الجزء90 من واش طيبتي اليوم **مبارك علينا الشهر الفضيل** - الصفحة 25

<نَجْمَاتْ> · 2014-06-30, 10:06

صباح الخيرات والطاعات لكن جميعا. انا فطوري من تاع البارح غير الشربة نديرهاوبس والحمد لله

ساندي 28 · 2014-06-30, 10:16

صباح الخير رمضان كريم ومبروك تاهل المنتخب الوطنى الايام الماضيه كنت مع التحضيرات لرمضان مقدرتش ندخل
ام اسلام مبروك الكوزينه اطباقك تشهي وماشاء الله على الكتكوت يوسف ربي يحفظولك من بعد نحط الباروك
حبيت نبارك لكل الناجحين الف مبروك مبروك لدائمه الحمد المولود الجديد يتربى فى عز والديه
الهام عظم الله اجرك ربي يصبر اهلو ويرزقو ابواب الجنه
فطورى البارح شربه فريك اجبارى مع سلطه وطاجين الحلو وكسرة خمير والديسار دلاع وقازوز وعصائر الحلويات ممنوعه طيله شهر رمضان منكلوهاش والطياب هدا فقط مياكلوش على هدي ندير غير الضرورى

ساندي 28 · 2014-06-30, 10:28

نروح نسخن شربه لاولادي ونطيب كسرة باش يتغداو سلام فيما بعد نرجع
ام ابراهيم بصحتك المشتريات خاصه لوازم الحلوى كاشما تطيبى جيبى نقرعجو
البارح جابلى زوجي قلب اللوز حاشا نعمه ربي مينذاقش اليوم ان شاء الله نطيبو ونبردو قلوبنا فيه هههههههه

ناهدوران · 2014-06-30, 10:42

صح رمضانكم يا الفحلات ويا الزينات
الهام عظم الله اجركم و ربي يصبركم ويعطيك الصحة على الاطباق الي عملتي فحلة بنت الفحلة

ناهدوران · 2014-06-30, 10:46

ام تاجو يعطيك الصحة على واش قدمتي وربي ايبارك وقوليلي منين شريت هداك الصحن الطويل راني نموت على الصحون

أم ياسين الزهراء · 2014-06-30, 10:48

صباح الانوار

ام محمد فرحت كيعجبو زوجك ح الطاجين تسلمي وبصحتكم وحتى انا كيتبقى الخيرات مانطيبش الحمد لله

الهام مالقيت مانقول غير الله يبارك واووووووووووووووووووووو

دائمة ربي يعينك والبيبي راهو عندك

الفطور مازال ماقررتش منبعد

ناهدوران · 2014-06-30, 10:59

طومة و ليدي يعطيكم الصحة على واش قدمتو
هاو ليكم خبز الدار االنتاعي و شباح الصفرا ومن اليوم باذن الله انعود انحط واش نعمل سوا ملاح ولا لالا وعملت البارح جاري فريك وحميص و سلاطة والديسار والطبق الي يعجبني هو المصحف وراني خجولة علا هديك ما نحطلكم والو على خاطر انخاف تظحكو عليا ولا تقولوا تزوخ

عازفة الناي · 2014-06-30, 11:01

صباح الخير للجميع
كيف اخباركم ؟؟؟؟؟؟
ربي يشفي كل مريض و يعينه انا ايضا صبحت مكسرة ههههههههههههههههههههه
دائمة الحمد ربي يجازيك الخير و يساعدك على انجاز المهمات الصعبة راكي قدها هههههههههههههه اسينات واش اخبارها ؟
ام رحاب الف مبروك لبنتك وربي يفرحك بالبنت الاخرى و تزهينا الحالة بالباروك
فضيلة طهور ان شاء الله
ساندي ان شاء الله تجربي قلب اللوز و ينجحلك و ينال اعجاب زوجك ؟
فطوري مازال مابان والواااااااااا

أم فاطيمة · 2014-06-30, 11:02

صباح الخير
الهام عظم الله اجركم و يعطيك الصحة على الاطباق دائما نستنى جديدك
ام رحاب مرجبا بك و مبروك على بنتك عقبال للباك انشاء الله
دائما الحمد ربي يقويك و يشفيك انت و اسينات راه لي يقابل لمريض هو لمريض
البقية يوم موفق انشاء الله و الفوز للفريق الوطني

lyzzabel · 2014-06-30, 11:03

صباح الخير على حبيبات قلبي الغالياااااات و نهاركم طيب
ميمتي ام رحاااااااب يا سلاااااام الف اهلًا و سهلا بعودتك يا الحنينة والله توحششششتك بزاااااف بزاااااااااف راكي طولتي الغيبة و ما عاودتيش طليتي من نهار شاركتي من عند أختك ام إكرام ،، انشالله تكوني لاباس نتيا و كل العاءلة و الف الف مبرووووووك للغالية النجاح في شهادة ال b e m و العقوبا لبنيتك الكبيرة تنجح و تفرحك و تدوم عليكم الأفراح يااااارب ،، و رمضان مبارك كرييييييم

حبيباتي ماشاء الله عليكم كل وحدة باسمها ما خليتو ما تنوعو الله يبارك و يزيدكم من نعيمه كلشي يشهي بصحتكم و مطرح ما يسري يمري على قول الغاااالية

داءمة الحمد لاباس عليك حبيبتي اتهلاي في روحك و ربي يقدرك على العناية باسينات الام و الابنة معا و يخليك لعائلتك يا احلى طيبة و ربي يشفي اسينات و يقومها بالسلامة يا رب

نواااال واااااع فاتكم السحور ماعليش حبيبتي اليوم عوضوه انا قاع ما نتسحرش و الف لاباس عليك

فضوووولة لاباس عليك يا الحبيبة و ربي يشفيك و يشفي جميع المرضى ياااارب

اليوم بالاك ندير الحوت للفطور مع الحريرة راهي باقيتلي بيناتنا زيدت منها البارح باش ما نطيبهاش اليوم كل عام ندير على حساب ما ناكلو منها ثلاث ايام موالفة نطيبها كونسونتري ما عليا غير نحي شوية و نزيد عليها الماء و نعطرها و نرمي فيها الدشيشة و هاذ العام طيبتها حتى ل la fin و نزيد معاها سلطة الروز و الحمد لله مين نكونو صايمين نجوعو و مين نبداو ناكلو بلخف نشبعو و زيد الحمان غير الماء يقضي لافار ههههه ربي يدوم النعم علينا و على المسلمين

راه عندي الغسيييييل و ما نقوللكمش حبووووبي منصف واش راه داير فيااااا راه داخلها غير بكااا

سلاااام حبيباتي نغتنم الفرصة و نخلي عوالي تغسل و نقرا ما تيسر من القران الكريم و بصحتكم قااااع واش طيبتو و واش غادي تطيبو

سبحان الله و الحمد لله و لا اله الا الله و الله اكبر ولا حول و لا قوة الا بالله العلي العظيم

أم ماجد · 2014-06-30, 11:09

اقتباس:

المشاركة الأصلية كتبت بواسطة saja safia

صباح الخير يالبنات
عندي فلان نوارة دوق شوكولا وفراز
حابة نعمل فلان الطبقات، ممكن تعطوني وصفة مليحة
ليهم

https://www.djelfa.info/vb/showthread.php?t=1216072
بلبنات راني في نعمة والحمد لله
فقط حبيت هاذ العام نركز اكثر على الجانب الديني ربي يقدرنا على الصيام والقيام وهذا لايمنع اني نطل عليكم لكن من فترة لاخرى فقط ونعاون قد مانقدر خاصة طالبات المساعدة
تحياتي وصح رمضانكم كامل ولا للتبذير واستغلوا الوقت اكثر استغلال ربما رمضان لن يعود

عازفة الناي · 2014-06-30, 11:14

ناهدوران يعطيك الصحة خبز وعليه الكلام رانا نستناو في الصور وماتخافيش رانا كامل كيف كيف مرة تصيب و مرة تخيب ورانا نتعلموا ونستفادو من بعضنا البعض حتى في الاخطاء اللي نوقعو فيها تشجعي برك

مريم الاميرة · 2014-06-30, 11:30

احلى صباح عليكم يا فحلات ما شاء الله ما خليتو ما تحطو من خيرات الله يبارك و يزيد
ام رحاب اهلا و سهلا و الف مبروك لبنتك لعقوبة للفرحة لكبيرة نتاع الباك ان شاء الله
فطوري ان شاء الله شربة فريك و طاجين لحلو تاع لبارح و نزيد شوي حميص زوجي ح يسحر بيه و ميني بيتزا و جاج محمر و الف حمد و شكر لله
ايا سلام مبعد ان شاء الله

حمودية · 2014-06-30, 11:33

اليوم الاول درنا
الشربة
طاجين الحلو
البوراك
ودلاع ديسار
وفي السحور مسفوف بالخضرة

sirina_angel · 2014-06-30, 11:39

اقتباس:

المشاركة الأصلية كتبت بواسطة إلهام07

سيرينا حبيبتي ربي يخليك ، الوصفات حشمت نحط يقولو غير راهي طيب وفرحانة والميت عندو غير اربع أيام

المهم ، والله يابنتي شعرك غير يرجع للطريق لوكان تاخذي الراي والله ماتعرفيه

حقة بنات حبيت نقوللكم معلومة بسيطة والله ضرحت نكتبها موضوع :

باش تتخلصو من الاضطرابات المعدية وحتى تنقصو بزاف من الرائحة الكريهة نتاع الفم أثناء الصيام :
كي تتسحرو وتخلصو أغسلو سنيكم مليح مليح ومن بعد قصو شريحة صغيرة نتاع ثوم ( شريحة قصوها بالعرض ماشي بالطول باش ماجيش طويلة ) المهم حطو الشريحة في آخر اللسان وابلعوها بشوية ماء بسرعة كانها حبة دواء
ماكلاه نقوللكم على فوائد الثوم تعرفوهم مليح راهو هايل وينظف المعدة من داخل لانو ريحة فم الصائم من المعدة وليس الفم
بصح هذي الوصفة راهي غير صالحة لأصحاب القرحة المعدية او اللي عندهم حساسية من الثوم
وماتاكلو من وراها والو تقدرو غير تشربو الماء
الصباح تحسو النفس نتاعكم ماهوش كيما مالف وحتى المعدة تحسوها مرتاحة انا مالفة يصرى فيا الباطل كي نصوم ملي نوض وانا حاشاكم رايحة نتقيى حتان تفوت 12 وساعات حتان 14:00 باش تتنحال والله ريحت بهذي الطريقة فووووووووووووووور

لهومتي معليش ماش ضرك مي حطييييييييييييييهم من بعد راني نستنى اوكي ؟؟؟؟
على الشعر نقولك لاه ما يصلحلوش ؟؟؟؟؟
لأنو بالاك انت كان شعرك مليح و من بعد فسد راكي تعالجي فيه باه يرجعو لأصلو
لكن أنا شعري أصلو حرررررررش يعني مثلا كون نقصو كامل التعب لي تعبتو يروح لأنو رح يرجع لأصلو حررررش
فهمتيني ؟؟؟ واش رايك ؟؟؟