لازانيا على الطريقة الايطالية +من السكاكر الملونة الى الباستا الملونة

fatimazahra09 · 2014-06-16, 00:03

السلام عليكم

كنت من قبل علقت على موضوع طرحاتو اخت في المنتدى في ما يخص الازانيا لي تباع او بالاحرى المعجنات الخاصة بـ les gratins de pate
انا حقيقة شريتهم مرة وندمت و شريتهم محليين .... و من هداك النهار عجائني كامل في البيت وصدقوني طعمهم غير الطعم الكومارسيال ..... ديرو الفرق برك بين الكسكس المفتول جديد وطايب في نهارو و الكسكس اليابس
المهم وعدت باش نوريلكم الطريقة الصحيحة لصنع اوراق الازانيا و من البلد الاصلي لها ....
مانطولش اكثر وهادي المرة بدون مقدمة
عجينة الازانيا الايطالية جي خضراء اللون بفعل سبانخ وهادي الطريقة لي تخدميهم بيهاورايحا نحطلكم كتكملة ومانبخلش عليكم باربع طرق اخرى لتلوين و تزكية الباستا كيما يقولولها الايطاليين وبشوية نتاع مجهود رايحا تحصلي على عجائن
originales ... وخاصة ادا خلطنا شحال من لون و دوق في طبق واحد ( رايحا نحطها وصفة و بالصور انشاء الله الرحمان الرحيم )
الاعشاب........................................... ............................ للون الاخضر المنمش
و البيتراف .................................................. .............................للون الوردي
و الطماطم .................................................. ..........................للون الاورنجي
والسبانخ او السلق لانهم ماشي كيف كيف...................... للون الاخضر الموحد
والزعفران .................................................. .............................للون الاصفر
وما نقوللكمش على الروائح الزكية .....
وما تخافوش مانيش رايحا ندورها طاليانية

للعجينة الموحدة الخضراء ( لي خدمت بيها الازانيا ):
تبداي تحظري السبانخ قومي بطهيهم 2 د في ماء مملح او ادا حطيتي السلق خليهم 5 د و تقطريهم حطي 250غ تكفي و تصبي الماء البارد عيهم و تعصريهم مليح مليح من الماء نتاعهم ... و ترحيهم ادا حبيتي حتى في سيار ولا شوكة ... خلطيهم مع 300غ فرينة لي تحطيها في ليان واسع و تكسري 3 بيضات متوسطين في الوسط ( وهنا المعيار المحدد للعجائن انك لكل 100غ فرينة تحطي 1 بيضة )و قرصة مليحة نتاع ملح و 1 الى 2 م ك زيت الزيتون حسب الرغبة ...خلطي قبل باشوكة بلخف ومن بعد عاد بيدك مليح اعجني مليح حتى تشكلي كرة ولاكان شفتي مازال خاصة الفرينة زيدي ...حطي العجينةعلى الطاولة وتكون مرشوشة بالفرينة وابداي براحة اليد تخبطي فيها هادي العملية تسمى بفريزي لابات fraisez la pâte
وبداي كملي وابسطي العجينة بهاد الطريقة و مرة على مرة اثنيها و عاودي براحة اليد اخدميها ...كملي هاكدا 5د الى10 د حتى تولي سوبل و طرية و ادا كانت عندك ماشينة البقلاوة خفي لمي العجينة بيدك حق لي دخلي المكونات في بعضها و حليها فيها وعاودي اثني على زوج وعاودي فوتي فيها هاكدا تريح العجينة وتريحي حتى نتي معاها ....
غطيها بسربيتة وخليها تريح 1 سا ...من بعد اقسميها بمقدار البونية نتاعك و شكليها كريات و حلي كل وحدة بالحلال هو الاول على طاولة مرشوشة بالفرينة رقيهم قدر المستطاع وادا بالماشينة حلي رقم 6 او 8 ادا كنت حابة ارق لكن ننصحك تتوقفي في 6....لان الخدمة نتاع الصح راها جاية القدام
الطياب المسبق لعجينة الازانيا:
قطعي بالجرارة مربعات 10/10 سم او اقل كيما بغيتي و ديري قدرة نتاع ماء يغلي وفيه الملح الكافي ...كي تغلي ابداي ارمي بالخمسة الى ستة مربعات على خطرة و استناي حتى يطفو على الواجهة .... مدة 1د ونصف الى 2 د لااكثر هادي هي طريقة طياب العجائن الطازجة
كيما يقولو الايطاليين أل دانتي al dente
و في ما يخص العجين الكومارسيال 5 د و على حساب النوعية .....
نحيهم بشبكة الصياد لاعندك .... امزح .... غير بملعقة البطاطة المقلية و حطيهم مباشرة في ليان فيه ماء مجمد يعني قلاصي او بارد بزاف بزاف باش يحبس الطياب نتاعهم ........و ما تنسايش الماء لي رايحا تبدليه كل مرة تحسيه سخن
برديهم شوية وخرجيهم وحطيهم على سرابت يكونو نقيين بالطبع نتاع الكسرة مثلا ... حطيهم جنب الى جنب و حادري باش ما يلصقوش مع بعضهم ....
انا هادي المرحلة كامل نديرها نهار او يومين قبل ما نحضر الطبق الرئيسي لي ما زال كل مرة نديرو ماشبعوش منو
ونخبيهم بطريقتي في فيلم اليمونتار بطريقة نخلي كل وحدة ملفوفة فيه بلا ما تتلاصق مع ختها و نحطهم في علبة محكمة الغلق في المجمد وكل مرة نحب ندير هادي الوصفة نجبد حصة واحدة كيما في الصورة و... والله غير كو د شونس لقيت هادي الاخيرة في احشاء المجمد لي كتبتلكم لاني حوست على السلق و مالقيتش ... كن عاودت وريتلكم الطريقة بالتفصيل الممل ..
طريقة تحضير الطبق :

ادهني مول بالزبدة و حطي قبل صلصة الطماطم لي كنت حطيت موضوع عليها في هاد الرابط ......https://www.djelfa.info/vb/showthread.php?t=1605022
حطي مباشرة فوق الصوص قطع من الازانيا بحيث تخليهم شوية يديبوردو على الاطراف بـ1سم وكملي حتى في الوسط ... لازم يتغطى كامل عاودي حطي الصلصة وفرشيها مليح على كامل المساحة حطي فوقها صلصة البيشاميلhttps://www.djelfa.info/vb/showthread.php?t=1605022 و رابي الفرماج فوقها و عاودي حطي طبقة اخرى من قطع الازانيا و عاودي نفس العملية ...اي طبقة من الصوص باللحم وطبقة من البشاميل من فوقها ورابي الفرماج من فوق وكتري ....يام يام يام ...
اقلبي هادوك الحواش و دهنيهم بشوية زبدة و غطي كامل الطبق باالالومنيوم و دخليه يطيب 30 د وهو مغطي و نحيه وزيديلو 10 د حتى يحمار الفرماج من فوق ....... و خلوه يبرد 5 د باش تقطعوه هاكدا رايح يجي طرف صحيح ماشي مايل....
نمرو للعجينة الملونة الاولى لي هي الخضراء المنمشة بالاعشاب و طريقة تحظيرها :
قطعي او ارحي الاعشاب :معدنوس زعيترة مريمية نبات الطرخون نبات الحميض الحبق و نبات المردقوش نبات الزوفا و البسباس ايضا .
وهادو اساميهم باللغة الفرنسية :
persil - oseille - thym - sauge - estragon -basilic -la marjolaine - l'hysope et le fenouil
وماشي شرط تحطوهم كامل حطو الحاجة لي تبغوها ومتوفرة عندكم .
حطي الاعشاب الجافة هادي و بواسطة شوكة دخليهم مع قية المكونات لي بنفس المقادير في الوصفة الاولى الفرينة + البيض ......ادلكيها مليح و خليها تريح وكملي كيما في الوصفة الاولى .
العجينة الملونة بالبيتراف :
اعملي بوريه للبيتراف طيبيهم في ماء مملح و قشريهم و رحيهم . وخلطيها مع باقي المكونات ....فرينة + بيض ...
العجينة الملونة بالورونجي :
هي بالطماطم ... اعملي صوص تومات ثقيلة بزاف وخلطيها مع باقي المكونات و ادلكيها مليح ........
العجينة الملونة بالزعفران :
هو الوحيد لي نخدموه وحدو قبل ما نظيفوه للبيض و الزيت
بالمعنى ديري قرصة مليحة منو في المواد الجافة فقط ( الفرينة والملح )خلطي مليح بالشوكة باش تمشي اللون زيدي حطي المكونات السائلة ... اعجنيها مليح و غطيها تريح .
انشاء الله نكون فدتكم شوية و هادا وين كملت الموضوع ورايحا نتعشا طبق الازانيا على الطريقة الايطالية .......
قبل مافاتتليش قلت حتى نكمل الجريدة الرسمية نتاعي
ماتنساونيش في دعوة خير من القلب ....سلامي الحار ليكم