موضوع جذيذ

[ام امجد14]

الى الاخت ام مريةكيف احوالك رجعتى لدارك ولا مازال واش راه داير فيك الماسو
حبيت نسالك على طريقتك مع الثوم هذى الفكرة عجبتنى بزاف تاع التجفيف
وهل نستعملو عادى فى الطبخ
و كيفاش نحتفظ بيه
ومشكووووورة اختى

[sondse1]

المشاركة الأصلية كتبت بواسطة ام امجد14

الى الاخت ام مريةكيف احوالك رجعتى لدارك ولا مازال واش راه داير فيك الماسو
حبيت نسالك على طريقتك مع الثوم هذى الفكرة عجبتنى بزاف تاع التجفيف
وهل نستعملو عادى فى الطبخ
و كيفاش نحتفظ بيه
ومشكووووورة اختى

حبيبتي ام امجد
ممكن نقدر نفيدك بطريقتي

انا نقي الثوم و من بعد نقطعو بالعرض لشرائح رقاق
و من بعد نملحو و نحطو للشمس في قطعة نتاع قماش نضيفة و كي ييبس نخلي نصو هكذا " شرائح " و النص الاخر نرحيه
و نستعملو في الطبخ عادي

و كاين اللي يتباع عند العطار مي ماهوش مالح

بالتوفيق حنونتي

[hakim3148]

صباح الخير حباباتي اشكركم على تواصلكم واسفة على التاخير لضروف خارجة عن ارادتي المهم اختي ام مارية وسندس بالنسبة لهدا الثوم تبقى فيه البنة عادي مثل الثوم الجديد ولا تروح اما بالنسبة لموضوعي مع اختي ام مارية سمحيلي على التاخير مصروفي الشهري فيه اضطرابات بعض الاحيان يكفيني شهر ومرات لالا نعطيك قائمة المشتريات كل شهر واش نشري وانتي شوفي واش تقدري تساعديني نشري 1كغ قهوة و6ل زيت 5طماطم و1كغ حمص مصبرة و5صابون مارساي وعلبة اريال3كغ تا المشينة و2ازيس بريل و2شامبوا و1شوربة و2كغ روز نحبو بزاف عنديطريقةجديدة وسهلة غير نحير في العشا نروح ليه و10كغ سكر و25كغفرينة الخبزنشري الايام اللي نكون عيانة اوعندي قضيان بزاف و10كغ سميد طعام كنت نشري طعام واجد وهذه الايام ماهوش يجي شباب و10كغ سميدرطب ندير بيهالفطير الحرشة والمسمن تقريب هذه الضروريات دائما نشريها تبقالي فالخضر كل مرة وكيفاش وكيما قتلك جاجة كل اسبوع والايام الباقية مرات نقلي مرات روز مرات نشري قيس20الف دجاج اولحم مرحي هذه مشكلتي معنا كي نشري داجة ونقول نقسمها منعرفش واش نديرعليها العشا راجلي مايكلش الحريرة وحدها يقولي متشبعش هي غير كيا الما ء يبقى الحليب والخضروات مانيش منضمة فيهم كل مرة وكيفاش والكوش نضشريعلبةب130الف اما الضوء دائما يخرجلي350الى400الف والانترنت150الف ويفي والهاتف حوالي100الف وراجلي قالي مانتنازلش على 100كل شهر والما بديت نغليه وزيد عنديبناتي حشاك الاحذية كل شهر البارح شريت 2سنادل 100الف اما ولدي هو فقط مهنية منو عارف الضروف عمروا مايكلفني امي كينروحوا عندها تعطيه ويشري واش يخصوا طولت عليك اعطيتك كلش بالتفصيل اما عنك انشاء الله تكملي دارك بالصحة والهنا وتتهناي فيها نصيحتي اعملي دال دو صول في الهول والكوزينة والفايونص في الحائط يزي النص في البيت وكذلك يلا كان عندك دري فو بلافو يجي روعة تبان السكنة دائما نقية والله يوفقك اختي

[ام انيس2]

المشاركة الأصلية كتبت بواسطة هبة الكوثر

احكمي مليون اقسميها على 5 اسابيع تطيحك كل اسبوع 2000 الف واحكمي 500 الف روحي اشري قيص 100 الف لحم كونجيلي و 100 الف حوت و 100 الف لحم مرحي و100 الف اشري شوية خضروات واقصميهم في ساشيات ديري موني تاعك بحيث انك في الاسبوع يكون عندك يوم تطيبي فيهم معجنات ويوم تطيبي فيهم الحساء ويوم تطيبي فيه البقوليات منهار تديري فيه حوت ونهار تاع لاغراتان ونهار سبيسيال ماكلة بنينة شطاطح مثلا وكي تديري هادوك الماكلات لي ماتعجبهمش زيدي ديري غراتانتاع البطاطا بالحليب والفرماج ولا غراتان تاع البدنجان ولا شلايظ وحطي 200 الف تاع الخبز تاع كل يوم لمدة شهر صدقيني تلقاي روحك موفرة ملين في جيهة ماتمستش وهادوك الاظرفة رايحة تلقي فيهم دراهم ماتمستش وديري شهر خبي فيهم دراهم الماء والتريسيتي
هده مجرد راي ان شاء الله نكون عاونتك اختي والاسبوع الخامس على اساس انها ممكن تطول لاباي ولا كاش مايصرا بعيد الشر للطوارئ

بارك الله فيك اختي الكريمة ربي يعطيك على قد نيتك
عجبني الرد تاعك وراني رايحة نجرب طريقتك لاني والله حاصلة في المصروف هههههه

[ام امجد14]

الله يعطيك الصحة يا سندس تهلاى فى روحك باش فى عرسك تكونى شاااااابة واذا كنت نحيفة لازم تسمانى و العكس و بداى من الان فى وصفات الطبيعية للبشرة
باش تحمرينا وجوهنا ياك

[nourtazmalt]

السلام عليكم

بكري كانوا يخبيولنا الذهب أنا الكبيرة في دارنا

كانت يما كي نجيب معدل مليح تشريلي حاجة نتاع ذهب حتى كي تخرجت وشراتلي

بصح الذهب غلا

ضرك أنا نخدم يتسمى إذا جا مكتوبي عندي أنا الدراهم ان شاء الله منحيرهومش

[sondse1]

المشاركة الأصلية كتبت بواسطة ام امجد14

الله يعطيك الصحة يا سندس تهلاى فى روحك باش فى عرسك تكونى شاااااابة واذا كنت نحيفة لازم تسمانى و العكس و بداى من الان فى وصفات الطبيعية للبشرة
باش تحمرينا وجوهنا ياك

بلا مزية حنونة
راني نوجد و بالنسبة للسمانة كنت شوي مليانة و ذرك مع التحضيرات و الجري شينت فوق ما كنت حابة نشيان
و الوصفات الطبيعية و الله ما ني ندير في حتى وصفة بخلاف ماء الورد كي نوض و لا فازلين ليديا و رجليا ابارسا والو

ربي يجيب اللي فيه الخير

[sondse1]

المشاركة الأصلية كتبت بواسطة nourtazmalt

السلام عليكم

بكري كانوا يخبيولنا الذهب أنا الكبيرة في دارنا

كانت يما كي نجيب معدل مليح تشريلي حاجة نتاع ذهب حتى كي تخرجت وشراتلي

بصح الذهب غلا

ضرك أنا نخدم يتسمى إذا جا مكتوبي عندي أنا الدراهم ان شاء الله منحيرهومش

وعليك السلام و رحمة الله تعالى و بركاته

صح اختي بكري كانو يديرو الذهب حنا ماما وجدتلنا ملي كنا صغار و حنا غير زوج بنات في الدار
و ذرك الحمد لله حتى و غلا الذهب لقينا رواحنا واجدين

و نصيحة مني حاولي تبداي تجهزي في روحك مادامك خدامة و راه كل يوم الشي يغلا و كي يجيك مكتوبك تلقاي روحك واجدة

ربي يرزقك بالزوج الصالح

[sondse1]

أم مصطفى
بالنسبة لسؤالك ايه يبقا نفس الطعم

بالتوفيق

[hakim3148]

شكرا اختي راح نجربوا ونرجعلك الخبر

[iamyoucef]

اختي العزيزة و اللى ما عندوش الدار كيفاه يدير

[ام ظافر]

اهلا بالغوالي الي هنا راهو فاتني موضوع مليح ومافقتش بيه تقرعيج ربات البيوت
ان شاء الله من اليوم نكون عضوة في هذا الموضوع المميز نفيد ونستفيد
انا ام لزوج اولاد وبنت وراني بالحمل وزيد راني متغربة على ولايتي يعني من الشرق نروح للغرب كل حاجة مبدلة عليا الغربة والوحدة علموني بزاف صوالح
راح نرجعلكم ببعض الامور الي راني تعلمتها ولقيتها تفيدني في حياتي منها تحضيرات المطبخ والملابس تاع الاولاد وووووو

[نيفرتيتي.]

ماكانتش كاين كونكسيون نخدم شغالي ونرجعلكم

[ام ظافر]

--لما يكون وقت الطماطم مليحة كبيرة وملحمة ورخيسة نشريها تقريبا ب5 الاف للكغ نغسلها وننزعلها القمع ونمسحها ونحطها في اكياس وفي المجمد على طول
الان لما لحقت ل16 الف بديت نجبد الطماطم الي عندي والله ما حسيت بانها غالية في السوق لاني ما نشريهاش خلاص لما تغلى
هذي الطماطم تاع الطبيخ مثلا الحريرة والشربة فريك واللوبياء الخضرة والعدس وووووو يعني ننزعها من المجمد مباشرة للقدر نطيبها ومن بعد نصفيها اما تاع البيتزا والسباقيتي وووووالصوص طوماط نطيبها مع الثوم والكرافس والجزر والبصل وزيت الزيتون والتوابل والملح ونرحيها ونخبيها في علب في المجمد وكل وين نحتاجها نجبدها نسخنها غير شوي تكون واجدة ناقصة تعاب وناقصة سعر
اما تاع السلاطة لازم تكون جديدة هنا نشري غير رطل في اسبوع راجلي يحب الطماطم في السلاطة
وقت الفلفل الاحمر الحلو لما يكون ملحم حتى هو ورخيس نشري كميات نشويها وننزع القشرة ومن بعدها نستفها بدون تقطيع شرائح بينهم شوي ثوم وفي الاخير نصب شوي زيت الزيتون على العلبة ونجمدها لما نحتاجها نلقى فيها طعمة الثوم وزيت الزيتون روعة
نستعملها في تزيين الاطباق او في لي قراتان تاع السردين او حميص يعني فلفلة مشوية ونزيدلها شوي هريسة تاع الشري ونرحيها توليلي حميص رايع
الفطر البري ايضا ننقيه ونغليه ومن بعدها نجمدو في علب تاع البيتزا رقيق وحدو وتاع الاطباق كبير شوي وحدو
العصائر نصنع دائما تاع الجزر بكميات كبيرة ونخليه في المجمد ونجبد بالقارورة والباقي يبقى للضيف او في وقت الصيف ما يخطاش داري ابدا
نعصر الليمون لما يكون وقتو ونخبيه مكعبات في ساشي في علبة ولما يجي وقت الشتاء خاصة المرض نجبد بالمكعب حنا في رمضان يلحق ل50 الف لكغ
نخبي السفرجل غير ننقيه ونفورو شوي فقط ونخبيه لما يلحق رمضان نحطو في المرق الحلو وباقي القشور تاعو والنوى نصنع بيهم جولي رائع ونصنع ايضا مربى السفرجل يقعد مدة طويلة
المشمش في وقتو يلحق لسعر زهيد ايضا نرحي كميات كبيرة ونحطها في اكياس ولما يلحق رمضان نجبدها ونصنع بيها عصير رائع مفيد للعطش يقولولو المشارقة شراب قمر الدين ونصنع ايضا مربى المشمش وما نحتاجش خلاص للي يتباع في السوق على مدار العام نفطرو بيه ونستعملو للقاطوات ولي كرام ديسار
هذا الي تفكرتو اشياء كثيرة نستغل الوقت لما تكون رخيسة في موسمها ونشري ونخبيها في المجمد الي لازم يكون في كل بيت الان والله ساعات نجبد حوايج راجلي نفسو يحير فيها ويقولي مازالت عندك
اي اكلة تبقالي او ما يحبوش ولادي ياكلوها نخبيها حتى ينساوها ونجبدها نسخنها ونزيدليها شوي فريت فقط مثلا مرقة زيتون او جلبانة نخبيها في علب وننساها ولما نكون تعبانة او عندي شغال كثير نجبدها مع الفريت وحنا تغدينا

[ام ظافر]

الفلفل الحار ايضا نخبيه بعد غسلو مباشرة وتفوارو غير ثواني ولكن نخرجو من المجمد الى القدر مباشرة لما يكون كلشي طاب خلاص لانو راح يهز غلية او زوج في المرق فقط يعني ما نخليهش حتى يذوب منو اثر التجميد لانو راح تلقايه وكانو ذابل مباشرة حطيه في القدر تاعك والله وكانك استعملتيه جديد
الهريسة الحارة الحمرة ايضا لازمة نعملها في وقتها ونخبيها في علب
كل حاجة نحاول نخبيها بطريقتها المناسبة لما يغلى سعرها ما يهمنيش وايضا نلقاها ديما واجدة عندي وتنقص عليا التعاب لما تكون واجدة وتنقص الوقت
ولكن لما يلحق عليها العام الجاي نكون استغليتها ونعمل واحدة جديدة
قطع لحم الدجاج نزيدلو بعد ما نغسلو ونقطرو ونقطعو شوي ملح وفلفل اسود وسكنجبير وكسبر وكروية مطحونين كميات قليلة جدا ما تظهرش ولكن لما نخبي قطع الدجاج متبل في المجمد تخدم فيه هذيك التوابل وتنحيلو الريحة والزفرة تاع الدجاج ويكون الطبخ بيه بنين جدا وكذلك طعمة الدجاج في حد ذاتو يكون بنين عن تجربة