حمزة المجتهد مستعد للاجابة على استفساراتكم ~ الى التميز ~ متجدّد ~

[ورود العلم]

المشاركة الأصلية كتبت بواسطة creative chaos

اختي وفاء كم اشتقت اليك كثيرا
ان شاء الله تكوني بخير واحوالك زنية كما ارى مزالك مع النصائح بالتوفيق حبيبتي راكي ربحتي الاجر على كل واحد نحيتي شويا من هموا وخففتي عليه ربي يوفقك ان شاء الله
كل دخولي كان لاجل ان ابشرك بمعدل الفصل الثاني الذي لم ادرس له ابدا عكس الفصل الاول الي قتلت روحي فيه بالسهرة ونحفظ ونراجع وفي التالي ديت 8.42 اما درك الفصل الثاني مخدمت والو ركزت على العلوم الي هي نقطة ضعفي وبدل 4.25 نتاع الفصل الاول ديت 12 وتفكري استاذنا قتلك تصحيحوا نتاع باك يحاسب على كل صغيرة وكبيرة وحفظت شريعة واجتماعيات وخدمت مليح عكس الفصل الاول حفظت هاذي المرة خفافي برك اسوا شيء في هذا الفصل انو مزال ضعفي في الرياضيات و ومبديتش نراجع فيزياء مع اني حاكمة كلش في راسي بصاح الحق خائفة واما الفلسفة سقوط حر قاتلي خروج عن الموضوع انا دلت المقالة جدلية مع انو كنت عارفه انها استقصاء بالوضع لكني نهارها كنت خلاص تعبانة قويكتا تخلاص الامتحانات من 14.30 الى 6 وربي يجيبها زينة واما المراحعة فبدات لكن بمواد ادبية وسابدا العلوم هذي الليلة ادعيلي .
المهم هاذي اخباري يا وفاء مزالني متذكرة وعدي ليك اول منخلص الباك نرجع هنا ونحكي معاكي
ماهي اخبارك ؟ نتمنى تكون حالتك زينة
هل من نصائح اضافية لي راني تخلصت من الخوف وطبقت نصايحك يظهر خرجت عليا
بالتوفيق ختي وفاء ربي يوفقك ويحفظك ان شاء الله .

السلام عليكم ورحمة الله تعالى وبركاته ..

يا مرحبا واهلا وسهلا بحبيبتي قلبي وصديقتي الغالية هاجر ..

يوحشك الخير حبوبتي والله انا ثاني توحشتك يااااااااااااااااسر يا الزينة ..وصدق حقا من قال القلوب عند بعضها ..والله لقيتيني من البارح وانا نخمم فيك ..قلت كيفاه تكون احوالك يا ترى ....والله فرحتيني حبيبتي ..

اما عن حالي فانا الحمد لله بالف خير يا غاليتي ...ومازلت كما ترين احاول ان اقدم بعض العون للاخوة الاحباء لعل الله عز وجل يتقبل منا ويرضى علينا ...

وراني فرحانتلك صح يا غاليتي ..شفتي ليبذل جهدي ويتوكل على ربي سبحانه وتعالى مستحيل يخيب ظنو ...

يعني صراحة حبيبتي مادام انك في العلوم طلعتي من 4.25 وليتي 12..هاذي راها قفزة حقيقية .....واتمنى لك ان تاخذي علامة عالية جدا في الباك ..فقط تابعي على هذا المنوال ...

والله صح راكي بطلة حقيقية .....يعني اثبتي انك ذات ارادة صلبة لا تحطمها اعتى الرياح والعواصف ...

مممم بالنسبة للرياضيات والفيزياء مش مشكلة ..شوفي اول شئ حبيبتي لازم يكون عندك ملخص لكل وحدة من كل مادة ...

مثلا مادة الرياضيات ..درس المتتاليات ...جيبي الملخص نتاعو ...افهميه فوقيا مثلا كيفاه تولدي متتالية حسابية او هندسية ..كيفاه تحسبي المجموع ...كيفاه تحسبي الاساس ..كيفاه تحدي اتجاه التغير وهكذا ..في البداية راح تحسي روحك ماكي فاهمة والو ...بصح التطبيق هو ليراح يخليك تفهمي ...بعد ماتطلعي على الملخص لازم يكون عندك حوليات تع الرياضيات ..احكمي كل التمارين نتع المتتاليات المطروحة في البكالوريات السابقة وحاولي تحلي اكبر عدد منها ..وهكذا بالنسبة لبقية دروس الرياضيات وكذلك الفيزياء ..

ومن بعد كي تكملي الدروس كامل ابداي حلي موضوع تع بكالوريا كامل ...باه تعرفي النتيجة لوصلتي ليها ..

وكاين حبيبتي في الانترنت دروس رائعة في شكل فيديوهات لمجموعة من الاساتذة الرائعين..

وهذا مثال عن استاذ رياضيات ...وهو ولييد الحارة ...وهو بصراحة استاذ رائع ...
https://www.youtube.com/watch?v=t3dbbursHHY

وكاين اساتذة ياسر رائعيين كيما الاستاذ نور الدين ...في الرياضيات و مولاي عمار

بالنسبة للفلسفة عادي جدا ماتقلقيش روحك فيها حبيبتي ..والله هي صراحة زهر ومكتوب ....ونتي شوفي برك المقالات المتوقعة وركزي عليها ...وكيما هذا العام نسبة كبيرة يديرو المنطق ..ثم البيولوجيا ...وشوفي استاذتكم وش قالت ..

وايضا باه تفرقي بين الاستقصاء والجدلية ...الجدلية دائما يكون سؤالها ب هل اما الاستقصاء يكون اما ارفع او اثبت او ابطل او فند الاطروحة ..

وحاولي حبيبتي دائما تكوني مرتاحة قبل ليلة الامتحان لخطراه كي تكوني تعبانة راكي مستحيل تقدري تركزي ..اما اذا كنت مرتاحة راح تقدري تجاوبي حتى من مخك ...لانو اصلا عندك معلومات كثيرة خلي اذا لعقلك وقت كي يرتبها ..

احسنتي حبيبتي لانك درستي المواد الادبية لان الكثير يمهملها وعليكي ايضا ان تقومي بحل مواضيع بكالوريات فيها حتى في الشريعة والاجتماعيات ..

وربي يوفقك حبيبتي اليوم في دراسة العلوم ..الله معك ..

وانا بانتظارك حبيبتي ..بعد ماتخلصي الباك ان شاء الله راح نحكو نحكو حتان نشبعو ...

والله انا الحمد لله بخير وهاني مع الخدمة تع الدار هههه هذا العام وليت فحلة تع الصح ....

وضرك عمري في هذي الفترة انصحك فقط بالحوليات تع الباك ..فهي الاساس ...لانها اختبار حقيقي لما وصلتي اليه ...

كما انصحك بان تحاولي ان تستغلي كل دقيقة من وقتك واحذري ضياع الوقت ..وكذلك وفي نفس الوقت لا تنسي الراحة فهي مهمة جدا ...

وبالتوفيق غاليتي راني ندعليك دائما ..باذن الله ستوفقين في تحقيق جميع احلامك ...

واشكرك غاليتي جزيل الشكر على هذه الطلة الحلوة وانتظر مجيئك هنا دائما عندما تحتاجنين في اي شئ ...

يسعدني ان اجيب على جميع اسئلة اختي الغالية هاجر ..

وشكرا لك مرة اخرى ..الله يحفظك وفي امان الله ...