زوجي

[مشكلتي]

بسم الله الرحمن الرحيم
انا امراه متزوجه منذ سنوات قليله ولدي طفله.وساكنه وحدي.مشكلتي هي زوجي المتسلط في كل شيء.ويحسب لكل شيء.وهذا سبب لي مشاكل كثيره.مما ادى بي الى الاسيتياء خايفه نكمل حياتي وانا هكذا.در ك نشرحكلم لانو ما افهمتش شخصيتو.
هو انسان عادي ذو راتب عادي يعني الحمد لله كيما الناس.نهار مليح ونهار مشي مليح.ومع الناس انسان هايل كامل يحبوه.ويحب يدير الخير بزاف فالبراني وخاصه عايلتو يحبهم بزاف وخاصه امو اللي لاصق فيها بزاف ويهتم بيها بزاف واسرارو كامل عندها.والديه متخلقين ودينين.والحمد لله والعلاقه بيناتنا مليحه.
بس المشكله انو معايا انسان آخر دايما يحب يذلني اذا طلبت منو شيء ويظلمني.والمشكله اذا حبيت شيء وما حبش لو ماتقدرش يديرهولي.كيما انقولو......

.مزيرني حتى في داري وما عندي الحق في حتى شيء حتى ابسط الامور .حتى مثلا في اختيار ملابس ابنتي.
يحب يديرلي راي ويعاملني غير قدام البراني وهذا الشيء غاضني بزاف لدرجه انو وليت انغار منهم وما افهمتش اعلاش.
هدا أنه مزير في تفكيرو بعني متحفظ بزاف مع انو قالي ماكاش كيما تربيتك واخلاقك .ولكن ما عنديش حقوق بزاف مثلا نخرج نتعلم كاش حرفه او علم اونشري وحدي.
ويقولي النسا مالا زمش تنحللهم العين.
نادرا نخرجو وحدنا لازم تكون الام موجوده.وكي نقولو يتحسس بزاف ويقولي أمي لخط احمر.وانا والله ما قصدي غير باش نكونو كاين زوجين وحدهم.
حاولت نتفهم شخصيتو ولكن ما القيتش حل.مانيش حابه نضيع وقتي فالمشاكل وننتقل الى مرحله نتطور فيها وتتعلم ونربي اولادي تربيه صالحه.
والله العظيم ما عنديش الحق حتى في اختيار قش بيتي هذا اذاحب يشري.
جربت معاه الطريقتين بالعنف وبالملاحه.وما القيتش حل.
وتانيك مانيش حابه نهرب بيتي و ماعنديش اللي يوقف معايا.

[nadir_telecom]

السلام عليكم سيدتي
أنا يبدولي من سردك للموضوع أن زوجك رجل متحفظ و هذا أمر جميل و كي تقولي يديرلك الراي قذام دارهم هذه ثاني حاجة مليحة خير من أنو يحشمك و يذلك و ساكنة وحدك الله يبارك حلم كل فتاة و لا لا إحمدي ربي على النعم لي راكي فيها و كي يقولك ما تخرجيش وحدك و ماتروحيش تقراي كش حرفة لانو يغار عليك علابالو مازالك صغيرة و المجتمع مايرحمش للأسف أنا نوقف من صفو مامذبش عليك بصح من ناحية إختيار الملابس و تلك الأمر لا يجدر به الإعتماد على ذوقه فقط و يجيب عليه المساورة لان ذلك لا ينقص من قيمته و بالنسبة للخروج على الأقل يخرج معاك باش ما تكرهيش من البيت و السلام

[Volani14]

جميع نساء هاذ وقت لديهم تفكيرك، راكي في نعمة ابناء ودار وحدك وزوج محبوب واش حابا اكثر...

[nadir_telecom]

الراجل لي راهي تحكي عليه هذه السيدة ماخاصو والو هي برك حابة دير رايها عجباتك الإجابة هكداك

[فطيمة 03]

قريت مشكلتك مرتين ، في رايي والله اعلم انه االمشكل منك وفيك وليس في زوجك ، اولا: كبفاش زوجك من النوح المحافظ وتطلبي منه انك تخرجي وحدك ؟ او انك تدخلي لتعلمي حرفة او دراسة او ما شابه وانت متزوجة بيه ؟؟ هل اشترطت هادي الاشياء قبل الزواج ؟ من الضربة الاولى زوجك من النوع المحافظ وانت من النوع المتحرر ما تتزوجيش بيه اطلاقا لان شحصيتك وشخصيتو ما يتلاقاوش ، لان الرجل المحافظ بمجرد انه الزوجة نتاعو تطلب منو هادي الامور نخرج وحدي ، نقرى ، نتعلم في المعاهد ..الخ يحط عليها كروا ويلغي قرارتها ويزيرها الى اقصى الحدود ، لو كان لقى تفكيرك و قناعاتك كيما تفكيرو وقناعاتو ، المعاملة نتاعو تكون شي اخر ،ويدير فيك الثقة ، .صراحة لا اعرف النصيحة المناسبة لك ،لذلك ربي يوفقك و يصلح احوالك

[ايمان4]

الاخت فطيمة معها حق الف بالمئة ... شوفي يا اختي الخيار كان عندك في مرحلة الخطوبة .. شفتي السيد من االنوع المحافظ ما تقولوليش ما بينليش لا الرجال اغلبهم واضحين في هاد الصوالح النهار الاول خصوصا امور الخروج و الدخول يعني قالك انا زوجتي كذا و تلبس كذا و نبغي ما تخرجش الا معي او امي يعني علمك قبل او على الاقل معنالك بعض النساء يحسبوا يكتسبوا العصا السحرية بعد الزواج و تقلك درك نبدله لكن غير تكون غالطة الانسان نفسه جامي يتبدل و جامي يبدل قناعاته

انت من النوع لي عادي تبغي تقراي تبغي تتعلمي انت تاني عادية لكن كان لازمك شخص يفكر كيفك يخمم انو المراة لازم تقرا او تتعلم بالضرورة بالنسبة ليه يبغي زوجته تفهم في دومان ما و ما يهمش اذا تزوجت معاه و درست بالعكس يشجعها

يعني لكان في مرحلة الخطوبة منين كان عندك الاختيار كنتي ترفضي تتزوجي معاه تقوليله اخي حوس ع وحدة تفكر كيفك انا طموحة نبغي نتزوج واه نبغي الحلال لن طموحي نقرا

كاين لي طموحها تتزوج و فقط كاين لي طموحها تتزوج و تقرا كاين لي طموحها تتزوج و تعيش وحدها كي تتزوج و راجلها يوفرلها بيت صايي السعادة القصوى

يعني كل شخص و طريقة تفكيرو ما عبليه غير يحوس عن شخص يخمم كيفه باش ما يصراش تصادمات

اانت اليوم الاول رضيتي و قنعك بطريقة تفكيره و تزوجتي بيه اذن انت لست ضحية اختي اسمحيلي انت لازم تتعايشي مع الوضع لانو مش خيانة او خروج عن طاعة الله هذا الشي في طريقة التفكير برك .... واش نقلك اختي صعب الشي لي راكي فيه بالصح اقنعي روحك بلي انت رضيتي بيه زوج بيه بالعيوب لي فيه باش ما تزيديش تحسي روحك ضحية و تبداي تخممي في الطلاق و تبداي تكرهيله دنيته .... عادي اقتنعي

[ايمان4]

انت تعرفي زوجك اذا من النوع لي مشكاك خليه يتعلم يوثق فيك طبعا تجي بالوقت سنوات تاخذ حسب درجة شكه .... علميه انو ممكن تتعلمي و تقراي و تتهلاي فيه و في البيت و في الابناء بالشوية اقراي شوية علم النفس كاين كتب روعة ... و غير بالشوية فهميه انه لكان يخليك تدرسي راح تكوني ممتنة له و راح يكون بالنسبة ليك سيد الرجال و انك راح تفرحي فرحة حياتك طبعا هذا بعد ما يوثق فيك و يعرفك انك زوجة صالحة يعني باغية تقراي مش تخرجي من البيت وحدك

يعني هدفك دراسة قوليله زوجي اذا خفت وصلني انت و جيبني انت بالشوية مش في شهر تجي

نعرف بزاف نجحوا كما نعرف بزاف فشلوا في اقناع ازوااجهم لانو كاين لي تتهجم و ما تعرفش تقنعه لازم انت تعرفي زووجك كيفاش يفكر هو في الاول و الاخير يبقى انسان حاولي تعرفي الاسباب لي يرفض انك تقراي ع جالهم و بينيله انو غير واهم مش صح بالبرهان و التصرفات الحسنةو و طاعة الله طبعا

كي يقتنع بصحتك اذا ما اقتنعش لا تياسي ادعي ربي ...لكن كلنا تياسي و تزعفي منه شدي روحك و اتفكري انك انت حطيتي روحك مع انسان ما يفكرش كما انت اذن لازم مسؤوليتك تغيريه او تتعايشي مع الوضع او الطلاق لي اصلا انت رافضاته و انا اصلا ما ننصحكش بيه و رافضاته اصلا يعني ما عندكش حل من غير الصبر طبعا مش صبر سلبي صبر ايجابي لي فيه جايما تبقاي تحاولي او صبر لي تقتنعي بفكرته يعني شوفي انت و مدى طموحك ربما مع التربية يتغير طموحك يولي تربية اللابناء و فقط
ربي يوفقك

[ايمان4]

الصبر السلبي لي ما نحبوش هو الصبر هذاك تاع تبداي تتشنفي عليه و تقوليله انت سباب حزني و عذابي و تبداي تبكي و تديري بروحك ضحية ضعيفة ما عندها حتى قيمة مسكينة ...
مش صعيفة انت رضيتي بيه بطريقة تفكيره دركا راها شركة اتخيلي زوج عندهم شركة ما يقدرش واحد يتاخذ قرار من راسه او بلا ما يقنع الشريك لي حط دراهم في الشركة هديك لازم يقنعه

انت كيف كيف غير واش هو شاركك اغلى ما عنده حياته و اولاده دارهم معاك انت يعني انت حياته و هو حياتك دايما خممي بانكم اثنان مش شخص واحد انت و هو تكونو شخص واحد يعني يعني باش تقدري تخرجي لازم نصفك الاخر تاني يقبل و يقتنع ...

الصبر السلبي هو تاني منين تبداي ملي تتلاقاي مع الناس تبداي تقولي ما خلانيش هو شرير و واعر كما دركا راكي تحكيلنا مليح مع قاع الناس الا انا ... لا يا اختي انت مليح معاك و ربما كان راح يكون تاني مليح لكن تصادمات التفكير هي لي خلات علاقتكم تتعكر .... صراحة مشكل ننصك بالصبر الايجابي ....

[المطمئنّة]

المشاركة الأصلية كتبت بواسطة مشكلتي

والمشكله اذا حبيت شيء وما حبش لو ماتقدرش يديرهولي.كيما انقولو مايرحم ما يخلي رحمه ربي.مزيرني حتى في داري وما عندي الحق في حتى شيء حتى ابسط الامور .حتى مثلا في اختيار ملابس ابنتي.
ا.

السّلام عليكم ورحمة الله وبركاته
أرجو من المشرفين تصحيح هذه الكلمة
فلا ممسك لرحمة الله تعالى

[طاهر القلب]

السلام عليكم
أختي الكريم ... ليت الأمور تحل بتلك الطريقة وليس كل ما يتمناه المرء يدركه
وأنت تعرفين الحياة تقع بين نقيضين فلا شيئ دائم ولا شيئ محقق بالتمام
والحمد لله على نقصها من تمامها ...
لذا النعمة عندما ننظر إليها ننظر إليه بعينين وبزاويتين
فإن تحققت لنا إحداهما فالحمد لله على النعمة
ونعمة الهناء والعافية أكبر النعم
خاصة أنك تعيشين مع زوجك حسب سردك حياة عادية
فهل يمكن أن نطلب أكثر من ذلك؟
أو أن نريد أدنى من ذلك؟
كأن تكون حياتنا نكد ومشاحنات وعقبات
وأنت التي لا تريدين ذلك طبعا
لذا أختاه الأمر عادي جدا جدا ...
إضافة أن الحياة لا تعاش يوما أو يومان
بل هي عُمر بطوله وعرضه
وإن شاء الله مع وجودك بقرب زوجك وإحترامك له ولأهله
وكذا سعادة بيتك أولى أولوياتك
وإن شاء الله مع وجود كل هذا الكم الهائل من التفاهم والسعادة
سيقدر زوجك وجودك بجانبه و وقوفك معه حتى وإن كان ما كان
وسيفتقدك عندما تغيبين عنه وعن حياته ...
لذا لا تحرمي نفسك لذة العيش بهناء وسرور
وكوني خير معين لزوجك ...
وفقك الله

[ايمان4]

حسيت نصائحي كانت قاسية و عذبني ضميري و جيت نقلك اختي اسفة و اسمحيلي عند ربي اذا ضريتك انت التي خلف الشاشة ... و الاعضاء ان شاء الله يصححولي هفواتي و ينصحوك و يرشدوك ... المهم ديري في بالك بلي مكاش زوج او زوجة مثالية يعني الكمال لله ...

[ع.عيسى]

تصرفاته طبيعية جدا ، واحد اصلا مزير و زوجته تقول له حابة نخرج وحدي ، حابة نتعلم كاش حرفة ،في رايك واش يكون ردة فعله ؟ يقول في نفسه هادي المرا نحللها العين تولي طول الوقت هاملة في الزنقة ، هاذا النوع من الازواج وانا واحد منهم يحب يسمع من مرتو ا العبارات التالية : ما نحبش نخرج وحدي ، نكره الاماكن المختلطة ، كرهت القرايا والاختلاط لي فيها ، نكره الخدمة ، .الخ ، اي امرة عندها هادي القناعات زوجها يديرها فوق راسو ،