موضوع جذيذ - الصفحة 11

hamid70 · 2012-05-09, 09:26

السلام عليكم انا كنزة ماشي عضوة جديدة راني دائما ندخل باسم راجلي هو اول من سجل ودرك استوليت على اسم انا و بناتي انا معاكم و هومة في منتديات القراية كنت دائما نقرا برك بصح هادي المرة قلت نشارك بالردود نحبكم كامل ام ماريل سلسبيل حبيبة ام كوثر وجميعكم انا تاني نوجد لرمضان الشربة نكونجلي الجلبانة الفلفل المشوي الثوم عصير القارص والبرتقال انا نكونجلي كلش مرة قالي راجلي كاش نهار تكونجلينا ها ها ها عندي وصفة انتاع الطماطم تحلفي عليها وكانها مصبرة هزيتها من منتدى انتاع المغرب تبارك الله عليهم عندهم تدابير هايلة وجربوها قريباتي كامل و عجبتهم و هي انك ماترميش قشور الطماطم بعد ما ترحيها و كل مرة خبي في الكونجيلاتور كلما وجدتي حتى تعمري زوج ساشيات ولا 3 جبديها طيبيها مع شوية ملح و 2مغارف زيت زيتون وارحيها في رحاية انتاع اليد باه القشور يبقى من فوق و راكي تتحصلي علي طماطم هايلة للبيتزا والعجائن ولي عودة مع مصروف المنزل لان لي طفلة رضيعة

ام ظافر · 2012-05-09, 14:53

اقتباس:

المشاركة الأصلية كتبت بواسطة hamid70

السلام عليكم انا كنزة ماشي عضوة جديدة راني دائما ندخل باسم راجلي هو اول من سجل ودرك استوليت على اسم انا و بناتي انا معاكم و هومة في منتديات القراية كنت دائما نقرا برك بصح هادي المرة قلت نشارك بالردود نحبكم كامل ام ماريل سلسبيل حبيبة ام كوثر وجميعكم انا تاني نوجد لرمضان الشربة نكونجلي الجلبانة الفلفل المشوي الثوم عصير القارص والبرتقال انا نكونجلي كلش مرة قالي راجلي كاش نهار تكونجلينا ها ها ها عندي وصفة انتاع الطماطم تحلفي عليها وكانها مصبرة هزيتها من منتدى انتاع المغرب تبارك الله عليهم عندهم تدابير هايلة وجربوها قريباتي كامل و عجبتهم و هي انك ماترميش قشور الطماطم بعد ما ترحيها و كل مرة خبي في الكونجيلاتور كلما وجدتي حتى تعمري زوج ساشيات ولا 3 جبديها طيبيها مع شوية ملح و 2مغارف زيت زيتون وارحيها في رحاية انتاع اليد باه القشور يبقى من فوق و راكي تتحصلي علي طماطم هايلة للبيتزا والعجائن ولي عودة مع مصروف المنزل لان لي طفلة رضيعة

اختي ما فهمتش طريقة الطماطم
نطيب القشور ومن بعد نرحيهم ونصفيهم بتاع اليد اكيد راح يبقاو القشور الفوق ولكن واش هو الي راح يهبط التحت ومنين راح يجيني معجون الطماطم من القشور
فهمينا اكثر من فضلك

hamid70 · 2012-05-09, 15:25

طبعا القشور وراح يهبط عصير طماطم عاقد جربيها ماتخسري والوP090512_1953.jpg

ام ظافر · 2012-05-11, 09:50

يا ويلي ......خرجت امس قلت نشري حتى زوج كسوات خفاف تاع الصيف لولادي يبدلو فيهم ماشي حاجة فور المهم يلقاو فاش يلعبو
روحت مشوكية وما شريت والو
تخيلو حتى صحاب الحوانت فاقو بالناس ويحسبو اسعار العيد من ضرك
بونتاكور خفيف ريشة ب180 الف وتريكو بلا ذرعين ب195 الف ........نشريهم لولدي يلعب فيهم بالماء ويتمرغ فيهم كيما تعرفو الصيف
والله ما لقيت لبسة تاع بكري تاع 60 و70 الف شورت وتريكو للولاد تاع كل يوم
روحت نضرب اخماس باسداس وما فغهمتش علاش راهم يعملو هكذا وين راهم حابين يوصلو بغلاء الاسعار هذي
هل حتى انتم عندكم هذا الغلاء

مريم سلسبيل · 2012-05-11, 11:21

كيف حالك ام ظافر انا والله غير شديت السروال للي قصارو على ابني وللي ثقبهم من الركبة وقصيتهم راه لابسهم يلعب بيهم ورحت شريت 2 بنتكور من حوايج البا لة غير 20الف للواحد وهايلين قلت يلبسهم في المدرسة واش رايك انا مرة قريت في موقع فرنسي على الملابس قالك لاتكثر من الالبسة ياسر3 تبديلات هكذا تلقى واش تلبس ومتتعبش من الغسيل وكي دور العام تعاود تشري لبسة جديدة ماهو رايكم

ام ظافر · 2012-05-11, 11:29

يا اختي لوكان لقيت في البالة كنت والله ما نحوس في الحوانت
لكن كيما تعرفي البالة بدات تنقص بحكم القانون الجديد الي راهم منعو دخول الشيفون وزيد حنا عندنا البونتاكور في الشيفون يعمل 60 الف والله هذاك النهار تحتم عليا وشريت واحد لولدي لكبير ب60 الف ولكن حاجة فور
اما السراول انا الحمد لله حرست عليهم هذا العام وما قطعوهمش خبيتهم للعام الجاي ان شاء الله تهنيت منهم

مريم سلسبيل · 2012-05-11, 11:42

اختي ام ظافر من اية مدينة انت وبالنسبة لقشور الطماطم البارحة وان اتصفح منتديات المراة المغربية وجدت هدا الموضوع وحتى مواضيع اخرى طرحت هنا عندنا في منتدانا

ام امجد14 · 2012-05-11, 12:57

السلام عليكم و مشكوووووورة اختى ام ضافرو ام سلسبيل كلامكم فى محلو انا راجلى خدام ومدخولنا لاباس بيه
لكن رنى حايرة فى ملابس اولادى عندى ثلاثة ذكور و بنتين و الله ما لقيتش ما نشريلهم الملابس ناااااار و مازااااال نخمم فى رمضان و مصاريفو و العيد حتى باش نروح لدارنا باش نحوس ونبدل جو اجلتها حتى من وراء العيد لانها التحواس يدى الدراهم
ملابس بنتى الكبيرة اعطيتها للصغيرة لان ملابس البنات غااااالية بزااااف واولاد نحوسلهم من بالة وخلاص نشريلهم ملابس غالية باش يلعبو بها فى تراب هذا حرام
ولا كيفاش

مريم سلسبيل · 2012-05-11, 13:07

كيف حالك ام امجد انا حبتكم تتكلمو شوية على حاجة اخرى وهي كثرة المناسبات في الصيف راه جايين الاعراس واوالنجاح والافرا ح ربي يفرح كل واحدة فينا بولاده واهلها بصح ياريت نتشاور في هدايا والباروك ولبسة العراس ان عن نفسي شريت لبناتي ليسور هكذا نحو الحلاقة من طريقنا للي عندها فكرة تنورنا بيها

ام ظافر · 2012-05-11, 13:08

اقتباس:

المشاركة الأصلية كتبت بواسطة مريم سلسبيل

اختي ام ظافر من اية مدينة انت وبالنسبة لقشور الطماطم البارحة وان اتصفح منتديات المراة المغربية وجدت هدا الموضوع وحتى مواضيع اخرى طرحت هنا عندنا في منتدانا

موضوع قشور الطماطم ياريت الاخت تحطنا صور عليه لاني عييت نفهم كيفاش تخرجلي صوص طوماط من القشور
اما انا من الشرق وحاليا راني في الجنوب الغربي ساكنة في المشرية ولاية النعامة

ام ظافر · 2012-05-11, 13:11

اقتباس:

المشاركة الأصلية كتبت بواسطة ام امجد14

السلام عليكم و مشكوووووورة اختى ام ضافرو ام سلسبيل كلامكم فى محلو انا راجلى خدام ومدخولنا لاباس بيه
لكن رنى حايرة فى ملابس اولادى عندى ثلاثة ذكور و بنتين و الله ما لقيتش ما نشريلهم الملابس ناااااار و مازااااال نخمم فى رمضان و مصاريفو و العيد حتى باش نروح لدارنا باش نحوس ونبدل جو اجلتها حتى من وراء العيد لانها التحواس يدى الدراهم
ملابس بنتى الكبيرة اعطيتها للصغيرة لان ملابس البنات غااااالية بزااااف واولاد نحوسلهم من بالة وخلاص نشريلهم ملابس غالية باش يلعبو بها فى تراب هذا حرام
ولا كيفاش

عندك الحق اختي بما انهم مازالهم صغار نقدرو نلبسولهم ملابس خاوتهم ولكن صدقيني غير يكبرو يعرفو صلاحهم ويقولك الصغير ماشي الكبير يلبس الجديد وانا تعطيني القديم تاعو
اما على التحواس راهو موضوع لوحدو يبغي قعدة

ام ظافر · 2012-05-11, 13:16

اقتباس:

المشاركة الأصلية كتبت بواسطة مريم سلسبيل

كيف حالك ام امجد انا حبتكم تتكلمو شوية على حاجة اخرى وهي كثرة المناسبات في الصيف راه جايين الاعراس واوالنجاح والافرا ح ربي يفرح كل واحدة فينا بولاده واهلها بصح ياريت نتشاور في هدايا والباروك ولبسة العراس ان عن نفسي شريت لبناتي ليسور هكذا نحو الحلاقة من طريقنا للي عندها فكرة تنورنا بيها

صح اختي جاينا النجاحات بزاف والعراس وهوما وحدهم يحبو ميزانية ضخمة خاصة لما يكونو الناس مقربين
كنت زمان نشري هدايا لكن الان نمد دراهم احسن لانو مهما تشري الهدية راح تلقايها ماتسواش دراهمها وزيد التعاب تاع الدوران من الفوق
قررت السيسيام نمد 50 الف والاهلية والباك نمد 100الف وكذلك العرس اذا بعيد نمد غير 50 الف واذا قريب شوي نمد 100 اما اذا قريب بزاف لازمني نخرج نشري كادو مليح وخلاص
وصدقيني راني بالحمل ولما نولد كلهم راح يجيو ويمدولي 20 الف كاعادة
كل واحد يعمل باصلو
المهم الي عندها افكار تنورنا بيها

hakim3148 · 2012-05-11, 14:36

الله ينوركم اخواتي تقول راكم في قلبي وقريتوا واش راني نخمم عندي 4بنات كل يوم يقولولي صحباتي شراو كسوة جديدة حرت واش نشري من الغلاء زيد علىالضيوف دائما وكذلك كيما قالت ام ضافر واله نفس الموضوع بغيت نحطه في موضوع خاص المنسبات كثيرة في الصيف والخرجات عن الاهل لازم والمنسبات الامتحانات يعني فيها ضياف اللي تخسريه عليهم اكثر من الباروك تاعه ب100مرة هموا يخسروا 20الف وادوا واجبهم واحنا علينا القهو وقاطها والفطور لازم مقيوم وزيد العشية قهوة والتاي ومعهم حاجة ويلا بعاد لازم عشا ومباتة وشوفي خراجها انا عندي اهلي بعاد يجوا متفرقين يعني كل يومين اوثلاثة يجي واحد اوزوج يعني كل واحد يحب تضيفيه وحدوا واش بقانا والله راني حايرة عندي 34جراتي رايحين يتزوجوا واولادهم عندهم امتحانات راني نخمم في الكادوا من جهة واش نلبس من جهة اخرى معرفتش الحل وين

hakim3148 · 2012-05-11, 14:38

عفوا اخواتي سهوا كتبت 34 هما فقط 4 واني حايرة وين 34

ام ظافر · 2012-05-11, 15:35

خلعتيني ب 34 كنت راح نقولك غير بدلي لبلاد قبل ما يوصل فرحهم
مزية غير 4
شوفي حنونتي اذا على اللبسة سلكيها مرة ابقاي بالجلابة ومرة اللبسي العبائة السوداء ناس بزاف يروحو بيها وما يقلعوهاش ومرة قندورة وهكذا انا لما نحصل والله ما نحي حجابي نبقى بالجلابة خاصة الجيران وناس بعاد شوي
اما على الكادوات غير شمري على رجليك وابداي دوري على لحوانت اذا قدرتي والا مديهم دراهم وخلاص كل واحد ومقدورو