الشخشوخة المسيلية على أصولها بالخطوات المصورة من مطبخي راكم معروضين

oum anas 69 · 2013-09-19, 13:52

السلام عليكن حبيباتي
اليوم بإذن نديرلكم طريقة عمل الشخشوخة المسيلية على أصولها بالمراحل المصورة
طبعا كاين عدة أنواع من الشخشوخة الي تتغلى و لي تتسقى و شخشوخة القمح و كاين تاع الرغدة أوالشعير هاذو بالنسبة لولاية المسيلة
اليوم راح نعمللكم شخشوخة المريش و هاذي لي تتسقى بالمرق نعملوها في المناسبات الدينية أو في الأعراس
مقادير العجين : دقيق رطب من النوع الجيد لي يكون فيه العلك +كمشة فرينة +ملح +ماء أعجني و أدلكي كيما عجين المحاجب و خليه يرتاح

ممبعد قطعيه كويرات صغيرة قد حبة الجوز خطرش رايحين نديرو ب 2 طبعا إستعملي الزيت ... في الصورة يبانو كبار بصح هما صغار و أطلقوا كي إرتاحوو

هنا تبداي حطي الطاجين يسخن على نار هادئة
حطي كويرتين فوق بعض و ديري بيناتهم الزيت و أبداي تحلي رقيق وهزيها حطيها فوق الطاجين و غير تشوفيها نشفت أقلبيها رايحة تنتفخ شوفي

و غير تشوفيها نشفت ثواني فقط أقلبيها رايحة تنتفخ شوفي

و تقعدي تقلبي حتى تشوفيها طابت مالازمش تتحرق أو تيبس

هنا هزيتها باش يطيبو الجواشي ممبعد نحيها و حطي أخرى طيب و هكذا

طبعا لي طيبيها لازم تفتيها بسرعة باش ماتبسش ممبعد تجيك صعيبة المهم لازمك اتقرصي القرصة و طيبيها و تفتيها في نفس الوقت وإذا عندك البنات أو لي يعاونك نقولك ياسعدك هههه أعطيهم يفتولك

نجو للمرق ساهل ماهل :
نحتاجو قطع لحم أو دجاج
بصل كمية مليحة وكل ماكان المرق بزاف كل مانزيدو البصل بزاف و أنا عائلة صغيرة عملت 3 بصلات متوسطين و 3 سنات كبار ثوم المهم هي تحب البصل بزاف
2 حبات طماطم حب مرحية
القليل من الشحم أنا مادرتوش راجلي مايحبش حتى يشوفو بصح يمد بنة هايلة
قليل من الزيت، ملح. ملعقة أكل فلفل أحمر مرحي و لي يحب الحار يزيد
لفاح و هو كسبر حب مرحي متبل فيه بزاف حوايج أخرين تخدمو أمي
قطعة صغيرة سكر أو ملعقة قهوة باش يوزن حموظة الطماطم
حمص ، طماطم علب ، كسبر أخضر و فلفل أخضر

نرحي البصل و الثوم و الطماطم الحب و نفرغ على اللحم +نحط التوابل ملعقة فلفل أحمر +ملعقة لفاح +ملح +سكر+الشحم +الحمص +شوية زيت+طماطم علب+و نحمص كلشي مليح مليح تم نمرق و ندير قليل من الحشيش مقطع و نغلق الكوكوطة تطيب حتى يطيب اللحم

ننزع اللحم ثم نعطر المرق بملعقة لفاح أو الكسبر المرحي و نزيد الحشيش و الفلفل الأخضر نشقه و نرميه في المرق و هذه هي مرقتنا وجدت

أنا هنا خدمت اللفتات أو الرقاق أو الشواط نهار من قبل فلازم نفوره شوية فقط قيس ممايسخن خطرش يتعجن و نغطيه

نجو لطريقة التقديم
نجيبو قصعة أو طبسي عريض نحط قليل من المرق و نحط فوقه القليل من الرقاق ثم نسقيه بالمرق ثم نحط الرقاق ثم نزيد نسقيه و هكذا حتى نكمل و نعمر الطبسي نزين بالحمص و الدبشة و الفلفل المقطع و اللحم و نقدمه مباشرة مالازمش يقعد مدة طويلة خطرش يبرد و ينشف و تروح بنتو

و راكم معروضين أتفضلو حبيباتي
حقى أحنا الدبشة فوق الشخشوخة لااااااااااااازم يعني لي يحطلك شخشوخة بلا حشيش كلي ماحطلك والو
و نحب نشكر بزااااف أم كوثر على االتثبيت يااااااااااي

ام امير واية · 2013-09-19, 14:01

يعطيط الصحة ام انس اطباقك في القمة والله في وقتها مع هذا البرد وحظ موفق في المسابقة

لينا11 · 2013-09-19, 14:05

ماشاء الله حنونة نفس طريقة اختي دات عليكم طريقة يامسيليات ممممممممممم

أسومة المتفائلة · 2013-09-19, 14:06

يم يم الصور تحكي وحدها ربي يخليك اختى ام انس
تشهي اللهه يبارك

ريتاج تيارتية · 2013-09-19, 14:19

اااام تهبل ضقتها من قبل دارتهالنا مرت خالي مسيلية تهبل بصح تشوي حااااااااااااارة
يعطيك الصحة وبارك الله فيك

hanane220 · 2013-09-19, 14:41

يعطيك الصحة و بركة الله فيك نستنى الشرح عجبتني روعة

ريتاج تيارتية · 2013-09-19, 14:58

ام انس بغيت نسقسيك هذي اللي ضفتيها في الصورة واش هي

والبهارات اللي درتيهم في المرق واش هيا

عطر الياسمين الاصلي · 2013-09-19, 15:10

بارك الله فيك هايلة نفس طريقتنا

القبطية · 2013-09-19, 15:14

مبدعة كعادتك احنا نخدمو المسمن بنفس الطريقة الي خدمتي يها يعني في هدوك لي بول ولكن نديروه مربع ونطيبوه ولما يطيب ندخل المربع الطايب في خبزة مش طايبة ونعاود نطبق عليه وبالنسبة للعجين راه نفسو الي خدمتي بيه شخشوخة