اخى الكريم اولا ندعيلك بالتوفيق والبركة وانو ربي يسهلك ك
اول نصيحة متروحش وحدك خاصة لو كنت من النوع الخجول ادي الوالدة تاعك وزوجة الاخ مثلا او خالة او عمة المهم اشخاص يشرفوك وتثق فيهم وتدير فيهم ثقة ومتكثرش
تقدر تدى معاك احد اخوتك مثلا وتقعدو في البداية في مجلس للرجال قبل دخول العروس راح تتكورج بيهم انت وواش تحب
ادى معاك علبة حلوى باتيسري وزهور فال مليح لكما في البداية حتى انو اذا لسمح الله مكتبش ربي متحسش انو كلفت اهل الفتاة وثقلت عليهم لانو بكل تاكيد رايحين يتعبو في التحضيرات والحلوى وتنظيف البيت وو راك تعرف العادات
ادي معاك مصحف صغير اعطيه للفتاة حتى لو لم تعجبك وفي حالة عجباتك زيد عليه حاجة بسيطة رمزية دليل قبول عطر مثلا
نصيحة اتفقا على كتمان الامر خلوه سري حتى تتفقو ويتم اعلان الخطبة
اما باقي الخطوات عادى ادخل انت والوالدة
تقعد انت في مجلس للرجال مع خوها او باباها والنساء وحدهم في انتظار العروس
لما تدخل العروس تقعد مع اهلك شويا ثم يعيطولك تروح للصالون تشوفها في حضور امها او وليها ياش متحسش يالاحراج
تقعدو دقيقتين تشوفها وعلى الاغلب ماش راح تشوف مليح == اغلبية الخطاب يقولك مشوفتهاش بعد اول جلسة اما بسبب الاتباك او الخجل او ربما لوجود العائلة ==
عموما متركزش بزاف مجرد يكون القبول بيناتكم وخلى التفاصيل او الاوصاف امر تناقشه مع النساء ممبعد يعنى طويلة قصيرة رقيقة سمينة هذيك تناقشها ممبعد مع اختك او امك لا تحرج الفتاة لان البعض من الرجال يتصرفو تصرفات محرجة مثلا التعلق على الشكل قدام البنت كمثال يسالها عن الوزن او النظارة اللى لابستها او يعلق عن اي امر من امور الشكل مما قد يتسبب بالاحرجا للفتاة مجياش خلي هذى الاسئلة للنساء وصيهم فقط اذا رغبت واذا كان الامر لا يهمك يكون احسن وافضل
اتكلمو في النقاط الكبيرة والمهمة فقط الاسم السن الوظيفة
تقراي متقرايش تخدمي متخدميش
المهم اطرح عليها الاسئلة اللى حابها دون مبالغة لان التفاصيل الاخري اتركها للنساء هوما يناقشوها لان التفاصيل هى اللى ممكن تخلى الفتاة تدى عليك نظرة ماشي مليحة اذا سالتها اسئلة محرجة وممكن تؤدى للرفض خلى الاحترام هو اللغة الوحيدة بينكما وخير الكلام ما قل ودل اذا حدث قبول اول مرة يكفي المرة الجاية تناقشو في التفاصيل
يعنى شوف انت اخلاقها ودينها وكيفاش تتعامل واذا رزينة ومحترمة في الكلام وغيرها من امور
شوف هيئتها
اذا تم القبول على بركة الله توكل على الله مباشرة بعد الاستخارة والاستشارة لانو اذا تاخرت راح يبدا التردد
وممبعد خلاص اذا تم القبول خبروهم مباشرة او بعد مدة
وربي يكمل ويوفق