المشكلة زوج الأم

[مشكلتي]

السلام عليكم ورحمة الله

والله ماعلابالي منين رايح نبدالكم
ابي مات الله يرحمه وامي ونظرا للظروف القاسية اللي عاشتها مع خوالي اضطرت تعاود الزواج
العام اللول فات نورمال لكن هذا الرجل طماع باتم معنى الكلمة كان طامع يقولك عندهم ورث ولا حاجة ومام هوا استعرف وقال لعبتوهالي اي النية لم تكن خالصة لوجه الله تعالى
زاد خويا من امي وتما الحالة تشبكت اولا ماخدامش ويشرط فالماكلة عمباتلو شركة ولا حاجة
ولا يضربنا منقدرش نوصفلكم الوحشية المهم حب يا نخرجو عايقين ونتشردوا ولا نتعوقو لدرجة انه ضرب خويا لاذنه السمع تاعو نقص عقدنا ميخليناش نخالطو صحابنا يبهدلنا معاهم ووصل يضربنا فالشارع والناس تشوف على اتفه الاسباب /5دج كمثال/ وخلي وخلي ...
وين زاد هبالو كيما عطاوه دار خمم يخرجنا حنا ويعاود زواج مع وحدة خدامة حنا صبرنا العام هادا يتسقم اخاصة ان خوالي سامحين فينا كل واحد متلهي بهمو
زاد النجاح نتاعنا والاستقامة الى درجة ولاو اهلو وفاميلتو يقولونا نتوما ملايكة ويديرلكم هادا وقد ماحاولنا نصلحو والو
شحال من مرة توصل لدرجة الطلاق ومن تخمينه الخبيث انه محابش يطلق حاب امي تخرج تطلقلو باش ماتديش الدار ويعاود الزواج
شوهلنا سمعتنا تاع الصح وكيلو ربي كون مجاتش اختي الصغيرة وخويا منو والله دقيقة منقعدوهاش معاه
امي رايح يهبلها الى درجة ولا يقولها دبري راسك اشريلي ووكليني راه في عقولو هادا هي الراجل ولا هوا النهار كامل والله مانزيد عليكم كلمة راقد
انا عندي الباك هاد العام وخويا الكبير خدام على شرو لادار لا دوار ومع ذلك كيما يلقانا هكذا يشري وجيب ميبخلش ينوض ياكل لا حشمة لادين
الاعصاب مهلوكين امي مرضت بمرض القلب ومزال موراها قالها حتى ندخلك لسبيطار المهابل ونتهنا منك يظل يعاير فيها ويستفز فيها
البروبلام اللي راه حجرة فالسباط اختي العرس الصيف هادي وملقيناش كيفاه
اعطوني حلول الله يستركم ودعوة صادقة ان يفرج الله همنا احنا الحياة التاعنا امي اذا راحت راحت الحياة
للاشارة راه داير السنة يعني تقصير ولحية ؟
وهل في حالة الخلع ترتب غرامات مالية على الزوجة او لا
مقدرتش نعبر على الحالة تاعي لكي لا تملوا القراءة والله فيض من غيض ولله في خلقه شؤون

[دينا10]

ربي يجيب الستر حالة مزرية باتم معنى الكلمة اصبروا وكبروا قلب يماكم خلوها تزها و تضحك وتنسى راجلها الشرير ربي يهديه لازم تتجاهلوه وتتخاشاو الهدرة معاه ونركز على يماكم ما تستاهلش تعيش هك هم وغم مقدرتش نعبر لازم تتهلاو فيها تحدثوا معاها وخلوها تفرغلكم واس راهي مخبية في قلبها لدرجة مرضت بيه ربي يجيبلها الشفاء العاجل لازم تعوضوها واش قاسات في جالكم معندها غير ربي ومن بعد نتوما تتفاءل بيكم وتكمل حياتها ربي يجيب الخير

[غزلانْ]

السلام عليكم

الله يرحم الوالد

حبذا لو رمزت الى عمر زوج والدتك هذا

هي بعد موت أب أولادها نظرت الى مستقبل

أبنائها نظرة التشاؤم و خافت من متطلباتكم

و لهذا تزوجت و لكن ما حصل قد حصل

و منه هدفها واضح أن يعينها و يساعدها على تربيتكم

و لكن كل نظرتها كانت انعكاسية على أولادها قبل أن تكون عليها في حد

ذاتها و كحل اذا كان هذا الرجل كما وصفته يعاملكم بهده المعاملة

فهنا على الوالدة ادا كانت تريده و طغيانه أو تقوم بخلعه وفق مبررات

القرار قرارها هي لا أنت ابنتها و عن أخوك الله يقويه و يهديه

أنت كفتاة و أتعبكي زوج أمك فما بال أخوك كرجل

و عن أختك ألف مبروك عليها فرج الله عليها لمادا " حجرة في السباط"

و ادا كنت تقصدين داير لحية أنه في طرق الهداية الله يهديه

بالتوفيق
و حلها بيد أمك ( لاتلومي أخوالك)

لا اقتباس الله يحفظكم

[AMINA.Z]

المحامي هو الذي يمكن ان يزودكم بكل المعلومات
ربي يهنيكم منو ان شاء الله

[نور الفجر02]

حتى تخلعه عليها ان تدفع مبلغ بالاتفاق بينهما ان لم يتفقا يرفع الامر للقاضي والله اعلم
ربي يكون معاكم ويصبركم حاولي مع اخوالك او اعمامك ربما يساعدونكم

[الرميصاءْ]

ربي يفرج عليكم

[FELLA BIO]

ربي يفرج عليكم عاجلا غير اجل

[لامْية]

انشاله ربي يفرج عليكم اختي

[ramzi-messi]

ديروله المنوم في الأكل و لا وكلوه ماكلة نتاع المهابل خلوه مايهدرش و يولي كي لبهيمة والله هدا وحش ماشي بنادم

[أمل94]

اختي عليك بالصبر وانا من جهتي راح ندعيلكم ربي يفرج عليكم امين يارب