بقاي على خير يا هذا الدشرة ** اللي غاشيها غير فلان ايصك فلان
راني حالف ما انولـي ذا المر ه ** يا لو كان نموت في صحرا عطشان
نعشر بر الروم و بلاد الكفرة ** و لا نعشر بر الشمايت و الرعيان
لحديث تنوفيق و الضحكة صفرة ** و الصحبة تحيا و تفنى بالقضيان
بلسانو يعطيك قنطار مسرة ** و الحيلة متلمدة تحت البيطان
بالرشوة تلقاه ماشي للعمرة ** و يصلي في البيت في آخر رمضان
و يولي بكلاح و عباية صفرة ** و يعطيها للزور و كلام البهتان
يحلفلك ليمين قداه مرة ** و يحلف بالكعبة و يحلف بالقرآن
و يحرم البزوز و يحرم لمرا ** و غير يصد عليك تلقى كذبو بان
أبقاي على خير ياهذا الدشرة ** للي يحكمها غير الجاهل و الخوان
تلقى اللي ملو اقبال السبورة ** للسياسة داخلين بلا سلطان
المرفوعة تاليتــها مجرورة ** و العطف يوروه غير لفلان و فلان
و الفعل المجهول مبني على للكسرة ** و اسماء الخمسة يديرو ليهم شان
تلقى المير احمار و النايب بقرة ** و المجلس ثعبان يختل في ثعبان
ما تفرز أمي على واحد يقرا ** و لا تفرز صاحي على واحد سكران
كي تسمع لحديثهم عند الهدرة ** تقول أنت لبطال هاذو و الشجعان
لو تعجنهم ما يجو في ساق امرا ** و لو توزنهم ما يوفولك ميزان
كـي لغـراب امنين يعلى في الشجرة ** يحسب كل الخلق تحتو غي ذبان
ابقـاي علـى خير يا هـذا الدشره ** اللي لاحت تاريخها في عقب ازمان
يا سعـد اللـي جا موظف مـن برا ** بالوصله يحظى اعزيز ومولى شان
يـدو لـو لفـراش وايزيدوه امرا ** وكل خميس اعشاه مشوي عند افلان
مـا يحتاجـش لا حليب ولا خضرة ** كلش خالص جاي من عند الرعيان
هـذا باهـز جايب امخـدة حمرا ** وهذا يجري جايـب اقريـعات ادهان
وتلقى المشمت غي اتوصل في الهدرا ** وتلقى المرعن غي اتوصل فيالخرفان
اخزيهم يـاخالقي فـي ذا الدشرة ** ذا القــوم اللـي شانهم زايد يشيان
وارزقهـم لعـجاج وامعاه الغبره ** وزلـط اللـي بدراهمو يصبح جيعان
اذا اراد اللـه مـن هـاذ المرة ** ما رنجعـش اخـلاص لبـلاد البهتان
وانقـول على خيــر يا هاذ الحفرة ** وراهـا ليكم يا المشمت والرعيان
ما رانيش على الرجال اهل النعرة ** وما رانيـش على اللي سكنو لكفان
مقصـادي رعـيان عشرتهـم مرة ** وما رانيـش على اللي سكنو لكفان
كانـو مدسوسيـن فـي وقت الكفرة ** وياسر منهم كان في صف العديان
وذروك جاب اشهود وادخل في الثورة ** واخرج عندو كاميـو قهوة وبلان
ولحـق لـو رابيـل حجْ وزاد امرا ** واصبح فـي التاريخ يفتي بالبرهان
وايعــود ايقـول بـيا واش اصرا ** كي كنا في الزيش نا وحيات افلان
فـوق احـمار ولاحقتني طيارة ** وذاك الشـي واضربتـها بين الجنحان
اهجمـت علـى شار بعمـود وحجرة ** دقدقتـو واقديـت في جدو نيران
اخزيهـم يا خالقـي في ذا الدشرة ** ذا الحرك اللي عايـشا غي بالبهتان
وارحـم من شافـو الكحلة والمرة ** وماتو شهداء على الصدق والايمان
متعهـم بالحـور فـي الجنـة الخضرا ** واسكنهم يا خالقي خير الجنان
قصيدة الدشرة للشاعر جلجلي جلول عن و لاية البيض