يا عيني سُحِّي وجُودِي بالعَبرة
ياك البكي يخفف الهّم ولحزان
جيت نحكيلك يا الدمعة واش صرا
قولي ليا واش حبسك في لجفان
ماهيش هذي عوايدك يا ذا المُرّة
يا موالف بيك في الحزّة ويدان
قالتلي مقنوط ياسر ذا المَرَّة
قلتلها قلبي تفتت من لمحان
قالت ليا وراك قصة مشهورة
عوّد ليا قولي واش اللي كان
يا دمعة لوكان نحكي للحجرة
واش صرا تبكي معايا هي ثان
ذا الجيلالي يا الدمعة النكارة
سافر عنا راح ما فيها رجعان
جاني خبرو مع مغارب معسورة
حسّيت بْرُوحِي خَرْجَتْ من لبدان
اخرجت بزَرْبَة وفي قلبي جمرة
نتأكد بلاك ذا الشي غي بهتان
نجري داهش ما دريتش واش صرا
نطلب ربي ذا الخبر مُوشِي نيشان
فَرْدَة لابَسْها وفي يدِّي لُخْرَى
ونسابق في الريح وانا يا دهشان
كي نوصل نلقى القيطون تْسَوْرَى
و تْلّمَّد غاشيه وتْلَّمْ الجيران
ذيك اللحظة مِتْ قِدَاه ْنْ مَرَّة
ونحاول كيفاش نكذّب لعيان
نجي نهدر ما تجينيش الهدرة
نحاول نوقف حاس بروحي عيان
واش يصبر فاطنة في ذي المرّة
واش يصبر خيوتو واهلو والجيران
واش يصبر خاطري يا أهل النعرة
والجيلالي راح ملمّد في الكتان
رفدوه وصدو شوار المقبرة
وانا يا ماني مأمن باللي كان
واش من غاشي كان في ذيك الحضرة
والناس اللي حاضرة من كل مكان
لا تخزر ضحكة ولا تسمع هدرة
هول المشهد زاد في قلبي تمحان
سيدي ساعد شاهدة صوت وصورة
ذاك المشهد قسّم الكبدة تشطان
تبكيه الأقسام كلها والإدارة
تبكيه القرية كاملة رجال ونسوان
تبكيه الشجرة وتبكيه الحجرة
وتبكيه النسوة والذراري والصبيان
تبكيه الأقلام وتْحَّنْ ليه المسطرة
المعادلة والدالة مْعَ الزايد والنقصان
تبكيه الأعداد بأنواعها والإشارة
هندسة وتحليل و معاه البرهان
يبكيه بومدين خالدي حجرة حجرة
تبكيه القاعات وكل مساحة وكوان
تبكيه عين دزاريت دورة دورة
يبكوه الصحبة ويبكوه العديان
واش يطفي نار قلبي ما تبرا
واش يصبر خاطري من ذو لحزان
لوكان سلف نعطيك من عمري عشرة
تستاهل عمري بكلو لا نقصان
سماط الما والماكلة عادت مرة
فراقك يا شيخي ظَّلْمَ علينا لكوان
واش نقول عليك سيرة مشهورة
يشهد بيها الصديق مع العديان
نسب وأصل وأخلاق همة وشطارة
واش ما قلنا ما نوفولك ميزان
نرفد كفي ليك يا عالي القدرة
يا حنان و يا كريم و يا ديان
تكافيني واياه بالجنة الخضرا
ويْكُون مْقَامْنا وَسْطْ الجِنَان
جوار النبي بلاصتو في الآخرة
ومن حوضو يرويه ما يبقى عطشان
وتنجيه ان شاء الله يوم العسرة
بجاه الرسول وبجاه القرآن
نار فراقو حرها جامي يبرا
يا دمعة ذي قصتي اسباب الاحزان
قالتلي مقواك بــرني معذ رة
وسالت بحرارة على خدي ويدان
والصلاة عليه حبيب الزهرة
خير الثقلين من انس ومن جان
( تقرير عن مشاركة سيئة )، و الموجودة أسفل كل مشاركة .
2016-11-12, 13:14
ابكي با عيني قصيدة في رثاء استاذنا الفاضل رحمة الله تعالى عليه زواوي الجيلالي من كلماتي
العرض العادي
