ارجو الدخول بسرعة

[مشكلتي]

انا بنت عمري17سنة انا البنت الكبيرة في الدار منذ الصغر و بابا يبغيني بزاف مقلشني واي حاجة نطلبها يجيبهالي حتى و تكون غالية خاصة اني ممتازة في الدراسة لكن مين بديت نقرا في السيام بديت نتبدل قريت العام الاول نورمال منبعد سافرنا لولاية اخرى عندها تغيرت بزاف المراهقة كانت صعيبة بزاف عليا درت علاقة مع شاب كبيرعليا ب4 سنين و بابا عرف ممن هذاك اليوم مزادش هدر معايا قولولي كيفاه ندير

[~~نهال~~]

هو يا ختي صح عندو الحق

كيفاه بنتو العاقلة و الفاهمة يخرج منها هكا نتي ماتياسيش و حاولي مراضاتو باي طريقة
و الشاب هذا مازلتي تهدري معاه

[ولد حمد الباتني]

حاجة واعرة انو الواحد يتقاس ويخيب ظنو في بنتو ألي ربما كان يشوف فيها مثالية
لازم عليك تفوتي العلاقات هادي اطلاقا وربي يطبع في قلبو انك صافية وصفيتي
وكي يرضى عليك ربي راح يرضي عليك الناس ومنهم باباك

[aissam .3820]

عندو الحق يا اختي على خاطر حس بلي خيانة درتيها....

...
وهو اللي موفرلك كلش كيما راكي تحكي..

..

مازالك صغيرة تبعي قرايتك وتوبي لمولاك...
..

وما تفتحيش الباب للناس تلعب بيك..

..

والدك كي يشوف سلوكك تبدل رايح يغير معاملتوا معاك..

..

[Crazy lazy Girl]

اه.....عندو الحق باباك خاطش خيبتيلو املو فيك...

الحاجة الاولى توبي و اتركي المعصية.....
ثانياا سيي جيبي معدل ممتاز جداا باش تعاود تولي الثقة....

نصبرك و نقولك الزمان كفيل بان يمحي الحادثة......الشكر لك يا الله على نعمة النسيان

[zaki_moh_amir]

رغم ان هذا المثل لا يقال الا في حالة الاستهزاء بالناس ,,,,
إلا انني احببت اعادته على مسامعك لانه سيكون ذو مفعول ايجابي اذ طبقتيه ان شاء الله :d
عادت حليمة الى عادتها القديمة
ارجعي الى ماكنت عليه و ستعود المياه الى مجاريها ان شاء الله

[mohaa47]

أنت خنت الأمانة ..................................لا بد من التوبة .................أطلبي الغفران من أبيك.................وهو يسامحك بإذن الله.............

[**د لا ل**]

عزيزتي
انت خنتي ثقتهم

و قبلهم ربي سبحانو

عليكي بالتوبة
وابعدي نفسك عن صديقات السوء

وحافظي على نفسك لانك مازلت صغيرة

ربي يهديك ويهدينا اجمعين

[Soufiane2130]

ننصحك ماتشوهيش السمعة نتاعك بالعلاقات لانو كلام الناس راح يمرضك و يمرض الوالد نتاعك.. دخولك في علاقة مع شاب تجيبلك المشاكل و يعود الدوسي نتاعك محروق مع من يريد الزواج بك في المستقبل..يقولولو وش يجيك من واحدة بدأت العلاقات في سن صغيرة أكيد موش صالحة و ايضا كي تجيبلك بنات تفكر بلي سيرتهم رايحة تكون كيما سيرة امهم ....

[vivaldi]

ما حك جلدك إلا ظفرك

[اللؤلؤة مريم]

من الواضح أن والدك غضب منك لأنك خنت الثقة التي منحك إياها و حتى تعود معاملته لك كما كانت في السابق يجب أن تثبتي له بأنك تستحقين هذه المعاملة الحسنة و ثقته أثبتي له أنك أصبحت ناضجة إهتمي بإخوتك الصغار و ساعدي أمك و توبي إلى الله و حققي درجات ممتازة في الدراسة صدقيني بإذن الله سيرضى عنك خاصة إن تأكد أنك تبتي وفقك الله

[مريم الصابرة]

السلام عليكم اختي
راهم قالولك كامل باللي غلطت وباباك كان داير فيك ثقة كبيرة وما حرمك من والو رجعتيلو خير وبتحطيم إسمو كيفاه حبيتي يهدر معاك يشجعك على واش درت اختي لازم ترجعي الثقة هي صعيبة فالاول لكن ترجعيها فالدار داومي على الصلاة والدعاء وقرايتك وإسعاي ترضيهم بكل طريقة لما تخرجي للشارع إكسبي رضا والدك بانك ترفضي الخروج لوحدك إلا مع والدتك ديري كل شييخليه يعرف إنك نادمة احكي مع امك إبكيلها أطلبي منها تطلب منو يسامحك واكيد راح يسامحك وخليك من نحبو ويحبني ما خرجت الاولين ما تخرجك إنت قرايتك وخليك من المسلسلات كل شي خرطي موفقة

[داعي الله ياسين]

السلام عليكم


علابالك رب سبحانو كي واحد في جوف الليل ايصلي ركعتين ويتوب لله ويطلب المغفر

علابالك أن ربي سبحان ايحب دلك العبد ايحبو ويغفرلو ....هذا ربي سبحانو


حتى رب البيت تمااااااااام ===> شوفي

لازم تختاري وقت ايكون فيه باباك هادئ (منقولش فرحان لدرجة ما ..ممكن مناسبة...منقولكش غاضب بشيء ما)


المهم ايكون هادئ وجالس وحدو ...ومن الأفضل أن يوكن وحدو مع نفسو


قعدي قدّامو وقوليلو : بابا حبيت نطلب السماح منك وحبيت انعاهدك منزيد انخون اسمك

علابالك غير ( بابا حبيت نطلب السماح منك ) راح قلبو يترطّب ويحس انكي صح حابّا تصححي غلطتك


راح أنعاهدك 90% يرضا عليك ====> هدي نصيحة


أما إدا انتظرتي حتى تجيبي معدل أحسن حتى العام القادم راح الجرح عند قلب باباك ايزيد

ويقول أن بنتو مصرّة على خيانتو

ونصيحة الآن قبل مايطول الحال


وانتي من جيهتك ماشي ايسمحلك تنسايه وتعودي كيما كنتي

حاولي التجديد اقطعي كل العلاقات خلي الناس تقول معقدة المهم راسك مرفوعة مع والديك


ربي ايجيب الخير




مكانش حاجة ترطّب القلب كيما الإعتراف بالخطأ ===> هذا ربي سبحانو ويرحمك ويغفرلك


فما بالك بالمخلوق ======= إن شاء الله تطلبي عليه السماح وربي هو ايرطّب قلبو ويحن عليك


نصيحة لله

[islam girl]

والله هذي اكبر غلطة ديروها


مكانش طفلة في هذا الوقت خاطية هذو الحوايج الا من رحم ربك


بعدي على هذو الحوايج يرجعلك باباك

الله يهديك

دك حنا مانقعدوش نديرو فيها سبة نقولو المراهقة باش نديروا هكا حوايج !!!!!

[شخصية نرجسية]

هادي غلطة كبيرة تخليه يفقد ثقته بيك لازم أختي اتوبي و تصاحبي الي ناس ملاح و متخلقين و تخطيك من هده العلاقات التافهة و الضرة روحي أبكيلو أطلبي السماح لازم يسامحك لازم تبينيلو بلي تبت