الجزء 178 من كوزينة احلى رفقه كوزينة الاطايب للطيبات

[أمنية غفران]

صحا عشاكم أخواتي عضوات وزائرات
ام يوسف و ام هدول بصحتكم جواز الفول راكم سخفتوني اممممممممممممم اعطيتوني فكرة لعشاء غدوة ان شاء الله الطـــبيـخـة

...............................

أختي ام هدول رايحة نقدم ليك و للأخوات العيش (المردود/ البركوكس) بالتعمير اسمحيلي على التأخير


اولا نحضر مرق العيش

في كوكوت لربح الوقت نضع الخضر واش عندك لفت جزر كابوية او جريوات بصل كرافس و حبة طماطم و مغيرفة كبيرة زيت و مرقي واغلقي الكوكوت

في طنجرة اخرى ضعي واش عندك شوي دجاج او لحم انا ما استعملتهمش خاطرش درت التعمير بلحم الدجاج هاد المرة و مغيرفة زيت و ملح و حميصة ادا طايبة نص طياب و اذا ماهيش طايبة ديريها مع الخضر طيب و قلي مليح و من بعد ضيفي طماطم مصبرة و مرقي بالماء السخون و ضيفي عود قرفة و شوية من عشبة لحية الشيخ ( اختياري ) تعطيها بنة روعة و خليها تطهى في غرضها كي تطهى ضيفي له الدرسة من حشيش قصبر و ثوم

تانيا العيش / المردود / البركوكس

هنايا عندي المفتول باليد نأخذ المقدار الي نحتاج انا عندي شوب قهوة كبير بيه نعبر كيما تعرفو الكسكس و لا المردود يزكى كي يطهى الله يبارك علابيها نعبر بهاد الشوب يعطيني مقدار الي يوكل ثلاثة اشخاص تبارك الله

و من بعد نضيف له ماء سخون و نخليه دقائق و نصفيه و نخليه ينشف شوية و من بعد نفوره تفويرة اولى و من بعد نضيف له الماء من بعد ما نكون نحيته من الكسكاس و نخليه يتشرب مليح الماء و من يعد نزيد نفوره مرة ثانية و اخيرة و كي يفور نضيف له شوي ملح و الماء و نخليه يتشرب مليح الى حين تجميره في المرق

ملاحظة

كاين الي يفوروه ثلاث مرات انا استغنيت عنها لأني راني في الاخير نضيف المردود في المرق و نخليه يتجمر كيما نديرو لتليتلي

التقديم

كي تطهى الخضر نقوم بطحنها بالالة اليدوية العادية من الاحسن و نضيفها لطاجين المرق و نخليها تتجانس مليح المرق و هنايا نضيف راس الحانوت ضروري حبيباتي
عندنا في المردود

و في طريقة التقديم احكمي طاجين التقديم و حطيه فوق النار و ضعي فيه المردود و ضيفي له المرق بكمية لاباس بيها و خليه يتجمر بلا ما تغفلي عليه ديما قومي بتحريكه
حتى تشوفيه وصل للقوام المطلوب ماشي مايه و ماشي ثقيل و هنايا نحيه من النار و حطيه في قصعة او صحن التقديم ارجوكم ارجوكم حطوه في صحن تقليدي نموت عليه هاكة مقدم في صحن تقليدي و لا قصعة هههههههههه و شبحيه و حطي من فوق التعمير كيما في طبقنا اليوم
وادا ما درتيهش هاد التعمير حطي الدجاج او اللحم بعد ما تكوني فتتيه مورصوات صغار

حبيباتي الصور توضح المراحل اكثر



https://f./p_437d83q41.jpg









وهادي لحية الشيخ او الشيباني كل واحد واش يسميها









هادا الشوب الي نعبر بيه العيش المفتول و هو يابس




هنايا المردود بالتعمير



.............................

و هادا مردود بلحم مرحي و دجاج



و هنايا مقدم في قصعة تقليدية صغيرة هايل امممممممممم

https://a./p_437zz3ik2.jpg

وهنايا بلحم و دجاج في قصعة مودارن





يتبع ... ان شاء الله ................ التعمير