نصيحة لاختكم في الله

دمعة ولاكن · 2014-08-04, 19:39

السلام عليكم
حيبت نستشيركم في موضوع رغم اني عضوة جديدة في التسجيل لاكن راني متابعة قديمة بزاف للمنتدى
انا انسانة عادية والحمد الله خدامة اليوم خبرتني صحبتني انها حكات عليا لواحدة وهذي الانسانة حبت تخطبن لواحد قريب ليها و قلتلي بلي تعرفها مليح و تثيق فيها و في رايها و لوكان ماشي هكذا مستحيل تنعتني الحصول انا نثيق ف صحبتي و هذي عشرة عمر اكثر من 12 سنة صحبة هي قلتلي انوا اذا كنت قابلة حبيت نهدر معاه و نسقسيه و سقسيني او اني نتلقى معاه بحضور هذي الانسانة و انا علبالي بلي صحبتي متحبش هذوا اقترحات في 2 لاكن هي وصلتلي واش قلولها وانا تاني منكذبش عليكم محبيتهم في 2 حبا لي يجي يجي لدار لاكن تاني ديما ندعي لربي بلي لي يجي لدارنا و نتكشف عليه يكون هو راجلي على سنة الله و رسولوا لاكن خيفا لوكان يجي لدار بلا ميكون شافني ممكن منعجبوش ريحين تقولولي ممكن تاب انتي ممكن ميعجبكش نقولكم ممكن لاكن والله انا مارني حبا والوا في هذي الدنيا قد راجل يسترني و يكون رجل بمعني الكلمة ف الاخلاق و في الدين نقلكم برك اني نسكن في منطقة و هو في منطقة اخرى لاكن في نفس الولاية اما الخدمة نتنازل عليها عادي قدام الرجل الحقيقي
نتوما واش تقولوا واش تقترحو عليها
انا ريحا نصلي استخارة ان شاء الله لاكن حبت نعرف انتما واش تخمموا وطريقة تفكيري صحيحة او لا

السي محمد · 2014-08-04, 20:36

و كذلك قالتي خطيبتي الاولى

انت عندي اغلى من العمل و من كل الدنيا

و في الاخير افترقنا بعدما رأت ان حياتها لا تكون إلا بالعمل

=====================

اصل المُشكل الذي تطرحينه : أنت خايفة ما تعجبيهش ....

قوليلها يجي عندك للخدمة يشوفك و تشوفيه 2... دقايق و انتهى الامر

راية الاسلام1 · 2014-08-04, 22:31

السلاام عليك اختي
أنا من رايي انو صديقتك تتوسطلك
تتبادلو الصور اذا عجبك وعجبتيه مبدئيا اللهم بااارك اعلنوا الامر للعائلتان
لا ماكانش مكتووب الله غاالب
والاا التقي بيه بوجود قريبته وليس صديقتك وشوفو بعضااكم
ربي يوفقك ويعطيك الزوج الصاالح

أم عروة · 2014-08-04, 22:50

كي جي رايحة للعمل يشوفك من قريب لكن بدون كلام ولاشي
اصلا قادر يشوفك بلا ماتكوني عارفة
اذا وافق الكلام يكون فالدار
بالتوفيق

naamane3 · 2014-08-05, 10:48

لا يوجد احسن من البيت وامام العائلة
وكلما ابتعدت عن البيت زادت الهموم
والله يجيب الخير

kamiloo2009 · 2014-08-05, 11:18

مادام عارفك وين تخدمي قادر يشوفك من بعيد او من قريب
وادا عجيبتيه يجيك للدار ومن بعد الر لاق بيك توافقي عليه
ماكان لاه تتواعدي معاه

دمعة ولاكن · 2014-08-05, 12:33

السلام عليكم
اشكركم على الاهتمام
اخي محمد كيما رجال ماشي كيفكيف نساء تاني وحمد الله انا خدمت و شفت و تمرمدت و عندي قناعات خاصة عن العمل وهذا تفكيري من زمان
حبيت نقلكم برك انا من دائرة و هو من دائرة اخرى لاكن من نفس الولاية
وهو اصلا ميعرفنيش حتى قريبتوا متعرفنيش يعني الشخص لي يعرفني من حكاية هذي كامل صحبتي
يعني جاتني ثقيلة نشوفوا برى حتى بضور قريبتوا او اني نهدر معاه في التيلفون
وتاني خفت لوكان يجي لدار و واحد فينا ميعجبوش الاخر بعد مانكون دلخت بلا حجابي لي هو راس مالي و تاني انا نتاثر بزاف لوكان يسرلي هذا الموقف
على جال هذا جيت لعندكم باش تخبروني برايكم راكم خاوتي و خواتاتي
يا رب متبخلوش عليا

sarl02 · 2014-08-05, 12:47

سهليها تسهال اختي ....واقضي صالحة في اسرع وقت ..باش ما تبقايش اطلعي وتهبطي فالباطل ..لا حرج في ان ترو بعضكم البعض ولو لبضع دقائق وبحضور احد الاطراف ...ليكون هناك على ا لاقل ايجاب وقبول مبدئي ....او كل واحد اروح في طريقو.وبعدها يتقدم مباشرة للدار ..وانا مع هذا التصرف مائة بالمائة ووفقك الله

" أبو عبود" · 2014-08-05, 15:37

اقتباس:

المشاركة الأصلية كتبت بواسطة السي محمد

و كذلك قالتي خطيبتي الاولى

انت عندي اغلى من العمل و من كل الدنيا

و في الاخير افترقنا بعدما رأت ان حياتها لا تكون إلا بالعمل

=====================

اصل المُشكل الذي تطرحينه : أنت خايفة ما تعجبيهش ....

قوليلها يجي عندك للخدمة يشوفك و تشوفيه 2... دقايق و انتهى الامر

أنا ايضا لم تكن عاملة ولم يكن لها مستوى لكي تعمل وكانت تبكي لي لكي لا اتخلى عنها وبعد 3 سنوات زواج وولد تقول لي ان اباها فرض عليها العمل" عقود". وهكذا انتهى كل شيء. إياك أيها الرجل أن تتزوج عاملة على أساس أنها موافقة تترك عملها لانها وبساطة سوف تندم وربما تطالبك بالعودة الى العمل او على الاقل تشعر انك حرمتها من شيء كيان مهما في حياتها.

noeddin · 2014-08-05, 18:28

قوليلها يجي يشوفك من بعيد بلا ما تعرفيه ، بعدها قوليلها توريك صورته ....وانتهى

أم أحمد عبد الصمد · 2014-08-05, 22:30

أنصحك أختي تقترحي على صحبتك يجي يشوفك فالخدمة لدقائق و الحديث يكون قدام الأهل ، ممكن جدا يكون شافك مادام راكي تخرجي للعمل ، من جهة أخرى أنصحك متفرطيش في خدمتك مهما كانت الأسباب لأنك فيما بعد غادي تندمي
صلي صلاة الإستخارة و لي فيها الخير يجيبها ربي

أمال123 · 2014-08-06, 17:46

يشوووفك في الخدمة أحسن ماااا يشوفك في الدار بيسك أنكااا أوووو تكوون غير بينااتكم ميسمعوووش عائلتك و متكووونيش محرجة منهم
وان شاء الله تعجبيه و يعجبك
ديري ثقة في نفسك واتأكدي بلي انتي خير منووو "لازم تكوني فخوورة برووحك"
ومنتنسايش البسي احسن لباس عندك وان شاء اللله يجيب ربي لي فيهااا الخير يا رب

----------------------------------------------------------------
ـأو متنسااايش تبشرينااااااااااااااااااااااااااااااااااااااا كي تتلقااوي أوكي؟

aymen01 · 2014-08-06, 20:06

راني حاير في هذا الوقت

الحرام صار عادي و الكل يفتي من راسو

ربي قال الخطبة من الدار و من الاهل و على هذيك سموها الرؤية الشرعيه و انت جايا تقوليلي خايفا و منعرف وش شافك ماعجبتيهش الله يسهل

و انت يا السي محمد المنتدى كامل عرف بلي خطيبتك خلاتك على الجال العمل بصح كي تهدر مع النسا 2 دقايق في الخدمة و لا في الخطبة برا نورمال

دمعة ولاكن · 2014-08-07, 18:05

السلام عليكم
اشكر كل من مرة بهذي الصفحة و كل واحد نصحني لوجه الله
ان شاء الله اذا كان عندي جديد رني نخبركم
ادعولي ربي يوفقني لما فيه الخير و ينورلي بصيرتي