لاتارت نتاع قلب لعيد ميلاد زوجي

[ام ملاك.]

جبتلكم لاتارت نتاع عيد ميلاد راجلي العزيز
درتها نهار السبت

نخليكم مع الوصفة
لابات درت جينواز عادية
4 بيض 125 غ فرينة 125 غ سكر فانيليا ومغرفة صغيرة لاليفور
تخلطي البيض مليح حتان يبياض ويطلع وتزيديلو السكر وتكملي تضربي مليح وتزيدي لاليفور ولافاني وتكملي كي تشوفي الخليط بياض وطلع فرغي الفرينة وخلطيها بمغرف ولا سباتول بلعقل وفرغيها في بلا انا درت بلاطو قلب نتاع السيليكون
هنا كي طابت وبردت انا قسمتها على زوج




هذا هو المول اللي درت فيه وكي طابت غطيتو قع بالبلاستيك اليمونتار



هادي لاكريم باتيسيير عادية وزدتلها كاكاو
نص لتر حليب 2 صفار بيض 2 ونص مغارف كبار فرينة لافاني سكر 5 مغارفوكاكاو 2 مغارف يتخلط كلشي عالبارد وتحطيها فوق النار مع التخلاط حتان تعقاد مليح نحيها وخليها تبرد مليح من بعد ضربيها بالباتور باش يروح تحربيش
وتولي رطبة


هذا العصير اللي سقيت بيه لاتارت باش تولي مشمخة وماتجيش يابسة وتقدري تديري اي عصير عندك

هذا الجزء الاول حطيتو داخل المول وشربتو بنص بواطة عصير


هنا فرغت لاكريم باتيسيار فوق النص الاول نتاع لابات


هنا حطيت لابات الدوزيام فوق لاكريم وزدت شربتها بالعصير اللي بقى
هنا غلفيها مليح بالبلاستيك ودخليها للفريجيدار خليها تبرد مليح


انا طلعت لاكريم من الفوق بلاكريم شانتيي خاطرش كنت تعبانة باش ندير لاكريم نتاع الزبدة
درت 100 غ كريم شانتيي مع كاس حليب بارد وضربتهم مليح مليح حتان طلع
هنا خرجتها من الفريجيدار خليتها فوق ساعة قيس ماشد لاكريم الداخلاني روحو مليح تحبي تنحي لاكريم اللي على الناب ولا تحبي تطلي بيه انا طليتو غاضني نحيه



هنا طليت لاكريم شانتي قع من الفوق وعلا الجناب بالابيضواللي بقى منها زدتلو كاكاو وطليت من الفوق
وديكوريت الجوانب




وهنا كملت ديكور نتاعها درتو سامبل وبسيط قلتلكم كنت عيانة ومريضة شوية
الورد والديكور الفوقني وردات من البلاستيك واوراق ثاني شريت الورد اللي يتباع بارة اللي يجي شباب وفي الدار قصيتو وغسلتو ومخبياتو نخدم بيه غير الديكور نتاع لي تارت
وكتبت من الفوق العمر بلا ماندير قع الشمع




هنا كي قسمتها
وهادي لاول واحدة ترد




وهادي اللي تدعيلي بالشفاء


لليوم رانا الخميس ومازاللي منها شويز في الفريجيدار مزال تقول البارح برك درتها خفيفة وطرية ومعمرة عصير

ماتنساونيش من الردود التشجيعية

[kakinova]

أيا مليح

أنا أول وحدة ترد

خخخخخخخخخخخخخخخ أول مرة فالتاريخ

امممممممممممممممممممممم باينة بنينة

يعطيك الصحة

[ام ملاك.]

ههههههههه
الله يسلمك حنونة ارفدي هداك المورصو وكوليه راه ليك

[kakinova]

خخخخخخخخخخخخخخخخخخخخخ كليتو و زدت كملت لي بقات فالفريجيدار بلاما تعرضي

خخخخخخخخخخخخخخخخخخخ لحبابات ما بينهمش عرضة

تعيشي لعزيزة ربي يهنيكم

[الوهرانية 1]

كل عام وزجك بالف خير حبيبتي الغالية وانشاء الله دوام الصحة والهناء والسعادة وفعلا رائعة تحياتي يا متالقة

[ام ملاك.]

يعطيك الصحة اختي الوهرانية
الله يسلمك ان شالله
منورتيني



الاخت كاكينوفا بصحتك حنونة ههههههه
صحيتي على روحك الخفيفة

[عروبتي]

عيدميلاد سعيد وعمر مديد وصحة كالحديد لعقوبة ل100عام
وهاديك لي مازالها في الفريجيدار فليكسيهالي ههههههههههههههه
يعطيك الصحة

[ام ملاك.]

ههههههههههههههههههه
الله يسلمك من بعد نفليكسيهالك

[كاميلا]

الله يبارك ربي يعيشكم لبعضاكم اختي مونية مي مفهمتش لاليفور ؟؟؟؟؟
نقولك تبانلي رح نجرب وصفتك بانتلي ساهلة

[عروبتي]

المشاركة الأصلية كتبت بواسطة مونية ك

ههههههههههههههههههه
الله يسلمك من بعد نفليكسيهالك

هههههههههه شكرا عارفاتك صاحبت واجب وقدها وقدود
ربي يهنيك

[ام ملاك.]

اختي كاميلا لاليفور هي خميرة القاطو نتاع لي صاشي
يعطيكم الصحة والله فرحتوني

[أم ماجد]

يعطيك الصحة يا مونيا باين حب كبير ؟؟؟؟؟؟؟؟؟؟؟؟؟؟؟؟؟؟؟؟؟؟

[ام ملاك.]

الله يسلمك حنونة
ايه صح نحبو بزاف ماعندناش بزاف متزوجين 3 سنين او نص

[ساندي 28]

هايلة يعطيك الصحة فكرتيني في لاتارت الي درتها لزوجي درتها كيما بياس مونتي عجبني الشكل يدل على المحبة ربي يخليكم لبعض اختي نسالك البابي المنتار الي درتيه هو العادي الي نخدمو بيه في الكوزينة ولا نوع خاص بالفور وشكرا

[ام سارة 285]

يعطيك الصحة اختي و ربي يهنيك مع راجللك