ابتسم من فضلك

[زهرة المسيلة]

ابتسم من فضلك

لا تقول لا تزعلي

إنت لو مابدك ياني ازعل كنت عملت شي يخليني افرح ..

لا تقول لا تزعلي
أنا لو كنت بقدر ما أزعل ما كنت زعلت

أنا أكتر حدا إيجابي
و مرح و بحب الحياة و المزح و الضحك و التفاؤل
أنا ملامحي بتبينلك قديش فيني طاقة إيجابية
قديش فيني انشر التفاؤل ع أي حدا بشوفني
قديش فيني بيّن للناس اني فرحانة و مبسوووووطة مندون ما بين الجانب الحزين فيني

لا تقلي لا تزعلي لأني حاولت كتير و ما مشي الحال
لأني خدعت حالي كتير كمان و قلت إني فرحانة
ضحكت و مزحت و رجعت لغرفتي ما قدرت كمل الكذبة بكيت كتير و طلعت كل شي بقلبي

لا تفكرني ضعيفة
أنا قوية و يلي مقويني حبي لحالي
يلي مقويني إني ما بحب شوف حالي مكسورة
قوية لأنو ما بهون علي استسلم لحزني

قوية لأني تحملت ناس
و مواقف
و غربة
و تحطيم معنويات
و فشل أحلام
و كسران خاطر
و تشتت أفكار
و تعب روح
و فقدان أحبة

و كتير شغلات


قوية لأني تخطيت مرحلة الشباب يلي ما عشتا لسا !! لأني عم عيش هي المرحلة وأنا اتطلع كيف عم تضيع مني !!

لأني بالوقت يلي بدي احلم فيه مو عرفانة احلم
مو عرفانة أنا وين بكرى ؟!
مو عرفانة إذا الحاضر معي و لا ضدي !!
و الظروف عم تواجهني ع طول و تكون ضدي
و مع هيك عم إضحك

زعلانة لأنو بالوقت يلي رب العالمين بقول فيه

قال الله تعالى: (( أَمْ حَسِبْتُمْ أَنْ تَدْخُلُوا الْجَنَّةَ وَلَمَّا يَعْلَمِ اللَّهُ الَّذِينَ جَاهَدُوا مِنْكُمْ وَيَعْلَمَ الصَّابِرِينَ )). (آل عمران-142)

و بقول :
قال الله تعالى: (( وَاصْبِرْ فَإِنَّ الله لاَ يُضِيعُ أَجْرَ الْمُحْسِنِينَ )) .(هود-115)


‎قال الله تعالى: (( إِلاَّ الَّذِينَ صَبَرُواْ وَعَمِلُواْ الصَّالِحَاتِ أُوْلَئِكَ لَهُم مَّغْفِرَةٌ وَأَجْرٌ كَبِيرٌ )) .(هود-11)


الناس بتقول فيه :
رب العالمين بقول :

قال تعالى : وَمَنْ أَعْرَضَ عَن ذِكْرِي فَإِنَّ لَهُ مَعِيشَةً ضَنكًا وَنَحْشُرُهُ يَوْمَ الْقِيَامَةِ أَعْمَىٰ (124)


مابعرف ليش بعمموا و مفكرين إنو كل زعلان معناها أعرض عن ذكر الله
مع إنو حتى يلي ما أعرض و حتى الأنبياء و الأطفال و غيرن الحياة بتكون صعبة عليهن أوقات
ليش متلا ما بقولوا الحديث يلي بقول :


قَالَ التِّرْمِذِيُّ (2396) : حَدَّثَنَا قُتَيْبَةُ ثَنَا اللَّيْثُ عَنْ يَزِيدَ بْنِ أَبِي حَبِيبٍ عَنْ سَعْدِ بْنِ سِنَانٍ عَنْ أَنَسٍ قَالَ قَالَ رَسُولُ اللهِ صَلَّى الله عَلَيْهِ وَسَلَّمَ : « إِذَا أَرَادَ اللهُ بِعَبْدِهِ الْخَيْرَ عَجَّلَ لَهُ الْعُقُوبَةَ فِي الدُّنْيَا ، وَإِذَا أَرَادَ اللهُ بِعَبْدِهِ الشَّرَّ أَمْسَكَ عَنْهُ بِذَنْبِهِ حَتَّى يُوَافِيَ بِهِ يَوْمَ الْقِيَامَةِ » . !!


ماني داعية
ماني كاتبة
ماني وحدة بهمها المظاهر
ماني وحدة عم بدعي المثالية
انا عم بحكي الشي الحقيقي
بتعرف ليش ؟!
لانك رح تتعب اذا بقيت عم تدور عالسعادة و الفرح
لانو انا زعلانة و انت زعلان و كتير ناس زعلانة
بس الحياة مستمرة
مو شرط تكون طاير فرح مشان تعيش

أنا عم شوف إنك تقبل بقدرك و تعيش بقناعة و رضا أسهل بكتير من إنك تضل تفتش عالسعادة أو تتحسر ع الماضي أو تفكر إنك مكروه أو حدا سيء لأنو عم يصير هيك معو !!


أنا مو قوية مشان حدا
ولا مشان إنت تفكرني هيك

أنا قوية لأني بعرف إنو الحزن إذا أنا ما سمحتلو يكون ضعف بالنسبة إلي
فمارح يكون

حتى لو ما زعلت فكرك رح قضي حياتي مبسوطة ؟!
هالشي منطقي برأيك ؟!

لا تقلي لا تزعلي
قلي طلعي يلي جواتك
قلي أنا معك
قلي إنتي عظيمة
قلي أيام و بتمر
قلي متل ما بتجي للواحد أيام مرة
رح تجيه أيام حلوة

قلي متل ما أنا بقول لحالي
و بقول للعالم

و اذا انت زعلان ؟! كون قوي
كون قد هالبلاء
كون عارف إنو الناس و الدنيا و الحب و المال وكل شي بعمرو ما رح يجيبلك سعادة
رح يجيبلك حب رب العالمين إلك

هو معك
و هالزعل
و ملامح الهم يلي بوشك
مانها عبث

مرضك
و قلقك
و خوفك
و وحدتك
و اي شي
مانها عن عبث
و لا انتقاما منك
انت منيح
و رب العالمين بحبك
حتى لو الدنيا كلها قالتلك عكس هالشي
ما تصدق
حتى لو شو ماكنت عامل و غلطان
هو رح يستقبلك بأي وقت
و بكل حب
كون واثق من هالشي

و مو شرط تعيش مبسوط
لأنك ما نخلقت لهيك أساسا

و مو الناس هي يلي بتقرر إنت لوين رايح
و لا تفكر لازم تكون كامل مكمل لحتى تكون انسان صح او حدا منيح

بتعرف ليش أنا ما بنشر كلامي ع برامج التواصل كلها و لكل حدا بعرفو ؟!

لأنو أنا كتبت العنوان و إنت شفتو
ولو كان شي بخصك كنت رح تفتحو لحالك

كتبتو هون لأني وقت شوف عدد المشاهدات رح إعرف كم حدا زعلان و محتاج لهيك عنوان

مو مشاهدات لناس عم تجاملني أو أنا قلتلها تعي إقرأي كلامي ..

لو كلامي ريح نفسيتك ولو واحد بالمية فهاد شرف إلي و مابدي أكتر من هيك ..

ما رح قلك لا تزعل
رح قلك زعلك و دموعك و كل شي عم يصير معك رب العالمين عم يشوفن و عم يكتبلك حسنات و عم يتباهى بصبرك و عم يقربك منو و يرفعك درجات لانو بحبك ...
و رح قلك
أنت حزين ؟؟
إذا ابتسم من فضلك ..


بقلمي ..
علا الزعبي 🌷