عزومتي المتواضعة لصديقاتي

aminabent · 2013-01-20, 11:05

السلام عليكم اخواتي في الله حبيت نحط اول موضوع لي في الطبخ و هادي عزومة عملتها لصديقاتي الجزائريات في الغربة

هادي كل الاطباق

دجاجة محمرة

حميص الفلفل

قراتان البطاطا

سلاطة

و اخيرا التليتلي

و اكيد مشروبات و فواكه نسيت ما صورتهمش و بالطبع اي سوال انا في الخدمة باذن الله

ام احمد وصال · 2013-01-20, 11:09

ماشاء الله عرضة وعليها الكلام كلشي متول بالطبع ربي ادمها نعمة و احفظها من الزوال اعطيني طريقتك في التليتلي و تتبيلة الدجاج و مشكورة مسبقا و بصحتكم

امينة تيارت · 2013-01-20, 11:38

ما شاء الله اختي الله يبارك

ممكن تعطينا وصفة القراتان و الدجاجة المحمرة من فضلك وبغيت نسقسيك شاهو الحميص تليتلي و كيفاش تخدموه

om sirine · 2013-01-20, 11:53

بصحتهم ابنو بنان mmmm....عرض مليحة وعليها لكلام

aminabent · 2013-01-20, 12:07

هلا اختي نورتي موضوعي بردك صحيح كل شيء من الله علينا فالحمد لله الذي رزقنيه من غير حول لي و لا قوة

فيما يخص تتبيلة الدجاج نرابي بصلة صغيرة مع راس ثوم و حبة صغيرة طماطم ثم نضيف ملح فلفل اسود كمون الرند مقطع قطع صغيرة و ليمون نقشر نصف حبة و نقصها مربعات ندهن الدجاجة مليح من الداخل بهاد التتبيلة و كذلك جهة الفخاد و تحاولي تمشيه بين الصدر و الجلد باه يتنكه مليح و نخليها تبات و غدوة ندهنها بالزبدة و نرش ملح و فلفل اسود و نحطها تتحمر

اما التليتلي نطيب مرق عادي (بصل توم ملح فلفل اسود زيت دجاج او لحم او الاثنان حمص مشمخ) نقلي مليح و نمرق و كي يطيب اللحم نضيف طماطم مصبرة

و التليتلي ندهنو بالزيت و نحطو يفور مليح ثم ننزعو و هو في الكسكاس نصب عليه ماء بارد و بغزارة و نحلو بين يدي ثم ننشرو في قصعة او بلاطو و خليه يشيح ثم نعاود ندهنو بالزيت و نحطو يفور مليح ثم ننزعو و نحلو بين يدي لكن دون اضافات نخليه يبرد تماما ثم نرجعو يفور للمرة الثالثة مليح ثم تطيبيه فيالمرق مع اضافة الزبدة و شهية طيبة

نتمنى اني قدرت نشرحلك كيما راكي حابة و دائما في الخدمة

zhor1970 · 2013-01-20, 12:16

بصحتهم صديقاتك يعطيك الصحة

ام مريومة · 2013-01-20, 12:20

Lah yberk l mala rahi tchahi ya3tik saha w bsahathom sahabatek

سليلة ذات النطاقين · 2013-01-20, 12:22

rabbi ybarek kafza

aminabent · 2013-01-20, 12:27

اختي امينة تيارت اسعدني مرورك العطر
الغراتان عبارة عن بطاطا مقصوصة مربعات و مقلية صدر دجاج طايب و مفتت فرماج المثلثات او تاع الميزان مقصوص مربعات معدنوس ملعقة خميرة كيميائية (يمكنك الاستغناء عنها) و تجريهم بالبيض تدهني المول تاعك بالزبدة وتفرغيه ترابي من فوق فرماج قرويار و الى الفور و حاولي انك ما تحليش باب الفور حتى تشوفيه تماسك
الدجاجة سبق و كتبت الطريقة اذا ممكن تشوفيها اعلى و الحميص عبارة عن شكشوكة بالفلفل و البصل و الطماطم و اذا ما عرفتيهاش قوليلي نكتبلك الوصفة اما التليتلي هو نوع من المعجنات شكله مثل حبات الارز يتباع واجد مثل المقرونة ممكن معروف عندكم ب لسان العصفور

نتمنى نكون افدتك و لو بالقليل