عرسي بنظر امي مصيبة

[مشكلتي]

سلام
نعم تخيلوا ذلك ..........عطاولنا 4 اشهر في ايدينا و امي تعتبر المدة غير كافية و اصبحت تشتكي انها غي طلع في الحسابات و تهبط ....

امي المسكينة لا تتحمل الضغوطات و اي شيء بالنسبة لها صعب و فيه حسابات

وليت انا نقترح و لكنها غير مواثقة في آرائي ...........قلتلها لوكان نقولك انا نروح هاك بحوايجي للناس و مانشري ولا شيء لربما تفرحي ...

تجادلت معها و هي الآن تراني بنظرة اخرى ...............

اعينوني ماذا افعل معها مع العلم اننا وحدنا و لا يوجد من يساعدنا من ناحية الآراء في الجهاز و الخياطة و التحضيرات مع انها لها خبرة في هاد المجال ...يعني تعرف لاباس ....

من ناحية مادية تقدرو تقولول لاباس ........ماشي بزاف و لكن وسط .......

المشكل بالنسبة لي ليس الماديات بل في طريقة التفكير و ترتيب الامور في رأسها حتى تترك الهلع من موعد العرس لأنها أثرت علي في هاد الموضوع حتى قلتلها خلالالالالالاص نقولولهم بطلنا .........

راكم تشوفو وين راني ؟؟؟؟؟؟؟ والله تعبت تعبت تعبت ...........

انا عندي الراي و لكنها ماشي حابة حتى تخرج معايا كل مرة تقولي حتى نعرفو وش نشرو ........في رايكم نعرفو و احنا قاعدين في بلايصنا ؟؟؟؟

ياخي لازم نروحو و نشوفو و نسولو .........

قاعدة هاك لا هي عندها كوراج و لا انا تسمعلي ........

نقولها نديرو روب فلاني تقولي لالا ماديريش ديري في بلاصتو روب آخر .....وشنو هاد الروب؟؟؟ ....حتى نشوف .......... وقتاش نشوفو ؟؟؟ ماعلاباليش ....

و الوقت قاعد يروح ........قولولي كفاش ندير

راه يقولي راسي نروح نوجد وحدي لروحي و مانتكلش عليها .....وش رايكم ؟؟؟؟؟

[نور لاتراه]

السلام عليكم
قد يفيدك قسم شقائق الرجال

[أم رقية نسرين]

ختي متصعبيش الأمور وتعطي للموضوع فوق حقو نتي و ماماك في زوج مقلقين و باينلكم الوقت غير كافي هدي روحك شوية حاجة ماتستاهل تتقلقي على
ماماك
حاولي نظمي روحك ادخلي لقسم تجهيزات العروس رايحة تلقاي بزاف حوايج يساعدوك
الله الموفق و ربي يهنيك

[AMINA.Z]

ما دام كل وخدة فيكم تغني وحدها ماراح ديرو والو
وحدي قائمة بافكارك و اشياء اللي حابة ديريها و تشريها و اديهالها و اقعدو ورقة و قلم و اتفاهمو ...رتبو الاولويات
حويح التصديرة قرري يا تشري الواجد يا تخيطي ...و لازم تروحي تشوفي
الفراش تاني لازم تروحي تشوفي واش كاين و شحال السومة باه تقرري
قنادر الدار و مستلزماتك الخاصة تاني لازم تقرري تخيطي و الا تشري .....و اذا حابة تخيطي يا ربي تبداي
يعني رتبي كلش في راسك و حطيه قدام ماماك و قنعيها ...و ماكالاه الهدرة الزايدة
و اذا ماحبتش تروح تشوف معاك ...روحي شوفي وحدك و خبريها .....لازم وحدة فيكم تكون مبادرة.
و صدقيني هاذا راهو فرح ...حاجة ما تستاهل تفسدو هاذ الفرحة بالنرفزة اللي ما عندها حتى معنى.
بالتوفيق و ربي يهنيك ان شاء الله

[زبدة ذايبة]

بسطو الأمور تتبسط

الناس تهدر وتضحك على بعضها البعض درتو ولا مادرتوش

وهذا موجود في كل المجتمعات

ديري ماتيسر سواء من أكل أو جهاز وتوكلي على رب العالمين

ماراكمش رايحين ديروا عرس الأمراء والسلاطين

ماتيسر وبالجهد اللي عندكم واعرضوا الناس ماتيسر

وكلما يسرتو الأمور كلما كان سهل وبسيط

ابتعدو على التعقيد لأنه في آخر الأعراس ماسمعنا بحتى واحد اعطاولو جائزة نوبل في عرسو

والأهم في العرس هو الإعلان وحضور الناس للمباركة والتهنئة .

بدون تباهي ولا سمعة ولاخروج عن حدود الله في الزفاف

لامعازف ولاديسك جوكي ولا رزناجية في موكب العروس

ولاملابس فاضحة ، ولانمص،

وكلما كان عرسك بسيط ووفق الشرع كلما بارك فيه الله

ربي يهنيك

[غربة أهل السنّة]

وعليكم السّلام ورحمة الله وبركاته..
الأمر بسيط جدّا ولا يحتاج لتعقيدات
أربعة أشهر مدّة كافية والحمد لله
ابدئي بشراء الفراش وثياب البيت
أمّا بخصوص فساتين التّصديرة فهي التّي تأخذ منك كل الوقت والمال
وفي الأخير لا تستعملينها
رتّبي أولوياتك فقط وبالتّوفيق

[الزوجة البارة]

نصيحة مجربة العروس لنهار عرسها تبقى تشري و مخصوصة و نهار الصباحة مباشرة تندمي على النص
اختي انتي اشري اللازم القائمة راح تساعدة بصح اياااك من القوائم الخيالية الي تلقايها في المنتديات مبالغ فيها جدا كلش يتباع ضرك شهر بعد عرسك تقدري تزيدي تشري
انتي حددي ميزانيتك و ميهمكش في اراء الناس المهم الحاجة الي تريحك و الوالدة تاعك اقعدي معاها و حطي قائمة محددة و اعزمي انك متخرجيش على محتواها و راح تلقاي كلش بدى يسهال
ربي يكملك

[blanche rose]

كل الردود رائعة اختي
أختي ما يحدث لك ولأمك أمر طبيعي جدا
فكرتيني بالوالدة وما دارت فيا ههههه

في زوج رايحين تكونوا مضغوطات وكل وحدة فيكم تبان للأخرى بلي راهي آنورماااال

وزيد اذا انت البنت الوحيدة او الكبرى واول مرة تزوج بنتها رايح يتلفلها كلش..
صراتلي كيفك..

المهم
أنا لو اعتمدت على أمي مئة بالمئة كانت هردت الحالة ههههه..تخلطتلها الفرحة مع الخلعة..
ما تلوميش أمك..مهما كانت تعرف رايحة تنسىى

المهم
اول حاجة ديري القائمة
قائمة الأثاث
قائمة الملابس والماكياج
قائمة هدايا الزوج وأهله

وما تكثريييش..انا كثرت وندمت..

اولا كي تكثري رايحين
_ يدولك لبلاصة برك..
_ خسارة دراهم..
_ العيييييين..تجيبي العين لروحك ولراجلك هذا ما كان..

المهم كي تديري القائمة
الأثاث
ديري حاجة او زوج كأقصى حد
زربية او زوج فقط
وهكذا
الملابس
مثلا
لبس صيف 5
لبس ربيع5
لبس شتاء5
لبس الخرجة 5
الاحذية
..الخ
وكي تقفلي العدد المحدد ما تزيديش
وهكذا
شوفي

انت لازم تعتمدي على نفسك ..وقولي لوالدتك انا معولة عليك تفكري فلحوايج لكبار..

الهدايا لازم تديري بالزيادة
واعرفي تخيري..

راني نفكر نفتح موضوع بخصوص هذا الأمر لكن المشكلة أنو ما وليتش نقدر نتحكم في حجم الخط وكذا ..ما نعرف من عندي او هناك خلل ما..

المهم
ابداي اشري وخلي الملابس الثقيلة لأمك وما تكثريش منها لأنها خسارة دراهم برك..

وحاولي ما تتناقشيش معها ..
نوصيك ..ونوصيك

حصني نفسك يوميا أختي..هذه نقطة مهمممممممة
لا تنسي
اذكار الصباح والمساء
او على الاقل
قراءة الفاتحة مرة
الاخلاص والمعوذتين ثلاث مرات
آية الكرسي مرة
الصلاة
أكثري من قول
حسبي الله ونعم الوكيل
لا حول ولا قوة الا بالله العلي العظيم
الحمد لله
الاستغفار
التسبيح
والذكر عموما
التقرب لله عز وجل والابتعاد عن السيئات والذنوب
فعل الخير ولو لحيواان
الدعاء
الصدقة ولو بللي خبز في الماء وحطيه للعصافير..
او وكلي قطط ..الخ

وهناك رقية شرعية في الانترنت..اختاري منها ما ترتاحين له. ..واشحنيها في فلاش ديسك..واسمعيها متى شئت..

ويمكنك رقية نفسك بنفسك أيضا

عزيزتي ثقي أن كل شيء بيد الله عز وجل.


جربي وثقي ان الله لن يخيبك
ربي يسعدك ورزقك الذرية الصاااااالحة
والف الف مباااارك الزواج مسبقا

[michaella]

هناك حل و هو ان تخرجي لوحدك من أجل رؤية ما يباع ، و ما يلزمك و تقيمه ماليا ، ثم تخرجين مع والدتك و تكون لك فكرة مسبقة على ما تريدين بعيدا عن المناوشات ، و لن يكون هنالك تضييع للوقت ، و كما قالت لك الأخت أعلاه لا تكثري من المشتريات ، و دع عنك القلق ، و حظ موفق .

[first first]

اولا ربي يعينك اختي
ديري قائمة ..................او قسمي انت وامك مسؤوليات التجهيز......زوري قسم تجهيز العراس وخلى امك تشوفه وتقرر معاك في وضع القائمة.

المدة ربما قصيرة ولهذا امك تحت الضغط.

ديري المهم ولاترهقي نفسك...................وربي يسهل ان شاء الله.
ومبروك مسبقا .ربي يهنيك.

[أم الشَّيماء]

لا تعطي الأمر أكثر مما يستحق ، هي ضغوطات تمر بها كل عروس ،رتبي أولوياتك فقط ، أذا كان عرسك في الصيف ركزي على ملابس وأثاث الصيف ، وملابس الشتاء لما يحين وقتها سيشتريها لك زوجك بإذن الله ، ملابس التصديرة يمكنك كراءها لأن معظمها لن تستعمليه بعد العرس ،
بخصوص قولك لأمك ( لوكان نقولك انا نروح هاك بحوايجي للناس و مانشري ولا شيء لربما تفرحي ...) أخطأت كثيرا في حقها لأن كل أم تتمنى أن ترى ابنتها أجمل وأسعد عروس في الدنيا ربما خانتها الظروف فقط ....إذا أعطتك عمرها و زهرة شبابها هل ستبخل عليك ببعض الجهاز ....لا تجرحي أمك عزيزتي (والله أكلمك بقلب أم ) فهي ربما تخفي عنك مشاكل لا تريد إعلامك بها ، ثم المفروض أنت في فترة فرح عيشي هذه الفترة بسعادة فلن تتكرر ويسري على نفسك ييسر الله عليك.

[قدور بن عاشور]

روحي بحوايجك و خلوكم من عادات الجاهلية تاع عرض الأزياء، مع الأخر ماتزيديش تلبسيهم.

[hawa19]

والله يا اختي ماهو مصيبه ما والو راكي انت و انك تحت ضغط كبير و الحل هو انكم تبداو توجدو هو كلش على نقطه البدايه كي تبداو يجي كلش مورا بعضاه فهمتيني ديري قبل قاءمه و لاكان امك ما عندهاش خبره سابقه لازم وحده تنعتلكم و تكون قريبه ليكم و ربي يعاونكم و ربي يهنيك اختي

[ManouraHilwa]

الله يعاونك ويباركلك