حين بالغت أخت زوجي في التسلط

[imane1]

حين بالغت أخت زوجي في التسلط


-انا والله مانحب نخرج مشاكلي لبرا , لكني هنا اضطررت -




في البداية كانت علاقتنا ببعض " جيدة" وكنت أعتبرها بمثابة الأخت التي لم تلدها أمي
ومع مرور الوقت ورؤيتي لطريقة معاملتها لسلفتي و"حقرتها ليها " وتبريرها لتصرفاتها بعد ذلك بقولها " انا هكذا "
أو " هذه هي عقليتي " أصبحت علاقتنا " لابأس بها "

ورغم أنها في بداية زواجي لم تتعرض لي يوما بما يسوء سواء كان ذلك بالقول أو الفعل
الا انني كنت مقتنعة بأن تسلطها كاسح ولا يمكن أن يقتصر على فرد واحد من العائلة
فقد كانت تنهر سلفتي وتصرخ بوجهها وتحاسبها على كذا من الامور ، ثم حين تغضب منها وألحظ الغضب على ملامحها واكون جاهلة للسبب
تجيبني أخت زوجي بابتسامة تعلو شفاهها " أنا زقيت عليها "

وأتعجب وأصمت , كشيطان أخرس .. لكن نقول في نفسي " غير يقيلوني انا برك " وهو نوع من الانانية حقيقة

المهم مع مرور الوقت بدأت أختي زوجي تغير من لهجتها معي
وكانت طريقتها سبحان الله , ضرب هذه بتلك
يعني اذا خاصمت سلفتي تتقرب مني واذا خاصمتني تتقرب من سلفتي
المهم أنها لا تبقى وحيدة
ولم يكن بيني وبين سلفتي مشكل على الاطلاق , هي عاقلة وانا ما ندناش
بل على العكس , كانت علاقتي بها تشبه علاقة أخت بأختها , وكانت أكثر من أحب لانها عمرها ما لحقتني بكلمة توجع

المهم كما قلت مع الوقت بدأت لهجتها تتغير معي , وبدأت تخاطبني بلغة الحماة , فتسأل لما لم تحضري *واقيلا وليتي تخافي الشغل*
وتتصل بي وتطلب مني الذهاب الى بيت اهلها لمساعدة امها*واش مازلتي تحوسي ؟ روحي عند يما غدوه راهي عيانه*

وأحيانا نروح نكلمها بالضحكة وعلى النية وهي ترد بجمود والتجاعيد تعلو وجهها دون ان اعرف السبب
وشحل نكره كي يشنف عليا واحد خاطيني وخاطياتو !! وبلا ما نعرف على واش راهو مبني ؟
ونكره الهدرة تع المعاني ..

المهم استمر الامر على ذات المنوال في اول سنة لي من الزواج وعمري ما شكيت لحماتي منها
نظرا لان علاقتي بحماتي كانت جيدة , كنت اتغاضى عن كثير من البوادر تجنبا لحدوث المشاكل بيننا وبرود علاقتنا
فأم زوجي كنت ولا أزال أعتبرها شيئا مقدسا أو خطا أحمرا لا أستطيع تجاوزه أيا كانت الاسباب
وكنت أشتكي لزوجي من بعض تصرفات أخته ولكنه لم ينصفني يوماً
وكان يبرر ب " غاضتها يما " أو " هي مجعورة "
وأحيانا يقولي "وهاذي وش فيها "
وأحيانا أقتنع وأقول " صح انا اللي راني مكبرتها " وأحيانا أخرى أتمسك برأيي بعدم أهليتها لقول كذا أو فعل كذا

إلى أن جاء اليوم الذي فاض فيه الكأس
وحد النهار رحت الصباح عند عجوزتي لقيتها سبقتني , يعني لقيتها عند أمها
وكان سلفي يبني ملفوق وكان ماعندوش بزاف ملي كمل البنيان
كي وصلت عند عجوزتي لقيت أخت زوجي " تسيق "
دخلت بالضحكة والقجمة ونسأل على الاحوال
فردت حماتي بانفراد وجه * ونحبها فعلا وتحبني بزاف *
أما أخت زوجي فانها لم تستطع حتى الرد بابتسامة مصطنعة
رغم أنني لا ألتقي بها الا مرة في الاسبوع واحيانا مرة في الشهر
وعمري ما سمعتها كلمة توجع باي طريقة من الطرق رغم اني عندي ما سمعت منها

المهم خليتها تكمل التنظيف ورحت للمكبخ عند حماتي باش ندير لغدا
قاتلي حماتي " راحوا يقضوا مازال ما رجعوش , كي يجو نشوفو واش نديروا"

وليت طلعت عند سلفتي " ساكنة فوق عجوزتي " وسلفي يبني فوقها قلت نشوفها ونشوف اطفالها
طلعت سلمت عليها قلت بيدما تكمل أخت زوجي التنظيف
كي جيت حابطة واجهتني أخت زوجي بصوت مرتفع كما لو أنها تنهر ابنتها الصغرى وقالت :


| وين كنتي ؟ كنتي لفوق ..توحشتي فلانة واقيل ؟!
كي شفتيني نسيق ماعرفتيش اجيبي بالي ولا فروتوار وتخرجيلي الما ؟!!
ياك شفتي مازال عندنا تنظيف لفوق "تقصد ديار سلفي اللي غير ماكملهم وانا ماكنتش عارفه بلي راهي دايرتلي مخطط مسبق لنهاري "

المهم أنا سكتت في تلك اللحظة
مانيش عارفه علاه ؟ ممكن لاني عمري ما شفت ماما تقابل في الناس أو ترد الهدرة
لكن كي سكت قعد صراخها يجرق فيا من داخلي و وليت نقول " كون غير رديتلها في هاديك اللحظة كون مارانيش هكدا "

لكن صار اللي صار , وسكت ولم أرد فكان منها بعد أن رأت غضبي أن قالت " ايهيه راني اللي نهدر معاه يشنف "
فازددت غيضا وقلت لو أنها سكتت لكان خيرا لها ولربما كان أغناها سكوتها عن الاعتذار فيما بعد
ولكنها لا تعتذر , لا تقر بأخطائها , ولا تصمت بعد رؤية ردود فعل غير محبذة

واش درت انا ؟
كي راحت لدارها حكمت عجوزتي\
قلتلها يما كون تشوفي مقبيلا والله غير غاضني الحال على فلانة*ابنتها*
قاتلي علاش ؟ فقصصت عليها ما حدث
عجوزتي قاتلي ما اديريش عليها وهي اللي في قلبها على لسانها وانا دايما نزقي معاها وهي خرجت لعمتها وو و
قلتلها يما ازفي عليها , نحب تعاملني باحترام كما أعاملها
ما ترفدش صوتها عليا كيما ترفدو على ولادها
أنا امرأة .. وهي امرأةة
قاتلي معليش نزقي معاها لكن انتي ماتقوليش لفلان*زوجي*

وانا قررت اني هاد المرة راح نحط النقاط على الحروف
ونبينلها وين راهي الخطوط الحمراء التي لا يحق لها تجاوزها
وقلت لن أعود اليها بغير اعتذار منها
لأنها مش اول مرة ادير هكذا .. معايا او مع سلفتي لكن نتكلم على روحي

قعدت مع روحي , قلت زوجي اذا ماسمعش مني يسمع من حماتي
يعني يشوف زوجتو تتجنب في اختو وزعفانه منها وماتهدرش معاها ومايعرفش علاش
فخبرتو بالخصام الذي وقع واكتفى بالصمت ..
قتلو اذا نظفت تكون نظفت بيتهم وساعدت أمها , واحنا عمرنا ماتعاونا في التنظيف
متعودة انا اللي نظف البيت وعمري ماقلتلها علاش ما تساعدينيش
وإنما كان دأبنا اذا اجتمعنا أن نتقاسم المهام
تنظف هذه وتطبخ تلك وترتب تلك ...


بعد ماحكمت حماتي بنتها قالتلها " والله وتقعد عام مانهدر معاها , مازال ما تعرفنيش "
وزادت على ذلك بأنها لاحظت كذا مرة أنني نخدم الشغل امام عيون زوجي فقط ,
قالت " تكون قاعدة غير يجي راجلها تنوض تجري للشغل , زعما شوفني راني نخدم على يماك"
هذا على اعتبار اننا نلتقي مرة في الاسبوع , يعني لوكان كنت ساكنة معاهم وكانت تلاحظني يوميا كانت قالت ماهو اكبر
فازددت عيضا وقلت واش يجيب مول النية لمول التحراميت ..

وبهاد الهدرة اكيد ماخلاتلي حتى وجه باش ننسى وندير كلي ماكاين والو ونهدر معاها
لانها عاندت وأثرت , ومثلها لابد أن يُأدب

التقيت بها مرتين بعد الحادثة اكتفيت بالتسليم عليها , كي يلحق وقت الغدا نعيطلها,نقريلها ولادها كي يسحقوني كاش ما نطيب نقول لعجوزتي اعطيلها تدي معاها
وكل مرة تجي مورايا عجوزتي وتقولي علاش ما ضحكتيش في وجها
علاش ما شقسيتيهاش واش راكي اختي ؟ علاش علاش ...نقولها يما هي علاش ما سقساتنيش؟
تقولي هي راهي تقولي اجي تهدر معايا نهدر معاها
قلتلها يما " أنا لم أخطئ , ولو انني اخطأت لما تحرجت من الاعتذار والتودد "
فقاتلي احنا ما نحقدوش وانا الللي يحبلي بنتي حبني واللي ما حبليش بنتي ما كلاهلي بيه

ممبعد سألتني : أخبرت زوجك؟
قلتلها هو على علم
فخبطت الباب وخرجت , ولحقتها فأبت أن ترد علي
ممبعد شفت فيها قلتلها " بنتك ماتحبيش عليها , وبنات الناس يشربو ويسكتو ولا كيفاش ؟"
قاتلي " هاذيك بنتي ..وتغيضني ..غدوه كاش ما يصرى فيها نعشي مندمة ؟"
تلعثم لساني وشعرت بغصة في حلقي " على أساس كنت كيما بنتها تاني "
قلتلها في قلبي صح مارانيش راح نجي خير من بنتك , ومارانيش راح نجي كيفها
وكل وحدة تغيظ يماها
في قلبي طبعاً

ممبعد دخل حماي فبدأت تشكو له وسأل سلفي عما يحصل فقالت : فلانة زقات على ايمان وايمان راهي مشنفة "
وبعدها حكمت عجوزتي وليدها * زوجي *
وراحت تشتكي له مني
" خلاتني مريضة وما عيطتلي ما سقسات عليا "وانا لم أتركها مريضة متسطحة على الفراش كانت ادور عادي
وكنت نروح مع الصباح معاه فيسبقني يسلم عليها ونسمعها تقولو " ماقاتليش حتى صباح الخير "
واخر ما حصل لما قاتلو على الحادثة التي وقعت بيني وبين ابنتها
فقاللها " يما هي واش دخلها فيها ادا خدمت ولا ماخدمتش "
وهنا ازدادت غيضا وقاتلو راح تولي كيما شي ناس ماعلابالهمش بأهلهم
وهو والله أبر أبنائها بها وأحبهم إليها ولا يرضى عليهم ولو كان على حسابي
والكلام الذي دار بينه وبينه امه عرفته من اخته حين اتصلت بها كما سيرد لاحقا
اما زوجي فلم يخبرني بشيء

المهم من هاداك النهار زعفت عجوزتي مني , وبدات تتبدل اتجاهي , ولات ماتفرحش بيا كي نروحلها
ونسلم على راسها ولا تسألني حتى " كيف حالك "
ونبعثلها الماكلة وتقولي هاديك لاه بعثتيها
واتقولي احنا ما نلقطوش الهدرة
ومؤخرا *بعد الحادثة ب20 يوم بالاك* سمعت ببنت اخت زوجي مريضة *زكام *
قلت معليش فرصة نعيطلها ونرجع المياه الى مجاريها
وبالنهاية راهي أخت زوجي وفي وجهك يالسميد نجوز النخالة
والزعاف يعني مجرد موقف باش نحسو الطرف الاخر يخطئه لكن ماهوش حل لمشاكلنا ..

قلت منها نسقسيها على بنتها منها قال يا فلانه راني نسيت وراني وليت
عيطتلها كلمتني قيس قيس
قلت معليش انا المهم راني درت الواجب ودرت الخطوة المهمة والباقي عليها
يعني انا بكل الاحوال ما راني خاسرة والو ..
اذا رجعت ليا واعتبرت مما حصل تلقاني مكسب
واذا قررت التحفظ تتحفظ كما تشاء يعني بالنهاية ضميري مرتاح

وبعدها بأسبوع عاودت عيطتلها باش نزيد نأكد على نسياني لما حصل ولكنها أبت الا فتح الدفاتر القديمة
قاتلي انا يما قاتلي اسكتي لكن انا مانخلي حتى هدرة في قلبي
وانا هداك النهار كنت مقلقة وانا هاديك هي هدرتي
قلتلها علاش بعد ما صار اللي صار ماجيتيش وقلتيلي مرت خويا ماديريش عليا والله غير كنت مقلقة وعيانه
مافيها والو هاد الهدرة
قاتلي واش نقولك وانتي غير جيتي جيتي للقصاري وطلعتي عند حبيبتك تقصري معاها وخليتي يما واقفة لتحت
وانا ما علاباليش بيك ازعفي ولا اقعدي , وفلان*راجلي*يزعف ولا يقعد
وانتي تبدلتي ومابقيتيش نتيا
ويما راهي زعفاااانه عليك
وانا ما قتلكش سيقيلي دياري ولا اغسليلي مواعني
وبدأت تقولني ما لم أقل وتحملني ما لم أفعل وتجبد في واحد الدفاتر يعني الله المستعان

فقلت لها "
اسمعي يا أمة الله
أنت حماة ؟ أنت لست حماة , فلا تقولي لي افعلي ولا تفعلي , او ارفعي هذه او ضعي تلك , او لما لم تأت في اليوم الفلاني أو لما أتيت
وكما لا ترضين ذلك لنفسك من أخت زوجك لا أرضاه لنفسي منك
وإنما علاقتي بك انك أخت لزوجي نلتقي ببعض في بيت أهلك وكلانا ضيف
ما أحب أن أسوءك وما أحب أن تسوئيني


ثم ارتحت راحة تامة ..
وقلت " هذا ماكان ينبغي أن تسمعه منذ أمد بعيد "


بزاف ناس كي يشوفوني نكتب ردود ولا مواضيع نشكر فيهم حماتي او أمتدح حياتي الزوجية يقولو ربما انو هادي ماعندهاش مشاكل
واحيانا لما نقدم نصائح عن كيفية التعامل يشوفوني البعض مثالية
وبالاك كاين اللي يقولو هادي راهي تقول هكدا لانها راهي مهنية وماراهيش عايشة واش رانا عايشين
او تقول الواحدة كون جيتي في بلاصتي تشوفي
ورغم كل شيء مازلت نشوف حماتي مليحة ونشوف بلي التغير الطارئ عليها ماهوش جزء منها او من حقيقتها
ربما تحركت بعاطفة الامومة ولا ألومها ولكن فقط خاب ظني فيها حين وقفت وقفة عمياء مع ابنتها
فيما كان عليها نهرها وزجرها حتى لا تخسر أحدا منا


فلو أني جئت أستنصحكم اليوم
فبما أنتم ناصحي ؟

[هدى الجيجلية]

السلام عليكم
اختي
بارك الله فيك
على هذا الموضوع القيم
والهادف
والله اختي
السبب الذي يخلي
أخت الزوج
تعمل هكذا
يمكن عدم خطبتها او زواجها
وهي تحس بفراغ
لو يتقدم واحد لخطبتها
صدقني
راح تتغير للاحسن
إن شاء الله تكوني فهتي
قصدي
تحياتي لك

[مواطنة]

السلام عليكم ورحمة الله وبركاته
اختي العزيزة ماشاء الله عليك تودين ان تكون علافتك مع اهل الزوج جيدة و هذا امر رائع .هذه المشاكل للاسف تحدث كثيرا مهما حرصنا المهم ان لا نضخمها و نتركها تدور و تحطم افكارنا الجميلة .
يمكن ان اقول لك انه صار معي افضع من اللي صار معك لكن الحمد لله التجربة افادتني و ساعطيك النتائج المستخلصة يا رب تفيدك
لا تشتكي ابدا
1 *لحماتك عن ابنتها ولا عن ابنها الا اذا كانت من ذوي العقول النيرة و الحقانية و الا فلن تنصفك بل كل ما قلتيه سيكون ضدك في يوم ما
2*لزوجك فسيتدمر بمرور الوقت حتى و ان كان يعلم بتصرفاتهم معك فسوف يحزن لان اهله كذلك لا تجرحيه و انما اذا اصر ان تخبريه قولي له انك لا تريدين شغل تفكيره بامور زائلة و تتعبيه و قولي له انك لم تخطئي معهم و هذا يريح ظميرك حتى لو سمع من طرف اخر لا باس سيفهم انك راعيت شعوره و تكبرين في نظره
اذا حصلت مرة اخرى سوء فهم معها حاولي قول الحق ولا تتحججي كثيرا لان الحوار العقيم يضيع وقت و اذا زاد الكلام انصرفي فورا و لا ابتعدي حتى لا تشتعل نار الفتنة و لو كان عندك حق بختصار ما تهبطيش النيفو ديالك لا تتحددثي بهذه المشاكل لسلفتك و لو بالهاتف لان الذي يريد بك زلة سيترصد لك فكوني ذكية خوذي حذرك ليس ان تكوني شكاكة بل احرسي تصرفاتك العشوائية الناتجة عن تصرفات تنافي اخلاقك
خطوتك لتجديد العلاقة جيدة و هي الصح في هذه المرة حاولي ان تكوني مثلما كنت حنونة و رحيمة لكن على طبيعتك يعني دون تكلف زائد و ضعي مسافة فيها حدود للكلام حتى يظل الاحترام بينكم فانت مثل ابنتها ان لم تخطئي و ما ان تخطئي سيتغير الامر فالام الحقيقية تسامح كثيرا عامليها كامك في الحنان و ضعي الحدود الازمة لانها ام من ولدت
اعطيك فكرة من اجل فتح صفحة جديدة حاولي دعوتهم الى البيت عشاء اوغذاء يوم الجمعة او قهوة فهذا حتما سيصفي القلوب و اطلبي السماح ممن تظنين انك اخطات في حقهم و اعطيهم هدايا صغيرة و ابدئي حياتك من جديد معهم بكل حب و تفاهم و حذر هههههههههههههههههههههههههههه
اختك في الله تتمنى لك حياة زوجية سعيدة

[maymay]

أختي ايمان،المشاكل تلقايهم في كل بيت للأسف،و محال تكون الحياة كاملة،لهذا لي عليك نتي ديريه انو ماتخليش الغلطة تجي منك،أخت زوجك ربي يهديها راهي قاعدة تغلط معاك بصح كوني نتي ديما خير عليها و اتعاملي بأخلاقك لي تربيتي عليهم،عمرك ما تتبدلي بسبتها،راكي قلتي ماتتلاقاوش بزاف،امالا ماتخليهاش تنغصلك حياتك،خليها تهدر تهدر حتى تسكت وحدها،ولكان شفتيها بدات نفوت حدودها،وقفيها عندهم بأدب و ماتكونيش كيفها


حماتك يا ايمان،ماتخليهاش تبقى زعفانة عليك،راضيها و حطيها في مقام الوالدة لي تزعف من ولادها بصح في الأخير ترضى عليهم،هي مهما تكون تحبك و تعزك غريزيا ماراحش يكون كيما الحب لي تحبو لبنتها،الوالدين راهم لا شعوريا يحطو ولادهم دايما صح،اذا نتي قلتيلها بنتك غلطت معايا قلبها راح يقولها بلي ماكانش منها،المفروض انها كانت تحسبها بعقلها و تشوف شكون غالط لكن ممكن هي تبعت قلبها،و انا نقولك عمرك ماتلوميها لأنو رغم كلش راح تبقى بنتها،وشي هيا راضيها يا إيمان،لأنو رضاها عليك راح ينعكس على علاقتك مع زوجك،لانو حتى ولوكان مايهدرش،راح تبقى تحرقلو في قلبو كيفاش ماراكمش ملاح مع بعضاكم نتي و يماه،و كيما يقولو يا ختي لعزيزة،"بات مغيوض و لا تبات ندمان"....كوني دايما نتي الأفضل و ربي راح يفرج عليك،و زوجك خليه خارج هاد الحكايات،لانك كي دخليه فيهم راح تزيدي الطين بلة و راح تضري علاقتكم

ان شاء الله نكون نحيت عليك ولو شويا برك،ربي يهنيك إيمان..

المشاركة الأصلية كتبت بواسطة هدى الجيجلية

السلام عليكم
اختي
بارك الله فيك
على هذا الموضوع القيم
والهادف
والله اختي
السبب الذي يخلي
أخت الزوج
تعمل هكذا
يمكن عدم خطبتها او زواجها
وهي تحس بفراغ
لو يتقدم واحد لخطبتها
صدقني
راح تتغير للاحسن
إن شاء الله تكوني فهتي
قصدي
تحياتي لك

يا أختي حسب مافهمت أخت زوجها راهي متزوجة و عندها أولاد...

[خربشة ناعمة]

شكون فينا ما كانتش تعاني مع اهل زوجها
حماتها او بناتها
و لكن في حالتك انت اول حاجة راكي ساكنة وحدك
و اخت زوجك كيف كيف ساكنة وحدها
اول حاجة غاضتها منك انك لما راكي تزوري يماها اول حاجة لازم تعاونيها في الشغل
وعلى حساب ما فهمت عجوزتك وحدها مكانش الللي عاونهافي شغل الدار
و انت لما رحتي خليتي عجوزتك واقفة و اخت زوجك تسيق فالدار
و طلعتي عند سلفتك
برايي انت جيتي لعند عجوزتك ماشي لعند سلفتك
و من المفروض كنت تبقاي عند عجوزتك
لما تسمع بيك سلفتك باللي راكي تم راح تهبط و جي تسلم عليك
هذا الامر خلا اخت زوجك تحس باللي راكم متفاهمين على راسهم

الاهم في الامر و اللي لازم تتمسكي به هو رضا عجوزتك حتى لو تبدلت معاك ما تتبدليش معاها
خليكي دايما انت العاقلة و راح يجي نهار وتعرف قيمتك
اما بالنسبة لاخت زوجك ما لازمش تروحي في نفس اليوم اللي تزور فيه يماها
باش تتفاداي تطيحي معاها فالكلام الزايد
و اذا شفتيها خلي علاقتك معاها رسمية
يعني الكلام على قد السؤال

و بالنسبة لعجوزتك حتى اذا حبت تهدرلك على بنتها
كوني سريعة وبدلي الهدرة تم تم

ما دامك ساكنة وحدك حاولي تركزي في راجلك و اولادك و دارك
و تجنبي الحديث مع زوجك فيما يخص موضوع اخته ويماه
لان الزوج كل شيء يتحملوا الا زعاف يماه عليه
و دائما كوني انت اللي تذكريه باش يتصل بيماه و يروح لعندها و يشوف واش خاصها
باش كاش ما يقولولوا عليك يتعجب يقول هي اللي دايما تنصحني باش نكون بار بيما
و ما يصدقش كلامهم عليك
ما دام راجلك متفاهمة معاه و عايشة لاباس معاه
متكسريلوش راسو بالهدرة اللي تقولها اخته

الله يهنيك ويسخر لك زوجك

[AyOuB0587]

السلام عليكم
نسأل الله تعالى أن يرزق جميع الرجال نساء مثلك
ويبقى أن النصائح الربّانية في علاج هكذا أزمات خير من أي نصيحة من البشر
فالله تعالى أمرنا بقول التي هي أحسن، لأن الشيطان ينزغ بيننا
وكذا ان نعفو ونصفح ونسعى في الصلح من جهتنا -ولو كان الطرف الآخر مخطئا- طبعا مع وجوب تبيين الخطأ له والنصح له
وبعدها إن كانت طينته من الصالحين فسيندم وينفع معه الإحسان ... غير ذلك نكون قد أبرأنا ذمتنا أمام الله تعالى

[salima14]

ياختي ربي يهنيك حسيت بيك راني عايشة حكياااااات بنفس حكايتك
بعض النصائح بلاك ينفعوك أنا6 سنين زواج وحرب مع أهل زوجي
تغلبت على عجوزتي راها لطافت معايا بصح بنتها مازال ماتحملنيش
بصح حطيتلها خطوط ماتفوتهمش
1مانشتكيش لزوجي وكي يسمع نقول لحق وما نستناش يدافع عليا ههههه تعودت
2كي يشنفوا نكثر السكات و نقلل من التصنات ههه يشعل فيا النار و نبعد قد اللي نقدر
3ندخل عليهم حاجة في يدي معناها طالبة الصلح بلما نهدر حتى أنا نيفي تع زجاج
إذا طاح تكسر
4وروحي أخدمي لعجوزتك تربحي فيها لأجر تخيليها يماك وبقات وحدها
وربي معاك أختي

[amouna.sem]

ya okhti Rabi yhanik frat tgoulchi tahki fi hkayti ana ani darba 3am ma yahkouch m3aya ki golt l'khot rajli tahtaramni en fin el kder mlih é kkima golti chi li tardayah l'nafssek lazem tardayah lghirek par ce que impossible hya tahgar khot rajelha mé hna hachak ...... allah yahdi ma khlak

[لينة نور]

السلام عليكم

لي عودة ان شاء الله .

الله غالب ...ماكملت موضوعك حتى نعست ....ونخاف نرد ويقولو علي مثالية ..هذ الكلمة راه تجيبلي الحساسية .

الله يقدرك أختاه

[nina love]

وقلت واش يجيب مول النية لمول التحراميت ..
وانا الللي يحبلي بنتي حبني واللي ما حبليش بنتي ما كلاهلي بيه
هذا صدق الحق رجع باطل واالعكس.....أعانك الله أخية على هذا الستوتة والله الغيرة والحقد أ ختي عنده مايدير... تهلاي في روحك وفي راجلك هو الصح ....وأخطيك من الغاشي الراشي ههههه

[sarah1424]

Ana lecran sghir mes yeux ydorouni mana9rtach lmawadi3 twila mais wallah tn histoire 9ritha kalma bkalma
rabbi yjiblek sbar wya3tik l9odra
khali binatkom le9dar matdakhsiha matkatri hjadra m3aha
wida dalmatek kayn rabbi id3i rabbi yonsrek wyjiblek ha9ak

[Meriemchawiya]

ربي يكون في عونك حبيبتي من تجارب صديقة ليا عجوزتك تاج راسك و بيها لازم تغلبي سلفتك هي تصرفت بأنانية كي وقفت مع بنتها بصح اكيد عارفة داخلها انها ضلماتك
رجعي المياه مع عجوزتك و متشكيش لراجلك من امو لأنها ببساطة امو لكان تشعل فيك النار تبقى امو

[amouna.sem]

ngoul lba3ed el akhawat ma yhasse ba jamra ghir li 3afes 3liha éallah la ychawaf mouman fi had el machekel

[imane1]

المشاركة الأصلية كتبت بواسطة هدى الجيجلية

السلام عليكم
اختي
بارك الله فيك
على هذا الموضوع القيم
والهادف
والله اختي
السبب الذي يخلي
أخت الزوج
تعمل هكذا
يمكن عدم خطبتها او زواجها
وهي تحس بفراغ
لو يتقدم واحد لخطبتها
صدقني
راح تتغير للاحسن
إن شاء الله تكوني فهتي
قصدي
تحياتي لك

هي متزوجة أختي الفاضلة
ومن الله عليها بسكن خاص وأولاد كأنهم أقمار

فأنى يأتي هذا الفراغ ؟

[imane1]

المشاركة الأصلية كتبت بواسطة مواطنة

السلام عليكم ورحمة الله وبركاته
اختي العزيزة ماشاء الله عليك تودين ان تكون علافتك مع اهل الزوج جيدة و هذا امر رائع .هذه المشاكل للاسف تحدث كثيرا مهما حرصنا المهم ان لا نضخمها و نتركها تدور و تحطم افكارنا الجميلة .
يمكن ان اقول لك انه صار معي افضع من اللي صار معك لكن الحمد لله التجربة افادتني و ساعطيك النتائج المستخلصة يا رب تفيدك
لا تشتكي ابدا
1 *لحماتك عن ابنتها ولا عن ابنها الا اذا كانت من ذوي العقول النيرة و الحقانية و الا فلن تنصفك بل كل ما قلتيه سيكون ضدك في يوم ما
2*لزوجك فسيتدمر بمرور الوقت حتى و ان كان يعلم بتصرفاتهم معك فسوف يحزن لان اهله كذلك لا تجرحيه و انما اذا اصر ان تخبريه قولي له انك لا تريدين شغل تفكيره بامور زائلة و تتعبيه و قولي له انك لم تخطئي معهم و هذا يريح ظميرك حتى لو سمع من طرف اخر لا باس سيفهم انك راعيت شعوره و تكبرين في نظره
اذا حصلت مرة اخرى سوء فهم معها حاولي قول الحق ولا تتحججي كثيرا لان الحوار العقيم يضيع وقت و اذا زاد الكلام انصرفي فورا و لا ابتعدي حتى لا تشتعل نار الفتنة و لو كان عندك حق بختصار ما تهبطيش النيفو ديالك لا تتحددثي بهذه المشاكل لسلفتك و لو بالهاتف لان الذي يريد بك زلة سيترصد لك فكوني ذكية خوذي حذرك ليس ان تكوني شكاكة بل احرسي تصرفاتك العشوائية الناتجة عن تصرفات تنافي اخلاقك
خطوتك لتجديد العلاقة جيدة و هي الصح في هذه المرة حاولي ان تكوني مثلما كنت حنونة و رحيمة لكن على طبيعتك يعني دون تكلف زائد و ضعي مسافة فيها حدود للكلام حتى يظل الاحترام بينكم فانت مثل ابنتها ان لم تخطئي و ما ان تخطئي سيتغير الامر فالام الحقيقية تسامح كثيرا عامليها كامك في الحنان و ضعي الحدود الازمة لانها ام من ولدت
اعطيك فكرة من اجل فتح صفحة جديدة حاولي دعوتهم الى البيت عشاء اوغذاء يوم الجمعة او قهوة فهذا حتما سيصفي القلوب و اطلبي السماح ممن تظنين انك اخطات في حقهم و اعطيهم هدايا صغيرة و ابدئي حياتك من جديد معهم بكل حب و تفاهم و حذر هههههههههههههههههههههههههههه
اختك في الله تتمنى لك حياة زوجية سعيدة

عليكم السلام ورحمة الله وبركاته

والله أختي كلامك يثلج الصدر ’ بيد أنني دعوت حماتي للعشاء ورفضت الحضور
من جهتي لم أقطعها يوما , حتى وهي لا تعتبرني وغاضبة مني أزورها كل يوم عطلة*الجمعة*
من الصباح الى الليل ..

الهدايا ما أحسبني قطعتها عنهم يوماً .. خاصة حماتي ..وهي ايضا كريمة معي الى حد بعيد

أما الاصلاح هذه المرة فأظنه سيأتي مع الوقت وبالليونة من جانبي
وذلك ما اسعى اليه


هدانا الله واياك أختي لما فيه خير لنا وصلاح
وشكرا على حضورك