بعد عسري 2

[مشكلتي]

السلام عليكم انا صاحب موضوع بعد عسري
الواضح انه لا استطيع الرد الا بموضوع تاني على الاعضاء
اولا شكرا على تفاعلكم مع مشكلتي
حبيت نشرح بعض النقاط حول طبيعة العمل اللي ناب عليا ربي بيه "راهو عمل مضمون في شركة اقتصادية عمومية" يعني منقدرش نفرط فيه وانا خدمت عند الخواص وشفت سلبيات العمل عندهم
الوالدة تاعي اقترحت عليها تجي معانا كيما شرتوا عليا لكنها لم تقبل كونها كيما قتلكم لست وحيدها والدي حي واخوتي مزالو معاها بالاظافة الى اولاد اختي تعمل هي اللي تربيلها فيهم وتناقشت معاها حاولت نقنعها باللي بعد 3 سنين ممكن نحول لولايتي حتا نخدم ونطلع شوي شوي قالتلي نحب ولادي دايرين بيا وانت رح تبعد علينا ونسابك خير مني الخ
الحقيقة لم استطع اقناعها وقمت بالاتصال بمركز فتوى في مدينتي وقالولي انه هاد الشي مش عقوق
وحتا زوجتي حكات معاها وقاتلها ارواحي عندنا كل نهاية اسبوع نروح انا نجيبها ونردها ومحبتش
راني بالديون حتا الكرا اللي رح نكريه ثم راه مرتي باعت دهبها باش قدرنا نخلصوا الكرا العام الاول وهاد العام وحتا اخي الكبير راه يعاون فيا
على العموم اسال الله الهداية لامي راهي صعبت عليا الامور من الناحية النفسية وصراحة كل منخطوا خطوة حتا في زواجي وعملت نفس الشي ومتحبنيش نقترب من اهل زوجتي لا ادري ما السبب مع اني مشفت منهم والو غير الخير طيلة مدة زواجي وحتى زوجتي
شكرا لكل الاعضاء

[آسيا 25]

السلام عليكم
يا أخي حسب حكايتك أمك هي المخطئة و لا يحق لها أن تحرمك من العمل في ولاية بعيدة طالما لا يوجد لك بديل ,و على ما يبدو أنك ستنتقل للعيش و العمل بجانب أصهارك (أهل زوجتك) و هذ ما أزعجها, أنصحك أنك تحاول معها من جديد و أيضا أتكلم مع والدك و إخوتك يقنعوها, فقط لما تروح قم بالإتصال بها يوميا و السؤال عنها و كل نهاية أسبوع إذهب لزيارتها علها تطمئن أنك لن تنساها و ربي يسهلك إن شاء الله يا أخي.

[kacimo.samy]

السلام عليكم
ربي يسهلك اخي

[زبدة ذايبة]

حاول تقنع والدك بالموضوع

الرجال يختلفون عن النساء في التفكير

إذا والدك كان مقتنع رايح يقنعها

حاول ترضيها بالشي اللي تقدر عليه

لأنه مهما كان ماتقدرش تخليها زعفانة منك

وبلغها أن المكان اللي رايح ليه ممكن يكون فترة وتقوم بالتحويل قريب ليها.

رب يهديها ويرزقك بر والديك

[محارب الحمق]

أحييك أخي على برك لوالدتك وحرصك على مشاعرها

[جهينة اليقين]

كاين امهات كيم هكذا ما تهمهمش مصلحة اولادهم وخصوصا اذا كنت قرب نسابك ما تفراش المهم حاول ان تثبت لها انها خاطئة بافعالك تزورها تدي لها حقها في المناسبات اي شيء يحصل في الاسرة تكون واقف تكلمها في الهاتف حتى تحس بالي نسابك ما قدروش ينسوك فيها وشيئا فشيئا سوف تهدا وترضى شفت حالة كيم هاذي والان الحمد لله الابن هذا راه هو ممو العين لان البعد يجيب السلام

[oum imane83]

ربي يفرج عليك ان شاء الله

[رندة.]

دير كيما قالتلك جهينة اليقين وربي يوفقك ان شاء الله

[كاميلا]

راني قتلك باللي معجبهاش الحال خاطر اهل زوجتك هوما اللي حكمولك البوسط حسرا كلنا نعرفوا العقلية تاع نبع الحنان الجزايرية ولدهم ممنوع يقترب من مرتو وعايلتها والا رح تدعيه ومترضاش عليك
روح يا اخي اسعى لرزقك من المفروض هي ام تفرح لولدها كي كان في غبينة مزعفتش وكي فتح ربي وزيد منصب دايم عادت تنغص عليه في حياتو
ربي يهديهم من المفروض مش هكدا