♦○• "مُشاركتي في تحَدّيات و إبْـدآاع في رِحَآاب رَمَضَآان 彡•○♦[[أسْـيــــاآ 25 ]]

[آسيا 25]

السلام عليكم و رحمة الله و بركاته

بداية لا يفوتني أن أشكر مشرفات قسم الطبخ على هذه المبادرة الطيبة التي جعلتنا نجتهد حتى نبدع و نفرح عائلاتنا فبارك الله فيكن كما لا أنسى أن أحيي كل العضوات المشاركات دون إستثناء.

كما هو مطلوب قمت بتحضير طبق رئيسي و تحلية:
بسم الله الطبق الرئيسي عملت أرز محشي في الفرن بلمستي الخاصة العصرية:

بالنسبة لطريقة التحضير:
نحمر فخد دججاج في الزيت ثم نضيف بصلة مسكرفجة و 4 سنينات ثوم, ملح فلفل أبيض زنجبيل فلفل عكري, راس الحانوت, قصبر و حبة حلاوة و نترك الكل يتقلى ثم نضيف حبة طماطم مرحية و نصف ملعقة طماطم مصبرة و ورقتين رند و نترك المزيج يتقلى حتى يذبال كلش و الزيت يطفو على السطح, حينها نمرق بكمية قليلة من الماء الساخن أنا مرقت بحوالي 0.75 لتر و نغلق عليها و نخليها تطيب و تتخثر.

من جهة أخرى نجيب كمية من الأرز أنا استعملت أرز ستار المفور حقيقة رائع نحبوأكثر من البسمتي و نقسم الكمية تاعي على 2 نصف نغليه مع شوية ملح فقط و الجزء الثاني نغليه مع ملح و كركم باش نعطيه لون جميل و لا نكثر من عمليةالغلي 5 دقائق كافية باش من بعد يشرب المرق ممممم

كما نقوم بتقطيع بعض الخضر أنا إستعملت بطاطا+ جزر+جلبانة و نفورها مع رشة ملح ثم نحمرها شوية مع ملعقة زبدة و نضعها جانبا

و نذبل حبة بصل صغيرة فالزيت ثم نضيفلها لحم مفروم مع رشة ملح و لما تطيب نحطها بجهةو أخيرا عملية المونتاج: في دي مول تاع السيليكون مدهونين نحط كمية من الأرز الأصفر بعد ما نخلطو مع شوية بيض (على حسب كمية الأرز) ثم نسقيه بكمية من المرق ثم طبقة خضر ثم طبقة لحم مفروم ثم طبقة أرزأبيض و نسقي بالمرق مليح ثم نحطهم يطيبو فالفرن

و في الأخير نقلبهم على صحن التقديم بحذر و نزينهم بوردات من الجزر المبري و نحط فخد الدجاج فالمنتصف مع الخضر المتبقية الممزوجة باللحم المفروم و صدقوني روعة روعة ماناش موالفين ناكلو بزاف في رمضان لكن هاد الطبق لحسناه

التحلية

تحلية بالكريمة الإنجليزية بالقشدة و بافوا الشكولاطة:
نخدم كريمة إنجليزية بضرب 4 صفار بيض مع 4 ملاعق كبار سكر و رشة فانيليا حتى يبيض الخليط

من جهة أخرى نحط 20 سل حليب+15 سل كريمة فراش سائلة فوق النار حتى يغلو ثم نحيهم و نضيف نصف الكمية على البيض المخفوق مع التحريك بسرعة ثم نرجع كلشي للكسرونة و نخلط و نردها فوق نار هادئة مع التحريك المستمر حتى تعقد (لا يجب أن تغلي الكريمة) ثم ننزعها و نضعها مباشرة في كؤوس التقديم و إلى الثلاجة

ثم نقوم بصنع البافوا حيث نضرب صفار 2 بيض مع 3 ملاعق سكر تماما مثل المرة السابقة لكن هذه المرة نسخن 15 سل حليب لوحدها مع فانيليا و نعمل مثل الكريمة الإنجليزية يعني نحط كمية من الحليب الساخن على البيض مع التحريك السريع ثم نرجع البيض و الحليب إلى الكسرونة و نحرك فوق النار حتى تعقد الكريمة ثم ننزعها من النار و نضيفلها 100 غ شكولاطة سوداء مبشورة أنا إستخدمت أمباسادور و نخلط حتى نتحصل على كريمة ملساء

ثم لما تكون الكريمة بدرجة حرارة الغرفة نخفق بالفوي 20 سل كريم فراش سائلة حتى تتماسك و نضيفها لكريمة الشكولاطة مع الخلط برفق فنتحصل على البافوا بهذا الشكل:

و نحطها في الكؤوس فوق الكريمة الأولى و نضعها على الأقل 4 ساعات في الثلاجة.

و أخيرا نطلع 2 بياض بيض مع رشة ملح حتى يصبح كالثلج ثم نضيف حوالي 70غ سكر بالتدريج مع الخفق المتواصل حتى نحصل على ميرانغ

نأخذ بالملعقة الميرانغ و نطهوه في حليب ساخن ثم نصفيه بالصفاية

و نحطهم فوق البافوا ثم نزين بنجارة الشكولاطة أو مكسرات أو كراميل كل واحد و ذوقو

نتمنى أطباقي يكونو عجبوكم و إلى اللقاء في التحديين المقبلين بإذن الله