البراج من مطبخي

kakinova · 2013-02-22, 15:44

بسم الله الرحمن الرحيم

البارح عملت لبراج

هادو حبات لكبار لينا

و هادو الحبيبات الصغار لبنياتي ربي يحفظهم

و هادي الوصفة للي تحب

كيلة زبدة ذائبة

كيلة زيت

2 كيلات حليب فايض و دافئ مش معمرين و اذا احتجتي من بعد ممكن تضيفي

نصف ملعقة كبيرة ملح انا عملتها في 1 كغ غرس و تقريبا 2 و نصف دقيق

تخدمي الزبدة مع الزيت جيداااااااااااااااااااااااااااااااااااااااااا حتى تولي مثل المايوناز ثم تضيفي الحليب و تخلطي حتى يتجانس الخليط

و تضيفي الدقيق حتى تتشكل عندك عجينة متماسكة الدقيق يجب ان يكون متوسط يعني نحي منو الرقيق و نحي ايضا الخشين

تغطيها نصف ساعة تتشرب البسوس و اذا وجدتيها يابسة ممكن تزيديلها القليل من الحليب و تعجني شوية المهم لما تضغطي على كمشة فيدك تتماسك و تكون طرية

الغرس ضفيلو قطعة زبدة مقدار 2 ملاعق كبار اقسميه على دفعات و حطيها فالخلاط كل مرة جزء من الغرس مع قطعة صغيرة زبدة و القليل من ماء الزهر و خلي الخلاط يدور دقيقة او اثنين

و الله صدقوني رح يكون الغرس طريييييييييييييييييييييييييييي بشكل لا يتصور حتى لو عملتي الغرس تاع لحوانت و لما طيبيه يبقى ذهبي اللون ما يكحالش اطلاقا

و بعد ما تكملي كل الكمية ضفيلو القليل من القرفة و على راس الملعقة طيب و اعجني

ثم اعملي كويرة من الغرس ادهني من الفوق و من الاسفل بالزبدة و حطيها في قطعة نيلون كبيرة و حليها على شكل قرص و غطيها الى حين استعمالها

العجينة نقسمها على اثنان نقرص الاولى و نحط فوقها الغرس ثم نقرص الثانية و نحطها فوقهم

و نغطي العجينة و نحلها لاقنوط " الحلال حتى تصبح فالسمك 1 سم

نقطعها بالطابع او السكين انا استعملت الطابع هاذا

و اطبعيه كامل ثم اعدلي الجوانب حتى يكون شكلو متحوف

و لما تكمليهم كامل اطهيه فوق طاجين حديد موضوع فوق طاجين طين على حرارة مرتفعة حتى ما ييبسش الغرس و يبقى البراج طري

لما يتغير لونها قليلا من فوق اقلبيها بسرعة ما تخليهاش طول باه يجيك لونها مليح و ما تتشوطش و تبان محروقة لانو احسن براج لي يطيب اصفر

ملاحظة :1 انا ما نستعملش الدقيق فوق العجينة نطهيه مباشرة ما نحبش هاذيك الحروشة و ما نحبش لما نهز حبة نلقى فيها الفتات

2 انا الدقيق نتاعي مليح تاع مطاحن الطارف يشرب لبسوس و ما يطلقش ليدام نتاعو و ما يجيش معجن حتى لو جريتو يشرب

نتمنى يعجبكم

و هادا صحن كبير للأخوات و لكل من مر بموضوعي

و هاذي حبيبة قسمتها فالنصف بالسكين باه تشوفو الغرش قداه طري و لونو ما تبدلش قعد ذهبي