اريد حل

[مشكلتي]

لعام هذا جوزت لباك كانت تقرا معايا وحد الطفلة عجبتني حبيتها انا معروف منحكيش ياسر معا لبنات و غير مهتم بيهم بصح هادي الطفلة عجبتني شفتها عاقلة تقرا مليح الله يبارك مالقي قراو معايا من قبل ياسر بنات شابين عليها و عاقلين بصح هادي وحدها هاذي حبيتها و اول طفلة تدخل لقلبي , كنت نحكي معاها مرات على امور لقرايا برك محبيتش نبينلها بلي نحبها بصح في الاشهر الاخير بدات تفيق هههه لاني منحكيش معا لبنات لخرين نحكي كان معاها و زيد انا معالاقاش معا لقرايا انا نقعد في الطابلة الاخير و ندي ادنى المعدلات و هي تقعد في الطابلة الاولى و تدي اعلى المعدلات عدت كي نهدر معاها في امور لقرايا متقيمينيش فهمت روحي و جبدت روحي .
المشكل تاعي هي دركا لصقتلي في مخي محبتش تروح و انا انسان نحب الحاجة الاولى نعتني بيها و نحافظ عليها مهما يصير منحبش نبدل , و الله كنت قادر نقولهالها ولا نطلبها في رقم هاتف ولا فيسبوك بصح انا منيش حاب نحكي معاها كلمة في الحرام حاب ندخل من الباب لولا ظروفي المادية كون راني رحت خطبتها
مننساش نهار كملنا لباك سقسيتها اذا خدمت ولا لا كانت تتهرب باه متحكيش معايا غاضتني ياسر الجيست
المهم هي دركا تربح الباك بصحتها و انا نعاودو 100% مش علجالها ولاكن بسبب ظروف خاصة
و الله حاب نشارك معاها برشا حاجات الاغنية لكتبتهالها وووو
الحاجة لخايف منها كون نروح نخطب في المستبقل و ترفضني ؟ ترجعلي الوقت لي ضيعتو على جالها ؟
متقولوليش حب تاع مراهقة و تنساه و الله راني كبير و نعرف صلاحي و ناوي لحلال برك
مش عارف مرات نقول هذا راه شيطان برك
صليت صلاة الاستخارة مشفت حتى منام
كل ما نقول ننساها خلاص نزيد نتوحشها اكثر

[محارب الحمق]

كامل عدينا عليها حكاية الاعجاب هاذي (بدرجات متفاوتة), انا الحمد لله عمرها وحدة ماقدرت تقرقبني ليس لأنني "acteur ما يموتش" ولكن لأنه كانت لدي اهتمامات أكبر وكنت أتجنب النظر والحديث معهن, هذا أولا, ثانيا ولنكن صرحاء الفتيات في بلادنا يعانون من أزمة جمال وأنوثة وصدقني ما تمر به مجرد اعجاب فطري حدث بسبب الاختلاط وأغتنم فرصة مشكلتك لاكد أن من أسباب تراجع مستوى الذكور أمام الاناث في المؤسسات التعليمية هو الاختلاط الذي يكون تأثيره مختلفا على الجنسين فتاثيره أكبر على الذكور.فبالفطرة وجود الاناث مع الذكور في مكان واحد يشتت الانتباه فلا عجب من معاناتك دراسيا وكذلك الكثير من الذكور أعانهم الله. ما سأقوله لك, الزواج من الواضح أنه بعيد عنك بسبب صغر سنك وظروفك المادية لذلك أنت تضيع جهدك ووقتك على "أحلام اليقظة", هي تكمل قرايتها وتروح تخدم وانت اقعد أحلم.

[dede2000]

السلام عليكم ،أخي النية هنا لاتكفي،تقول ناوي لحلال مليح ،لكن هل أنت تقدر علي الحلال؟؟؟
شوف نحسبوها منطقيا ،هل تستطيع الزواج ؟ الجواب سيكون لا طبعا لعوامل السن والعمل ووووووو
سؤال الثاني حتي لو توفرت كل الضروف لك هل ستقبل بك هذه الفتاة ؟ الجواب سيكون طبعا لا لانها تلميذة مجتهدة وراح تنجح الباك زيادة علي ذالك راك تقول متقيمكش يعني متحبكش ومراحش تربط نفسها مع إنسان .....
السؤال الاخير انت كل العوامل ضدك وراح لا محالة تصطدم بالجدار ؟؟؟
إذا هني روحك واطلب من ربي تبرا من هذا لراك تسمي فيه حب.
اسمحلي لكنت قاصي في تقييمي لكن تبقي الحقيقة مرة.

[om_hadil]

مجرد إعجاب و سيزول،،،، اهتم بدراستك يا بني،،،

[زبدة ذايبة]

تدي أدنى المعدلات وتقعد في الطابلة الأخيرة.

وش عندك تقدملها؟؟؟؟؟؟؟

لا قراية لاهمة لا سمعة !!!!!!!!

وفوق هذا كامل متأكد تخسر

الباك؟؟؟؟!!!!!

عندها الحق ماتشوفش فيك.

وماعندكش الحق تفكر في هذي

وفي غيرها.

نهار ماتكون ناجح وترفع راسك

وترفع راس والديك. هذاك النهار

اهدر على الإعجاب والزواج.

انت أبسط الأشياء ماعندكش!!!!!!

على هذا ننصحك تقرى وتنجح

وخليك من الطاولة الأخيرة.

نهار ماتقعد في الطاولة الأولى

هذاك النهار تولي تشوف مليح.

إلتهى بقرايتك وانجح وادخل للجامعة وتخصص.

وكي توصل للنجاح هذاك النهار

وحدة ماترفضك عربية أو أجنبية.

لكن ولا بقيت مصر على لخسارة

ماتزيدش تهدر على بنات الناس الناجحات تريح راسك من التخمام

وماتزيد لا تتوحشها ولا تبكي عليها.

لأنك بالنسبة ليها مجرد إنسان فاشل ماعندك حتى قيمة.

اجتهد وانجح وحافظ على صلاتك

وابتعد على رفقاء السوء.

ودير لروحك قيمة باش مايحقروك

لا الرجال ولا النساء.

وأخيرا أتمنى لك التوفيق بني.

[toulay]

السلام عليكم
قلتي كبير وتعرف صلاحك نهار تولي كبير وتعرف صلاحك تندم على الوقت لضيعتيه وانت متقراش وتريح فالطابلة الاخيرة تندم لانو غير قرايتك لتنفعك وديرلك لقدر
تساعفني روح اقرا قرايتك راك مزال صغيييييير مزال المشوار طوييييييييييييييييييل
هي درك تدي الباك تاعها avec mention تروح تقرا طب ولا مدرسة عليا متسمعش بيك اصلا اذا كاين ولا لا اسمك وتنساه في déja راها تقرا معاك ومهيش شايفتك
مالا يا اخي خمم على روحك وخمم في قرايتك لانو هي الصح
بالتوفيق

[ابو سليمان10]

مجرد نزوة عابرة
ركز على بناء مستقبلك..مزال الطريق طويل امامك

[رندة.]

ركز في قرايتك. هذاك هو الصح

[nihal159]

علابالك يا أخي علاه ماهيش مقيّمتك؟ لأنّ طموحها على قد التعب لي راهي تتعب فيه؛ طموحها أنها تكون ناجحة و متميّزة علابيها راهي تقعد فالطاولة الأولى و تنال أعلى المعدلات؛ وماعندهاش الوقت أصلا باش تفكّر فالأمور لي راك تفكّر فيها أنت؛ نصيحتي حاول تجتهد و تنجح .

[ridha34]

نزوة عابرة..........

[muslim girll]

السلام عليكم
اللهم وفقنا للقول السديد والعمل الرشيد
اول حاجة اخي الاستخارة نتيجتها تكون بارتياح او انقباض النفس تجاه قرار معين ..وكيما يكتبلك ربي فهاديك هي الاستخارة ..يعني اذا كتبلك ربي وتيسرلك انك تخطبها وتقبل معنتها هاديك هي نتيجة الاستخارة ..واذا ما كانش المكتوب بيناتكم معنتها هاديك هي نتيجة الاستخارة وافضل حاجة ممكن يكتبهالك ربي
حاجة مليحة كي قلت بلي صليت الاستخارة ..دايما استخير ربي في كل كبيرة وصغيرة باش يوفقك اكثر ..وان شاء الله تكون تصلي الصلوات المفروضة وفي وقتها وتحافظ على صلاتك

وحاجة مليحة تاني كي نويتها لحلال و تفكيرك يبين بلي انت انسان من النوع اللي مهما يغلط يولي لاصلو ...
لكن ...شوف انت راك فالليسي ..علابالك وش معنتها ليسي!! كي شغل واحد عايش غير فحومتو جامي خرج منها الولايات المجاورة ما يعرفهاش وينك يا بلدان وحداوخرى !
تفكيرك رح يكون محدود كيما هاداك اللي عايش فقرية ماخرجش منها ..
:::::
فهاد الدنيا لازم تكون قوي ..والقوة فهاد العصر ماشي دراهم برك مي فهامة وقراية وشهادة
كي تكون قاري وبشهادتك الناس يفتخرو بيك ويحبو يناسبوك ...
انت رك تقول ماديا ما تقدرش .. والزواج لازملو تحمل مسؤولية ..انت الباك ماقدرتش عليه ..صح ولا لالا؟ كيفاش رح تتحمل مسؤولية مرا وحياة جديدة واومبعد اطفال ..... خممت فهادي ولا رك تخمم غير فكلمات الاغنية اللي كتبتهالها !
علاش مانقولولكش مراهقة !
انا تبانلي بلي هادي مجرد غيمة عابرة تفوت ويزيدو يفوتو موراها غيم وحدوخرين ...
المهم انت ايدا رح تقعد شاد فيها (وهذا مرجوح ) لازم تقرا وتخدم. وتبدا تتحمل المسؤولية عود نفسك على تحمل المسؤولية ابتداء من داركم ..
اما هي ماعلابالناش ايدا رح تقبل ولا لالا مانعرفوها مانعرفوك انت ..
صحة نسقسيك هدرت انت مع يماك باش تهدر عليها!!!! درت كشما خطوات "حقيقية " باش تخطبها ؟؟؟ ولا راك قاعد تضيع في وقتك وتخمم ايدا وايدا ...
الحاجة اللي لازم ديرها -برايي؛وانت ادرى بنفسك - انك تقرا وتخبي دراهم بالشوية حتى يجي الوقت المناسب اللي تقدر تتقدملها وايدا بدلت رايك فيها مارح تكون خسرت والو
ماتضيعش وقتك فكتابة الاغاني روح احفظ قران وادخل فكاش جمعية خيرية الفراغ هو اللي يدير هكدا ... وعمر وقتك بواش يفيدك
كي تدخل للجامعة ان شاء الله تشوف عالم واحداخر كامل !
يادرى ايدا جبت الباك ؟ اليوم خرجو النتائج ..ان شاء الله تكون جبتو
ربي يوفقك .

[Saif al-Islam]

أخي الكريم

الآمال يا اخي لا تُبني بهذه الطريقة ، فأنت الآن تحطّم ذاتك بوتيرة سريعة و تبعاتها ستكون قاسية عليك شخصيًا و على مسيرة حياتك و مستقبلك

أنت يا اخي في طور بناء مستقبلك ، و " العشق " ممنوع في هذا الوقت خاصتًا و أنت تدرس ، و إن فعلت هذا سيكون كل تركيزك موجّه لهذه الفتاة شئت أم أبيت و بدون شعور من طرفك سينهار كل شيء من خلفك .....
و الدليل هو خسارتك للباك ، طبيعي أن تقول أنّ خسارتك إياه ليس بسبب هذه الفتاة ، و لكن كن متيقّن انّ رغبتك فيها " الفتاة " يجعلك تنفي كل ما يُسيئ لها بدون شعور ، و هذا لسبب أنّ كل تركيزك موجّه لكسب ثقتها فيك و كسب علاقة صداقة أو ماشابه بها ، لذلك يا أخي أنا لا انصحك بمتابعة المسير في هذا الطريق ، نظرًا انّه طريق كفيل بتحطيم كل آمالك المستقبلية و منه هذه الفتاة التي أحببتها

حاول التركيز على بناء مستقبلك و متابعة دراستك ، و ركّز على تجاهل هذه الفتاة حاليًا ولا تحاول الإتصال بها ، و هذا لأنّها تتجاهلك و لا تريد التواصل معها ، و حتى لو إفترضنا العكس و قبِلت التواصل معك ، قُلّي ب الله عليك ما الذي سيدور بينكما من حديث طوال هذا الوقت ؟ أليست هذه العلاقة محرّمة يا أخي ؟ ، كن حذر يا أخ أنت في منعطف خطير سيدمّر مستقبلك نهائيًا

الذي يجب عليك فعله هو إتباث جدارتك في تكوين نفسك و ضمان مستقبلك و النجاح في دراستك ، و من بعدها ركّز على إستقرارك المهني و المادي ، ثم حينها فكّر في الحب و العشق و إبحث عمّن تُحب ......و ربّما ستكتشف بعد هذا الوقت أنّ هذه الفتاة لا تصلُح أصلاً لك ، و قد تجد أفضل منها بكثييييييير

هذا رأيي و أنا أنصحك به ، و نظرتي للحياة هو الأولى ثم الأولى ، فلا يمكن قلب المعادلة ، و أيّ علاقة مع فتاة بدون ضمان مستقبلنا و قاعدة خلفية نرتكز عليها للإرتباط مثل قدرتنا على الخطوبة و الزواج ، يُعتبر مضيعة للوقت و الجهد ، و هناك أسباب كثيرة قد تبدّل رغبتك في هذه الفتاة بعد طول مدّة بناء و ضمان مستقبلك ، لهذا أنا نصحتك برؤيتي الخاصة للحياة و كن حذر يا اخي في خياراتك