قطع وارمي...المقطعة...ثيقزيرث أوجنوي...ادخلو ومدولي رايكم

[ام ملاك.]

السلام جبتلكم اليوم الماكلة اللي يديروها قع الجزائريين مي كل واحد واش يسميها
احنا بالعربية نقولولها قطع وارمي وكاين اللي يقوللها المقطعة والقبايل يقولولها ثيقزيرث الموس

نخليكم مع الصور اللي راح يفهموكم كل شي



انا هنا نحب ندير الخضر قع اللي متوفرة عندي كيما راكم تشوفو زرودية بطاطا لفت بصل كورجيت توم فلفل حار




هنا توجدي عجينة تحبي بالسميد رقيق ولا الفرينة انا خدمت بالفرينة تلميها بالما والملح برك





وهنا تديريها في النيلون وتخليها ترتاح







هنا تحذي البصل والثوم يتقلاو ومن بعد تزيدي الخضرة قع والطوماطيش نتاع بواط والتوابل راس الحانوت فلفل لكحل ملح جومبو فلفل عكري



وتمرقي بالما





تشدي العجينة وترشي تحتها بزاف فرينة وتبداي تفتحيها لازم تكون رقيقة





كيما هنا قد ماتكون رقيقة مليح






وتعمريها من الفوق بالفرينةوتقسميها شرائط كبار كيما راه باين





وتزيدي تديري الفرينة وترفدي كل شريط فوق خوه كيما هكذا ولازم تكون الفرين بزاف بيناتهم باش مايلصقوش





وتبداي تقطعي بالموس رقيق




كيما هكذا وتديرلها الفرينة باش يبقاو متفرقين




وكي تطيب المرقة نتاعك والخضرة اللي فيها ترفدي العجين اللي خدمتيه وتغربليه باش تهبط قع الفرينة اللي درتيها




وكي تتغربل مليح ارميها داخل المرقة وحركي بسرعة باش ماتلصقش في بعضها وتخليها تطيب من 15 دقيقة لعشرين لازم يطيب ملبح العجين




وهنا كي طابت
واللي تردلي تاكل مغرفة وتخلي للبقية



هاذ الماكلة تحب الحار بزاف واللي حاب يديرلها اللحم يديرلها
واش رايكم؟؟؟

نستنا ردودكم

[أم ياسين الزهراء]

اهنا يسموها المقطعة يعطيك الصحة

[حياتي نبع امل]

امممممممممممممممممممممم مونية يا مونية نموت عليها يعطيك الصحة شهيتينى
انا عجوزتي جوزها فى الماكنة تاع البقلاوة وتقطعها فى جهة الرشتة العريضة يجيو طوال
بالصح نجرب طريقتك فى اعدادها عندي بزاف ما درتهاش
بارك الله فيك

[ام ملاك.]

المشاركة الأصلية كتبت بواسطة حيهتى كلها امل

امممممممممممممممممممممم مونية يا مونية نموت عليها يعطيك الصحة شهيتينى
انا عجوزتي جوزها فى الماكنة تاع البقلاوة وتقطعها فى جهة الرشتة العريضة يجيو طوال
بالصح نجرب طريقتك فى اعدادها عندي بزاف ما درتهاش
بارك الله فيك

هي كل واحد كيفاش يديرها احنا ماما كانت تفتح العجينة كبيرة وتروليها ومن بعد تقطعها كي تزوجت لقيت عجوزتي تديرها هكذا عجبتني طريقتها خاطرش تجي رقيقة بزاف
والله لوكان قدامي نوكلهالك حتان تشبعي منها

[ام ملاك.]

المشاركة الأصلية كتبت بواسطة أم ياسين الزهراء

اهنا يسموها المقطعة يعطيك الصحة

يعطيك الصحة حنونة على الرد

[أم عائشة 10]

يعطيك الصحة باينة بنينة هذه الأكلة مانعرفهاش راح نجربها
مشكورة

[ام ملاك.]

المشاركة الأصلية كتبت بواسطة أم عائشة 10

يعطيك الصحة باينة بنينة هذه الأكلة مانعرفهاش راح نجربها
مشكورة

والله بنينة سورتو كي تكون حارة

[ام ملاك.]

وين راكم يالبنات؟؟؟؟؟؟؟؟؟؟

[ryma la cool]

هايلهههههههههههههههه حنا ثاني نديروها بالصح بلا خضره لازم نجربههههههههههههههههاااااااااااااا

[لينا11]

باينة بنينة حنونة
مالفة نديرها بصح نخليها مورصوات كبار يعني مانقطعهمش وتجي بنينة تسخف ممممم
قريبة شتاء نشبعو منها وتاعك جات تشهي ممممممممم

[le chameau]

اول مرة نشوف هذه الاكلة وعد سوف نجربها يوما ما حنا فى الصحراء ما نعرفوهاش

[djamilach]

بارك الله فيك فكرتينا بزمان الجدة.وكي كناصغار

[ام ملاك.]

يعطيكم الصحة فرحتوني وطلعتولي المورال علابالي ماعجبتكمش
مي الحمدلله كي عجبتكم

[oum anas 69]

mmmmm chahatni tlik fi lberd w mliha li 3andou la gripe hna nsamouha haswa w mgat3a basah ndirouha bla khodr ya3tik asaha ya fahla w nousssssssss

[ام ملاك.]

انا نحب الخضر بزاف واي ماكلة فيها عجين نعمرها خضرة للتوازن الصحي