الجزء 1 : كُوزِينَةْ الأَكْلْ الصِحِّيْ ........... مع زُخْرٌفَةٌ

[أم سلوى]

[أم سلوى]

للمزيد من للمتابعة مطبخي الخاص هنا بحيث ادرجت موضوعنا هناك..
https://fonouneatabkhe.blogspot.com/?m=1

["سمية"]

المشاركة الأصلية كتبت بواسطة zokhrofa

اهلا بالصديقة سمية شرفتيني

نفس طريقتي لتحضير السلق

و سبحان الله كل مرة نقول من بعد نقوللهم ما تفوروش السلق و ما تغلوهش راهي هاذيك الفكرة خاطئة

السلق يطيب كيما قالت اختي سمية في ماه باش لا يفقد الحديد لي فيه

نسيتي عصرة الليمون مممممممممممممممممم

تقوللكم هذه المعلومة ربما تفيدكم

اذا لاحظتو جدودنا كل حاجة فيها سلق او قرنون او باذنجال او عدس يعصرولها الليمون صح؟

لماذا ؟

لأنّ كل هذه المواد فيها حديد و الحديد في الجسم يحتاج الى فيتامين س c لكي يثبّت في الجسم عكس هذا راح يخرج بدون ما يحتفض بيه الجسم

اذا لازم دايما كي تاكلو حاجة فيها حديد اعصرولها الليمون

اذا ما تحبوش الماكلة حامضة معليش ديرو عصير ليمون و طبعا بدون سكر يعني

احكمي كاس ماء اعصري فيه شوية ليمون و اشربيه قبل الوجبة او في الوسط و ليس بعد الوجبة

لماذا ؟
[color="navy"]
قال الشيخ ابن عثيمين رحمه الله :

" يكره الشرب في أثناء الطعام بلا عادة ، فإن كان الإنسان اعتاد هذا فلا بأس ، قال بعضهم : ويكره أيضاً بعد الطعام مباشرة بلا عادة ، وقوله : ( بلا عادة ) يفهم منه أن المسألة ترجع إلى ناحية طبية ، قالوا : لأن الشرب أثناء الطعام يفسده ، وتزول به منفعته ، وكذلك إذا شرب مباشرة ، فإذا كان قد اعتاد هذا فإنه لا يضره . وقال بعضهم أيضاً : إنه إذا شرب أثناء الطعام فإنه يشعر أن معدته كالسقاء ترجرج ، أما إذا كان هناك عادة ، فالعادات لها طبائع ثابتة ، فكثير من الناس لا يهمه أن يشرب أثناء الطعام أو بعده مباشرة فلا يضره ؛ لأنه معتاد .

ثم إن الطعام إذا كان حاراً والماء بارداً صار هناك مضرة من جهة أخرى ، وهي ورود البارد على الحار ، ومعلوم أن الحار يوجب تمدد العروق والجلد ، فإذا جاء البارد تقلص بسرعة ، فيكون في ذلك خطر " انتهى .

" الشرح الممتع " (12/366-367)

السلام عليكم حنونة
ربي يحفظك على مجهوداتك و يجازيك إن شاء الله
بالنسبة للسلق عند الحق مئة بالمئة أنا أصلا علاجال هاكذاك اللي نطيبو بهاذ الطريقة و هاذي الطريقة نفسها مع الكابوية أو الكاباوة و الفرق أنو الكابوية نديرها مباشرة مانذبلهاش
بالنسبة للقارص كاين اللي يحبو كاين اللي مايحبوش أنا نديرو في الشربة فريك
أنا نموت عليه تقريبا في كل شي بصح كيما قلتلك كاين اللي مايحبوش
في أمان الله

[أم البراء 2017]

اول وصفة عبارة عن خضار في الفرن بزيت الزيتون والخل
وصفة هايلة وبنينة وريحتها مانقولكمش تعبق كامل الدار
خضار مشكلة اللي تحبي
انا ستعملت جزر.بطاطا.قرعة.بسباس وكرم وخرشف مغليين
الكل مقطع مكعبات او اصابع
ونزيدوا حبة طماطم مكعبات ودبشة.ح بة بصل مقطعة وراس ثوم لازم تكون كمية مليحة
وقطع دجاج.توابل مانكثروش باش يبقى طعم ااخضر
ونخلطوا كل المكونات ونحطهم في مول
ونرش عليهم شوية زيت زيتون ورشة خل او عصرة ليمون
والى الفرن

[zokhrofa]

المشاركة الأصلية كتبت بواسطة ام هدول

سلالالام لبنات ...يعيطكم الصحة على التفاعل ..لانو مهما ناكلو لازم لازم تولهو من صحتنا لي مايعوضها حتى شي....
زخرفة الكسكس الصحي لي درتو موضوع عاودي شوفي الوصفة مليح كنت دكرت انو في الاصل بزيت الزيتون انا زت اضافة الزبدة لي مايحبوش زيت الزيتون الصحي لانو شفت بعيني كي ياكلو حاجة تع زيت الزيتون يجيهم لقيا ..حشاكم ...فقترحت فكرا الزبدة ...فقط باش مايضيعوش بقية المكونات والفايدة تاعهم

اه انا نقرا مفرفشة هههه يعطيك الصحة كي صححتيلي عزيزتي ام هدول

[zokhrofa]

المشاركة الأصلية كتبت بواسطة انا هي رزيقة

عندك الحق اختي ام هدول كاين بزاف ناس ل لي مشي متعودين على دوق زيت الزيتون من الصغر تجيهوم الحالة لي وصفتيها... بصح المهم في الموضوع انو المقفول فيه خضار مطبوخة بطريقة صحية بزاف و المرغارين او الزبدة ميضيعوش القيمة الغذائية تاعو طبعا

طبعا طبعا رزيقة عندك الحق الزبدة ماشي معناها تضيع القيمة فقط تبطىء الهضم يعني لي ياكلها من المستحسن في النهار ماشي في الليل

ممممممهاذيك الشلاظة تاع الخضرة اعطيهالي غير هي فالصيف و بعدي نحب ناكل هذا النوع خير من الجواز سخون ههه

[zokhrofa]

المشاركة الأصلية كتبت بواسطة انا هي رزيقة

اختي طالبة راهي جاوباتك ام هدول صح لي مترباوش على زيت الزيتون يصعب شوةي عليهم التاقلم مع ذوقو مع انو يهبل .......خخخخخخخ بصح كاين ثاني لي ماتوصلهمش زيت زيتون ذات جودة عالية يكون ذوقها قاسح سي نورمال ميكلوهاش ..... لازم كي تشريو زيت الزيتون تشروها من عند ناس ثقة باه تدوقوها على اصولها .... راجلي مثلا متربي في بيئة ميعرفوش زيت الزيتون بصح معايا ولا يحبها ... صح في الاول كان عندو صعوبات باه يتقبلها بصح مع الوقت ولى ميستغناش عنها سورتو كي بحث و عرف فوائدها العظيمة ... لذا نوصي الامهات يعودو ابنائهم من الصغر على دوق زيت الزيتون

كلامك صحيح واش قلتي لطالبة

وزيدي في وقتنا ضرك مساكن الناس ماعادتش تقدر تشري لتر وواحد ب 800دج او اكثر مرات والله غالي بزااااف


انا شخصيا راني بلابيه الان خاطش مالقيتش نوعية صافية

[zokhrofa]

حياة يعطيك الصحة على الكسكس بالحلحال ياك تاع شعير هذاك ياك ؟

حياتي كلها امل ربي يزيدك تالق في مطبخك هذا تدبار زين ان شاء الله نجربو خاطش عندي كامل المكونات

ام البراء اهلا اهلا زارتنا القمرة الضاوية ربي يعطيك الصحة على الوصفة باذن الله نجربها

ام اياد معليش انتي فقط كي تقلي نقسي كمية الزيت يعني ما تخليهش يعوم و تاني نقسي للنار يعني سخني الزيت كي تديري يدك من البعيد فوك المقلة و تحسي السخانة طالعة حطي الحوت فالمقلة

صحيتو على الوصفات

[رحمة2016]

بارك الله فيكم يا البنات وصفات ولا اروووع

[zokhrofa]

انا فطوري كان كارانتيكا

هذي هي طريقتي

https://www.djelfa.info/vb/showthread.php?t=1996770

كانو بزاف لي قالولي خرجتلنا و وحدوخرين لالا

لي ما خرجتلهمش نقوللهم راكم ديرو الغلطة لي درتها انا مرة

و هي انو تديرو الخليط في قالب الكوشة صغير

الكارانتيكا تحب قالب طويل و عميق باش ما تتركزش الحمص في الاسفل و تجي طبقة كبيرة

["سمية"]

المشاركة الأصلية كتبت بواسطة انا هي رزيقة

اختي زخرفة نزيدلك هذو و نروح ... مقفول الخضارالقبايلي يشبه مقفول ام هدول فقط حنا ندير كل الخضار تفور طبقة على طبقة نبدا بالخضار لي تدي الوقت و ننتهي بالخضار لي متديش الوقت مثلا نحط طبقة جزر ثم لوبيا خضراء ثم لفت ثم كورجيت و جلبانة و بطاط ثم بصل و نملحو شوةي فقط كل طبقة و نغطيو و نخليهم يفورو ... و حنا طبعا ندهنو بزيت الزيتون حصريا حتى تشوفي الطعام تاعك راه يلمع هذي ضرورية جدا ...... خخخخخخ و هذا مقفول او مسفوف كيما تقولو تع الفول و الجلبانة حنا نديرو الفول بقشورو منرموهمش ... ربي مخلقهومش باطل يا بنات ....

السلام عليكم أختي رزيقة

سبحان الله نفس الوصفتين اللي نديروهم و كيما قلتي الفول بقشورو أكيد أنا من قبائل الوسط الجزائري و أنت ؟

[جهينة اليقين]

السلام عليكم اولا دخلت هنا باش نستجيب لدعوتك كما اوصانا صلى الله عليه وسلم
ثانيا كانت واحد الاخت دارت موضوع الاكل الصحي في هذا القسم وانا كنت مؤيدتها لكن كاين الي عارضوها بزاف وراح موضوعها
ثالثا كاين اخت حطت قراتان ودارت جومبو فهو غير صحي ياريت تنحوه تنقص البنة خير ما تنقص الصحة وواحدة دارت الاالمنيوم فهو غير صحي كذلك
يا ريت كل واحدة تحط طبق صحي تحاول باه يكون بمواد طبيعية والا فقد الموضوع معناه وما درنا والو تحياتي

[zokhrofa]

صحيتي صحيتي اختي جهينة على تلبية الدعوة و على الملاحظات

والله ما نتبهت لهذه التفاصيل خاطش كنت مقبيل نخدم بالهاتف يهبلني شوية ما نقراش بالتفصيل

و صح عندك الحق الألمنيوم يا خواتاتي اثبتت الدراسات انو اذا ارتفع نسبته في الدم يسبب الزهايمر

لذلك ارجوكم لا تستعملوه للطهي سواء ورق الالمينيوم او اواني الامنيوم

من الاحسن الاينوكس او النحاس او الطين و الخشب في العجن و الكسكس

كيما قالت اختي تان على الجمبو راه مضر بالطحة لأنهم يستعملو عظام الدجاج فيه و البقر و يستعملو بزاف مواد ما نعرفوهاش اصلا

علاش ديرو جومبو بما انو كاين بهارات ترجع البنة هاااااااااايلة

نقترح عليكم تضيفو الكركم في بلاصت الجومبو و راح تشوفو الفرق بزااااااف بنين

جهينة ياريت تبعثي رسائل خاصة لصاحبات المواضيع كي تنتبهي لحاجات كيما هذه باش كامل نشاركو في انجاح الموضوع ان شاء الله

[أم رقية نسرين]

صح عندكم الحق على زيت الزيتون لانو دقت النوعية المليحة و النوعية لي ماشي مليحة فرق كبييييييييير
كنت رايحة نسقسي على ورق الألمنيوم لقيت الأخت هدرت عليه انا سمعت بلي مهوش صحي و حابة نتأكد من اامعلومة علميا هل هذا صحيح
ثاني حاجة السلق قالولي كي يطيب و تعاودي تسخنيه ماشي مليح

[أم رقية نسرين]

اه زخرفة ورق الألمنيوم سمعت بلي مهوش صحي من عند واحد والله نسيت اسمو بصح راهو عضو في منظمة الإعجاز العلمي في القرآن الكريم من تم مزدتش استعملتو