عشرة أسعلة إلى بن غبريطة

[بوسماحة 31]

سيدتي وزيرة التربية.. رايح في هذا المقال أُكلّمك بدارجة بلاك تفهميني وتفهمي قصدي، لحاجة لولى شفت نية واللا قولي حسيت حاجة لوش ماهيش نورمال فللي باغياته يكون تمتم فيليكول يعني كيما قلت تقري اولاد لغة أمهم سيتادير الدارجة، وقلتي اللي ايهمك في دشي الفايدة نتاع الدراري، واللا كيما يقولو عندنا فلغرب الشاشرة، بصح كيما قلتلك يا السيدة الوزيرة، هدا الشي ماهوش باين ومشي واضح، اتبان الحالة كللي مقصودة وشينة وماتزيد غير فلكلام الضايع واللي مافيش حتى معنى واللا فايدة، وانزيد انقولك بلي ايضر ويشلوش العقل على خاطر النية تبان مشي صافية وصدقيني أنا ما في راسي حتى أريار بونسي والله والو بصح غايضني الحال وغايضتني بلادي اللي ما حبتش تخرج ملغرقة واتفيش والتمخريق ولفوديبا، قولي لي بالله عليك كيفاه مانطورش اللي عندنا مثال انسهل أكثر الفصحى واللي راهي دارجة فلحقيقة في ليكولاتنا مشي انروح انحط عداوة انتاع اشكيل بين الدارجة والفصحى، وندير هربة للقدام باش منحطشي المشاكل انتاع الصح، بصراحة انقول أنّ الناس اللي باغيين اليوم يشعلوا حرب لغات أهلية فلبلاد يعني مافهموا فشي اللي صار فدزاير هدي خمسين عام، يعني رهم مديفازيين وماعلابلهمش، المعوقيت انتع الصح هو هاذلجيل القديم اللي بقى مكومبلاكسي بلعرببة وبقى يشوف فيها لغة انتع ليزانتيقريست كيما ايقول، هذا الجيل كارثة، ما تعلمش العربية ولا لغة وحدخرا بقى مسجون بلفرنسية اللي بقات عنده هي لغة أمو واحنا هنا رانا قدام حالة باتولوجية مريضة واعرة بزاف على خاطر تخلي مولاها إذا أصبح عندو شوية بوفوار يدي لبلاد للواد، وبلا مانطول عليك مدام بن غبريط عندي شي أسئلة باش نفهم

سؤال لول.. حاب نعرف واش هي العلاقة مع الديوان الملكي فلمرووك فيما يتعلق بتدريس الدارجة في السنوات لبتيدائي الأولى وديك العلاقة بين الفصحى والدارجة كللي راهم ربايب وشفنا نفس الصراع المفتعل ونفس الكلام تقول وراه راس واحد وميسترو واحد؟

الزاوج.. هل ممكن باش نعرف كمواطنين أشكون هم هادو الخبرا؟ باش متكونين؟ واش يعرفو الدارجة والفصحى مليح؟

التالت.. العربية الدارجة باش وصاو الخبر نكتبوها بحروف لاتينية واللا بلعربية؟

الرابع.. كيفاه رايح الخبرا ايوحدوا الدارجات الجزايرية في دارجة وحدة ويعني هذا اشكون هي الدارجة اللي رايحة اتكون المسيطره، وهل هذا ايكون مقبول عند الجزايريين وللا رايحين تاني نخلقوا مشكلات أخرى؟

الخامس.. كيفاه رايحين مع كلام الشارع اللي يحيا ويموت كل وقت، وعلاقته مع الشعر الملحون القيم اللي اصبح اليوم حتى واحد ما بفهمه ملجيل اليوم؟

السادس، واش هي خطة تدريس الدارجة وحنا ما عندناش إنتاج في جميع الميادين لا كتب ولا قواميس ولا معلمين وأساتذة متكونين؟

السابع،، واش رايحين بلموروث الأدبي والفلسفي والتاريخي وغيره للفصحى اللي ساهمت فيها شعوب وأجيال.

الثامن، هل رايحين حسب الخطة باش اتكون الدراجة أو الدارجات لغات وطنية ورسمية؟

التاسع،، كيفاه حسب الخطة تكون مكانة اللغات التامازیغت الأخرى؟ وكيفاه يكون هذا. مع الوحدة الوطنية؟

العاشر..والنشيد الوطني نحافظ عليه بلفصحى وللا انردوه بدارجة؟!؟

اللّهم أهدي



وكل واحد يرسل برية الى وزيرة ليكول نورية بن غبريط بلهجته الدارجة.....
والموضوع منقول ....صاحبه أحميدة عياشي