يوميات فتاة جزائرية متجدد

[كبْرياء] · 2010-10-21, 15:41

السلام عليكم ورحمة الله وبركاته

في انتظار الحلقات الأخرى خيتي نينا

هههه رانا نديرو في الإعادة

fffatima zohra · 2010-10-21, 15:52

salem 3alaykom
on est tjr la pr suivre
rani nesstana lhalka ljaya
chokran

نينا الجزائرية · 2010-10-21, 16:11

اقتباس:

المشاركة الأصلية كتبت بواسطة fffatima zohra

salem 3alaykom
on est tjr la pr suivre
rani nesstana lhalka ljaya
chokran

اهلا اختي مرحبا بيك
ضوكة راني ندير في اادة ان شاء الله لمشافهمش يشوفهم وتبعيني ايام الجاية نحط الجديد:mh31

:

نينا الجزائرية · 2010-10-21, 16:19

السلام عليكم

وصلت للدار ميتة بالعيا وقلبي يدور وراسي يوجع طحت في بلاصتي وماقدرتش نوض منها وحتى الظهر نضت بالسيف صليتو ماما مسكينة راحت بلخف وقبل ماتحوس تفهم غلاتلي نعناع وجابتولي والحمد لله غير شربتو ريحت ورقدت حتى للمغرب نوضني برك صوت التلفون فيكس يصوني كي رفدت لقيتها فتيحة تعيطلي باش تسقسي عليا ايلا بريت
. قلتلكم تبغيني .

وفي الليل درت سهرة طويلة مع العايلة حكيتلهم واش صرالي اليوم و bien sur ماقلتلهمش بلي فاطيمة قفزت وفاتت من جيهة المعوقين ودات فطورها بلا ماتدير لاشان خاطر على بالي بابا يديرلي محاضرة على لبنات الساجيات ولي يعرفو يعيشو. mais هو كي حكيتلو غضتو قالي هذي المرة نعطيك تاكلي برا فرحت بزاف وقعدت نستنى وقتاش يلحق الشهر الجديد باش تلحقني الزيادة في المصروف.

بعد السهرة الطويلة ماقدرتش نوض بكري الصباح ولحقت للجامعة روطار قعدت برا ندور حتى خلاص الcoure اللول خرجوا لبنات فتيحة ولطيفة ماعدا فاطيمة طبعا هذيك تجي على ال 11 وتخرج على 3 وكي نقولولها تقلنا مانقدرش نوض بكري هذي هي القرايا في الجامعة انا بيناتنا ماكنتش نبغي نعطل الدروس ماشي خاطر قرَايا بصح نكره نتسلف cahier ونعاود نكتب في الدار.

البروف تع الكيمياء مدلنا بحث عن الهيدروكربونات وكنا احنا اربعة فيه بانتلي حاجة صعيبة بزاااااف وماعرفتش كامل كيفاش نسلك من هذي الورطة ربي يجيب الخير برك. قررنا نروحو للمكتبة لأول مرة ونشوفو كيفاش تمشي الحالة كي دخلنا لقينا وحد تم تقدمت انا وسقسيتو ايلا يقدر يمدلنا كتاب تع الكيمياء العضوية قالي كيفاش يسموك وكي قلتلو لقى روحو يعرف خويا راح بلخف جابلي كتاب وجا وقالنا ادخلو للمكتبة الداخل واقراو فيه ومن بعد...
وقبل مايكمل هدرتو رحنا احنا للمكتبة

انا ديت الكتاب ورحت انا ولبنات لداخل المكتبة وبدينا نقلبو في الصفحات واحنا مانا فاهمين والو وفوتنا قريب ساعة واحنا نضحكو على روحنا كي لحقت الوحدة رحنا باش ندخلو للكوغ درت الكتاب في الساك ورحت كي بديت خارجة قدام هذاك لي مدلي الكتاب شفتو بدا يخزر فيا ويتبع فيا بعينيه بديت نقول في قلبي هذا مالو مايحشمش

كيفاش يخزر فيا هاكة هذي لي زعما يعرف خويا. ماديتهاش فيه وفت عليه بلا مانخزر ليه

البروف تع الفيزياء ماجاش فرحت بزااااف خاطر كنت عيانة ومديقوتيا من روحي كي مافهمت والو في البحث.

كي رحت للدار جبدت الكتاب وبديت نقرا فيه وحدي وجبدت هذاك dictionnair scientifiq وسييت نعاون بيه روحي وبالفعل والله فهمت بزاف دروس كنت حابسة فيهم ولقيت مقدمة وبعض المفاهيم للبحث تاعي وعيطت لفتيحة تزيد تحوس في الانترنت خاطر هي عندهم في الدار. وفي اليوم التالي جابتلنا فتيحة تقريبا البحث واجد بصح انا أصريت باش نحط المقدمة تاعي والمفاهيم لي لقيتها في الكتاب وكتبنا البحث وحطيناه في الموعد وانا استفدت بزاف من الكتاب bien sur بعد ماقعد عندي اسبوعين كاملين قلت نرجعو لمولاه يمكن يستحقو؟؟؟ وغير شافني قالي ارواحي هنا ارواحي عندي سمانتين وانا نحوس عليك

وين كنتي انا بانتلي كلي راه حاب يداسر قلتلو: واش بيني وبينك حتى تحوس عليا

قالي: ماكان والو غير الخير برك راكي داية كتاب تع الجامعة وناسياتو عندك وهذاك الكتاب المفروض كامل مايخرجش تقراي بيه داخل المكتبة وترجعيه قبل ماتخرجي خاطر كاين منو نسخة وحدة برك تماك فهمت وعلااه كان يخزر فيا هذاك اليوم

وحتى للعام الثاني كي راح هو من المكتبة وجا واحد أخر باش عرفت بلي ممنوع يمدو الكتب بلا la carte وتماك وين عرفت صح بلي صاحب خويا وناس ملاح

وصلى اللهم وسلم على سيدنا محمد

نينا الجزائرية · 2010-10-21, 16:10

اقتباس:

المشاركة الأصلية كتبت بواسطة imane32

السلام عليكم ورحمة الله وبركاته

في انتظار الحلقات الأخرى خيتي نينا

هههه رانا نديرو في الإعادة

ههههه
شتي تواع الصيانة هلكونا الحلقات