طلب كيفية تحضير الكمونية

أم هاجر و زكريا · 2010-12-29, 19:15

السلام عليكم و رحمة الله و بركاته

واش حالكم أخواتي ؟ إن شاء الله الكل بخير

شكون فيكم اللي تعرف كيفية تحضير الكمونية اللي يعملوها بكبدة الدجاج

و بارك الله فيكم مسبقا

chaymoum-17 · 2010-12-29, 21:07

شوفي ختي انا نعملها هكذا
تحكمي الكبدة تاع الدجاج وتكون كمية كبيرة يعني المهم مخدومة نظيفة وكل كبدة مقطعة على زوج تحطيها ف الطنجرة وديري التوابل فلفل + ملح + كمون اخضر خاصة كثريلها شوي + كسبر زعفران المهم ديري شوي برك التوابل مي الكمون الاخضر تكثري منو من بعد معجون الطماطم والثوم والبصل واقليهم شوي وديريلهم كاس ونصف ماء ما تكثريش وخليهم يطيبو من بعد لما طيب مع الاخير ديريلها قرون الفلفل الصغير وخليهم يطيبو شوي مع الاخير على جال الذوق اوكى من بعد قدميها في الصحن وزينيها ب القارص المرقد او الطازج والمعدنوس او الدبشة وشهية طيبة حنونة

chaymoum-17 · 2010-12-29, 21:08

راني نسيت نقلك لاصوص تجي ثقيلة وتكون قليلة اوكى

ام خديجة1 · 2010-12-30, 11:13

بارك الله فيك على الكيفية فانا كذلك اعملها هيك

أم هاجر و زكريا · 2010-12-30, 12:17

بارك الله فيكِ أختي chaymoum-17
مشكورة كثيرا على المساعدة
ربي يحفظك

مشكورة أم خديجة الغالية على المرور

chaymoum-17 · 2010-12-30, 15:38

وفيكي بركة اختي العفو حنا خواتات هنا واي حاجة تحبيها نعاونك ونتي ثاني

djazia87holi · 2013-01-15, 19:02

السلام عليكم اخواتي الفاضلات بغيت نقلكم انا على طريقتي في الكمونية اولا كبدة الدجاج نظيفة وقطعة على 2 مع شوية ثوم مهرس وقليل جدا من البصل +شوية زيت +فلفل اكحل +راس الحانوت ,المعروف فيه مجموعة من التوابل مثل الكسبر والكروية ونجمة الارض والقندس والوردفيه قرابة 12 توابل المهم نرجع لموضوعنا من بعد ما زدتي راس الحانوت +شوي برك فلفل احمر مهرس+ملح حمصيهم مليح على النار من بعد اضيفي طماطم المصبرة + الماء شوي برك خليها طيب في الاخير قطعيلها الكسبر واضيفي لها الكمون تكون كمية معتبرة باش تقعد فيها ريحة الكمون وصراحة انا نموت عليها ونطيبها بكثرة ونزيد نقلك كاين لي يزيدلها البطاطا المقلية والبيض الغلي تحطيه كزينة مهع الزيتون الاسود وهادي الطريقة اخذتها على حبيبتي من سوريا وانشاء نكون افدتك ولو بالشيء البسيط وشهية طيبة

أم عيشوش · 2013-01-15, 21:37

السلام عليك انا ماما الله يحفظها تديرها كالاتي:تقلي البصل رقيق مع الثوم تصب الكبدة تملحها وتزيد ليها التوابل مي الكمون تخلية في الاخر تقطع الطماطم وتصبها و تخليها حتى تنشح و تطيب وتحط فالاخير الدبشة و الكمون و شهية طيبة