السلام عليكم و رحمة الله و بركاته
حبيت نحط هاذي الطبخة لي طيبتها عشانا اليوم
صراحة خويا كان صايم اليوم وجدتلو فطور عادي شربة و طجين زيتون , جابلي ليزابا نتاع الداند و الجلبانة و كانت الساعة الربعة و نص , قالي لازم طيبيهملي في زوج , قلت انا كيفاش ليزابا مع جلبانة , صراحة جامي اذا طيبتهم مع بعض , قلت والله غير نجربهم , فيها جات فيها راحت .
بندالكم بالمقادير :
رطل جلبانة , 04 ليزابا نتاع الداند ( القانصة فقط أو كما نسميها الكانزة ) , نص بصلة مفرومة , علبة كرام فراش , فلفل اسود , ملح , كركم , معدنوس أو اذا حبيتي كسبر , رند , فرماج شاف , زيت .
التحضير : أول شيئ نظفت ليزابا و قطعتهم قطع صغيرة وغليتهم , وغليت الجلبانة مدة 05 دقائق
في قدر كرفجت البصل , اضفت له كسبر لانه لم يكن لدي معدنوس , فلفل اسود , ملح , كركم , رند وطبعا زيت وخليتهم يتقتلاو فيه واضفت كمية من الماء , طبعا عينك هي ميزانك , بعدما غلا المرق اضفت كل من الجلبانة و ليزابا مع بعض , و بما اني انا كان وقتي ضيق في الطياب اليوم و قريب يأذن المغرب , وضعتهم في الكوكوت , بعدما ما عرفت انهم طابو فتحت عليهم , كانت المرق فيها تقريب كاس , حليت نصف مغرف فرينة في ماء بارد واضفتها للمرق ثم اضفت علبة صغيرة كرام فراش , وفرماج شاف وخليتهم يتغلاو شوية , ثم فرغت الكل في مول الفرن و ودخلتها للفرن , مدة 10 دقائق حتى نشفت و شعلت عليها ايضا من الفوق حتى تاخذ لون مميز
صراحة ذوق و بنة ومظهر رائع , كان هذا رأي صحاب خويا جاو فجأة و كلاو منها بصحتهم
جربوها على ضمانتي
اسمحولي على الصور لاني مصورتهاش كيما قلت في الاول درتها على الزهر فقط , المرة الجاية ان شاء الله نصورها و تشوفوها احسن