شربة الفريك

ام مؤمن · 2012-06-26, 14:13

السلام عليكم

شربة الفريك

نبدا بسم الله

المقادير

فخد او صدر دجاجة + قطعة لحم غنم او بقر + بصلة كبيرة او 2 متوسطين مفرومة 3 سنات ثوم مفرومين

عود كرافس +طماطم مصبرة 2 ملاعق اكل

طماطم حب مرحية 2 حبات صغار تكوني فورتيها او غليتيها وترحيها ملح وفلفل اكحل وزيت راس حار اخضر و كسبر مرحي اذا كنت تحبي طعموا و فريك جاهز

طبعا و ملعقة صغيرة غبرة فريك

التحضير

اغسلي اللحم و الدحاج جيدا و احطيه في قدر و اضيفي له البصل و الثوم و الزيت و الفلفل اسود و الملح و الطماطم المصبرة و ممكن تضيفي كسبر مرحي انا مانحطوش و تخلطي كل شيىء و تخليهم على نار هادئة يتقلاو حتى يذبل البصل و تنسايش تحركي ساعة على ساعة

حتى تتقلى مليح ضيفي طماطم نتاع الحب و زيدي قلي شوية و امبعد امرقي بماء سخون و خليها تستوي حتى يطيب الدجاج و يقرب يطيب اللحم امرقيها بكمية من الماء و خليها تغلي و بعد ما تهز الغليا ارمي كاس صغير او نصف كاس كبير من الفريك و الفلفل الاخضر اذا ماتحبيش الحار خليه مغلوق او استغني عنوا و نقصي للنار و خلي الفريك يطيب على الاقل ساعة او اكثر و ماتنسايش تحركي ساعة على ساعة باش مايعجنش الفريك كي تنشف امرقيها بماء ساخن و بعدها ضيفي غبرة الفريك و عود الكرافس و خليها تغلى 20 دقيقة حتى تختار و طفي عليها

ماتخليش المرقة عاقدة الفريك بعد ما يبرد يتكاثف و حطيها في غميقة و زينيها بدبشة مقطعة رقيقة

ملاحظة

ممكن تعملي شربة الفريك بالدجاج فقط او باللحم فقط اذا ماتوفروش الاثنين و اذا توفروا راهم يزيدوها بنة ايضا ممكن تستبدلي اللحم بكريات من الكفتة مداوية و ارميها تطيب بعدما تمرقي

و شهية طبية

liliane24 · 2012-06-26, 14:18

يعطيك الصحة أختي أم مومن ، بارك الله فيك.
مشكلتي في التمراق، مانعرفش نمرق يا تجيني خاثرة بزاف، ياتجيني جارية
رايحة نجرب نستعمل غبرة الفريك ، شكرا على الطريقة

ام مؤمن · 2012-06-26, 14:36

[QUOTE=liliane24;10566589]يعطيك الصحة أختي أم مومن ، بارك الله فيك.
مشكلتي في التمراق، مانعرفش نمرق يا تجيني خاثرة بزاف، ياتجيني جارية
رايحة نجرب نستعمل غبرة الفريك ، شكرا على الطريقة[/QUOTE

الله يسلمك و فيكي بارك الله

امرقي باللعقل برك و كي تجيك خاترة تقدري تزيديلها الماء و تخليها تعقد و طيبي دائما على نار هادئة

غبرة الفريك غير مغيرفة صغيرة نتاع قهوة برد راهي تخترها و تبننها

شكرا و عمت مساءا