كاب كيك الدجاج بالسلق-من مطبخي ومن ابداعي

ninafret · 2013-03-11, 13:29

السلام عليكن اخواتي ليوم حبيت نقدملكم طريقة من ابداعي بسكالوب نتاع الدجاج ولا الداند حسب الرغبة وسعرو راهو في متناول الجميع هاذ الايام مالا راهي فرصة تجربو هاد الطبق اللي هو عبارة على قوالب صغيرة من الدجاج ومحشية بالسلق والجبن ومزينة بالبطاطا المرحية توالم العرضات وتحمر الوجه قدام الضياف خاصة انها محشية من الداخل يعني مفاجئة في الوسط نتمنى يعجبكم وراهي فرصة حتى تخليو اولادكم ياكلو السلق لان فوائدو كثيرة ومليان بالالياف نخليكم مع الطريقة

ااولا توجدي صوص بيضاء ولا حمراء حسب الرغبة انا عملت صوص روج من وجه التغيير لكن انا في ذوقي الشخصي نفضل الصوص البيضاء مع هاد الطبق وكل وحدة وذوق عائلتها
اما الحشو تجيبي كمية من السلق انا عملت نصف ربطة كبيرة تغسليه مليح وتنشفيه تماما من الماء وتحطيه في مقلات مع ملعقة زبدة و2سنات ثوم وشوية ملح وفلفل اسود

وتخلطيه على نار هاادئة حتى يذبل ويتقلص ويطيب

تخليه يبرد وتزيديلو بيضة او اكثر حسب حجم السلق اللي عندك انا خذا مني بيضة كاملة + صفار وتزيديلة 100غ جبن طري من الاحسن انا ماكاش عندي الطري عملت القرويار او الجبن المبروش زيدي شوية ملح وخليه على جنب

نرجعو للدجاج تقطعيه وترحيه بالتدريج مع 3سنات ثوم وشوية معدنوس مقطع

كي ترحيه كامل على مراحل زيديلو بيضة وملح وفلفل اسود وخلطي الكل

ادهني لي مول نتاع ليمادلان او الكاب كايك بالزبدة ورشيه بالخبز المرحي او الشابلير

اعملي كويرات من الدجاج المرحي وادهني صباعك بالزيت وحليها في هادوك القوالب الفردية والزيت يسهلك العملية لان الدجاج يلصق في الاصابع ولا في الكف نتاع يدك كيما الصورة

حطي في كل وحدة ملعقة من خليط السلق والجبن
د

واغلقي بكرية تكوني حليتيها في كف يدك من الدجاج المرحي

عدلي الوجه بيدك ودخليهم لفرن ساخن من فوق وتحت حتى تشوفي الحواشي بدات تتحمر ماياخدش وقت بزاف حتى مايوليش ناشف
في هدا الوقت حطي 2 حبات كبار بطاطا بالقشور في ماي يغليو حتى يطيبو قشريهم واهرسيهم بالفرشيطة وزيديلهم مغرف صغيرة زبدة وملح و2ملاعق حليب وخلطيهم شوية بالباتور حتى تتنحى الكتل لكن البطاطا تبقى ثقيلة ملازمش تكون خفيفة كي لابيري خليها تبرد وحطيها في الكيس الحلواني او لابوش آدوي

كي تطيب حبات الدجاج ديموليها وخرجيها بلطف من القوالب وزينيها بوردات من البطاطا المهروسة كيما الصورة وفوق كل حبة نصف حبة زيتون اسود او اخضر
رجعيها لفرن ساخن جدا تحت الشواية مباشرة حتى تزيد تتحمر من فوق

قدميها مع الصوص اللي وجدتيها ادا الصوص روج زينيها بالدبشة او الحشيش وادا الصوص بلونش زينيها بالمعدنوس المقطع وهذا الشكل النهائي

وهادي الحبة من الخرج ومن الداخل

ملاحظة ادا ماعندكش القوالب الفردية نتاع الكب كيك ممكن تعمليها في مول عادي نتاع الزجاج اللي نعملو فيه التارت اعملي نفس الخطوات وراح تتحصلي على تارت كبيرة تجي روعة راني عملتها من قبل وتجي روعة حتى في المنظر
ادا ماعندكش السكالوب ممكن تعمليها باللحم المفروم وتجي لذيييييييذة عن تجربة
ادا ماتحبيش السلق ممكن تشوحي حبة بصل كبيرة مقطعة مربعات في شوية زيت حتى تذبل خليها تبرد وزيديلها كمية مليحة من المعدنوس والملح والفلفل اسود وبيضة مخفوقة وجبن طري خلطي الكل واعمليه كحشو في مكان السلق وممكن حتى تضيفيلها جلبانة مفورة

ninafret · 2013-03-11, 13:58

راني كملت تحميل الصور وحطيتها اخواتي

mounia nouna · 2013-03-11, 14:08

شكرا لك وبارك الله فيكي على المجهودات

ام ساجد · 2013-03-11, 14:10

يعطيك الصحة روعة بدون مجاملة

حدة الجزائرية · 2013-03-11, 14:23

هايلة و باينة بنينة يعطيك الصحة

ninafret · 2013-03-11, 14:26

شكرا لكن حبيباتي على المرور وعلى الردود الطيبة فرحتوني

أنآحلُم · 2013-03-11, 14:47

ماشاء الله روعة
عجبوني وان شاء الله نجربهمم
بصح خفت الدجاج ميطيبليش ؟

الأمنيات · 2013-03-11, 14:50

أم عاتكة · 2013-03-11, 15:01

ذوق و فن راااااااااااائع
تحفة روعة في الشكل و التزيين و طريقة التقديم
ما عندي ما نقول اختي نينة444444444444444444444444
ربي يبارك لك في صحتك و يعطيك ما تمنيتي دنيا و آخرة