صاحبي

[مشكلتي]

السلام عليكم و رحمة الله تعالى و بركاته
عندي صاحبي تلاقيت بيه في الجامعة و في نفس الوقت نسكنو في نفس المدينة حيرني امرو, لا مصاحبني من اجل مصلحة لا يحبني بزاف
المهم اموري المادية جيدة و الناس كامل تشهد بشطارتي و قفازتي لانو في الصيف مانحبش نقعد, نحب نخرد في كل شي يعني نخدم شهار عند واحد و في نفس الوقت راني نشري في هواتف و اكسسوارات و حواسب و و و و و نعاود نبيعهم علابيها الحمد لله ماتجي توصل القراية نلقى روحي رافد ملايين ,وهذا الشي خلى صاحبي يعجب بيا بزاف و خاصة في الجامعة نعاونو ماديا بزاف لانو على قدو وقد روحو و هذا الشي خلاه يطلب مني المعاونة بزاف لدرجة حسيت بلي راني الاب ديالو علابيها راني حاس بلي راهو مصاحبني من اجل المصلحة فقط,و الاشكالية انو ماتوقفش عند هذا الامر فقط منذ تعارفنا بالتقريب و هو يقلدني في كل شيء سواءا في لباسي او شعري او حتى كلامي تخيلو,اذا راطيت الاعمال الموجهة و التطبيقية في الجامعة حتى هو مايروحش و اذا عدت الى مدينتي يعود معي واذا رحت للاستحمام حتى هو يروح و اذا وزنت روحي حتى هو بوزن روحو و كل شي كل شي ,حقيقة ادهشني امره حتى انه يغار علي و ارى وجهه متجهما اذا راني اتحدث مع احد اصدقائي و دائما يقول لي انت صاحبي القريب و مانقدرش نلقى صاحب كيما انت ولازم كي نرجعو لمدينتنا ندور معاك غير انت ,حتى انه يستشيرني في كل شيء و ياخذ برايي كثيرا و ان طلبت منه ان يذهب الى تمنراست و يرجع لربما سيذهب و الشيء الذي حيرني ان ابن عمي طلب رقمي منه لانه ضيعه و لكنه لم يعطه اياه و عندما سالته قال لي قلت بلاك ماتحبش
غريب امره مع اني ندمت لمصاحبته لسبب واحد فقط انه اصبح يقلدني في بعض الامور السيئة مثل التدخين و غيرها من اعمال الرجس التي لم يكن يفعلها يوما و اصبح يفعلها بسببي والتي اتمنى من ربي ان نتخلص منها و لكن الشيء الذي افرحني انه اصبح يعمل رغم انه لم يعمل في حياته
لهذا انا حائر جدا هل هو مصلحجي او يحبني لدرجة التملك؟

[معرف للتغيير6]

هذا إنسان مريض نفسيا

+

بدا يغير ويحسد فيك

نصيحتي لك ألقالوا سبة مليحة وليكيدي عليك

وذرك تشوف كي تجي تليكيديه واش يديرلك

أزرب خويا أنا نعرف الصنف من الناس هذو

أخطي منو نهائيا

[صالح القسنطيني]

هذا مرض و صديقك ليس عاديا بل نقول الصراحة المرة الرجل الذي يغار على صديقه في قلبه نوع من الشذوذ و فتش صديقة فستجده فيه شذوذ و لست بقاذف له

علمتنا الحياة و علمتنا معاملاتنا مع الناس ان الذي يغار على صديقه و يحبه حبا لا يقوى لا فراقه انه شاذ

و تأكد يقينا أنه سيتنكر لك و سيدور عليك يوما و كأنه ما عرفك يوما

و صدق رسول الله صلى الله عليه و على آله و سلم لما قال ( أحبب حبيبك هونا ما عسى أن يكون بغيضك أو مبعضك يوما ما ) أو كما قال

أقولها لها احذره احذره احذره

[فافا مينوشة]

خويا بعد منو احسن انا نظن وبعد الظن اثم انو انسان يحمل شيء في قلبو
لانو الانسان الحسود والغيور وش يجيك منو
والله اعلم

[biti]

انتظر ان يقلدك في العمل كي ترتاح

[وفية زاد]

انا نظن راهو طيب و انسان نية
و يمكن ما عندوش صحاب او اخوة و ما يخالطش بزااف
يمكن راه شخص خجول
و شاف فيك المثالية و الانسان اللي راه حاب يكون في المستقبل
و عجبتو عادي و راه حاب يصير مثلك و يتعلم منك
المثل عندنا يقول "عاند و لا تحسد "
يعني مافيها والو اذا راه يقلدك مادام هذا الشي ما يسببلكش مشاكل
بالعكس انت راك تأثر عليه بالسلب كيما قلت

غريب امره مع اني ندمت لمصاحبته لسبب واحد فقط انه اصبح يقلدني في بعض الامور السيئة مثل التدخين و غيرها من اعمال الرجس التي لم يكن يفعلها يوما و اصبح يفعلها بسببي والتي اتمنى من ربي ان نتخلص منها

فنصيحة ما تظلموش الا اذا شفت منو حاجة تضرك
و حاول كيما راه يقلدك و يتعلم منك
تقلدو في الحاجات المليحة و تردو للطريق الصحيح
و تخليه يبطل الامور السيئة اللي تعلمها منك

[razika zouzou]

مسكين هذا صديقك عندو النية

و بلاك مصاحبش من قبل على ذيك راه يقلد فيك

وانا نظن ميغير منك ميحسدك

قالك عاند لا تحسد واش فيها اذا عاندك مسكييييييين

انا بانتلي نورمال

اما الجماعه ليراهم يقولهوا شاذ فانا ضد هذي الفكرة تحكمو على الواحد غير هكا حرااااام عليكم

يا خوي مدام قلت جامي خدم و كي لقاك خدم راها حاجة مليحه و ممكن تفهمو تقولو

متعاندنيش في الحوايج لي ماشي ملاح كيما راك تقول التدخين


ربي يهنيك اخي و يسهل امورك

[اناناسة]

السلام عليكم، انا أظن انه مثل أغلبية الشباب يحاول ان يكون شخصيه و يتلائم مع هذا المجتمع لا تلمه فهو يحاول ان يكون مثلك لانه يرى فيك ما لا يراه في نفسه ... لا تتخلى عنه يا أخي انا أرى انه انسان ضعيف نوعا ما حاول ان تقنعه بان لا يقلدك أخبره بالصفات التي يتمتع بها و التي تميزه عن غيره حاول ان ترفع من ثقته بنفسه لكن أرجوك لا تتخلى عنه او تأخذك به الظنون الى أمور أخرى ... انصحه بالتخلي عن عاداتك السيئة و اجعلها فرصه لك لتقلع انت عنها . الله يوفقك الى ما يحب و يرضى.

[leila ben]

متحلوش العين حتى يطلع على راسك متقربو منك متبعدو خلي بينكم مسافة

[بلسم غرام2018]

ربي يهدي وخلاص
اما اللي قالوا شذوذ
حرام الظلم

[wafa16]

انا نظن ما عندوش صحاب من غيرك لهدا يعاندك و يظل لاصق فيك
و بالاك شافك ناجح في حياتك و راه دايرك مثلو الاعلى
و اللي اتهموه بالشدود نقوللهم ربي يهديكم
اللي متعلق بصديقو شاد
اصلا هو لازملو مساعدة ما تقدرش تجبد روحك منو الا ادا شفت منو تصرف مريب
و الا نقولك ما تخسروش و ادا راك مقلق من حاجة صارحو بيها و قولو ما نحبش نبانو كيفكيف يعني ما تعاندنيش و لازم يكون عندك شخصيتك وحدها
ادا تقبل النصيحة اللهم بارك و ادا ما تقبلهاش العيب ما يجيش من عندك
غدوا تكبرو و كل واحد يبني عايلة و حياة مستقلة و بالمشاغل تعودو تتلاقاو خطرة في الغرة و تتوحشو هاد اليامات

[حكاية منسية]

المشاركة الأصلية كتبت بواسطة وفية زاد

انا نظن راهو طيب و انسان نية
و يمكن ما عندوش صحاب او اخوة و ما يخالطش بزااف
يمكن راه شخص خجول
و شاف فيك المثالية و الانسان اللي راه حاب يكون في المستقبل
و عجبتو عادي و راه حاب يصير مثلك و يتعلم منك
المثل عندنا يقول "عاند و لا تحسد "
يعني مافيها والو اذا راه يقلدك مادام هذا الشي ما يسببلكش مشاكل
بالعكس انت راك تأثر عليه بالسلب كيما قلت



فنصيحة ما تظلموش الا اذا شفت منو حاجة تضرك
و حاول كيما راه يقلدك و يتعلم منك
تقلدو في الحاجات المليحة و تردو للطريق الصحيح
و تخليه يبطل الامور السيئة اللي تعلمها منك

يعطيك الصحة
قريت الردود اللي من قبل كامل قالو راه يغير ووووو....الخ
في الوقت هذا مكانش اللي يهدي للخير غير اللي ....

خويا مول الموضوع اذا ماشفتش منو حاجة تضر ماتظلموش
راك عاجبو و راه حاب يولي كيفك
عادي هاذي

[~~نهال~~]

ماتدري
ممكن بسببو تصلح نفسك و تقلع عن التدخين
كون انو ديت ذنبو انو قلدك في الحوايج السيئة
حاول تصلح روحك
مادام يقلدك سما تشوف نفك فيه مرآة تعكسك انت و افعالك
اصلح روحك و روحو قبل فوات الاوان
وفقكم الله

[محمد مصطفى الحبيب]

ردود عشوائية و اصبح الكل يتدخل و كأن المنتدى مليء بالأطباء...أنت منى يعرف صديقك جيدا و أنت من يستطيح الإحساس بنواياه

[naamane3]

صاحبك هذا عديم الشخصية
لذا يقلدك في كل شيئ
اخبره بان يصنع لنفسه شخصية
يعيش بيها فانت ما تدوملوش