مغامرااااااااااتي مع تعلم الطبخ...حابة نتعلم منك..شكراااا - الصفحة 14

نجمة ساطعة · 2012-07-16, 19:25

اقتباس:

المشاركة الأصلية كتبت بواسطة سنوم 33

السلام عليكم
اليوم جربت المقرونة.....وهذيك الفرحة جاتني هاااااااااااااااااايلة
وعجبتهوم كامل والصحن كملوه وماخلو فيه والو.

درت البصل والثوم والملح وخليتهم يتقلو حتى ذبلو

وزدتلها الفلفل الاسود وراس الحانوت

وجومبو دجاج

وزدتلها نجمة البحر

بصح مادرتهاش كامل شوي برك ع خااااطر طعمها قوي
اكيد ماما الي توجه فيا

درت قد هاك

وزدتلها 4 حبات طيب--فرد العود--

وقرفة

ودرتلها 2 مغارف طماطم...ومغرفة صغيرة هريسة

ومرقتها بماء سخون وخليتو فوق النار

بعد ما غلا الماء زدتلو شوي زيت وملح...ودرت فيه المقرونة..
وين تبدل لونها طفيت عليها وخليتها في الماء شوي
وبعد صفيتها وشللتها بماء بارد

كنشوف الصوص خثار ماشي ياسر
زدتلو المقرونة وخليتها حتى طابت معاه

بعد ما طابت نحيتها من على النار وقطعت زيتون اخضر وخلطو معاها وقفلت عليها باه يذبال الزيتون

باه نقدمو درت الطبقة الاولى مقرونة ودرت فوقها الفرماج وزدت فوقها المقرونة...ومن الفوق درت حبات زيتون اخضر والطن

درتليها كل التوابل اللي في الكرة الارضية ههههههههه بصح كلها توابل عطرية مفيدة

ربي يبارك ربي يهنيك يا رب

nour inasse · 2012-07-18, 00:41

يعطييك الصحة حنونة

swami 4 · 2012-07-18, 23:13

والله اول مرة ندخل لهاد النوع من الاقسام وبصراحة ابهرتيني الله يبارك ويزيد وشجعتيني باش ندخل للكوزينة
منكدبش عليكم قاتلني التفنيين يعيشك اختي قوليلي ننين جاك الكوراج

hanane 26 · 2012-07-18, 23:46

يعطيك الصحة

manoula23 · 2012-07-19, 08:24

يعطيك الصحة

سنوم 33 · 2012-07-19, 13:44

السلام عليكم
درت بيتزا كوفار----زعما زعما----
اول حاجة درت عجينة البيتزا...بصح فرينة وماء وملح وبرك--بلا ما ندير زيت ولا الزبد والخميرة...

حليتها بالحلال ودرت فوقها بواط كامل تاع زبدة

وبعد غطيت الزبدة بالعجينة وضربتها بالحلال حتى تمشي شوي هذيك الزبدة

وانا نضرب في العجينة بالحلال وماما تضحك عليااااا..وانا حايرة علاه راهي تضحك وبعد فهمت بلي نورمالمونضربها غير بالعقل انا درت كالعجايز تاع بكري...الي يغسلو الصوف بالعصا...
المهم خذات من عندي هذيك العجينة طريحة مليحة

وبعد بديت نحل فيها بالحلال...بصح واش نقوللكم والله سوفريت معاها انا نحلها والزبدة تخرجلي....ماما كانت تقولي حليها غير بالعقل

شوفو كفاه خرجتلي هذيك الزبدة

وليت رجعت طبقتها ودرتها بالحلال -----نفس الحكاية زادت خرجتلي الزبدة

هي في الحقيقة راهي عندها 4 تطبيقات كل طبيقة مختلفة على الاخرى .ومابين التطبيقات لازم ندخلوها للفريجيراتور...بصح انا دخلتها مرة وحدة..وعييت نحفظ طرق التطبيقات...
وزيد الي زاد عليا--كتخرجلي الزبدة نولي نطبقها بالتطبيقة الي جات قدامي
دخلت فيها دخلة عمياء
تقدرو تقولو راني طبقتها 20 الف مرة وكامل كيفكيف
في اخر مرة كخرجت الزبدو رجعت طبقتها ...وصايي نشوف في روحي تقفلت بالغش
رحت لماما قلتلها كمليها انت....قتلي وانت راكي متسمعيش الهدرة قتلك ديريها غير بالعقل..زدت ما عادش نشوف قدامي من الغش
قلتلها خليها---حاشا نعمة ربي---خلي ضرك نطيشها في البوبال
الله غالب عانيت معاها تاع الصح
لدرجة اني وانا نحكيلكم تفكرت..زدت حسيت بالغش
رحت تكيت وخليت الكوزينة هكاك وبعد خممت قلت كون يجي بابا وما يلقاش الغداء-وليت رحت للكوزينة..ياخي لقيت ماما سقمتلي العجينة---بصح العجينة فسدت على خاطر ماشي هذيك هي التطبيقة تاعها--

رحت وجدت صوص البيتزا...قشرت الطماطم..ودرتلها التوابل والملح ورحيتها وحطيتها على النار

نورمالمو العجينة نقصها على زوج نصف نحطو في البلا وبعد ندير فوقو صوص البيتزا وبعد ندير الطبقة الثانية تاع العجينة بصح العجينة جاتني طرية وما قدرتش نتحكم فيها وليت قسمتها كاريات وبعد زدت لكل وحدة صوص البيتزا وزدتلها دبشة مقطعة والفورماج الخاص بالبيتزا ----من فضلكن الي تعرف اسمو تقولهولي--
وبعد زدت طبقة اخرى من العجينة ودهنت وجها بالزبدة ودخلتها للفرن

وفي الاخير خرجت هاك

شكلها لا علاقة
طعمها وهي سخونة ----جات بنينة----
كبردت ولات يابسة

الله غااااااااااااااالب هذا واش خرجت يدي

hanane 26 · 2012-07-19, 14:17

والله غير قتلتيني بالضحك يا سنوم بصح عجبتيني كي كملتيها لوكان جيت انا نرميها

Basketteuse · 2012-07-19, 14:31

يعطيك الصحة راكي شاطرة انتقلتي مباشرة لمستوى عالي وليتي تطبقي العجينة المورقة !!
شي مليح ... بصح هدا النوع لازملوا صبر كبيييير . الزبدة تكون باردة وبين حلة وحلة تحطيها تريح في الثلاجة ... ماشي صعيبة تتطلب صبر اكثر
بالنسبة الوصفة ننصحك تعملي عجينة البيتزا احسن .. تجيك اسهل. والذ واقل دسما ...
والجبن الخاص بالبيتزا كاين انواع منهم الشيدار. القرويار. والمزدام .والموتزريلا... وادا شريتيه مرابي واجد راهو الشيدار
ربي يوفقك

meriem hanin · 2012-07-19, 14:45

هههههههه ة الله قتلتيني بالضحك
لكن نستعرف بيك فحلة و نص
انا في بلاصتك و الله نخلي ماما تكملها و حدها و الا تدبر راسها
المهم سلكتي راسك و درتي فطور
استناي رمضان راهو جاي و مع الصيلم مانعرف كامل كيفاش ندخلو للكوزينة في هاذ السخانة
بارك الله فيك و بالتوفيق

sarra5 · 2012-07-19, 17:07

hhhh wlh to9otli bedahk mais bravooo raki hayla kemli hekdak w rayha tet3lmi w zidi f ramdan

nour inasse · 2012-07-19, 17:32

معليهش حنونة لازم تجربي باه تتعلمي المهم جات بنينة وكلاوها ما طيشتوهاش
حبيت نقوللك اذا سمحتيلي الزبدة في الصور ذائبة لازم تكون جامدة باه تضربيها بالحلال وماتخرجلكش من الجوانب وكملي طريقة التطباق كيما المرة الأولى إلي طبقتي بيها كانت صحيحة وأتركيها ترتاح بين كل طية وطية وحظ سعيد في الطبخة الجاية

safioo · 2012-07-19, 17:44

خرجتي لينار فيها بالضرب هههههههههههه
مي ربي يعطيك الصحة عندك الخاطر وكان أنا دارتلي هكذاك نسمح فيها ولا عودة خخخ
المهم المحاولة
وراه جا رمضان وابدعي فيه ( مي في حدود تخليهم بالجوع وباباك يحاوزك ههههههههههههه)
تحياتي

*سماح 94* · 2012-07-19, 18:39

يعطيك الصحة اختي والله بالك طويل انا تفسدلي حاجة تلقايني في حالة احباط تااااام الهدرة ما نهدرش
الله يبارك عليك
صح رمضانك

نجمة ساطعة · 2012-07-19, 19:29

علاه صعبتيها على روحك كاين وصفات لعجبنة البيتزا اسهل و احسن ...معليش راكي تتعلمي المرة الجاية ان شاء الله تصلحلك

salimata · 2012-07-19, 22:17

اختي الكريمة مكانش لي زاد معلم درجة درجة وتتعلمي مرة تصلح ومرة تفسد وهي رايحة