملعقة من الحشوة في وسط البطاطا و ندخلهم الى الفرن متاخذش وقت طويل كلشي طايب, يطيب البيض فقط ,نخرجهم ونرش داخل الوردات قليل من الجبن المبشور, ثم نعيدهم الى الفرن حتى يذوب الجبن
طاجين الجبن بطريقة جديدة
الصوص...
بصلة مبشورة-2 سنان ثوم-فلفل اسود -ملح-توابل مشكلة-لحم او دجاج او حتى عضم المهم انك تحصلي على صوص بيضاء ولديدة
نقليها حتى يدبل البصل والثوم ونمرقهاو نغطيها ونخليها على نار هادية
حتى ينضج اللحم و تثقال الصوص, نقلي شوية فطر في الزيت او الزبدة.
من جهة اخرى تاخدي صدر دجاج او ديك رومي تحطي عليه ملح فلفل شوية ثوم وترحيه وفي صحن اخر تحطي لحم مفروم مع بصل مبروش و معدنوس و ملح وفلفل وخبز يابس مرحي وبعدها تجيبي بلاستيك وتحطي عليه اللحم المفروم الاول ثم صدر الدجاج المفروم ثم الجبنة بطول وتلوي بحيث تحصلي على اسطوانةتدهني ورق الومنيوم بالزبدة و تغلفيه بها وتقفلي الجناب مليح و اعملي فتحة بالسكين في الوسط وحطيه في الفرن وقلبيه من حين لاخر حتى يطيب حوالي 45د.طلعيه وخليه يبرد شوية وقطعيه دوائر .
نحط الصوص في صحن التقديم مع قطعة اللحم و الفطر و دوائر اللحم المحشيه ونزين منتصف كل دائرة بالجبنة المبشورة ورشة من المعدنوس
وعصرة ليمون خفيفة
يمكن تحطي الصحن شوية في الميكرويف باه تدوب الجبنة
خبز بعجينة 10 دقائق
طريقة سهلة وسريعة للحصول على خبز لذيذ وخفيف
العجينه تتكون من مرحلتين
المرحله الاولى
نخلط 2 كاس فرينة + 2 ملعقة اكل سكر + 2 ملعقة اكل خميره فوريه + 3 ملاعق كبيرة حليب بودرة(لحضة) + نصف ملعقة كبيرة ملح + 2 كاس ماء دافي
نتحصل على عجينة سائلة ونتركها عشر دقايق تخمر
المرحله الثانيه
نهبط العجينة ونضيفلها نصف كاس زيت + 3 كيسان فرينة ونحلط باليد او العجانة حتى نتحصل على عجينة طرية ,نبلل يدينا بالزيت ونشكل الخبز حسب الرغبة ,نشعل الفرن والوقت الي يسخن فيه يكون الخبز اخمر مرة ثانية ,ندهنو بخليط صفار البيض مع قليل من القهوة ,ممكن نرش عليها حبة حلاوة او السانوج وندخلو الفرن ونخليه يطيب حتى يحمار نتحصل على خبز رائع
والآن لي تحب التورتات تتفضل
تورتة بالكرام ياتيسيار والكرام شانتيي
مقادير الكيك
4 البيضات
120غ سكر
3م ك ماء
م ص خميرة الحلوى
م ص لافاني
120غ فرينة + 2 م ك نشا /مايزينة/
الكرام باتيسيار
كاس حليب (ربع لتر) +علبة كرام باتيسيار +صفار بيضة نخلط الكل فوق النار حتى تعقد
كرام شانتيي
100غ بودرة الشانتيي + كاس حليب بارد جدا جدا
نضرب بالباتوغ حتى تطلع ندخلها الثلاجة حتى وقت الاستعمال
التحضير
نضرب البيض والسكر والفاني حتى يتضاعف حجمو , نزيد الماء ببطئ ونضرب ,نضيف الفرينة والمايزينةوالخميرة مغربلين ونقلب من الفوق لتحت بالسباتولا ,نفرغ الخليط في مول دائري و ندخله الفرن الساخن على 180°حوالي 15د .
بعدما تبرد الجينواز نقسمها على اثنين ونشربهم بالسيرو ,نضع الكرام باتيسيار على القطعة الاولى ونرجع عليها القطعة الثانية ونغلفها كاملة بالكرام شانتيي وندخلها للمجمد حتى تجمد لكرام باش كنفرغ عليها الناباج دافي متخسرش, نذوب الناباج فوق النار ونضيفلو ملون غذائي اصفر ثم نفرغو فوق التورتة ونزين الجوانب برقائق اللوز محمر ونزينها بحبيبات الشوكولا وباي نوع فاكهة انا عملت الكرموس
تورتة بشوكولا والموز
المقادير
4 بيضات
120مل زيت ( نصف كاس)
120غ فرينة
200 غ سكر
ملعقة صغيرة خميرة الحلوى
50غ شوكولا
3 ملاعق كبيره قهوة نيسكافيه او قهوة عادية
السيرو:
2 كيسان ماء
كاس سكر
نضعهم على النار 5دقائق ونطفي
للتزيين
كرام باتيسيار
2 حبات موز
قناج الشوكولا (100غ شوكولا+100غ كريمة طازجة’’ كرام فراش’’)
رقائق اللوز (لوز ايفيلي)
حبيبات الشوكولا
طريقة التحضير
نضرب البيض مع السكر بالباتوغ حتى يبياض ويتضاعف حجمه تم نضيف الزيت ثم القهوة و الشوكولا ذايبة ثم نغربل الفرينة مع الخميرة فوق الخليط شوية بشوية ونخلط بالسباتولا
نسكب الخليط في القالب و ندخله الفرن الساخن على 180°حوالي 15د .
بعدما تبرد الجينواز نقسمها على اثنين ونشربهم بالسيرو ,نضع الكرام باتيسيار على القطعة الاولى ثم نضع فوقها دوائر من الموز ونغطيها بالقطعة الثانية ,نذوب الشوكولا مع الكرام فراش وفي الاخير نضيف قطعة زبدة ونخلط جيدا ونسكبها فوق الجينواز والاطراف ونزينها باللوز ايفيلي ودوائر الموز مزين بحبيبات الشوكولا
تارت بالبسكوي طعم روووووعه
المقادير
بسكوي من اي نوع 2علب
كرام بتسيار
كرام شانتيي
حليب ,علبة شوكولا ,رقائق اللوز,2موز
نحضر كرام بتسيار . ½ لتر حليب + 130غ سكر عادي+ 60غ مايزينة+ 1بيض+ لافاني .نضرب الكل في الخلاط الكهربائي ثم نفرغو في كاسرول ونضعها فوق النار مع التحريك المستمر حتى تعقد ,نتركها تبرد ثم نضربها بالمضرب الكهربائي جيدا,نطلع الشانتيي ونمزج نصفها مع الكرام بتسيار ونضيف لنصف الاخر ملعقة كبيرة كراميل
ندخلهم الثلاجة ½ساعة . نشمخ البسكوي في الحليب ونستفو فوق طبق التقديم و نضع طبقة من الكريمة ثم طبقة من البسكوي ثم طبقة من الكريمة ثم البسكوي ثم اخر طبقة من الكريمة ونضع فوقها دوائر الموز كما في الصورة
ثم اخر طبقة من البسكوي ونغطي الكل بكرام شانتيي ونزين باللوز افيلي اي رقائق اللوز و بالشوكولا نضع التارت في الثلاجة على الاقل 4 ساعات....
جينواز بكريمة الليمون
المقادير :
( الجينواز )
4البيضات
120غ السكر
120غ فرينة
ملعقة صغيرة خميرة الحلوى
ملعقة صغيرة فانيلا
ذرة ملح
( كريمة الليمون )
100غ سكر قلاصي
عصير 2 حبات ليمون
50غ من الزبدة
2 حبات بيض
قشور ليمونة
( السيرو )
نصف لتر ماء
125غ سكر
قليل من الفانيلا
( التزيين)
كريمة الشانتيي ( نطلع 100غ شانتيي غبرة مع كاس حليب بارد جدا)
اللوز ايفيلي محمر
طريقة تحضير الجينواز :
اخفقي البيض و السكر و الفانيلا وذرة الملح جيدا لمدة 10 دقائق حتى يبياض الخليط ويتضاعف حجمه ويصبح رغوي
اضيفي الفرينة و الخميرة مغربلين كالمطر اخلطي برفق بواسطة ملعقة
افرغي الخليط في مول عليه ورق الطهي او مدهون بالزبدة و مرشوش بالفرينة ثم الى الفرن على 180د حولي 30دقيقة
طريقة تحضير كريمة الليمون :
حضري كل المقادير اخلطيهم في كاسرونة حركي على نار هااااااادئة مع التحريك المستمر دون التوقف حتى تخثار الكريمة وتعقد ,صفيها بواسطة مصفاة و اتركيها تبرد جيدا
طريقة تحضير السيرو :
نغلي الماء مع السكر 5 دقائق نضيفلو الفانيلا ( يستعمل باردا لتبليل الجينواز)
طريقة التزيين:
قطعي الجنواز لما تبرد الى قطعتين بللي الاولى بالسيرو ثم اطليها بكريمة الشانتيي ثم القليل من كريمة الليمون و ضعي عليها القطعة الثانية من الجينواز بللي بالسيرو اطلي الجوانب و السطح بكريمة الشانتيي ثم زينيها باللوز ايفيلي ثم اطلي السطح بكريمة الليمون ثم خدي ملعقتين من كريمة الليمون اضيفي اليها الكاكاو و اخلطي و شكلي دوائر بواسطة لابوش ادوي و زيني بالكوردون من الوسط نحوى الاطراف
ان شاء الله نكون وفقت في اختيار الوصفات وتنال اعجابكم انتظروني في الجزء الثالث ان شاء الله دعوة خير منكم تكفيني
( تقرير عن مشاركة سيئة )، و الموجودة أسفل كل مشاركة .
2014-12-11, 14:32
تابع لوصفات رائعة منقولة الجزء الثاني
العرض العادي
