بريوش فوري بالشوكولا ولاكرام باتيسيار من ابداعي وبطريقتي الخاصة

ninafret · 2013-03-08, 10:42

صباح الخير اخواتي كيما وعدتكم بالبريوش راح نحطهولكم ويجيكم روعة وراح يفرح اولادكم بزاف يصلح لفطور الصباح ولا مع قهوة العشية وكيما عودتكم عجينتي ساهلة وماتحتاجش للعجن وعملتو محشي بالشوكولا وباش نزيد بنة على بنة زدت حشيتو بلاكرام باتيسيار وزينتو بلاجولي والسكر قلاصي جربوه وراح تلقاو اسهل منو ماكاش والبنة نخلي الكلمة لكن تبعو معايا لاني راح نحطهولكم بالتفصيل

العجينة
كاس حليب دافئ+مغرف كبيرة خميرة الخبز+4 مغارف كبارسكر +ملح حسب الرغبة + بيضة كاملة+2ملاعق كبيرة حليب غبرة او لحضة وادا مش موجود ماشي مشكل
خلطي كل المقادير

وزيدي كاس فرينة وخلطي بملعقة الخشب غطي الصحن بكيس وخليه 5د ثم زيدي باقي الفرينة + 1خميرة الحلوى وخلطي حتى تتحصلي على عجينة طرية
زيديلها 4 ملاعق زبدة التوريق ذايبة بالتدريج مع العجن

حتى تدخل الزبدة فيها مليح حتى تتحصلي على عجينة طرية ومطلوقة وتلصق في اليدين ماتخافيش لان عجينة البريوش تجي شوية مطلوقة وكي تختمر راهي تشد روحها
غطيها بالكيس وخليها تختمر

كي تختمر نزلي العجينة من غير ماتعجنيها

بالسكين قطعيها على2تم عل4 ثم على 8

تتحصلي على كويرات

شكليها حسب الصور بطريقة الاونفلوب اللي تخليها تجي خفيفة وهشة من الداخل
حلي الكويرة بشكل دائري وحطي قطع الشوكولا في الوسط

اغلقيها من الجيهتين

لمي الجيهتين واغلقي بصبعك

عدليها حتى تاخذ شكل البريوش
رشي البلاطو بالفرينة وحطي الحبات فيه وماتنسايش تحطي الجيهة اللي غلقنا منها لتحت وادهنيه بصفار بيضة مخلط مع ملعقة قهوة يعطيك لون جميل جدا

سخني شوية الفرن وطفيه ثم دخلي السنيوة اللي فيها الحبات في الفرن الدافي حتى يتضاعف حجمها انا خدات مني 45 دقيقة في التخمير شوفو النتيجة

خرجيها وسخني الفور مليح ملح ودخليها حتى تتحمر

شوفي طيابها من تحت

وفي الوقت هداك وجدي لاكرام باتيسيار انا شريت نتاع الاكياس زدتلها نصف لتر حليب و4كلاعق سكر وشوية فاني وحطيتها على النار مع التحريك المستمر حتى ثقالت خليها بردت وعاودت خفقتها واستعملتها للحشو

كي تطيب حبات البريوش خليها تبرد تماما لانها كل وين بردت كل وين تروح منها ريحة الخميرة وممكن حتى تعمليها في الليل وتخليها تبات وفي الغد مع الصباح تحشيها وتكملي تزينيها
كي تبرد حليها على الجنب بالسكين وعمريها بلاكرام باتيسيار

سخني شوية جولي وادهني بيها الوجه وادا مالقيتيهاش طيبي شوية عسل ثقيل وادهني بيه امممممم شوفو كيفاه يلمع

خليها تنشف شوية ورشي كمية من السكر قلاصي بالصفاية

عند التقديم زيدي رشيها مباشرة بكمية اخرى من السكر قلاصي

وفي الاخير نتمنى ينال اعجابكم لانو لذيذ جذا وزيد بريزونتابل راني نستنى رايكم وتقييماتكم وتطبيقاتكم

fadilasor · 2013-03-08, 10:50

امممممممممممم يشهي يعطيك الصحة نجربو ونرجعلك الخبر

ninafret · 2013-03-08, 10:55

اقتباس:

المشاركة الأصلية كتبت بواسطة fadilasor

امممممممممممم يشهي يعطيك الصحة نجربو ونرجعلك الخبر

شكرا على المرور حبيبتي ورانا نستناو تطبيقك بحول الله

sarah.. · 2013-03-08, 10:56

اممممممممممممم هايل
تسلمي
ان شاء الله نجربو مشكورة اختي يعطيك الصحة

الوهرانية 1 · 2013-03-08, 10:56

الله يبارك اختي شكرا على الوصفة والطريقة

oum ibrahim · 2013-03-08, 10:56

تسلم الايادي بارك الله فيك في انتظار باقي ابداعاتك

basmala farah · 2013-03-08, 10:59

امممممممممممممممممممممممممم مشهي

مشكورة

zhor1970 · 2013-03-08, 11:06

ما شاء الله اختي انشاء الله انجرببو ونحطو في التطتيقات وتعطيني رايك و صفاتك خصوصا في الخبو روووووووووعة

minoucha2008 · 2013-03-08, 11:12

touta2010 · 2013-03-08, 11:16

ninafret · 2013-03-08, 11:25

شكرا لكن حبيباتي على المرور وحبيبتي زهرة شكرا على ثقتك الكبيرة في اطباقي ونوعدك غير بالجديد بحول الله
ماتنساونيش بدعواتكن في هده الجمعة المباركة
ربي لاتذرني فردا وانت خير الوارثين

أم محمد تاج · 2013-03-08, 11:27

الله يبارك روعة يسلم يديك يالحبوبة

أم أبوبكر · 2013-03-08, 11:32

خرجلك هايل نجربو إنشاء الله يعطيك الصحة

*ام رامي* · 2013-03-08, 11:32

ما اروع ما تقدمين
جزاك الله الفردوس اختي
ربي يرزقك الذرية الصالحة عاجلا غير اجل
يعطيك الصحة

ninafret · 2013-03-08, 11:36

شكرا لكن حبيباتي على الردود وحبيبتي ام رامي حتى انتي ماخليتيش علينا ربي يحفظك وشكرا على تثبيت الموضوع