أسرع وألذ جينواز من مطبخي .......مرحبى

salima14 · 2013-03-05, 10:58

السلام عليكم جميعا بمناسبة نجاحي عملت لي تارت للعائلة وجاو روعة فالبنة
والشكل نتوما تحكمو عليهم وصدقوني سهلة وسريعة وأي وحدة تقدر تعملها سر نجاحها
خفة اليد وتوزني المقادير وتحضريها بجنب إن شاء الله تجربوها وتنجحو فيها وترحموا
على والدي

المقادير
4بيض
125سكر/8مغارف أكل
125فرينة/6مغارف أكل
1/2كيس خميرة
هاذو المقادير لمول تع20سم
التحضير
1أوزني السكرو الفرينة كل حاجة وحدها و أفصلي الصفار على البيض
2أشعلي الفرن 180د

2حطي البياض فالروبو مع قرصة ملح يطلع مليح زيدي السكر بالمغرف يولي الخليط يلمع
ضيفي صفار البيض تم تم ضيفي الفرينة و الخمارة بالمغرف وحبسي الروبو بسرعة باش
مايبطش الخليط وفرغي فمول كنت ديجا دهنتيه بالزبدة والفرينة دخليها للفرن 20د

ملاحظة :*لازم الروبو ما يحبسش ماللي تبداي تخدمي الخلاط يدور ونتي تضيفي فالمكونات
*إذا طيتي لخلاط ولقيتي مازالت لفرينة ماتخلطتش دخيها بالشوي من الفوق للتحت باش ماتطيحش
*كي تطيب خليها تبرد ونحيها من المول وزيدي خليها حتى تبرد مليح وبداي تزينيها با تتقسم مليح
التزين
*كاس عصير* لاشونتيي*وفاكهة
أقسمي التارت على إثنين أسقيها بالعصير وديريلها شونتيي وحطي لقسم الثاني وزيي منفوق بالشونتيي والفاكهة
أو شوكولا وكونفتير
صدقوني ساهلة بزاف ماتشوفوش لكتبة بزاف تقولو صعيبة حبيت نشرحلكم مليح للي ماشي موالفة تخدمها
وخفيفة ياسر وبنينة إن شاء الله تجربوها وتعجبكم

أما لمول تع26سم ديري
187سكر/12ملاعق أكل مليانين
187فرينة/10ملاعق أكل مليانين
6بيض
پاكي خمارة

(توضيح أكثر)

طلعي لبياض مليييح زيدي سكر بالشوية
ومباشرة زيدي الصفار ضربة وحدة وتم تم أبدي زيدي فالرينة بالشوية ماتخليش
لخليط يهبط يعني الفرينة مغرف مور أختها 1د وحدة وطفي الخلاط إذا لقتي
الفرينة ماتخلطش مليح خلطيها بلاسپاتي من فوق لتحت وفرغي فالمول وطول للكوشة
20د وشوفيها بسكين إذا ماطابتلكش طفي من تحت وشعلي من فوق ونقسي للنار
وهبطي لمول لتحت ڤاع وڤابليهعا باش ماتتحرقش كي تحمار خرجيها وخليها
تبرد مليح ونحيها وزيدي خليها على الأقل3سا وزينيها

كوزينة هديل · 2013-03-05, 11:04

يعطيك الصحة رائعة والله يرحم الوالد تاعك إن شاء الله

sarah.. · 2013-03-05, 11:06

الله يرحم الوالد ويغفر له ويسكنه فسيح جناته ....
الف مبروك النجاح من تفوق الي تفوق ان شاء الله
ماشاء الله خرجتلك هايلة اختي يعطيك الصحة ويسلم هادوك اليدين
بارك الله فيك

salima14 · 2013-03-05, 11:18

ربي يحفظكم لبنات ويعطيكم ما تتمناو من بعد ندخل نكتب المقادير ما عنديش لوقت
راني نوجد فالغدا للأولاد رح نكتبلكم المقادير ونشرحلكم كيفاش

remadna · 2013-03-05, 11:34

الله يبارك
هايلة يعطيك الصحة
رب ارحم والدي سليمة و كل المسلمين و المسلمات
آمين

ام ملاك. · 2013-03-05, 11:38

الله يرحمك والدك ويرحم جميع امواتنا يارب
خرجتلك هايلة الله يبارك

أم ماجد · 2013-03-05, 11:41

الله يرحم الوالد راهي هايلة واش من نجاح فهمينا باه نباركولك ؟

sali-sali · 2013-03-05, 12:18

شكرالك اختي

ربي يوفقك

والله يرحم الوالد

أم نور · 2013-03-05, 12:21

اولا مبروك عليك النجاح وثانيا يعطيك الصحة

ام باديس · 2013-03-05, 12:25

الله يرحم الوالد ويسكنه فسيح جناته
الله يبارك يعطيك الصحة
اختي سليمة ياك انتي صاحبة الصالون المودرن لي عجبني

ميمنة الجزائر · 2013-03-05, 13:28

رووووعة حبيبتيات تهبللللل

أعطينا المقادير
وربي يرجم باباك ويرحم جميع موتى المسلمين يارب

manal01 · 2013-03-05, 13:50

يعطيك الصحة اختي الكريمة جاتك هايلة وما شاء الله عليك

اميمة الجابونية · 2013-03-05, 13:52

اولا ربي يرحم الوالد
ثانيا ماشاء الله و ربي يسلم هاذوك اليدين
ثالثا اسرعي بالمقادير لاني في امس الحاجة لها (عيد المراة يوم الجمعة و اريد الاحتفال مع تلميذاتي به يوم الخميس)

انتي بلون الورد · 2013-03-05, 17:57

خرجتلك هايلة بزااااااااااااااااااااااااااف.وربي يرحم الوالد تاعك و يكنو فسيح جناته يا رب..تعيشي اختي قوليلي المقادير و يا ريت تحطيلي صورة للمول لي طيبتي فيه.

امونة الشاوية · 2013-03-05, 18:44

444444444444444444 اختي اعطينا الوصفة