أختنا [[على رصيف الأمل]] ضيفة تحت المجهر

[المكارم]

السلام عليكم ورحمة الله وبركاته
أهلا بك بنتي سطايفية أتمنى أنك بخير .. عائلتك هنا تبلّغك السلام
خبر مباشرتك العمل في مجال تخصصك أسعدني كثيرا وأسأل الله أن يفتح عليك أبواب الخير
ويوفقك في كل خطواتك وييسر أمورك ..
باش ماتقوليش بلي باباك جا عندك بيديه خاويين .. تفضلي أولا

[IMG][/IMG]

وبعد العشاء ، أرى بأن المشاكس تاي عقد العزم على شرب دمك لكن هيهات سطايفية وأجرك على الله
سُعدت بتكليف ابني تاي بالإشراف لأنه أهل للمهمة من ناحية التقنيات والسلوك والجدية والرزانة
وأتمنى أن يكون الإشراف هنا فأل خير للإشراف على مؤسسة كبيرة في حياته الواقعية ..
أعدت قراءة ردك مرات عدة لأهمية ما جاء فيه وخصوصا فيما يتعلق بالنصيحة المتعلقة بالطالبة
والوالدين .. صدق من قال ، ما خاب من استشار وخاصة إذا أتت المشورة من أهل الإختصاص والتجربة والثقة

عييت ما نعصر مخي مالقيت حتى سؤال نسولك عليه
المشاكس تاي لم يترك لنا ما نسألك عليه .. سنايبر محترف

تستاهلي واحد البراد مدحدح .. شربي لاتاي على راحتك

[IMG][/IMG]

[المانجيكيو]

\ — ( السلام عليكم و رحمة الله و بركاته ) — ( حياكم الله ) أهل المنتدى و بيّاكم و أحسن مثواكم — /

.
.

( المستضافة هذه المرة إسم ثقيل بإنجازاته ، خفيف الظل بحسّه الفكاهي ، أيقونة سطايفية بارزة متفرِّدة بحصرياتها و شخصيتها العفوية .. / .. شخصيًا استفدت كثيرًا مع بدايات عهدي بالمنتدى من مواضيعها المفيدة و الهادفة .. .. ) — لذا لا يمكن أن نضيِّع فرصة قدومِها هنا لهاتِه الفسحة الأخوية الدسمة دون تقديم خالص تشكراتنا و عميق امتناننا لجهودها في الإرتقاء بهذا الصّرح الثقافي و المعرفي الرحب و اِقتطاعِها لتلك الأوقات الثمينة من أجل تحمّل ( همومنا ) و ( مشاكلنا التي لا حصر لها ) .. .. كنا حينئذ وجع راس بأتم معنى الكلمة .. .. // .. فـ ( شكرًا جزيلًا ) .. .. //
.
.

أرحب بكِ كـ ( ضيفة ) كريمة مكرّمة في ( بيتِك الجلفاوي ) .. .. متمنيًا لك ( إقامة طيبة سعيدة ) بين إخوتك الأفاضل و أخواتك الفضليات ../ .. و أُحيي الأخت البارعة ( جميلة ) على حسن الإنتقاء .. / .. ( جميلة مصاصة دماء ليست بالهيِّنة حتى تكونو على علم .. .. ) — ( من حسن حظكم أنها منغمسة في حربها ضد النت اللعينة .. .. التي تصيب الإنسان بأمراض الضغط و الغثيان .. و إلاّ لكانت أختنا السطايفية أحد الأطباق الشهية لهذا الأسبوع .. .. ) .. // .. إلاّ إذا كان لـ ( السطايفية ) رأي آخر .. ( !! ) .. //

.
.

— السطايفية و المطالعة ( !؟ ) — هل هناك بينهما علاقة حب أم علاقة إعجاب خارج إطار التخصص ( !؟ )
— ( الفن في الجزائر ) .. تقييمكم ( !؟ )
— ( الموهبة ) هي تلك المنحة الإلهية التي تميِّز بعض الأفراد عن عامة الناس .. و لا أظن أن ( السطايفية ) تخلو منها .. !! .. حبّذا لو نتعرّف على ما تجود به أختنا ( )
— ( نصائح ) داخل أو خارج إطار التخصّص على السريع .. ( !! ) .. لا نمانع إن كانت قاسية قليلًا .. ( ) .. //

.
.

( تقبلوا في الأخير تحياتي و تحيات طاقم الخيمة الإشرافي العامل معي ) .. ( على أمل تجدد لقائنا بأحد روابط هذا المنتدى العريق ) .. ( دمتم سالمين ) .. ( ) .. //

[karimtito]

السلام عليكم ورحمة الله وبركاته
- مقلتيلناش واش أسمك ؟ وعلاش مزالك على رصيف الأمل حتى لضركا ؟
- أعجبتني إجابتك وطريقتها وكذا حب الأعضاء لك ما سر هذا النشاط والحيوية ؟
- هل تفعلين ما تنصحين به الأعضاء في المنتدى ؟
- شحال تخلصي في الشهر ؟
- وهل تعاوني الدار ولا تصرفي على روحك فقط ؟
- ريال مدريد خسر أمام جيرونا ألى تضنين ان زيدان كان سبب الخسارة ؟
ما تحليلك للخسارة ؟ لو كنت مكان زيدان اي تشكيلة تلعبين بها ؟
-انا من محبين ريال للنخاع هل انت مثلي ؟
-ما رايك في كريم ؟ وما أول انطباع لك عليه ؟

المزيد بعد ال|أجوبة

[toulay]

السلام عليكم
اهلا وسهلا ومرحبا بالاخت رصيف الامل تحت المجهر
قريت بلي وليتي عاملة جديدة ياسيدي الف الف الف مليون مليار مبروك ومزيد من النجاحات ان شاء الله على الصعيد العملي والشخصي
وياربي تكون سيدة اعمال ناجحة
واش حوالك يخي لباس واش الغيبة هاذي ça fait très bien longtemps
على كل جيت باش نلقي التحية والسلام
بالتوفيق اختي

[سطايفية بكل فخر]

اهلا حضارات
اااااي اني نعيطلك حضارات سمانة برك تنحي السخفة ونولي نعيطلك تاي المشاكش تعرفني منحبش الالقاب بزاف ههه

ونبداو على بركة الله

المشاركة الأصلية كتبت بواسطة ڤولدن تاي

أولا شكرا على أجوبتك الصريحة و الطريفة السابقة و شكرا على وصايا لقمان أعجبتني :d و شوف أسيدي لقد جعلت الأمر تحدي إذن

العفو والله مسرورة بكامل الاسئلة
وزيد اني حشمت نديرلك جريدة خلي كاش خطرة نكتبلك وصايا السطايفية لتاي ههه

المهم قبل أن أواصل حملتي الفومبيرية راني جبتلك شوية آتاي و مكسرات و حتى تبقي نشطة و مستيقظة

غير بروفيتي يا سطايفية فمثل هاته الاستضافات تأتي خطرة في القرن و حتى لا تلومينا لاحقا بأننا لم نكرمك كفاية

مزيا قتلي مالا راهو في خاطري
واحد سوندويش مكسيكانو وكانات كوكا
وكي نكمل لغدا
جيبلي كرابيب بالنوتيلا والبانان
ومعاه كاس جي ناتيرال تاع فراز هههه

أضف لذلك بعد أن أصبحتُ حاضارات "احم احم" سوف أصبح مثل كوفي كوجيا
أسير و في جعبتي باكيطة تاع كارت أحمر و كل من يصادفني أشهر في وجهه البطاقة سواء غلط أم لا و لعلك أنتِ أولهم :d
أمزح معك سطايفية و أكيد لستُ ممّن تغريهم المناصب فيتحولون إلى دكتاتوريين كساسة بلادنا
ربي يوفقني و يقدرني لأكون على قدر المسؤولية الموكلة إلي و أقدم الإضافة المرجوة و أصبح لابرانتي للسبيكتار أبو مروان :d

راني موجدة روحي قتلك كريستيانو تاع سطيف نزل للملاعب متخلعنيش اكوفي كوجيا هههه
ثم اعلم انك ستكون برانتي هايل للانسبيكتور
وزيد رايحة نرجع باذن الله الى ذلك القسم ونساعدكم اسيدي

فتفضلي إذن لاتاي المشحّر

و هذه المكسرات و حتى نخلطها مع الزريعة و الكوكاو لأبو مروان و نديرو الناير هههه

ههههه يناير تاع اول نوفمبر ههههه

و يعلن الحكم عن بداية الشوط الثاني من ماراطون الأسئلة ...

بسم الله اسيدي

الباقة 1 :

كي شغل وحد لعباد هكا راهم يحاربو فيا باساليبي القديمة هههه
سيستام الباقات وما عين الفوارة تاعي ههه

- أبدؤها بالسؤال الذي لم تفهميه و الذي قصدت به العادات في الواقع و ليس في نفسك ؟
اه اوك فهمت الان
من الاحسن انو نحافظ على ان المجتمع الجزائري عاائلة وحدة نهزو بعضانا وقت الشدة
نحافظ ايضا على الحرية الممنوحة الينا ونتفتح على العالم بشرط ان لا نمس الهوية الجزائرية
نحاافظ على دينا الاسلامي دون تعصب ولا تفريق
نحافظ على طلب العلم حاليا كل العائلات تدرس ابنائها زوهذا شيء راقي اتمنى ان يبقى
ما يجب التخلي عنه
اولا البعد عن العائلة يجب ان نرجع لحضن العائلة حتى نبني الشخصية الصحيحة لانفسنا الشارع عمرو ولا يربي
نحيو صحانية الوجوه لي رانا فيها
ونحيو اللباس الفاضح سواء بنات او رجال الراجل يولي راجل والمرا مرا
راهي تخلطت الدنيا
نتخلاو على الرياء والتكبر خاصة ما اراه في مواقع كثيرة عادو يتكبرو كثيرا
هذي اهم النقاط
- ما الشيء الذي تكرهه السطايفية في الأعمال المنزلية ؟

منحبش نغسل لماعن اعطيني بانيو قش غسلو اعطيني نطيب لميات نعبد تحب نسيق الحارة كاملة ومتقليش اغسلي زوج طباسا

- ما هي الأكلات التي تخطر ببالك بمجرد قدوم ضيوف غير متوقعين ؟

حنا السطايفية معروفين بليبات

يعني كي يجيك ضيف اجبد ال****طة والقدرة والكسكاس
يادير شخشوخة يابربوشة لي هي الكسكس ياتليتلي
واذا حبيت تكبر بيه كثر زيد معاه شربة فريك الله الله في الفشوش وهي انية طينية شربتها علامة وماركة مسجلة
ولا نزيدو زيتون
هذا اذا كانو ضيوف عاديين
اذا كانو ضيوف لاشيشي وميحبوش ليبات
وقتها تتحول الى الخطة ب
ليقراتان والجاج في الفور او اللحم لمحمر
طبعا الحميس او كما تقولو نتوم الفلفة والطاجين لحلو والسلطات شيء مضمون في بيت السطايفة
هههه
اكرام الضيف واجب

- ماذا يعني الوفاء بالعهد بالنـسبة للسطايفية ؟

مسالة حياة او موت
راني مراة لكن في مثل هذه الامور اصبح رجل
لانو ابي ربانا على الصدق والكلمة
بيت السطايفية كلمتهم راس مالهم عليها يحياو وعليها يموتو
واحد يخون العهد او الامانة يهبط من حياتي بدون رجعة

- ما هي السعادة في نظرك ؟

مفهوم السعادة بالنسبة لي جد بسيط السعادة هي ردة فعل لا ارادية او بعبارة اخرى النتيجة التي تنجم عن شيء اسمه القناعة
لما يقنع الانسان بلي كتبلو ربي
سيسعد اكيد
مثالين بسيطين
واحد شاري صباط بمليون ومهوش مقتنع بيه ومش عاجبو رغم انه مركة كبيرة
بيار كارديان هههه والله ميفرح بيه ويرميه في الدار
واحد اخر جاي عاقب في السوق لقا صباط سبورتيف خفيف وباهي وشاره صولد بميات الف
ومقتانع بيه وجاه باهي والله يشبع فرح بيه
هذا مثال بسيط
هكذاك اذا اقتنعت في الامور الكبرى
اقتنعت بالمراة التي اخترتها تسعد
اقتنعت بمبادئك تسعد
اقتنعت بعملك تسعد به

- خطوطك الحمراء التي وضعتها لنفسك ؟

اسطايفية عندها ثلاث خطوط حمراء مرتبة ترتيبا اولويا
اولا عدم معصية الخالق كي نرضي ربي الناس معندي مندير بيهم حتى لو كانو اهلي فلا طاعة لمخلوق في معصية الخالق
منيش نقلك ملتزمة وجلبابي سر سعادتي ولكن احاول قدر الامكان ان لا اعصي الله
ثانيا ارضاء والديا وعدم المساس بالثقة لي منحوهالي ومنخرجش من شورهم
وكي ترضي والديك اكيد ترضي ربي والجحمد لله تربيت في عالية تعرف ربي
ثالثا معدم المساس بمبادئي مبادئي خط احمر واولهم كرامتي وشرفي
تهون الرقاب على جال الكرامة والشرف

- ما هو أجمل موضوع قرأتيه سواء هنا بالمنتدي أو كتاب أو جريدة أو غير ذلك ؟

• 1. توامك تحب قراءة الشعر
  2. فجل المواضيع التي احبها شعرية
  3. والشعر الذي لن انساه واستمر دائما في قراءته
  4. هي قصيدة الارملة المرضعه
  5. والشعر الجاهلي تاع وث
  ية كليب لاخيه الزير
• هذو ديما نعاود نقراهم

- من هو الشخص الناجح في نظر السطايفية ؟

الشخص الناجح بالنسبة لي هو ذلك الشخص الذي يحب ما يفعله ومقتنع به وبمبادئه ولا يعصي الله فيه
سواء في امور حياته او في عمله او في تعاملاته
هذا الامر سيوسس له كيان وشخصية اوتوماتيكيا

- ما أكثر شيء تتضايقين منه في واقعك ؟
الكذب والنفاق
وكم هي كثيرة الان

- ما هو شعوركِ حين يصفكِ أحدهم بما ليس فيكِ ؟

عندي زوج حالات
الاولى لما انسان ميعرفنيش ومش قريب ليا فهذيك يدز معاهم والله معلابالي بيه القافلة تسير والكلاب تنبح
الثاني لما يكون انسان قريب ويعرفني
يولمني كثيرا لانو يعرفني وعلابالو بلي هذيك الصفة مفياش وهكاك ساء في الظن
ميغضنيش الحال منو لكن يغيضني الحال من نفسي لاني اسات اختيار الاقرب الي

- ماهو الخطأ الذي لايغتفر عند السطايفية ؟؟

الكذب بكل انواعه ويندرج عليه الكذب في المشاعر الكذب في الكلام
الخيانة في العهد
النفاق

- أيهما تفضلين و لماذا : العتاب و المواجهة أم الرحيل بصمت ؟

انا اعاتب واواجه لعرف السبب ثم اقرر
لا ارحل بصمت علي ظلمت الشخص
نفرفد الحالة ياتسقمت يا تفرزعت المهم منخليهاش في قلبي ههه

يتبع للقرمشة ...

انا لها هذه القرمشة هههه

[سطايفية بكل فخر]

هكا جوعتني بزاف
دومنديلي زوج مكسيكانو مش واحد خخخخ

المشاركة الأصلية كتبت بواسطة ڤولدن تاي

حتى لا أرهقك بكثرة الأسئلة فقد قمت بتقسميها ... شفّيتيني

اخاه معلاباليش بلي الجيش ومصاصين الدماء عندهم قلبو ويشفوهم لعباد سبحان الله

الباقة 2
- ما هي الصفات التي تكرهها السطايفية في الرجل ؟

قستني في الصميم
نكره الراجل لي ميكونش راجل
الراجل الكذاب ولي معندوش كلمة
ونكره الراجل لي يكون متسلط وحاسب المراة فاز في دارو ويعاملها انها سلعة في يده
ونكره الراجل لي يقبع حرية المراة وميخليهاش تحقق احلامها ويرجع الزواج مقبرة لاحلامها
نكره الراجل لي ميثقش في مرتو
ونكره الراجل لي ميطيعش ربي فيها
نكره الراجل لي ميصليش
ولي ميخافش ربي
نكره الراجل لي مش لاهي بولادو وبيتو
ولي يفضل مرتو على امو

علابالي ظرك تقولي بلي تكرهي كامل الرجال
هههه
والله عادي برك يكون راجل تاع الصح مش ذكر ويطيع ربي ويخاف الله في محارمو سواء امو اختو مرتو اولادو

- يقولون أن كل فتاة بأبيها معجبة فهل أنت كذلك ؟ وهل ترين أن زوجك المستقبلي يجب أن تكون به سمات من أبيك ؟

ااااا وي هذي قولها وعاودها ديما نقول لامي كون نلقا رجل صورة طبق الاصل لابي رايحة نجيك للدار متزوجة نخطبو في الطريق هههه
ثم يستحيل ان اجد رجل مثل ابي فابي لن يعوضه الزمن
ساحاول ان ادعو الله ان يرزقني برجل يطيع الله في وينسيني صفات ابي
ويجعلني لا اقارن بينهما
لانو هذاك ابي وهذاك زوجي
احم احم راني ندير في الدبلوماسية
بلاك مسود السعد المستقبلي راهو يقرا في كلماتي متدريش هههه

- ما صحة مقولة "المرأة لا تطلب من الدنيا إلا شيئا واحدا وهو الرجل وإن جائها الرجل طلبت منه كل شيئ" هههه

او مقالوليش عليها هذي بصح
واله منعرفها
تسما انا منيش مراة ولا كيفاش
لاني ليس طلبي الوحيد رجل
ونحب نعتمد على روحي في تحقيق متطلباتي
او منشتيش الاهانة
انت تقولو جيبلي هذيك وهو يشنف عليك
انا يجيبلي حاجة بالتشناف منديهاش ونرميهالو
كلش كلش والكرامة
وزيد
سيفري المراة ميليقلها غير دار راجلها وهو حلالها من حقها تطلب منو كل شيء
كيما كانت تطلب من باباها تطلب منو
ممكن ناكسابتيها هذي الهدرة
بصح ميشنفش عليا ويقميني

- ما هو الجمال الحقيقي للمرأة ؟ و هل برأيك أن المرأة الجميلة دائما مغرورة بجمالها ويصعب العيش معها ؟

الجمال الحقيقي للمراة اخلاقها
ولي يغرها جمالها هي انسانمة تافهة من الداخل
متقدرش تعيش معاها
وحتي الرجل لي يبحث عن الجمال تافه
لانو الجمال ميدجومش تدوم العشرة والمحبة
وزيد الجمال نقطة نسبية قادر انا نشوفك انت جميل والناس كامل ميشفوكش جميل
وقادر الناس كامل يشوفوك جميل وانا نشوف مش جميل
والجمال الحقيقي جمال الروح
وكملاحظة زلت متلاقيتش مع وحدة بوقوصة ومش شايفة روحها
خاصة في الجزاير
ميساج خفيف اطاطا حطي رجليك في لرض ومتتغريش بزاف تعييا وتولي عجوز وزيد راكي في العالم الثالث مبهيك الميكايج مش جمالك طبيعي
وعلى قول ابن عمتي نصيحة للشباب لي عينو في الزين يبكرلزو يشوفو كي ينوض الصباح ولا يتلاقاه في رمضان
هههه
ديزولي البنات كشفتلكم سر المهنة ههه
انا مناصرة لان تكوني طبيعية ربي جميل خلق كل شيء جميل
ولي منيش عاجباتو يخبط راسو للحيط شكون قال بلي هو يعجب
وميساج استغاثة ومستعجل
للشباب لي راهم يحبو يوليو جميلين كيما النسا
ا عمو فيق لروحك راك راجل مزالك غير دير الماكياج وتخرج

- ماهي النصيحة التي توجهينها لفتيات هذا الجيل عامة ؟
نصيحتين
الشرف والكرامة وثقة الاهل متفرطيش فيهم
وثاني حاجة الحياء والحشمة
باقي الامور تجي تدريجيا بعد هذو

- مالذي يلفت انتباهك بسرعة في الشخص الذي أمامك ؟

معاملتو وافكارو واخلاقو

- هل تملك السطايفية القدرة على رسم شخصية الإنسان من خلال كتاباته ؟

بمعنى أدق هل يمكنك اكتشاف المزيّف و المدعي من الصادق و إذا أخذنا منتدى الجلفة كمثال ؟

نيستيمي برك منطيحش في الصح
بصح الحمد لله نيتي صافية
الانسان يكشفولي ربي اذا كان منافق
بخصوص الجلفة نعم اصبح يل خبرة في الاشخاص
مش كيما بكري بصح مزلت نيستي يقلك العشرة فتاشة ناس عشرناهم سنوات وخرجو مش نورمال تحوس وراء شاشات
مي لي مخليني راضية على نفسي اني مقتنعة بلي نبتي صافية وربي يعطيني على قدها
والحمد لله لحد الان مصراوليش كوارث

- لو قلتُ لكِ أن تضعي عنوان لحياتك فما هو يا ترى ؟

اعتقدذ احسن عنوان هو
"مازل واقفين "
ههههه

أيا بزاف مخّي عصرته لدرجة خرجتلي عبارة : إن رصيدكم غير كافي لإجراء هذه المكالمة
لكن لا تفرحي كثيرا فقد يأتيني الإلهام في أي لحظة أو سأقوم بالارتجال كعادتي و أقلبها سيناريوهات
و إلى ذلكم الحين فليتقدم أحد من المترصّدين لحمل مشعل الأسئلة ... يا جماعة يد وحدة ما تصفّق هههه

لقد نلت منك
تحوس تتحداني انا لها
ثم والله توحشت سيناريوهاتك المجنونة
ايا على بركة الله ابدا تالف
خخخخ

[سطايفية بكل فخر]

المشاركة الأصلية كتبت بواسطة om_hadil

خالتي،،،، المطحنة نتاع القمح اسمها القْرْوِيشَة،،،، كنت حاسبتك عروبية طِلعتي مُودرن،،،، سعيدة بمعرفتك ،،،

بنت اختي
المطحنة تاع القمح في سطيف نسميها المطحنة
راني في الشرق مش الغرب
والجزائر شاسعة بلهجاتها
لعلمك حنا السطايفية ومنهدروش زي بعضانا
فشكرا للمعلومة
ثم انا ماني عروبية ماني مودارن
انا عورومودرنية ههههه
وانا اسعد غاليتي
شكرا للمعلومة

[سطايفية بكل فخر]

اهلا بالوالد
كيف حالك وحال الاخوة المغاربة
اعلم انكم ستفرحون لي بعملي
الحمد لله ربي يوفقني ويقدرني وننجح فيه
العقبى للتوامين الحقيقين
التوامين الافتراضيين راهم لاباس حالييا
ولا وشا قال حاضارات
+
شكرا جيت في وقتك راهو جوعني تاي
ومزال مجابليش الميكسيكانو
ههه
+
بخصوص الاستشارة نحن عائلة بابا ونتشاورو في بعضانا حتى انا كي نحتاجكم نجي متخموش نكسؤلكم راسكم
وعن تاي راك تشوف فيه يحقر فيا زومهدرتلوش نتوما ديما تناصرو الذكور وتحقرو النسا
انا اعترض بيابا واعلن اضراب عام في البيت
هههه
+
زيد اعصر مخك اكيد كاين سوال
استعن بتاي او باسماء هههه
+
يا شاي مدحدح كم اشتقت لهذه الكلمة هههه
الله على ايام الامارات البائدة
يلعن الايادي الخارجية ويامها

المشاركة الأصلية كتبت بواسطة المكارم

السلام عليكم ورحمة الله وبركاته
أهلا بك بنتي سطايفية أتمنى أنك بخير .. عائلتك هنا تبلّغك السلام
خبر مباشرتك العمل في مجال تخصصك أسعدني كثيرا وأسأل الله أن يفتح عليك أبواب الخير
ويوفقك في كل خطواتك وييسر أمورك ..
باش ماتقوليش بلي باباك جا عندك بيديه خاويين .. تفضلي أولا

[img][/img]

وبعد العشاء ، أرى بأن المشاكس تاي عقد العزم على شرب دمك لكن هيهات سطايفية وأجرك على الله
سُعدت بتكليف ابني تاي بالإشراف لأنه أهل للمهمة من ناحية التقنيات والسلوك والجدية والرزانة
وأتمنى أن يكون الإشراف هنا فأل خير للإشراف على مؤسسة كبيرة في حياته الواقعية ..
أعدت قراءة ردك مرات عدة لأهمية ما جاء فيه وخصوصا فيما يتعلق بالنصيحة المتعلقة بالطالبة
والوالدين .. صدق من قال ، ما خاب من استشار وخاصة إذا أتت المشورة من أهل الإختصاص والتجربة والثقة

عييت ما نعصر مخي مالقيت حتى سؤال نسولك عليه
المشاكس تاي لم يترك لنا ما نسألك عليه .. سنايبر محترف

تستاهلي واحد البراد مدحدح .. شربي لاتاي على راحتك

[img][/img]

[نجوم الأمنيات*]

السلام عليكم -هده اول مشاركة لي في هدا القسم
اختي اسم عضويتك هو حالتي انا الان *لك اطلالة مميزة ماشاء الله موفقة في حياتك
سوال ان امكن
ماهي مهنتك

[سطايفية بكل فخر]

اهلا بيك اخي
ومبروك عليك الاشراف انت ثاني
راني نشوف تشكيلة انتخابية جديدة الله يبارك
حكومة محترمة هذي الايام
مقلتوليش وقتاش درتو الانتخابات في بالي مزال الحال عليها
هههه
ربي يعينكم على الشقا
ثم
استرسل الكلام بين سطورك

المشاركة الأصلية كتبت بواسطة mangekyoux

\ — ( السلام عليكم و رحمة الله و بركاته ) — ( حياكم الله ) أهل المنتدى و بيّاكم و أحسن مثواكم — /

اااااااا وعليكم ما قلتم ههههه وهاتو واش جبتم منيش ضيفة باطل خخخخ
امزح فقط ثم
بلعقل عليا اختك العربية جيها ثقيلة
ومتقوليش هي لغتنا اني علابالي
بصح بلعقل برك هههه

( المستضافة هذه المرة إسم ثقيل بإنجازاته ، خفيف الظل بحسّه الفكاهي ، أيقونة سطايفية بارزة متفرِّدة بحصرياتها و شخصيتها العفوية .. / .. شخصيًا استفدت كثيرًا مع بدايات عهدي بالمنتدى من مواضيعها المفيدة و الهادفة .. .. ) —

حفظك حشمتوني والحمد للهع ياربي لي استفدتم هذا الشي يفرحني

لذا لا يمكن أن نضيِّع فرصة قدومِها هنا لهاتِه الفسحة الأخوية الدسمة دون تقديم خالص تشكراتنا و عميق امتناننا لجهودها في الإرتقاء بهذا الصّرح الثقافي و المعرفي الرحب و اِقتطاعِها لتلك الأوقات الثمينة من أجل تحمّل ( همومنا ) و ( مشاكلنا التي لا حصر لها ) .. .. كنا حينئذ وجع راس بأتم معنى الكلمة .. .. // .. فـ ( شكرًا جزيلًا ) .. .. //

راك تمارس في الدبلوماسية عليها تاهلت للاشراف
العقوبة لرئاسة الجمهورية ههههه
العفو واجبي اتجاه اخوتي انا ثاني احتجت في وقت ولقيتكم
الحمد لله
النية برك ودعاوي الخير

أرحب بكِ كـ ( ضيفة ) كريمة مكرّمة في ( بيتِك الجلفاوي ) .. .. متمنيًا لك ( إقامة طيبة سعيدة ) بين إخوتك الأفاضل و أخواتك الفضليات ../ .. و أُحيي الأخت البارعة ( جميلة ) على حسن الإنتقاء .. / .. ( جميلة مصاصة دماء ليست بالهيِّنة حتى تكونو على علم .. .. ) — ( من حسن حظكم أنها منغمسة في حربها ضد النت اللعينة .. :d .. التي تصيب الإنسان بأمراض الضغط و الغثيان .. و إلاّ لكانت أختنا السطايفية أحد الأطباق الشهية لهذا الأسبوع .. .. ) .. // .. إلاّ إذا كان لـ ( السطايفية ) رأي آخر .. ( !! ) .. //

الله الله الكل يتوعد والكل يتربص
حسبته فقط تاي الشرير المشاكس
وبما ان الحالة راهي دونجي وانا لا خبر
راني رفعت وصعدت مستوى التحدي
وبعد مكنت نلعب برونالدو برك في الهجوم
رايحة ندخل سيرجيو راموس ومرشيلو وايكر كاسياس او بوفون
نخاف تباغتوني على غفلة
هههه

— السطايفية و المطالعة ( !؟ ) — هل هناك بينهما علاقة حب أم علاقة إعجاب خارج إطار التخصص ( !؟ )

السطايفية قبل الباك ربطتها قصة عشق وغرام مع المطالعة كنت نقرا بزاف
كنت اعشق الادبيات والشعر الجاهلي
بعد الباك
تطلقنا انا وهي وافترقت عنها
واصبحت اطالع اما مجالي او مجال التقنية
احاول ان اعود لها
مزية مطلقتهاش بالثلاث كون حرمت عليا

— ( الفن في الجزائر ) .. تقييمكم ( !؟ )

ببساطة تالمون كلمة الفن انحصرت في الغناء والرقص والشطيح عند الجزائرين
تناسينا الرسم والشعر والكتابات
بخصوص الشطر الاول هو فن عفني في بلادنا تركنا التراث الاصيل والغناء المحترم
خاصة مع الاي اي والواي واي والجماعة الزينة
كان بكري الشعبي والمالوف والسطايفي قمة

بخصوص الشطر الثاني
باعتقادي هو الفن الاصلي لكن ليس له فرصة ليظهر في الجزائر
غمو العفن

— ( الموهبة ) هي تلك المنحة الإلهية التي تميِّز بعض الأفراد عن عامة الناس .. و لا أظن أن ( السطايفية ) تخلو منها .. !! .. حبّذا لو نتعرّف على ما تجود به أختنا ( )

ااييي وي عندي مواهب بزاف
نعرف نقلي البطاطا والبيض ونعرف نسيق
ونعرف نتفرج ونرقد ونكونكتي
متشكرونيش مواهبي متعددة علابالي هههه

نولي للسيريو
السطايفية تكتب شعر لكن مهيش شاعرة تخربش برك
وفي المطبخ موهبتي صنع الحلويات نلقا فيها راحتي بزاف ونحاول نطورها ديما
وهناك موهبة ربانية معلاباليش تصنف موهبة او لا
عندي القدرة على التاقلم مع جميع العقليات رغم صعوبتها واضحاك الجميع هوما راهم يقولو مش انا
تبانلي كون تربيت في وسط فني كون راني كوميديانة هههه

تاي نحكيلك هذي علابالي بلي تضحك
كنت نهدر بزاف في القسم سنة خامسة ومدايرة حس كبير
قرر الاستاذ يعاقبني وقعدني مع طفل حاط في بالو كي نقغد مع طفل نحشم ونبطل منهدرش
لم ينفع الحل ويرجع الطفل والبنات لي مورايا وقدامي يهدرو كامل

فقرر تصعيد العقاب ويقعجني مع طفلة هي والعقون والابكم كيفكيف
ربع سنين مسمعناهاش هدرت وكي ينوضها تجاوب يسمعها غير هو بشق الانفس
والحمد لله العقاب كلل بالنجاح
وجاب نتيجة جد مبهة
لم اكن اتوقع انه سيلقى صدى
في ظرف شهر واحد
لاظنا جميعا الفرق الباهر
الطفلة رجعت تهدر وتضحك وتظل تهدر معايا
ويتسمع صوتها وضحكتها
ومن يومها ياس معلمي وخلاني براحتي مدايرة رايي هههه
متقوليش توقعت بلي انا بطلت منهدرش اي مكانش منها
العقون ونهدر معاه بالاشارات ههههه

— ( نصائح ) داخل أو خارج إطار التخصّص على السريع .. ( !! ) .. لا نمانع إن كانت قاسية قليلًا .. ( ) .. //

وكون انو المجتمع الجزائري مشتمع مش اصلي ويحب المقلد
ممنوع منعا باتا عليكم ارتداء نظارات السوق المقلدة والعدسات اللاصقة الصينية
لانو العين هي العضو الحساس الاكبر في الجسم
شفت الضرسة واش حساسة وكي تنوض تقتلك
ابا القرنية تاع الانسان اكثرلا حساسية بعشر خطرات من الضرسة
متستخسروش في رواحك حاجة اوريجينال راهم الحبيبتان كيما قال الرسول صلى الله عليه وسلم
النصيحةالثاني امر شائع انو كي دير نواظر تزيد تنقص في الشوفة وانو يفسدو العنيني والاهل ميخليوكمش تلبسوهم هذا خطا حذاري واحد ناقص يتخلى على نظاراتو رايح يزيد ينقص وقتها منفعوش الندم
كيما ايضا امر شائع انو ندير النظارات مدة ونحيهم
النظارات مهمش دوا
النظاارت حل يضمن روية واضحة
ويساعد المخ على العمل بشكل جيد
ويساعد في تثبيت درجة الريوة
ومعلومة عن المخ للناس لي عندها عين ناقصة على عين وتقلك معلي شمنديرش النزظارات اني نشوف بالاخرى
لا اخواني المخ ميكسرش راسو معاك
يولي يخدم بالصحيحة لي تشوف مليح ويكاشي لوخرا وتولي عين فنيانية
لازم ترغموه باش يخدم بالاخرى ويويلي يشوف بيها
شيء اخر
ومهم بالنسبة للاطفال تاعكم وخاصة لي دايرين عينيهم
متقولش مزالو صغار يكبرو ونعالجوهم
الصغر هو تاع علاج يفوت 12 سنة راهو روطار 16 خلاص تكمل عليه مال ويبقى المشكل
منيش نبالغ راني نقذول الحقيقة
الطفل كي يتعالج وهو صغير احسن مايكبر وميلقا وثتها وشا يدير حل
هذا بشكل بسيط اخي
واي حاجة موضوعي موجود اسالوني ونجاوبكم

.
.

( تقبلوا في الأخير تحياتي و تحيات طاقم الخيمة الإشرافي العامل معي ) .. ( على أمل تجدد لقائنا بأحد روابط هذا المنتدى العريق ) .. ( دمتم سالمين ) .. ( ) .. //

قتلك دبلوماسي وتمارس في السياسة
واحد ميقدرلكم ياحكام ممكلة جلفون من صغيركم لكبيركم هههه
تحايتي اخي

[سطايفية بكل فخر]

المشاركة الأصلية كتبت بواسطة karimtito

السلام عليكم ورحمة الله وبركاته
- مقلتيلناش واش أسمك ؟ وعلاش مزالك على رصيف الأمل حتى لضركا ؟
- أعجبتني إجابتك وطريقتها وكذا حب الأعضاء لك ما سر هذا النشاط والحيوية ؟
- هل تفعلين ما تنصحين به الأعضاء في المنتدى ؟
- شحال تخلصي في الشهر ؟
- وهل تعاوني الدار ولا تصرفي على روحك فقط ؟
- ريال مدريد خسر أمام جيرونا ألى تضنين ان زيدان كان سبب الخسارة ؟
ما تحليلك للخسارة ؟ لو كنت مكان زيدان اي تشكيلة تلعبين بها ؟
-انا من محبين ريال للنخاع هل انت مثلي ؟
-ما رايك في كريم ؟ وما أول انطباع لك عليه ؟

المزيد بعد ال|أجوبة

اهلا مجددا اخي كريم
اسمي سطايفية ومزلت رصيف الامل حتى لظركا خاطر البيس تاع الامل لي فات عليا راه حابس اومبان مزال ملحقنيش لراي تاعي
هانا قاعدين فوق رصيفو حتى يخدم رواندو ونمشيو هههه
احب ان يبقى اسمي مجهول اخي
+
الحمد لله ياربي اني محبوبة من طرفكم وانا ايضا احببتكم في الله واعتبرتكم عائلتي الثانية
سر النشاط تاعي راد بول يعطيك جوانيح هههه ومرات تيانتي ههههه
والله مكانش سر انا ابسط من ان يكون عندي اسرار اخي
عفوية بطبعي
+
انا انصحهم من تجاربي الخاصة يعني نجرب باش ننصح
فطبعي ندير واش نقول
+
ابابا وشحال نخلص في الشهر واعرة هاذي
ليوم ركبت من عند بابا ملبقري خدامة
اخي عملي جديد ومزال مخلصناش ومتهنيناش بيه ههه
صدقة يالمومنين هههه
امزح فقط الحمد لله معدناش ومخصناش وراضين
+
نعاون الدار ولا نصرف على روحي
الحقيقة المرة الدار يصرفو عليا
خلي لبير بغطاه متحشمناش ههه
+
تاي يخي راك وليت حاضارات وانا اختك وةبابا راهو لاهي بالتوام الحقيقي جيب تشوف عشرين الف معنديش مصروف هههه
ونحي منها خمسالاف لي تسالهالي تسما راني نسالك 15 الف هههه
جيبهم تشوف درنا فيك خير نسيتنا تسلف للعربي تاعنا وتندم خخخخ
+
منقدرش نحلل خاطر مشفتش الماتش متفكرنيش لاكتيفاسيون تاع لبين كملت وراني صحرا مقابلني غير بن شيخ كي كرهتو قفلت التيفي عندي 5 شهر مشعلتوش
+
ريال مدريد وانا زيدان واش من تشكيلة نلعب
اسي محمد راهي ريال مدريد
نقابل البارصا ب u20 ومنخافش
الحابس فيهم يلعب
منخممش خلاص في التشكيلة
علاش حطيتهم كرعين لمعيز تاعنا
اذا كنت زيدان
ندير كاس جي وباراسول في نص السانتياقو بيرنابيو ونقعد نتشمس
كي يلحق الماتش ندير القرعة ونخرج شكون يلعب هههه
نولي للجد اخي
كل ماتش وعندو خصوصياتو
كاين وين تهاجم وكايم وين دافع وتغلق اللعب
وان كان احسن طريقة للدفاع هو الهجوم
كل ماتش رايحة نخيرلو تشكيلة
ولو كنت مكانو نسعى باش نرجع بيبي كي راح راحت معاه روحي
لاعب من طينة الكبار
+
نحب اريال مممم سوال جيه
هاك شوية من دمي روح حلو تعرف وشا معناه الريال بالنسبة لي
+
رايي في كريم صراحة منعرفوش مليح باش نحكم عليه
واول انطباع لي عليه هو انسان يديموراليزا بلخف بصح من بعد تتنحالو ويولي يقاوم
منيش عارفة اني مخطئة او لا انت تعرف روحك اخي

[سطايفية بكل فخر]

المشاركة الأصلية كتبت بواسطة toulay

السلام عليكم
اهلا وسهلا ومرحبا بالاخت رصيف الامل تحت المجهر
قريت بلي وليتي عاملة جديدة ياسيدي الف الف الف مليون مليار مبروك ومزيد من النجاحات ان شاء الله على الصعيد العملي والشخصي
وياربي تكون سيدة اعمال ناجحة
واش حوالك يخي لباس واش الغيبة هاذي ça fait très bien longtemps
على كل جيت باش نلقي التحية والسلام
بالتوفيق اختي

ياااااه تولاي الكشرودة هنا
توحشتك والله
الاخوة انا نعيطلها كشرودة خاطر نحبها بصح هي راهي موقوصة ولاطاي منكاش وشعرها ليس هههه
+
ريب يخليك ليا ولعقوبة ليك يارب تترسمي ونتهناو منك
+
الغيبة حبيتكم تتوحشوني شوية والحمد لله عارفة بلي قيمتي كبيرة عندكم
راني رجعت متخافش ندمكم على النهار لي توحشتوني فيه ههه
+
وينهم الاسلئة
اي منقبلش ظرك تضيفيني بكاش سوال

[سطايفية بكل فخر]

المشاركة الأصلية كتبت بواسطة امنية بيضاء

السلام عليكم -هده اول مشاركة لي في هدا القسم
اختي اسم عضويتك هو حالتي انا الان *لك اطلالة مميزة ماشاء الله موفقة في حياتك
سوال ان امكن
ماهي مهنتك

اهلا وسهلا بيك بيناتنا اختي
جامي شفتو ضيفة تعرض سامحونا برك
جميلة قتلك متحليليش العين بزاف ههه
+
ايا مليح
مالا اقعدي على رصيف الامل وجدي روحك
قادر يعقب بيس ولا طفطافة ولا كاميو ولا طونومبيل فيه اللامل اركبي فيه
مرات او يعقب تيجيفي بسرعة حاولي تلحقي عليه ومتتعطليش
ربي يوفقك اختي
ثم اسمك ايضا مليح
امنية بيضاء
خاطر كاينين امنيات سوداء كيما اماني تاي حاب يشرب من دمي
والسي بابا والسي لانسبيكتور تاعو
طالقيلنو ومخلينو مداير رايو هه
+
ايييه مهنتي
جارنا يبيع اللفت
وختو حفافة
زولي لي فلكارطي مورانا جارنا طبيب
وخويا تاي حاضارات وانا نبيع المخدرات اه عفوا عفوا نبيع النظارات ههههه
اوبتيسيانة اختي
ومجالي الحقيقي اوبتميتريس
وهو القياس البصري غاليتي
بين طبيب العيون والنظاراتي
شفتو كلش مخضرمة فيه حتى قرايتي جي دورونج تاع تفاح
ههه
لكي تتعرفي على مجالي زوري هذا الموضوع
https://www.djelfa.info/vb/showthread...post3994163144

مرحبا بيك اختي

[السجنجل]

أهلاً وسهلاً بکَ أيتها الطيبة المشاكسة الأريحية ،يا ذات الحجا في هذا الصرح البَهيِّ الندي ِّ الجميل...
أتمنى لكََ إقامة طيبة بين أهلكَ من الأطهار وأترابك الأزهار يا مُشعة بالأنوار
دُمتََ في رعاية العزيز الوكيل الجبار...

إن ممَّا لا أحبده هو أنْ أحاول معرفة شيء عن الآخرين مِما لا يُعنيني، سَواء تحسُّساً كان أو تجسُّساً، لكن رغم ذلكَ سأحاولُ أن أطرح بعض الأسئلة التي ربما قد تكون إجابتها مُفيدة لي وللبعض من دون ريب .
نبدأبالأسئلة على بركة الرحمان ، وهي :
الجزء الأول :
1* ما هو الشيء الذي يجعلك تسيرين على رصيف الأمل (لكن ماشي النهار كامل وأنت في الرصيف هههه) وماذا تفعلين كي تتخلصي من التوتر والقلق؟؟
2* ماذا تفعل هذه الجمانة الهنَّانة عندما تتلقى سوء ممن أحسنت إليهم ولم تكن تتوقع ذلك؟؟لا تقولي حينها سأجلس على الرصيف وأبكي
3* ما هو مصدر قوتکَ وهل أنت تطبقين (نم باكرا واستيقظ باكرا)؟؟
وماهي نقطة ضعفکَ وكيفَ تتعاملين معها أمام من يحاولون استغلالها؟؟
4* ماهوالمبدأ الذي تؤمنين به ولا ولن تتنازلي عنه مهما كلفكَ الثمن ؟ ؟
وما قولك في فكرة (إذا عمت خفت )؟؟
5*لو كان لديك مركز مسؤولية في الدولة ما الشيء الذي تسعىين إلى تجسيده؟؟
6*ما هو موقع أختي الكريمة من فضيلة الإيثار؟؟
7-ما رأيك في التعليم في الجزائر من ناحية التحصيل العلمي والاخلاق والمنهج المتبع؟؟
8-بماذا تنصح هذه الأنثى العزيزة ذلك الرجل الذي يترك أختك أو زوجته أو بنته تخرج وحدها رغم أنه يستطيع الخروج معها وهو يعرف جيدا حال مجتمعنا مع الفتاة المحترمة وغير المحترمة ؟؟
09- ما رأي هذه الفتاة التي اتخد ت رصيف الأمل مأوى لها ، في ذلك الشخص الذي يلهث ويجري وراء كل جديد ولا تهمه عقبات وآثار ذلك على شخصه وأسرته ومجتمعه؟
10- ماذا تقولي لذلك الشخص الذي يتحرش بالفتيات ولا يعلم أنه بذلك الفعل يُعرِّض أخته أو إبنته للتحرش؟
11-ماذا تقول الأخت الكريمة لتلك المرأة التي تُفضلُ العَمل فتخرج له بغير سِتر، وفي زينةٍ وعطر، وبدون محرم ، فتخالط الرجال، وتجلس معهم ،وتحدثهم،وتعرَّض دينها للتهلكة ،وتفرط في تربية أولادها ،وتقصر في حقوق زوجها ،بحكم ارتباطها بالعمل، رغم أن زوجها ميسور الحال ويتسطيع أن يوفر لها ضروريات الحياة والعيش الكريم ؟؟؟
12- يا ترى ماذا تفعلي لو أخوها أو ولدها يرتدي ملابس ممزقة ومن غير حزام .

13- بماذا تنصحي ذلك الرجل الذي يتوضأ بدموع أمه كي يصلي في محراب زوجته ؟؟؟؟

14-يقال بأنه لا يلتزم الصمت إلا الذي تجاوز حد الصراخ ؟مارأيك في ذلك
15- لو كنت إمرأة أخرى هل ستصاحبين نفسك ؟بكل صراحة ......أنا علابالي بصح مانقولش
16- بماذا تنصي تلك الفتاة الخجولة بطبعها لكنها تحاول نزع ذلك الحياء ربما قالو عنها خجولة أو ربما عيروها بالحياء أو ربما اردوا استغلالها من خلال تلك الصفة

17- في رأيك هل المرأة المرحة كثيرا والفضفاضة (بالعامية يعني خفيفة ) محببة للرجال أو عكس ذلك .
18- إذا كان رصيفك هو الأمل فماهو إذا طريقك ؟؟؟ ماتقولش العمل ههههههههه
19- هل تعرفين قائل هذا البيت الشعري
صقل النفوس الحالمة بالأمل ==وغزل الأيدي الناعمة بالعمل
وماهو تعليقك عليه
الجزء الثاني : أكملي الفراغ بدقة وشفافية ووبدون صمت بل بصراخ ملأ الفاه ....ههههههههه

- أعتقد الآن أنني ..........
- دائما ما أتساءل بيني وبين نفسي عن .........
- فشلت ذات مرّه بسبب ........
- أميل كثيرا إلى .......
- أحب كثيرا .......
- يزعجني كثيرا .......
- أعتقد أن الآخرين .......
- عندما أتطلع للمستقبل أجده .......
- أنا حساس نحو الأمور ........
- رصيدي من النجاح بسبب توفيق الله ثم .........
- أحلامي دائما ما تكون ......
- عندما أقع في مأزق ........
- أشعر بأنني .......
- أحب أن يتفهم من حولي أني ......
- أكره بشدّه ......
- مشكلتي أنني ......
- كنت أتمنى أن .......
- في المناسبات الإجتماعيه أحب أن أكون .......
- أعاني بيني وبين نفسي من ......
- الماضي بالنسبة لي ......
- أنا راضــي عن .....
- عندما أواجه النقد .......
- الحياة بالنسبة لي .......
- كثيرا ما أجد نفسي .......
- عندما أكون بمفردي ........
- أنفعل بشده عندما ........
- مررت بتجارب ........
- أتمنى أن يسامحني ..........

بيناتنا مرمدتك بالأسئلة ههههههههههه

وأرجو أن تكون أسئلتي في محلها وغير محرجة كما أنه يمكنك أن لا تجيب عن كل أسئلتي إن كنت رأيت أنني حِدتُ عن الطريق

[karimtito]

أقسم بالله غير عجبوني ردودك حالة وراني نقرى ونعاود
برك جا في بالي سؤال شحال عمرك ؟؟