تجهيزاتنا للشهر الفضيل

[arwa alaa]

اهلا فراشات
ربي يرحم وفاء ويسكنها فسيح جنانه
والله الدنيا هذي تدير وتجيب ويا سعد فاعل الخير

[قرويجة]

إنّا لله و إنّا إليه راجعون
رحمها الله وغفرلها وجعل مثواها الجنة
وألهم ذويها الصبر والسلوان

[رندة.]

المشاركة الأصلية كتبت بواسطة قرويجة

السلام عليكم
يعطيك الصحة ختي رندة وبارك الله فيك أنا شخصيا كانت تصرالي لكن هذا العام إذا حيانا ربي قررت ندير برنامج كالاتي
صبح بعد صلاة الفجر نقرا ماتيسرمن القرأن و الاذكار الفجر راح يبقى يطلع حتى 3ونص عندنا
نرجع نرقد شوي حتى ينوض وليدي على 9 ونبدأ بسم الله حبيت صبح نطيب شربة و دوزيام بلااا نخدم تحلية أو فلان نضر لوازم العصير و السلطة مع لوازم البوراك أو المملحات ونخليهم جاهزين فالثلاجة
يلحق الظهر ننعش روحي بالماء ......مشي نشرب نتوضئ نصلي نقرأ وردي نسبح وندير قيلولة مع وليدي
بعد العصر نوض نصلي ونزيد نقرأ وردي ونسبح حتى 6 نرج للكوزينة نكمل تحضير السلطة و العصير و المملحات أو البوراك كل نهار و باركتو
نحضر طاولة الفطور و بعد المغرب و الفطور نغسل ماعني مباشرة باش نقرأ وردي ونسبح مابيد تلحق العشاء نزيد نفس الشئ بعدها مع ماتيسر من ركعات قيام و أدعية ثم إلا النوم
يارب نكونو ممن يرحمهم الله و يغفر لهم و يعتقهم من النار يارب يارب
أنا هذا نظامي لهذا العام إذا نسيت كاش حاجة أو عندكم إضافة نبهوني

قرويجة أنا ثاني كنت هكا من قبل، بصح من رمضان تاع العام إلي فات مع الدورة إلي درناها مع أم شمسو ربي يذكرها على خير، تعلمنا نقومو بمعظم الواجبات الخاصة بالطبخ في الصباح، من جهة نكونو في قمة نشاطنا ومن جهة أخرى وقت الصباح مايتقاطعش مع وقت الصلوات المفروضة، وبالتالي نتخلصو من جزء كبيييير من أشغالنا، نصلو الظهر ونقراو الورد اليومي وأمبعد نديرو قيلولة، حتى ولو أداك النوم في القيلولة ماتنوضيش قلقانة لأنك راح تكملّي فقط تحضير الأطباق إلي كنتي بديتيها الصباح، تصلي العصر وتقراي الورد تاعك، وتلقاي مازال عندك الوقت باش تنظمي مائدة الإفطار ان شاء الله.

[رندة.]

المشاركة الأصلية كتبت بواسطة جهينة اليقين

عندك الصح يا راندا كاين بزاف الي يطيبو الصباح انا ندير الشربة مع الصباح وننقي السلطة ونوجد الماصيدوان قلب اللوز مثلا ثم نصلي الظهر وناخذ قيلولة
وقبل الصر نعجن الخبز وندير الطاجين الي مبرمج في ذلك اليوم ولما نصلي العصر نكمل واش تبقى

يعطيك الصحة جهينة هذاك هو البرنامج المليح خاصة لما مايتقاطعلناش وقت الطبخ مع وقت الصلوات المفروضة. ربي يقدرنا ان شاء الله ونتخلصو من عادات سلبية كانت فينا ونغيّروها بأخرى إيجابية.

المشاركة الأصلية كتبت بواسطة قرويجة

السلام عليكم
ختي أم راضية أنا نعتبرك قدوى و مثل اعلى في أمور البيت ونحشم نعطيك وصفة البسبوسة ولكن مادام أنت طلبتيها حاضر ومن عيوني
الوصفة الاصلية هي تع سليمة يعلي لي تفوت في قنات سميرة أنا نقصت منها على حسب المول لي عندي يرفد 6 حبات بيض
6 حبات بيض
كاس إلا ربع سكر
كاس إلا ربع زيت
كاس إلا ربع حليب
2 كيسان خبز مرحي يكون خشين شوي
2 ليفار شيميك
زاست تع القارص أو تع البرتقال حسب الرغبة
هي تزيد نص كاس جلجلان محمص و نص كاس كوكاو محمص أنا كل مرة ندير كي يكونو عندي مرات منديرش
بالنسبة للشاربات
كاس عسيلة
كاس سكر
3 كيسان ماء
نص لب حبة قارص بدون قشر
هذي هي الوصفة أنا كي طيب نشربها مباشرة وهي سخونة و الشاربات باردة تي روعة نزيد نقطعها ونديرها في ليكيسات بيوضا و نخبيها في بورت مونجي تبقى 3 أيام طرية وصالحة للأكل ننصحكم مديروهاش في الثلاجة تيبس

يعطيك الصحة قرويجة على وصفة البسبوسة بالخبز اليابس، بربّي نجربّها قبل رمضان، أنا كيما قالت جهينة نعرف غير تاع السميد.

المشاركة الأصلية كتبت بواسطة crono

السلام عليكم
عذرايا فراشاتتى سأعود لاحقا
اليوم أصدم بخبر لا أصدّق الأمر
وفاة الزميلة وفاء الياسمين
تعزية...أختنا https://www.djelfa.info/vb/showthread.php?t=2140222

رحمها الله و أسكنها فسيح جناته

انا لله وانا اليه راجعون، ربّي يرحمها ويصبّر أهلها عليها ان شاء الله.

[الزهراء_92]

يعطيكم الصحة .. استفدنا منكم .. الله يرحم الاخت و يثبتها عند السؤال اللهم بلغنا رمضاااااااااااااااااان

[جهينة اليقين]

المشاركة الأصلية كتبت بواسطة قرويجة

السلام عليكم
ختي أم راضية أنا نعتبرك قدوى و مثل اعلى في أمور البيت ونحشم نعطيك وصفة البسبوسة ولكن مادام أنت طلبتيها حاضر ومن عيوني
الوصفة الاصلية هي تع سليمة يعلي لي تفوت في قنات سميرة أنا نقصت منها على حسب المول لي عندي يرفد 6 حبات بيض
6 حبات بيض
كاس إلا ربع سكر
كاس إلا ربع زيت
كاس إلا ربع حليب
2 كيسان خبز مرحي يكون خشين شوي
2 ليفار شيميك
زاست تع القارص أو تع البرتقال حسب الرغبة
هي تزيد نص كاس جلجلان محمص و نص كاس كوكاو محمص أنا كل مرة ندير كي يكونو عندي مرات منديرش
بالنسبة للشاربات
كاس عسيلة
كاس سكر
3 كيسان ماء
نص لب حبة قارص بدون قشر
هذي هي الوصفة أنا كي طيب نشربها مباشرة وهي سخونة و الشاربات باردة تي روعة نزيد نقطعها ونديرها في ليكيسات بيوضا و نخبيها في بورت مونجي تبقى 3 أيام طرية وصالحة للأكل ننصحكم مديروهاش في الثلاجة تيبس

شكرا قرويجة عجبتني الوصفة بصح نحاول ننقص من الحلاوة راكي تعرفي السكريات مضرة للصحة

[جهينة اليقين]

المشاركة الأصلية كتبت بواسطة الزهراء_92

يعطيكم الصحة .. استفدنا منكم .. الله يرحم الاخت و يثبتها عند السؤال اللهم بلغنا رمضاااااااااااااااااان

اهلا وسهلا يا زهراء احنا تجمعنا هنا من اجل افادة اكبر عدد ممكن من النساء خاصة المبتدئات وماذا بينا تشاركينا يومياتك باش نحفزو الي مازال ما بدات في التنظيف العميق استقبالا للشهر الفضيل
هدفنا هو تنظيف كل البيت وترتيبه وغايتنا هي التفرغ للعبادة اللهم بلغنا رمضان

[جهينة اليقين]

اليوم خملت سلة الخضار تاع البطاطا والبصل مسحتها وغسلت البطاطا ونقيت البصل ونظمتهم وغربلت شوية توابل كمون وكروية وحبيت نطحنهم ما لحقتش جاوني ضياف
العشية درت كسرة فطير وبعد العصر عجنت المطلوع للعشا ودرت برانية بالحمص راهي تطيب وضرك نفصل جبة صيفية لاحدى الزبونات باش غدوة ان شاء الله الصباح نخيطها اذا حب ربي سبحانو ومن بعد نطيب المطلوع فالطاجين تاع الطين

[arwa alaa]

اهلا فراشات
رندة انا تاني نخدم كلش الصباح في رمضان لاني لعشية نفشل بزاف ومنقدرش
انا اليوم قشرت شوية جلبانة باش نخبيها لرمضان ان شاء الله

[حياتي كلها امل]

ربي يرحم اخت وفاؤ الياسمين ويغفر لها ويجعل مثواها الجنة
جهينة حبيبتي انا عندي مشكل في النت كل انهار وكيفاش ديجا اليوم راني من الصبح حتى الظرك فجعني خبر موت اختنا وفاء الياسمين ربي يرحمها

[جوهرة الشرق سكيكدة]

السلام عليكم كيف الحال يافراشات عجبتني فكرت الطبخ الصباح في رمضان راح نطبقها ان شاء الله اما اليوم غسلت اواني المطبخ والخزانة تاعو ونضفت سلة الخضار وادراج المطبخ والباقي روتين يومي

[جهينة اليقين]

المشاركة الأصلية كتبت بواسطة randa2017

مرحبا فراشات
حبيت نذكّر نفسي ونذكرّكم بحديث الرسول صلى الله عليه وسلم " يا معشر النساء تصدّقن"
نعرفو كامل فضل الصدقة علينا وبالأخص احنا النساء على هذا حبيت نديرو سلسلة عن الصدقة والسُبل تاعها، والدال على الخير كفاعله، خاصة في موضوعنا هذا و تحضيراتنا لاستقبال الشهر الكريم.

أنا راح نبدأ في هاذي السلسلة: يا معشر النساء تصدقن " قفة رمضان".
فضل إطعام الطعام ما يخفى على حتى واحد، وبالتالي الكثير من ربات البيوت يشرو المواد الغذائية إلي تكفيهم الشهر كامل وأحيانا تنقص وأحيانا تزيد.

في البداية نجيبو كرطونة كيما هاذي



نخبّوها في مكان مخفي عن الأنظار مثلا تحت السرير، ونحاولو كل يوم نحطو فيه حاجة من المواد الغذائية: قرعة زيت، كيلو سكر، باطة قهوة، باطة لحظة، كيلو حمص، كيلو طعام، ملح، روز. خل. ماء زهر. تاي.....الخ وكل وحدة وامكانياتها.




ما يجي يلحق رمضان تكون عمرّتها بالمواد الغذائية. وبالتالي ماييقى غير تشري البيض واللحم أو دجاجة باش تكون قفة كاملة وتربح أجر إفطار عائلة لعدة أيام.

ليلة رمضان تديّها أو تبعثها لعائلة فقيرة تعرفها وإذا كانت من صلة الأرحام الأجر مضاعف.

أما إذا كانت ما تعرف حتى واحد تبعثها لإمام المسجد تاع الحي إلي تسكن فيه وهو يتصرّف فيها بمعرفتو.


ربي يحفظكم ويباركلكم في أرزاقكم ان شاء الله.

اسمحي لي راندا قريت مداخلتك هذا الصباح ونسيتها
المهم فكرة طيبة وجميلة والي ما تلحقش تمد مبلغ مالي الي تقدر عليه ماراهيش مقيدة المهم تفرح عايلة فقيرة
ايضا الجيران اذا درتي مطلوع ابعثي واذا درتي قلب اللوز ابعثي او الوالدين اذا كانو قراب ابعثي لهم من ذاك افطار كامل ونوي كلش صدقة
خاصة المرضى واصحاب الحميات عندي جارتي فيها السكر كل مرة نبعث لها عصير المخدوم في البيت تفرح بيه بزاف ن اودها يشرو العصير وهي تبفا تشوف ربي يقدرنا على فعل الخير

[رندة.]

بارك الله جهينة على إثراء الموضوع بأفكارك عن الصدقات.
بطبيعة الحال المرأة مش مقيدة بطريقة معينة، كل وحدة وامكانياتها وطريقتها الخاصة.
و قفة رمضان هاذي راهي كبداية فقط وكل مرة راح نتبادلو أفكار عديدة لموضوع الصدقات.

[رندة.]

الفكرة الثانية هي: " محل البقالة"





استكمالا لموضوع يا معشر النساء تصدقن، وأفكارنا المتنوعة فيما يخص الصدقات، فكرة " محل البقالة" هي فكرة بسيطة وعمليّة جدااا وفي متناول الجميع دون استثناء.

تتلخّص الفكرة هاذي أنك تروحي لبقّال الحيّ وتسقسيه على عائلة فقيرة عندها ديون عندو حول مستلزماتها من المواد الغذائية، وتشوفي شحال يسالهم من الدين إلي عليهم، تحاولي تخلصّي عليهم هذا الدين، وإذا كان الدين يفوق إمكانياتك، في الحالة هاذي خلصّي جزء من هذا الدين إلي تقدري عليه، و بالفعل هذا إلي قمتي بيه راح تكوني نحّيتي عليهم غبينة كبيرة وفرجتّي عليهم، وربي يفرّج عليك ان شاء الله ويرزقك من حيث لا تحتسبين.

إذا ماحبيتيش بقّال الحي تاعكم يعرفك، تقدري تروحي لأي بقّال في حي آخر وتقومي بنفس المهمة. باش تتفادي الرياء وتحتسبي الأجر من الله عزّ وجّل.

[arwa alaa]

اهلا فراشات راكم تهدرو عل. الصدقة نحكيلكم على وحدة كانت تسكن بكري قدام دار بابا مني كنا صغار عمرها مخادلفت هذي العادة غير لا كانت مكانش واش تدير كل جمعة الصباح تخرج للاولاد يعني حنا ولاد الحومة حاجة وتنويعها صدقة تدير كاسكروط فرماج حلوة شوكولا المهم واش توفر عندها وحتى حنا كنا نفرحو بزاف
راكم تعرفو بكرى مكانش الصور بين الديار تخرج البرى تطيب الكسرة والي يعدي يدي والله هذيك المرأة كي الويز وربي كارمها